Lo Jɔn Bee Ɛm
4 Sɔ̄ Nɛɛ-a-i-ɛrɛ esuā kɔ pya Farisii edaā kɔ pya nɛɛ gaa ye nyɔɔnɛe dumɛ sa a gaa limaā pya nɛɛ ee Jɔn— 2 kereadoo Jizɔs naa bee limaā lɔgɔ nɛɛ mɛ pya a wee ye nyɔɔnɛ dumɛ na a bee limaā nɛɛ a— 3 a bee aa Judia sa obia kii Galilii. 4 Mɛ a bee lu ebɛɛ̄ kɔ a tɛɛ̄ Sameria. 5 Nyɔɔwo, a bee lu ina ziī buɛ̄ Sameria a kura Saika, waɛloo kere nam Jekɔb bee nɛ ye nwiī Josɛf. 6 Kɛādoo, bana maā Jekɔb bee lenage akɛāma. E Jizɔs bee le e’ɛŋɛtɛ̄ lo kɛ̄ nyɔɔbee loo ye ebee ɔ aāloo ye kiā. E ebee dap lu yira ini’ī sɔ̄ awa.*
7 Ziī waa Sameria bee lu wee ibi maā lo kɛ̄. Jizɔs kɔ ye nɛ kɔ: “Nɛ mɛ maā m ɔ̄.” 8 (Nyɔnɛbee pya a wee ye nyɔɔnɛ dumɛ ebee kii bu buɛ̄ wee yaɛ nuede.) 9 Nyɔɔwo, lo waa Sameria bee ye kɔ nɛ kɔ: “Tɛɛ̄ doodoo wa olo nɛɛ Juu bara mɛ maā e’ɔ̄ kere m lu waa Sameria?” (Nyɔnɛbee pya Juu naa wee nyɔɔnɛ pya Sameria dānia lɔgɔ nu.) 10 Jizɔs ture ye nɛ kɔ: “Lo o bee suā nu Bari i dɔɔ̄nɛ bu yɔrɔ le nɛɛ a a kɔ nɛ kɔ, ‘Nɛ mɛ maā m ɔ̄,’ o bee ye bara sa ebee a nɛ maā dum.” 11 Lo wa bee ye kɔ nɛ kɔ: “Tɛtɔ, oo ɛrɛ lɔgɔ nu tama maā a a le bah, e bana maā ama toga. Mɛ kɛ̄ na o ɛrɛ lo maā dum aā a? 12 Ekɔ olo eenyɔɔ i nama tɛ Jekɔb lo a bee i nɛ bana maā ama, lo alɛ gbaāloo pya ye miɔŋɔ le ye nam-tɔ bee ɔ̄ maā aābu ni?” 13 Jizɔs bee ye ture nɛ kɔ: “Ɛrɛgebah nɛɛ a ɔ̄ lo maā ama oo ye esikɛ̄ kaga. 14 Ɛrɛgebah nɛɛ a ɔ̄ lo maā mda m nɛ ye oo ye naale esinakɛ̄ kaga lɔgɔ sɔ̄, mɛ maā mda m nɛ ye elu ezimaā a pɔm aakɛ̄ lo a nɛ dum anaatah.” 15 Lo wa bee ye kɔ nɛ kɔ: “Tɛtɔ, nɛ mɛ lo maā, lokwa oo mɛ naa kagana, e mm le esinakɛ̄ lu akɛāma wee ibi maā.”
