Lo Jɔn Bee Ɛm

6 Sɔ̄ lo ama etɛ̄na, Jizɔs bee fia yee pɛnɛ Galilii ale Taibirias. 2 E gbɛnɛkpo nɛɛ bee ye nyɔɔnɛ nyɔnɛbee ba aa bee muɛ nyɛŋiatam lo a bee si sɔ̄ a bo pya loo naa nwaɛ̄. 3 Nyɔɔwo, Jizɔs bee kii nyɔɔ ziī egu sa ɛŋɛtɛ̄ lo kɛ̄ gbaāloo pya a wee ye nyɔɔnɛ dumɛ. 4 Mɛ doonu Tɛɛ̄yee pya Juu ebee waɛloo kɛ̄. 5 Sɔ̄ Jizɔs bee dana dɛɛ̄ sa muɛ gbɛnɛkpo nɛɛ a gaa ye lu pii, a kɔ nɛ Filip kɔ: “Mɛ kɛ̄ na i yaɛ fituru pya nɛɛ ama ede aā a?” 6 Kerewo, a bee kɔ lo ba ama lo edoā ye ɛp, nyɔnɛbee a bee suā nu a gaa gbī edoo. 7 Filip bee ye ture nɛ kɔ: “Lop tup denariɔs naale edap yaɛ fituru egbɔ̄mɛ loo pya nɛɛ ama, kere lo ziī ziī aba su tera, naale egbɔ̄mɛnage.” 8 Ziī nɛɛ a wee ye nyɔɔnɛ dumɛ lo ye bee kura Andru, wuga Saimɔn Pita bee ye kɔ nɛ kɔ: 9 “A ɛrɛ ziī gbagbara nwiīnɛɛdam a le akɛāma lo a ɛrɛ o’oo bee fituru barley le baɛ esɔgɔ epah bari. Mɛ lo ama elu e loo gbɛnɛkpo nɛɛ ama ni?”

10 Jizɔs bee kɔ: “Kɔaa wa nɛ kɔ ba a ɛŋɛtɛ̄ kɛ̄.” E kuma sɔ̄ gbɛnɛ-edo ebie bee le lo kɛ̄ a, nu alu 5,000 pya nɛɛdam bee ɛŋɛtɛ̄ lo kɛ̄. 11 Jizɔs bee su lo fituru, e sɔ̄ eyere kara sah,* a dɔɔ̄ nɛ pya a bee le ɛŋɛtɛ̄ kɛ̄ a; e a bee wa dɔɔ̄nage lo esɔgɔ epah bari nɛ sa ba de dookɛ̄ ba gbī doo. 12 Mɛ sɔ̄ ba edea sa emma wa, a bee kɔ nɛ pya a wee ye nyɔɔnɛ dumɛ kɔ: “Bɔŋɛnɛaaloo pya lo a siga lokwa lɔgɔ nu naa lu epee.” 13 Nyɔɔwo, ba bee bɔŋɛnɛloo lo a siga aāloo o’oo bee fituru barley pya nɛɛ bee de a, e a bee mma bu 12 ka kpɔ.

14 Sɔ̄ pya nɛɛ bee muɛ nyɛŋiatam lo a si, ba bɔātɛ̄ ekɔ: “Nɛɛ ama ɛɛ kaāna nɛɛ mɔmanudɛɛ̄ lo alu bu nyɔuwe.” 15 Sɔ̄ Jizɔs bee suā kɔ ba gaa gbī e’aae ye nua mɛnɛ, a bee zuura loo kii nyɔɔ egu wee tɔɔ̄ aba ɛɛ.

