Lo Jɔn Bee Ɛm
5 Sɔ̄ lo ba ama etɛ̄na, pya Juu bee ɛrɛ ziī doonu, e Jizɔs bee kii Jerusɛlɛm. 2 Bie Nudee Naana Pee a wee le Jerusɛlɛm, a ɛrɛ ziī dɛgɛrɛ bana maā a bee le lo a wee lu ekure Bɛtzeta bu Hibru, lo a bee ɛrɛ o’oo kɛɛ̄daɛ̄. 3 Mɛ gbɛnɛ-edo pya dumɛloo, pya zimadɛɛ̄, pya kɔgah, pya bah wa ale tɔ wa u bee le ema lo kɛ̄. 4* —— 5 E ziī nɛɛ bee le lo kɛ̄ lo loo ye ebee dumɛ loo 38 zua. 6 Sɔ̄ Jizɔs emɔna lo nɛɛ a le ema lo kɛ̄ sa suā kɔ loo ye edumɛ bu nyɔɔnyɔɔ sɔ̄, a bee ye kɔ nɛ kɔ: “O gbīge kɔ loo a a nwaɛ̄ ni?” 7 Lo nɛɛ dumɛloo a bee ye ture nɛ kɔ: “Tɛtɔ, mm ɛrɛ lɔgɔ nɛɛ a mɛ dana yere bu maā sɔ̄ lo maā nyɔŋa, mɛ sɔ̄ m le nyɔɔ dee aa kii bu, dɔɔ̄na nɛɛ da mɛ sī yii bu.” 8 Jizɔs kɔ ye nɛ: “Aakɛ̄! Su o nu manyɔɔ* sa o kiā.” 9 E loo lo nɛɛ bee nwaɛ̄ aba lo sɔ̄, e a su ye nu manyɔɔ* sa bɔātɛ̄ ekiā.
Lo dee bee le Dee Fɛɛrɛloo. 10 Nyɔɔwo, pya Juu bee bɔātɛ̄ ekɔ nɛ nɛɛ a bee lu ebo a kɔ: “Ɛɛ Dee Fɛɛrɛloo, e a naa bɔloo bu lok kɔ o aara o nu manyɔɔ.”* 11 Mɛ a bee wa ture nɛ kɔ: “Nɛɛ a bee mɛ bo bee mɛ kɔ nɛ kɔ, ‘Su o nu manyɔɔ* sa kiā.’” 12 Ba bee ye bip kɔ: “Mɛɛ na a bee a kɔ nɛ kɔ, ‘Su o nu manyɔɔ sa kiā a?” 13 Mɛ nɛɛ a bee lu ebo a naa bee suā loo Jizɔs nyɔnɛbee a bee gɔā yii yɛɛ gbɛnɛkpo nɛɛ a bee le lo kɛ̄.
14 Sɔ̄ lo ama etɛ̄na, Jizɔs bee ye muɛ bie bu tɔkaɛ sa ye kɔ nɛ kɔ: “Ɛp, loo a enwana. O aa sina pɔrɔ lokwa nu a bee piya eewo ama naa sira a loo.” 15 Lo sɔ̄, lo gbara aa sa kɔ nɛ pya Juu kɔ a bee le Jizɔs na a bee doo kɔ loo ye a nwaɛ̄ a. 16 Nyɔɔwo, pya Juu bee tɛ̄ŋaloo Jizɔs nyɔɔbee aa bee doo pya nu ama nyɔɔ Dee Fɛɛrɛloo. 17 Mɛ a bee wa kɔ nɛ kɔ: “Na Tɛ le aa sitam mmɛ nyaawo, e mda gaa sinage tam.” 18 Nyɔɔ lo ba ama na pya Juu bee gbī dɛ̄dɛɛ̄ sīdee efɛā ye a, naale aba bee a dɔ lok nyɔɔ Dee Fɛɛrɛloo mɛ a bee kɔnage kɔ Bari lue ye Tɛ, doodoo bee Bari le ɛɛ lu kunakuna.