16 A bee ye kɔ nɛ kɔ: “Si wee kue o dam sa bui lu akɛāma.” 17 Lo wa bee ture kɔ: “Mm ɛrɛ dam.” Jizɔs kɔ ye nɛ kɔ: “O kɔ leere sɔ̄ o kɔ, ‘Mm ɛrɛ dam.’ 18 Nyɔnɛbee o ebee ɛrɛ o’oo dam, e lo nɛɛ o le loo anyaawo naale o dam. Nyɔɔwo, o kɔ kaka.” 19 Lo wa bee ye kɔ nɛ kɔ: “Tɛtɔ, m muɛ kɔ ɔɔ nɛɛ mɔmanudɛɛ̄. 20 Pya i nama tɛ bee tɔɔ̄ nyɔɔ egu ama taāŋabah Bari, mɛ bɔɔlo kɔ Jerusɛlɛm na pya nɛɛ ɛrɛ etɔɔ̄ taāŋabah Bari a.” 21 Jizɔs bee ye kɔ nɛ kɔ: “Yira mɛ nɛ a nɛɛwa, awa gaa lu sɔ̄ buii le etɔɔ̄ nyɔɔ egu ama ale Jerusɛlɛm taāŋabah Tɛ. 22 Bui taāŋabah nu buii suāloo, mɛ ili taāŋabah nu i suāloo, nyɔnɛbee kpɔā bɔātɛ̄ aāloo pya Juu. 23 Kerewo, awa gaa lu, e a le anyaawo, sɔ̄ pya a taāŋabah Tɛ bu kaka, etaāŋa ye bah bu edɔɔ̄ le kaka, nyɔnɛbee bu kaka, pya a le doo wo na Tɛ aa gbī kɔ ba a taāŋa ye bah a. 24 Bari lu Edɔɔ̄, e pya a ye taāŋabah ɛrɛ etaāŋa ye bah bu edɔɔ̄ le kaka.” 25 Lo wa bee ye kɔ nɛ kɔ: “M suā kɔ Mɛsaia aa lu, lo alu ekure Kraist. E ɛrɛgebah sɔ̄ elu, ekɔ dɛ̄dɛɛ̄ nu siā i nɛ.” 26 Jizɔs bee ye kɔ nɛ kɔ: “Mda m gaa a kɔ ue nɛ ama na ɛɛ a.”
27 Lo sɔ̄ pya a wee ye nyɔɔnɛ dumɛ bee lu, e alu wa nyɛŋialoo kɔ a gaa nyɔɔnɛ nɛɛwa kɔnia ue. Kɛādoo, lɔgɔ nɛɛ naa bee kɔ: “Ena o gaa gbī a?” ale “Ena anua o aa nyɔɔnɛ nɛɛwa kɔnia ue a?” 28 Nyɔɔwo, lo wa bee lɛɛbahloo ye kana maā sa aa, e a yii bu buɛ̄ sa kɔ nɛ pya nɛɛ kɔ: 29 “Luaa wee ɛp nɛɛ a kɔ dɛ̄dɛɛ̄ nu m bee doo mɛ nɛ. Ekɔ nɛɛ ama naale Kraist ni?” 30 Ba bee aabu buɛ̄ sa bɔātɛ̄ elu ye loo.
31 Sɔ̄ pya nu ama aa bee sira, pya a wee ye nyɔɔnɛ dumɛ bee le aa ye bara kɔ: “Rabai, denu.” 32 Mɛ a bee wa kɔ nɛ kɔ: “M ɛrɛ nuede ede lo bɔɔlo buii suāloo.” 33 Nyɔɔwo, pya a wee ye nyɔɔnɛ dumɛ bee bip ɛnia aba kɔ: “A ɛrɛ nɛɛ a bee ye su nuede ma ni?” 34 Jizɔs bee wa kɔ nɛ kɔ: “Na nuede na lo edoo nu nɛɛ a bee mɛ yere gbī le lo esi ye tam lɛɛ. 35 Buii wee kɔ esiga nia enɔɔ̄ lɛɛ alu sɔ̄ gbī nu aā wii ni? Ɛp! m kɔ i nɛ, danaa dɛɛ̄ sa ɛp wii, e bui muɛ kɔ eleera egbī nu aā wii. Mɛ taɛ nyaawo 36 nɛɛ a gbī nu aā wii aa ɛrɛ ye ekpɛanu sa bɔŋɛnɛloo bee loo dum anaatah, lokwa nɛɛ a foh le nɛɛ a gbīnu gbaa ɛɛŋa. 37 Nyɔnɛbee kiiloo lo ama, nu alu ekɔ lu kaka kɔ: Ziī nɛɛ lu nɛɛ a foh nu, e elua a lu nɛɛ a gbī nu. 38 M yere i kɔ bui gbī nu buii bee sitam loo. Pya dɔɔ̄na bee sitam loo, mɛ bɔɔlo bui ɛrɛ biī aāloo wa tam.”