16 E sɔ̄ elua loo uunɛ, pya a wee ye nyɔɔnɛ dumɛ bee kii nu pɛnɛ, 17 sa yii bu fah fia lo pɛnɛ kii Kapaniɔm. Zii ebee ina aa yii lo sɔ̄, mɛ Jizɔs sii bee wa ina kpaɛ̄. 18 Gbaāloo wo, lo pɛnɛ aa bee toobi nyɔɔbee gbɛnɛ fii efɔp aa bee dɔ. 19 Kerewo sɔ̄ ba ebee ɔp nu alu taa ale nia maɛl* aāloo uwe, ba bee muɛ Jizɔs a gaa kiā nyɔɔ pɛnɛ waɛloo fah a, e bɔɔ bee wa aa. 20 Mɛ a bee wa kɔ nɛ kɔ: “Ɛɛ mda, bɔɔ aa i aa!” 21 Lo sɔ̄ ba su ɛɛbu ye suā yere bu fah, e sɔ̄ sɔ̄ naa binia, ba bee ina kɛ̄ ba aa bee kii.

22 Lo dee a za nyɔɔnɛ, gbɛnɛkpo nɛɛ a bee le elua naɛsī pɛnɛ a bee muɛ kɔ lɔgɔ dɔɔ̄na fah naa bee lena lo kɛ̄, mɛ aba ziī ka lo nwīgbagbara le kɔ aba pya a wee nyɔɔnɛ dumɛ Jizɔs na a bee yii bu fah aa a, e Jizɔs naa bee wa le loo. 23 Kerewo, pya fah a aa Taibirias bee ina kɛ̄ a le waɛloo kɛ̄ ba bee tɔɔ̄ de fituru sɔ̄ Nɛɛ-a-i-ɛrɛ edoora yaa sah. 24 Nyɔɔwo, sɔ̄ gbɛnɛkpo nɛɛ a emɔna kɔ Jizɔs ale pya a wee ye nyɔɔnɛ dumɛ naa bee le lo kɛ̄, ba bee yii bu wa fah kii Kapaniɔm wee gbī Jizɔs.

25 Sɔ̄ ba fia lo pɛnɛ, ba bee ye muɛ, e ba bee ye kɔ nɛ kɔ: “Rabai, mɛ sɔ̄ na o ina akɛāma a?” 26 Jizɔs bee wa ture nɛ kɔ: “M kɔ kaka i nɛ kɔ, naale nyɔɔ nyɛŋiatam bui bee muɛ na anua bui aa mɛ gbī a, mɛ nyɔɔ kɔ bui bee de fituru mmɛā bu. 27 Bui aa sitam loo nuede a wee gbe, mɛ siaa tam loo nuede a wee tɔɔ̄ mmɛ dee anaatah, lo Nwiīnɛɛ gaa le nɛ i, nyɔnɛbee alɛ na Tɛ, lo a le Bari etɔgɛ kɔ a yereekpotɛ̄ a.”

28 Nyɔɔwo, ba bee ye kɔ nɛ kɔ: “Ena i ɛrɛ edoo lo esitam Bari a?” 29 Jizɔs bee wa ture nɛ kɔ: “Nu sitam nɛ Bari kura na ɛrɛ yira bu nɛɛ a bee yere.” 30 Lo sɔ̄ ba kɔ ye nɛ kɔ: “Amunu edobah nu na o tɔgɛ i lokwa i muɛ sa a yiga nɛ a? E amunu tam na o si a? 31 Pya i nama tɛ bee de mana bie bu kpo-sagara-wii dookɛ̄ a bee lu e’ɛm doo kɔ: ‘A bee wa nɛ fituru aā bunyɔɔ kɔ ba a de.’” 32 Lo sɔ̄ Jizɔs kɔ wa nɛ kɔ: “M kɔ kaka i nɛ, Mozis naa bee i nɛ fituru a aa bunyɔɔ, mɛ na Tɛ nɛ i lo kaāna fituru aā bunyɔɔ. 33 Nyɔnɛbee fituru Bari na nɛɛ a sirakɛ̄ aa bunyɔɔ sa nɛ dum pya nɛɛ.”* 34 Lo sɔ̄ ba bee ye kɔ nɛ kɔ: “Nɛɛ-a-i-ɛrɛ, nɛ i fituru ama dɛ̄dɛɛ̄ sɔ̄.”

