Lo Jɔn Bee Ɛm
3 A ɛrɛ ziī nɛɛ Farisii ye bee kura Nikodimɔs, alu ziī nɛɛ a le yɛɛ pya a wee zaāsī pya Juu. 2 Gbara ama bee lu loo Jizɔs bu edɛɛ̄ sa ye kɔ nɛ kɔ: “Rabai, i suā kɔ o lu nɛɛ tɔgɛnu Bari yere, nyɔnɛbee lɔgɔ nɛɛ a dap doo pya nyɛŋiatam ama lo a le Bari naa ye le loo naale.” 3 Jizɔs bee ye ture nɛ kɔ: “Kaka m kɔ a nɛ, kɛɛrɛ kɔ nɛɛ sikɛ̄ mɛā,* a naale edap yii Buɛ̄-mɛnɛ Bari.” 4 Nikodimɔs bee ye kɔ nɛ kɔ: “Nɛɛ etɛɛ̄ doodoo wa sikɛ̄ mɛā sɔ̄ e’ana ni? A naale edapna yii bu ye ka sa a sikɛ̄ lu emaɛ̄ ye lo eree baɛ sɔ̄, sɛh edapge ni?” 5 Jizɔs ture ye nɛ kɔ: “Kaka m kɔ a nɛ, lo a le ziī nɛɛ naa lu emaɛ̄ ye tɛ̄maloo maā le edɔɔ̄, a naale edap yii bu Buɛ̄-mɛnɛ Bari. 6 Nu a bee lu emaɛ̄ tɛ̄maloo namloo lu namloo, e nu a bee lu emaɛ̄ tɛ̄maloo edɔɔ̄ lu edɔɔ̄. 7 Aa alu nyɛŋialoo kɔ m kɔ a nɛ kɔ: Bui ɛrɛ esikɛ̄ mɛā. 8 Efɔp wee dɔ kii kɛ̄ a gbī edɔ, e o dā muɛ̄ mɛ oo le esuā kɛ̄ a gaa aa le kɛ̄ a gaa kii. Kɛ̄ a lenage doolo loo ɛrɛgebah nɛɛ a bee mɛā tɛ̄maloo edɔɔ̄.”
9 Nikodimɔs bee ye ture nɛ kɔ: “Pya nu ama etɛɛ̄ doodoo wa dap waɛ?” 10 Jizɔs ture ye nɛ kɔ: “O lu nɛɛ tɔgɛnu a le Izrɛl sa oo suā pya nu ama ni? 11 Kaka m kɔ a nɛ, i wee kɔ nu i suā, e i wee yira ekeebee loo nu i muɛ, mɛ buii yiga pya nu i bee i kɔ nɛ. 12 Lo a le buii yiga sɔ̄ m kɔ nu akiiloo pya nu a le nyɔuwe i nɛ, bui tɛɛ̄ doodoo wa yiga lo m kɔ nu akiiloo pya nu a le bunyɔɔ i nɛ? 13 Kɛādoo, lɔgɔ nɛɛ sii kii bunyɔɔ, mɛ aba nɛɛ a bee aa bunyɔɔ lu, lo a le Nwiīnɛɛ. 14 E dookɛ̄ Mozis bee dana yɔɔ lɛɛkɛ̄ bu kpo-sagara-wii doo, kɛ̄ elunage edana Nwiīnɛɛ lɛɛkɛ̄ doo lo, 15 lokwa ɛrɛgebah nɛɛ a ye yira nɛ dap ɛrɛ dum anaatah.
16 “Nyɔnɛbee Bari bee wereloo nyɔuwe kaāna sa a bee nɛ aba ye Nwiīnɛɛdam,* lokwa ɛrɛgebah nɛɛ a kiisī lo e’ɛrɛ ye yira bu naale elu egbeesī mɛ e’ɛrɛ dum anaatah. 17 Nyɔnɛbee Bari naa bee yere ye Nwiī nua kɔ alu wee biaɛ nyɔuwe, mɛ kɔ a kpɔā nyɔuwe. 18 Naale elu ebiaɛ ɛrɛgebah nɛɛ a ye ɛrɛ yira bu. Mɛ ɛrɛgebah nɛɛ a naa ɛrɛ ye yira bu, elua ebiaɛ ye nyɔnɛbee a naa ɛrɛ yira bu aba bee Nwiīnɛɛdam Bari. 19 Nyɔɔ lo ba ama na elu ebiaɛ a: kɔ ɛɛdee elua bu nyɔuwe, mɛ pya nɛɛ wereloo zii ee ɛɛdee, nyɔɔbee ba si pɔrɔ tam. 20 Nyɔnɛbee ɛrɛgebah nɛɛ a doogi nu a bee piya baaloo ɛɛdee, e a naa lu loo ɛɛdee a, lokwa a naa lu emuuna ye pɔrɔ dogo. 21 Mɛ ɛrɛgebah nɛɛ a doo nu alu kaka lu loo ɛɛdee lokwa ye tam dap sira kɛ̄dɛɛ̄ pya nɛɛ lo etɔgɛ kɔ a doo nu a gbaaloo ekɛɛrɛ Bari.”
