Lo Jɔn Bee Ɛm
7 Sɔ̄ lo ba ama etɛ̄na, Jizɔs bee kiisī lo ekiāŋa sa si ye tam bie bu Galilii, mɛ a naa bee gbī ekii Judia nyɔɔbee pya Juu aa bee gbī efɛ ye. 2 Kerewo, doonu tɔkpo* pya Juu ebee waɛloo kɛ̄. 3 Nyɔɔwo, pya ye wuga bee ye kɔ nɛ kɔ: Aa akɛāma kii Judia, lokwa pya a wee a nyɔɔnɛ dumɛ dapnage muɛ pya tam o gaa si. 4 Nyɔnɛbee nɛɛ a gbī edoo kɔ pya nɛɛ a suā ye loo naa wee doo lɔgɔ nu bu gɔā. Lo o gaa doo pya nu ama su oloo tɔgɛ nyɔuwe.” 5 Bu kaka, pya ye wuga naa bee ye ɛrɛ yira bu. 6 Nyɔɔwo, Jizɔs bee wa kɔ nɛ kɔ: “Na sɔ̄ sii ina, mɛ bɔɔlo ɛrɛ sɔ̄ dɛ̄dɛɛ̄ sɔ̄. 7 Lɔgɔ nu nyɔuwe yira nyɔɔ i baaloo naale, mɛ a baa mɛ loo nyɔnɛbee m yira ekeebee kɔ ye tam lu pɔrɔ.* 8 Bɔɔlo kiraa uwe lo doonu; mɛ a sii ina sɔ̄ mda ekii uwe lo doonu, nyɔnɛbee na sɔ̄ sii ina anyaawo.” 9 Nyɔɔwo sɔ̄ ekɔa pya ue ama wa nɛ sah, alɛ bee tɔɔ̄ bia Galilii.
10 Mɛ sɔ̄ pya ye wuga ekira uwe lo doonu, alɛ bee sinage mɛ a bee gɔā si sa naa yiga kɔ pya nɛɛ a muɛ ye. 11 Nyɔɔwo, pya Juu bee bɔātɛ̄ egbī ye bie lo doonu sa kɔ: “Mɛ kɛ̄ na nɛɛ ama le a?” 12 E gbɛnɛ-edo nɛɛ a le lo kɛ̄ bee nuumi num ye kumaloo. Pio aba bee kɔ: “Ɛɛ le nɛɛ.” E pya dɔɔ̄na kɔ “Eeye. Aa dagɛ pya nɛɛ.” 13 Kerewo, lɔgɔ nɛɛ naa bee dap kɔ nu a ye kiiloo taɛkɛ̄ nyɔɔbee bɔɔ bee wa aa loo pya Juu.
14 Sɔ̄ edaba lu nia biradee aā sɔ̄ a bee lu ebɔātɛ̄ lo doonu, Jizɔs bee yii bu tɔkaɛ sa bɔātɛ̄ etɔgɛ nu. 15 E a bee lu nyɛŋia loo pya Juu sa ba kɔ: “Nɛɛ ama tɛɛ̄ doodoo wa suā Kpa Kaɛ* doo wo sɔ̄ a sii si lɔgɔ tɔkpa* ni?” 16 Jizɔs bee wa ture nɛ kɔ: “Nu m tɔgɛ naale lo mda mɛ lo nɛɛ a bee mɛ yere. 17 Lo a le ɛrɛgebah nɛɛ gbī edoo nu alu Ye nia, esuā lo a le nu m tɔgɛ aabah Bari ale m kɔ ue nyɔɔ na loo. 18 Ɛrɛgebah nɛɛ a kɔ ue nyɔɔ ye loo gbī alɛɛ ka, mɛ ɛrɛgebah nɛɛ a gbī ka nɛɛ a bee ye yere, lo nɛɛ lu kaka sa lɔgɔ pɔrɔ naa ye le bu. 19 Ekɔ Mozis naa bee i nɛ lok ni? Mɛ lɔgɔ bui buii gbaɛ̄tɔ̄loo. Ena anua bui aa gbī efɛ mɛ a?” 20 Gbɛnɛkpo nɛɛ a bee kɔ: “Pɔrɔ-edɔɔ̄ le a bu. Mɛɛ na aa gbī efɛ a a?” 21 Lo sɔ̄ Jizɔs ture wa nɛ kɔ: “Aba ziī nu m edoora, e alu nyɛŋia loo dɛ̄dɛɛ̄ bui. 22 Nyɔɔ lo ama, Mozis bee i nɛ lok akiiloo kokooa mɛ a naale Mozis na a bee bɔātɛ̄ a, mɛ pya bui nama tɛ, e a bee lu ekoo nɛɛ nyɔɔ Dee Fɛɛrɛloo. 23 Lo a wee lu ekoo nɛɛ nyɔɔ Dee Fɛɛrɛloo lokwa a naa lu egbee Lok Mozis, ena anua bui aa mɛ si gbɛnɛ saŋ pima nyɔɔbee m doo kɔ loo nɛɛ a nwaɛ̄ leere nyɔɔ Dee Fɛɛrɛloo a? 24 Ɔbɛaa ebiaɛ tɛ̄maloo kɛ̄ nɛɛ mɛā doo, mɛ biaɛraa tɛ̄maloo kaāna dogo.”
