Lo Matiu Bee Ɛm
17 Sɔ̄ ini’ī biradee etɛ̄na, Jizɔs bee su Pita, Jems le ye wuga Jɔn yaaloo ye sa wa su kuma nyɔɔ kpokɛ̄ a kii nyɔɔ, e aba nia aba na ba bee le lo kɛ̄ a. 2 E a bee nyaā wa bie kɛ̄sī; sī ye bee mɔ bee zue, e ye bɛloo bee ɛɛ bee miā. 3 E ɛp! Mozis le Elaija bee wa siraloo sa ba nyɔɔnɛ Jizɔs kɔnia ue. 4 Lo sɔ̄ Pita bee kɔ nɛ Jizɔs kɔ: “Nɛɛ-a-i-ɛrɛ, lee kɔ i le akɛāma. Lo o gbī, m wu taa ka tɔkpo akɛāma, ziī aba lo olo, ziī aba lo Mozis, e ziī aba lo Elaija.” 5 Sɔ̄ a gaa bee kɔge ue, ɛp! ɛɛdee bee wa kuɛ, e ɛp! ziī muɛ̄ bee aabu ɛɛdee a sa kɔ: “Alɛ ama na na Nwiīnɛɛdam m wereloo lo a doo kɔ bu mɛ a ɛɛ a. Gbānaa ye tɔ̄ loo.” 6 Sɔ̄ pya a wee ye nyɔɔnɛ dumɛ edaā lo ama, ba bee dɔ uu sī kɛ̄, e bɔɔ bee wa aa gbɛnɛ. 7 Lo sɔ̄ Jizɔs bee wa yii kpaɛ̄, wa daa bahloo sa kɔ: “Aaraa kɛ̄. Bɔɔ aa i aa.” 8 E sɔ̄ ba bee dana bee lɛɛkɛ̄, ba naa bee muɛ lɔgɔ nɛɛ mɛ aba Jizɔs. 9 E sɔ̄ ba aa bee sira kɛ̄ aa nyɔɔ kpokɛ̄ a, Jizɔs bee wa nɛ lok kɔ: “Bui aa kɔ nu bui bee muɛ nɛ lɔgɔ nɛɛ mmɛ sɔ̄ elua elɛɛ Nwiīnɛɛ kɛ̄ bu luh.”
10 Kerewo, pya a wee ye nyɔɔnɛ dumɛ bee ye bip kɔ: “Ena anua pya ɛm kpa kɔ Elaija ɛrɛ edasī lu a?” 11 A ture wa nɛ kɔ: “Bu kaka Elaija gaa lu, e a esikɛ̄ kwa dɛ̄dɛɛ̄ nu sere wa dɔ. 12 Kerewo, m kɔ i nɛ kɔ Elaija ebee lu, e ba naa bee ye suāloo, nyɔɔwo ba bee ye aara doo kɛ̄ a wa nia doo. Bu aba lo sīdee na Nwiīnɛɛ etɔganage wa kɛ̄bah a.” 13 Lo sɔ̄ pya a wee ye nyɔɔnɛ dumɛ bee suā kɔ ɛɛ Jɔn Nɛɛ Limaā na a gaa kɔ nu akiiloo a.
14 Sɔ̄ ba bee lu ina loo gbɛnɛkpo nɛɛ a, ziī gbara bee ye lu loo, ye kunɛzū kɛ̄sī sa kɔ: 15 “Nɛɛ-a-i-ɛrɛ, ɛrɛ toesaɛ̄ loo na nwiīnɛɛdam, alu nɛɛ boro aa sa loo ye dumɛ gbɛnɛ. A wee dɔ bu miā booboo sɔ̄, sa dɔnage bu maā gbɛnɛ-edo sɔ̄. 16 M bee ye su ma pya a wee a nyɔɔnɛ dumɛ mɛ ba naa dap ye boh.” 17 Lo sɔ̄ Jizɔs bee kɔ: “Aa sɔ̄ eku nyɔuwe a bee piya sa naa ɛrɛ yira, kuma mɛ sɔ̄ na m nyɔɔnɛ i tɔɔ̄ a? Kuma mɛ sɔ̄ na m tɔgɛ egerebu i kumaloo a? Suaa ye mɛ ma akɛāma.” 18 Lo sɔ̄ Jizɔs kɔgara ue pɔrɔ-edɔɔ̄ a sa a aa ye bu, e loo lo nwiīnɛɛdam bee nwaɛ̄ aba lo sɔ̄. 19 Lo sɔ̄ pya a wee nyɔɔnɛ dumɛ Jizɔs bee ye lu loo aba aba sa ye kɔ nɛ kɔ: “Ena anua ili ii bee ye dap kpo lɛɛ a?” 20 A kɔ wa nɛ kɔ: “Ɛɛ nyɔɔbee buii ɛrɛ e’agatɛ̄ yira. Kaka m kɔ i nɛ, lo bui ɛrɛ yira a le doodoo eyuu mustard, bui kɔ nɛ gbɛnɛ kpokɛ̄ ama kɔ, ‘Aa akɛāma kii dɔɔ̄na kɛ̄’ e a ekii, e lɔgɔ nu buii le edap doo naale.” 21* ——
22 A bee le sɔ̄ ba bee le ebɔŋana li Galilii na Jizɔs bee wa kɔ nɛ kɔ: “Elu etɛ̄ŋaloo Nwiīnɛɛ yere kɛ̄bah pya ye baa, 23 e ba efɛ ye sa elu elɛɛ ye kɛ̄ bu luh nyɔɔ lo eree taa biradee.” Nyɔɔwo, ba bee ɛrɛ gbɛnɛ ekiɛ̄nu.
24 Sɔ̄ ba e’ina Kapaniɔm, pya a wee tup etup tɔkaɛ bee lu loo Pita sa ye kɔ nɛ kɔ: “Bui nɛɛ tɔgɛnu naa wee kpɛ etup* tɔkaɛ ni?” 25 A kɔ: “Aiī.” Kerewo, sɔ̄ eyira tɔ, Jizɔs dasī ye kɔ nɛ kɔ: “Saimɔn, ena o kɛɛrɛ a? Ba mɛɛ na pya mɛnɛ nyɔuwe wee su etup du ale etup aābah a? Aābah pya wa miɔŋɔ sɛh aābah pya saanɛɛ ni?” 26 Sɔ̄ a bee kɔ: “Aābah pya saanɛɛ,” Jizɔs kɔ ye nɛ kɔ: “Lo a le doo wo, pya wa miɔŋɔ lu puɛ. 27 Mɛ lokwa ba naa tɛɛ̄ i nyɔɔ dɔ, kii bu pɛnɛ sa o tɛrɛ toba, lɛɛ o ɛp bu egā tua epah bari o aa e o muɛ ziī kpugi silva.* Su sa wa nɛ nyɔɔ bee olo le mda.”