35 Jizɔs bee wa kɔ nɛ kɔ: “Mda na fituru dum a. Loo ɛrɛgebah nɛɛ a mɛ lu loo naale elɛɛna, e oo ɛrɛgebah nɛɛ a mɛ ɛrɛ yira bu naale ekaga na. 36 Mɛ dookɛ̄ m bee i kɔ nɛ doo, bui emɔna mɛ, e kerewo buii mɛ yira nɛ. 37 Dɛ̄dɛɛ̄ pya nɛɛ Tɛ enɛā mɛ elu mɛ loo, e mm le ekpo lɔgɔ nɛɛ a mɛ lu loo; 38 nyɔnɛbee m bee aa bunyɔɔ lu wee doo nu a nia nɛɛ a bee mɛ yere, e a naale nu a mɛ nia. 39 Nu alu ekɛɛrɛ nɛɛ a bee mɛ yere na kɔ m aa pee lɔgɔ nɛɛ yɛɛ pya a bee mɛ nɛ, mɛ kɔ m lɛɛ wa kɛ̄ bu luh nyɔɔ kpɛdumɛ dee. 40 Nyɔnɛbee nu na Tɛ gbī na kɔ ɛrɛgebah nɛɛ a suāloo Nwiīnɛɛdam sa ye ɛrɛ yira bu, a ɛrɛ dum anaatah, e m lɛɛ ye kɛ̄ bu luh nyɔɔ kpɛdumɛ dee.”

41 Lo sɔ̄ pya Juu bɔātɛ̄ enuumi num ye kumaloo nyɔɔbee a bee kɔ: “Mda na fituru a aa bunyɔɔ a.” 42 E ba bee bɔātɛ̄ ekɔ: “Ekɔ a naale Jizɔs nwiī Josɛf i suāloo ye tɛ le ye ka na ama ni? Tɛɛ̄ doodoo wa kɔ, ‘M aa bunyɔɔ’?” 43 Jizɔs bee wa ture nɛ kɔ: “Ɔbɛaa enuumi num yɛɛ i. 44 Lɔgɔ nɛɛ naale edap mɛ lu loo kɛɛrɛ kɔ Tɛ lo a bee mɛ yere zuura ye, e m lɛɛ ye kɛ̄ bu luh nyɔɔ kpɛdumɛ dee. 45 Pya nɛɛ mɔmanudɛɛ̄ bee ɛm kɔ: ‘Jɛhova na etɔgɛ nu dɛ̄dɛɛ̄ aba a.’ Dɛ̄dɛɛ̄ pya edaā nu Tɛ kɔ sa su ye tɔgɛnu, elu mɛ loo. 46 Lɔgɔ nɛɛ sii muɛ Tɛ a, mɛ aba nɛɛ a aa kpaɛ̄ Bari, ɛɛ lo nɛɛ na emɔna Tɛ a. 47 Kaka m kɔ i nɛ, ɛrɛgebah nɛɛ a yira, e’ɛrɛ dum anaatah.

48 “Mda na fituru dum a. 49 Pya bui nama tɛ bee de mana bie bu kpo-sagara-wii, kerewo ba bee u. 50 Alɛ ama na fituru a aa bunyɔɔ a, lokwa ɛrɛgebah nɛɛ dap de sa a naa u. 51 Mda na fituru dum a aa bunyɔɔ a. Lo a le ɛrɛgebah nɛɛ de fituru ama etɔɔ̄ mmɛ deedee; bu kaka, lo fituru mda enɛ na na namloo lo m nɛ nyɔɔ dum pya nɛɛ.”*

