Lo Matiu Bee Ɛm
19 Sɔ̄ Jizɔs ekɔa pya ue ama sah, a bee aa Galilii sa lu ina bee bana buɛ̄ Judia a le yere Jɔdan. 2 E gbɛnɛkpo nɛɛ bee ye nyɔɔnɛnage sa a boh wa bie lo kɛ̄.
3 E pya Farisii bee ye lu loo lo edoā ye ɛp sa ye bip kɔ: “A bɔgeloo bu lok kɔ nɛɛ a lɛa ye wa bah nyɔɔ ɛrɛgebah nu ni?” 4 A ture kɔ: “Bui sii bee buū kɔ nɛɛ a bee wa dɛm aā bɔātɛ̄ bee wa dɛm nɛɛdam le nɛɛwa 5 sa kɔ: ‘Nyɔɔ lo ba ama na nɛɛdam e’aaloo ye tɛ le ye ka sa dabaloo ye wa, e baɛ aba elu ziī namloo a?’ 6 E ba naale eluna baɛ mɛ aba namloo. Nyɔɔwo, nu Bari ebee bɔp loo ziī, lɔgɔ nɛɛ aa yɔbara.” 7 Ba kɔ: “Nyɔɔwo, ena anua Mozis bee kɔ alu enɛ kpa ania loo ziī sa alu elɛa ye bah ani?” 8 A bee wa kɔ nɛ kɔ: “Ɛɛ nyɔɔ bui e’aga beenyiɛ na anua Mozis bee lɛɛbahloo kɔ bui lɛa bui wa bah a, mɛ a naa bee le doo wo aā bɔātɛ̄. 9 M kɔ i nɛ kɔ ɛrɛgebah nɛɛ a lɛa ye wa bah lo a naale nyɔɔ kunagā* sa ii dɔɔ̄na wa, ekuera wa dɔɔ̄na nɛɛ.”
10 Pya a wee ye nyɔɔnɛ dumɛ bee ye kɔ nɛ kɔ: “Lo a le kɛ̄ kɛ̄tɔɔ̄ dam le wa le doo lo a naa lee e’ii wa.” 11 A kɔ wa nɛ kɔ: “Naale dɛ̄dɛɛ̄ nɛɛ na edap doo wo a, mɛ aba pya a ɛrɛ lo dɔɔ̄nu. 12 A ɛrɛ pya a bee lu kookoo nɛɛ aā dee ba bee mɛā, e a ɛrɛnage pya nɛɛ pya nɛɛ doo kɔ ba alu kookoo nɛɛ, e a ɛrɛnage pya nɛɛ ba esua wa loo nua kookoo nɛɛ nyɔɔbee Buɛ̄-mɛnɛ bunyɔɔ. Doo lo nɛɛ a dap a doo wo.”
13 Lo sɔ̄ ba bee su pya miɔŋɔ ye ma lokwa a wa dɛrɛ bah nyɔɔ sa wa yere kara bee, mɛ pya a wee ye nyɔɔnɛ dumɛ bee wa kɔgara ue. 14 Mɛ, Jizɔs bee wa kɔ nɛ kɔ: “Lɛraabahloo pya gbomiɔŋɔ a mɛ lu loo, e bui aa wa ɔbɛ nyɔnɛbee Buɛ̄-mɛnɛ bunyɔɔ le nɛ pya a le doo wo.” 15 E a su bah wa dɛrɛ nyɔɔ sa aa lo kɛ̄ kii.
16 E ɛp! ziī nɛɛ bee ye lu loo sa kɔ: “Nɛɛ Tɔgɛnu, amunu le nu na m doo lokwa m ɛrɛ dum anaatah a?” 17 E a kɔ ye nɛ kɔ: “Ena anua o bip mɛ nu a lee a? Aba ziī nɛɛ a lee.* Nyɔɔwo, lo o gbī e’ɛrɛ dum, kiisī lo edoo nu lok kɔ.” 18 A kɔ ye nɛ: “Pya amunu lo?” Jizɔs kɔ ye nɛ: “O aa fɛ nɛɛ, o aa kue wa nɛɛ, o aa yip biu, o aa yira ekeebee esah, 19 nwadɛɛ̄ o tɛ le o ka, e o ɛrɛ ewereloo nɛɛ le ɔɔ le doodoo oloo loo.” 20 Lo zege gbara bee ye kɔ nɛ kɔ: “M wee doo dɛ̄dɛɛ̄ nu ama; ena a siga m sii doo a?” 21 Jizɔs kɔ ye nɛ kɔ: “Lo o gbī emmana,* oo dɛ̄dɛɛ̄ nu o ɛrɛ sa nɛ pya kporo, e o ɛrɛ zɔ li bunyɔɔ; lɛɛ o lu sa mɛ nyɔɔnɛ dumɛ.” 22 Sɔ̄ lo zege gbara edaā doo wo, bu ye bee biira gbɛnɛ nyɔnɛbee a bee ɛrɛ gbɛnɛkpo zɔ. 23 Lo sɔ̄ Jizɔs kɔ nɛ pya a wee ye nyɔɔnɛ dumɛ kɔ: “Kaka m kɔ i nɛ kɔ e’agabah nɛɛ mɛnɛ lo eyii bu Buɛ̄-mɛnɛ bunyɔɔ. 24 Dɔɔ̄na, m kɔ i nɛ kɔ ewaɛ kɔ ekobee Kamɛl a tɛɛ̄ dɛɛ̄ elaga, ee kɔ nɛɛ mɛnɛ a yii bu Buɛ̄-mɛnɛ Bari.”
25 Sɔ̄ pya a wee ye nyɔɔnɛ dumɛ edaā doo wo, a bee wa lu nyɛŋia loo sa ba kɔ: “Taɛ mɛɛ na edap lu ekpɔā a?” 26 Jizɔs ɛp wa sa wa kɔ nɛ kɔ: “Aāloo kɛ̄ nɛɛ ɛp nu doo lo ama naa dap waɛ, mɛ Bari dap doo dɛ̄dɛɛ̄ nu.”
27 Lo sɔ̄ Pita ture ye nɛ kɔ: “Ɛp! i elɛrabahloo dɛ̄dɛɛ̄ nu sa a nyɔɔnɛ, ena i ɛrɛ a?” 28 Jizɔs kɔ wa nɛ: “Kaka m kɔ i nɛ, sɔ̄ elu edoo kɔ nu alu aā, sɔ̄ Nwiīnɛɛ e’ɛŋɛtɛ̄ nyɔɔ ye kasi mɛnɛ ka, bɔɔlo bui bee mɛ nyɔɔnɛ dumɛ e’ɛŋɛtɛ̄ nyɔɔ 12 kasi mɛnɛ sa biaɛ 12 gā Izrɛl. 29 E ɛrɛgebah nɛɛ elɛrabahloo tɔ, ale wuga nɛɛdam, ale wuga nɛɛwa, ale tɛ ale ka ale gbomiɔŋɔ ale nam nyɔɔ mdaa bee, e’ɛrɛ o’oo tup sɔ̄ yere nyɔɔ sa e’ɛrɛnage dum anaatah.
30 “Mɛ gbɛnɛ-edo pya alu tuatua elu kpɛdumɛ, e pya alu kpɛdumɛ elu tuatua.