22 Sɔ̄ lo ama etɛ̄na, Jizɔs le pya a wee ye nyɔɔnɛ dumɛ bee kii pya buɛ̄ a le Judia, e a bee wa nyɔɔnɛ tɔɔ̄ lo kɛ̄ pio dee sa limaā pya nɛɛ. 23 Mɛ Jɔn bee le aa linage maā pya nɛɛ bie Inɔn a le kpaɛ̄ Selim, nyɔnɛbee a ɛrɛ gbɛnɛ eba maā a bee le lo kɛ̄, e pya nɛɛ aa bee lugara sa alu eli wa maā; 24 nyɔnɛbee a sii bee lu e’aa Jɔn yere kpɔgɔrɔ.
25 Lo sɔ̄ pya a wee nyɔɔnɛ dumɛ Jɔn bee nyɔɔnɛ ziī nɛɛ Juu amkɛ̄ kiiloo kɛ̄ ele ɛɛ kɛ̄sī Bari doo. 26 Nyɔɔwo, ba bee lu loo Jɔn sa ye kɔ nɛ kɔ: “Rabai, ɛp gbara a bee a le kpaɛ̄ li yere Jɔdan a, lo o bee yira ekeebee kumaloo a gaa limaā pya nɛɛ, e dɛ̄dɛɛ̄ nɛɛ aa ye pii.” 27 Jɔn bee wa ture nɛ kɔ: “Nɛɛ naa dap ɛrɛ lɔgɔ nu kɛɛrɛ kɔ a bee lu enɛ ye aā bunyɔɔ. 28 Bɔɔlo dap mɛ yira ekeebee loo kɔ m bee kɔ: ‘Mda mm le Kraist, mɛ a bee lu eyere mɛ kɔ m za ye sī.’ 29 Nɛɛ aa ii wa na nɛɛ a ɛrɛ wa a. Mɛ sɔ̄ gbo nɛɛ aa ii wa yira dā muɛ nɛɛ aa ii wa a, a wee ɛrɛ gbɛnɛ ɛɛbu. Nyɔɔwo, na ɛɛbu egbɔ̄mɛɛ. 30 Alɛ ewee yiiloo, mɛ mda m wee aaloo.”
31 Nɛɛ a aa mmnyɔɔ eenyɔɔ dɛ̄dɛɛ̄ nɛɛ.* E nɛɛ a aa kɛnɛkɛ̄, aa kɛnɛkɛ̄ sa kɔ nu akiiloo pya nu a le kɛnɛkɛ̄. E nɛɛ a aa bunyɔɔ eenyɔɔ dɛ̄dɛɛ̄ nɛɛ. 32 A yira ekeebee loo pya nu a bee muɛ sa dā, mɛ lɔgɔ nɛɛ naa yiga pya nu a kɔ. 33 Ɛrɛgebah nɛɛ a yiga pya nu a yira ekeebee loo, eyiga aābu dɛ̄dɛɛ̄ ye beenyiɛ* kɔ Bari lu kaka. 34 Nyɔnɛbee nɛɛ Bari yere kɔ nu a aaloo Bari, nyɔɔbee a nɛ ye edɔɔ̄ bu yaaribah. 35 Tɛ a wereloo Nwiīnɛɛdam, sa esua dɛ̄dɛɛ̄ nu ye yere kɛ̄bah. 36 Nɛɛ a ɛrɛ yira bu Nwiīnɛɛdam e’ɛrɛ dum anaatah; nɛɛ a lɛɛbeekɛɛ̄ Nwiīnɛɛdam naale emuɛ dum, mɛ saŋ Bari le ye nyɔɔ.