52 Lo sɔ̄ pya Juu bee bɔātɛ̄ e’amkɛ̄ yɛɛ ɛnia aba kɔ: “Nɛɛ ama etɛɛ̄ doodoo wa i nɛ ye namloo kɔ i ba?” 53 Nyɔɔwo Jizɔs bee wa kɔ nɛ kɔ: “M kɔ kaka i nɛ kɔ, lo a le buii ba namloo Nwiīnɛɛ sa ɔ̄ ye miī, buii le e’ɛrɛ dum.* 54 Ɛrɛgebah nɛɛ a ba na namloo sa ɔ̄ na miī e’ɛrɛ dum anaatah, e m lɛɛ ye kɛ̄ nyɔɔ kpɛdumɛ dee; 55 nyɔnɛbee mdaa namloo na kaāna nuede a, e na miī na kaāna nu e’ɔ̄ a. 56 Ɛrɛgebah nɛɛ a ba na namloo sa ɔ̄ na miī ekiisī lo enyɔɔnɛ mɛ le bu gbaaloo, e mda enyɔɔnɛ ye le bu gbaaloo. 57 Dookɛ̄ Tɛ a le dum bee mɛ yere sa m tɔɔ̄dum nyɔɔ bee Tɛ a doo, kɛ̄ ɛrɛgebah nɛɛ a ba na namloo etɔɔ̄nage dum nyɔɔbee mda doo lo. 58 Alɛ ama na fituru a aa bunyɔɔ a. A naale doodoo sɔ̄ pya bui nama tɛ bee de, e kerewo ba bee u. Ɛrɛgebah nɛɛ a de fituru ama etɔɔ̄ mmɛ deedee.” 59 A bee kɔ pya nu ama sɔ̄ aa bee tɔgɛ nu bie bu tɔ bɔŋanaloo* li Kapaniɔm.

60 Sɔ̄ ba dā doo wo, gbɛnɛ-edo pya a wee ye nyɔɔnɛ dumɛ bee kɔ: “Ue ama aga esu; mɛɛ na edap gbaɛ̄tɔ̄ a?” 61 Sɔ̄ Jizɔs suā kɔ pya a wee ye nyɔɔnɛ dumɛ aa nuumi num loo ue a, a bee kɔ: “Ekɔ lo ama ɔɛ loo bui yira ni?* 62 Emɛā doodoo wa lo bui muɛ Nwiīnɛɛ a gaa obia kii nyɔɔ kɛ̄ a bee le tua sɔ̄? 63 Ɛɛ edɔɔ̄ na a nɛ dum a, namloo naa nɛ lɔgɔ nu. Pya nu m i kɔ nɛ na edɔɔ̄, e ba wee nɛ dum. 64 Mɛ a ɛrɛ pio bui a naa yira.” Nyɔnɛbee aā bɔātɛ̄ Jizɔs bee suāloo pya a naa yira le nɛɛ elɛɛ ye. 65 A bee kiisī lo ekɔ: “Nu anua m kɔ i nɛ lo, kɔ lɔgɔ nɛɛ naale edap mɛ lu loo kɛɛrɛ kɔ Tɛ a nɛ ye dee.”

66 Nyɔɔbee wo, gbɛnɛ-edo pya a wee ye nyɔɔnɛ dumɛ bee obia wee doo pya nu ba bee lɛɛbahloo bie dumɛ, e ba naa bee ye nyɔɔnɛna kiā. 67 Nyɔɔwo, Jizɔs bee kɔ nɛ Lop Le Baɛ pya ye nɛɛ lɛɛratam kɔ: “Bɔɔlo gbīnage ekii ni?” 68 Saimɔn Pita bee ye ture nɛ kɔ: “Nɛɛ-a-i-ɛrɛ, mɛɛ na i kii pii a? Olo ɛrɛ pya ue dum anaatah. 69 I eyira sa suā kɔ olo na Nɛɛ Kaɛ Bari a.” 70 Jizɔs ture kɔ: “M bee sagɛ lop le baɛ bui, naale wo ni? Kerewo, ziī bui lu nɛɛ gbee bee.”* 71 Bu kaka, nɛɛ a gaa bee kɔ nu akiiloo na Judas nwiī Saimɔn Iskariɔt, nyɔnɛbee alɛ na elɛɛ ye a, kereadoo a bee le ziī nɛɛ yɛɛ Lop Le Baɛ a.