39 Gbɛnɛ-edo pya Sameria a aa lo buɛ̄ bee ye ɛrɛ yira bu nyɔɔbee ue lo wa bee kɔ, sɔ̄ a bee yira ekeebee kɔ: “A bee kɔ dɛ̄dɛɛ̄ nu m bee doo mɛ nɛ.” 40 Nyɔɔwo, sɔ̄ pya Sameria bee ye lu loo, ba bee ye kɔ nɛ kɔ a nyɔɔnɛe wa tɔɔ̄, e a bee tɔɔ̄ lo kɛ̄ loo baɛ biradee. 41 E wo bee doo kɔ gbɛnɛ-edo nɛɛ a ɛrɛ yira nyɔɔ nu a bee kɔ, 42 e ba bee kɔ nɛ lo wa kɔ: “Naale aba nyɔɔ nu o bee i kɔ nɛ na a doo kɔ i ɛrɛ yira a mɛ nyɔɔ nu i edaā, e i suā leere kɔ nɛɛ ama na nɛɛ kpɔā nyɔuwe a.”
43 Sɔ̄ baɛ lo biradee etɛ̄na, a aa lo kɛ̄ sa kii Galilii. 44 Jizɔs alɛɛ loo bee kɔ ba naa wee yere ka loo nɛɛ mɔmanudɛɛ̄ bie alɛɛ buɛ̄. 45 Nyɔɔwo, sɔ̄ a bee ina Galilii, pya Galilii bee ye su leere nyɔnɛbee ba bee muɛ dɛ̄dɛɛ̄ nu a bee doo bie Jerusɛlɛm bu sɔ̄ doonu, nyɔɔbee alaba bee sinage lo doonu.
46 Lo sɔ̄ a bee sikɛ̄ ina Kena loo Galilii, kɛ̄ a bee kiira maā nua mii a. E a ɛrɛ ziī nɛɛ a wee sitam nɛ mɛnɛ bie Kapaniɔm lo loo ye nwiī aa bee dumɛ. 47 Sɔ̄ lo gbara bee dā kɔ Jizɔs e’aara Judia sa ina Galilii, a bee ye lu loo sa ye bara kɔ alu wee bo ye nwiīnɛɛdam nyɔnɛbee ebee sah e’u. 48 Mɛ Jizɔs bee ye kɔ nɛ kɔ: “Etaāge bee bui muɛ edobah nu le nu alu nyɛŋia, buii le eyiga doo pippip.” 49 Nɛɛ a wee sitam tɔ mɛnɛ a bee ye kɔ nɛ kɔ: “Nɛɛ-a-i-ɛrɛ, nyɔɔnɛ mɛ kii lɛɛ na nwiīnɛɛdam gae u.” 50 Jizɔs bee ye kɔ nɛ kɔ: “Kii, loo o nwiīnɛɛdam enwana.”* Lo nɛɛ bee yiga ue Jizɔs bee ye kɔ nɛ, e a bee kii. 51 Mɛ sɔ̄ a bee le nyɔɔ dee aa kii be, pya ye zooro zɔ̄ŋia ye sa ye kɔ nɛ kɔ loo ye nwiīnɛɛdam enwana.* 52 Nyɔɔwo, a bee wa bip sɔ̄ loo lo nwiī bee nwaɛ̄. Ba bee ye kɔ nɛ kɔ: “Zuumiā bee ye aaloo bu nu alu ɛrɛba sɔ̄ awa* a nyɔɔ’ee a.” 53 Tɛ lo nwiī bee suā kɔ taɛ lo sɔ̄ awa na Jizɔs bee ye kɔ nɛ kɔ: “Loo o nwiī enwana a.” Nyɔɔwo, dɛ̄dɛɛ̄ pya ye tɔ bee yiga. 54 Lo ama na eree baɛ nyɛŋiatam Jizɔs bee si sɔ̄ a bee aa Judia ina Galilii a.