25 Lo sɔ̄ pio pya a le Jerusɛlɛm bee bɔātɛ̄ ekɔ: “Ekɔ a naale nɛɛ ba aa gbī efɛ na ama ni? 26 Mɛ ɛp! a lege aa kɔ ue taɛkɛ̄, e ba naa kɔ lɔgɔ ue ye nɛ. Ekɔ pya nɛɛ ama suāge kaāna kɔ nɛɛ ama na Kraist ani? 27 Kɛādoo, i suā kɛ̄ nɛɛ ama aa, mɛ sɔ̄ Kraist elu; lɔgɔ nɛɛ naale esuā kɛ̄ a aa lu.” 28 E sɔ̄ Jizɔs aa bee tɔgɛnu bie tɔkaɛ, a bee dana muɛ̄ nɛ nyɔɔ sa kɔ: “Bui suā mɛ loo sa suā kɛ̄ m aa. E mm bee lu nyɔɔ na loo, mɛ Nɛɛ a bee mɛ yere lu kaāna nɛɛ a le, e buii ye suā loo. 29 M suā ye loo nyɔnɛbee m lu nɛɛ a ye tɔɔ̄dɔ, e Alɛ na a bee mɛ yere a.” 30 Nyɔɔwo, ba bee gbī e’aa ye mɛ lɔgɔ nɛɛ naa bee ye dap aa nyɔnɛbee ye sɔ̄ sii bee ina. 31 Kerewo, gbɛnɛ-edo nɛɛ bee ye ɛrɛ yira bu sa ba kɔ: “Sɔ̄ Kraist elu, ekɔ esige gbɛnɛ-edo nyɛŋiatam ee nɛɛ ama ni?”
32 Pya Farisii bee dā sɔ̄ gbɛnɛkpo nɛɛ aa nuumi pya nu ama ye kumaloo, e pya tɛsī ewɔp le pya Farisii bee lɛɛra pya baɛloo tɔkaɛ kɔ ba a aa ye. 33 Jizɔs bee kɔ: “Bia kunɛ nwīgbagbara sɔ̄ m nyɔɔnɛ i tɔɔ̄ lɛɛ m pii Nɛɛ a bee mɛ yere. 34 Bui gbī mɛ, mɛ buii le emuɛ mɛ, e buii le edap lu kɛ̄ m gaa kii.” 35 Nyɔɔwo, pya Juu bee kɔ yɛɛ ɛnia aba kɔ: “Mɛ kɛ̄ na nɛɛ ama aa gbī ekii lo ii le edap ye muɛ a? Ekɔ aa gbī ekii yɛɛ pya Juu a legara yɛɛ pya Grik sa tɔgɛnu pya Grik ni? 36 Ena a gaa kɔ a, sɔ̄ a kɔ ‘Bui gbī mɛ, mɛ buii le emuɛ mɛ, e kɛ̄ m le, buii le edap lu a’?”
37 E nyɔɔ kpɛdumɛ dee alu gbɛnɛ dee loo lo doonu, Jizɔs bee yira yah sa su gbɛnɛ muɛ̄ kɔā kɔ: “Lo a le oo ɛrɛgebah nɛɛ kaga, alu mɛ loo wee ɔ̄ maā. 38 Ɛrɛgebah nɛɛ a mɛ ɛrɛ yira bu, dookɛ̄ kpa kaɛ bee kɔ doo kɔ: ‘Aāloo alɛ na ezimaā dum etɛɛ̄ aa a.’” 39 Kerewo, a bee kɔ nu akiiloo edɔɔ̄ pya a ye ɛrɛ yira bu esaa ɛrɛ, nyɔnɛbee a sii bee lu enɛ edɔɔ̄ lɔgɔ aba kuma sɔ̄ a sii bee lu enɛ ka Jizɔs a. 40 Pio nɛɛ a bee le yɛɛ gbɛnɛkpo nɛɛ a lo ba bee dā pya ue ama bɔātɛ̄ ekɔ: “Bu kaka, nɛɛ ama ɛɛ nɛɛ Mɔmanudɛɛ̄.” 41 Pya dɔɔ̄na bee kɔ: “Alɛ na Kraist a.” Mɛ pio aba bee kɔ: “Ekɔ Kraist e’aage Galilii ni? 42 Ekɔ kpa kaɛ naa bee kɔ Kraist elu manamana Devid sa aa Bɛtlihɛm alu buɛ̄ Devid ni?” 43 Nyɔɔwo, popooa bee yii yɛɛ gbɛnɛkpo nɛɛ a nyɔɔbee alɛ. 44 Kɛādoo, pio aba bee gbī e’aa ye mɛ lɔgɔ nɛɛ naa bee ye daabahloo.
45 Lo sɔ̄, pya baɛloo tɔkaɛ obia kpodumɛ pya tɛsī ewɔp le pya Farisii, e ba bee wa bip kɔ: “Ena anua buii ye su nua a?” 46 Pya baɛloo tɔkaɛ a ture kɔ: “Lɔgɔ nɛɛ sii bee kɔ ue doo wo ama.” 47 Lo sɔ̄ pya Farisii bee ture kɔ: “Ekɔ eluanage edag bɔɔlo ni? 48 Kunɛ ziī pya aa bɛɛ ale pya Farisii sii ye ɛrɛ yira bu, naale wo ni? 49 Mɛ gbɛnɛkpo nɛɛ lo ba naa suā Lok ama lu pya alu ekaɛ nu nɛ.” 50 Nikodimɔs a bee ye si loo tua sɔ̄, lo alu ziī nɛɛ a bee ye ɛrɛ yira bu bee kɔ: 51 “Ilii Lok wee biaɛge ziī nɛɛ lo a le a sii lu edā ue aā nu lo nɛɛ ale suā nu a doo ni?” 52 Ba bee ye ture nɛ kɔ: “Ekɔ olo aanage Galilii ni? Si wee gbītɛ̄ mɛ o muɛ kɔ lɔgɔ nɛɛ mɔmanudɛɛ̄ naale e’aa Galilii.”*