19 Nyɔɔwo Jizɔs bee wa ture nɛ kɔ: “Kaka m kɔ i nɛ, Nwiīnɛɛdam naa dap doo lɔgɔ nu nyɔɔ ye loo mɛ aba nu a muɛ ye Tɛ aa doo. Nyɔnɛbee ɛrɛgebah nu ye Tɛ doo, lo nu na ye Nwiīnɛɛdam doonage a. 20 Nyɔnɛbee Tɛ wereloo Nwiīnɛɛdam kaāna sa ye tɔgɛ dɛ̄dɛɛ̄ nu aa doo, e etɔgɛ ye tam a ee pya lo ba ama lokwa a i lu nyɛŋia loo. 21 Mɛ dookɛ̄ Tɛ wee lɛɛ pya nɛɛ e’ua kɛ̄ sere dum doo, kɛ̄ Nwiīnɛɛdam lɛɛnage ɛrɛgebah nɛɛ a gbī kɛ̄ sere dum doo lo. 22 Nyɔnɛbee Tɛ naa biaɛ biaɛ loo lɔgɔ nɛɛ, mɛ esua dɛ̄dɛɛ̄ biaɛ yere kɛ̄bah Nwiīnɛɛdam, 23 lokwa dɛ̄dɛɛ̄ nɛɛ yere ka loo Nwiīnɛɛdam dookɛ̄ ba yere kaloo Tɛ doo. Ɛrɛgebah nɛɛ a naa yere ka loo Nwiīnɛɛdam naa yerenage ka loo Tɛ lo a bee ye yere. 24 M kɔ kaka i nɛ kɔ, ɛrɛgebah nɛɛ a dā na ue sa yira nɛ Nɛɛ a bee mɛ yere e’ɛrɛ dum anaatah, e a naale elu ebiaɛ ye biaɛ loo, mɛ e’aara bu luh tɔɔ̄dum.
25 “M kɔ kaka i nɛ, awa gaa lu, e a le anyaawo sɔ̄ pya e’ua edā muɛ̄ Nwiīnɛɛdam Bari, e pya a gbaɛ̄tɔ̄loo etɔɔ̄dum. 26 Dookɛ̄ Tɛ ɛrɛ dum bu alɛɛ loo* doo, aba lo sīdee na a doonage kɔ Nwiīnɛɛdam a ɛrɛ dum bu alɛɛ loo a. 27 E enɛā ye ekpo kɔ a biaɛma biaɛ, nyɔɔbee alɛ na Nwiīnɛɛ a. 28 Aa i lu nyɛŋialoo, nyɔnɛbee awa gaa lu sɔ̄ dɛ̄dɛɛ̄ pya a le bu bana luh edā ye muɛ̄ 29 sa aabu, pya a doo nu a lee e’aakɛ̄ bu luh sa tɔɔ̄dum, e pya a doo nu a naa lee e’aakɛ̄ bu luh sa alu ebiaɛ wa. 30 Mm dap doo lɔgɔ nu nyɔɔ na loo. Aāloo nu m dā na m biaɛ a, e na biaɛ lu lo a kaāna nyɔnɛbee mm gbī nu enia aba mm mɛ nu enia nɛɛ a bee mɛ yere.
31 “Lo m yira ekeebee kumaloo aba mm, na ekeebee naa lu kaka. 32 A ɛrɛ dɔɔ̄na nɛɛ a mɛ yira ekeebee kumaloo, e m suā kɔ ekeebee a mɛ yira kumaloo lu kaka. 33 Bui eyere pya nɛɛ siā loo Jɔn, sa eyira ekeebee alu kaka a mɛ kiiloo. 34 Kerewo, naa lu ebɛɛ̄ kɔ nɛɛ a dasī mɛ yira ekeebee kumaloo, mɛ m kɔ pya nu ama lokwa bui dap ɛrɛ kpɔā. 35 Lo nɛɛ bee le numiā a bɛ sa mɔ, e bui bee kpɛ̄naloo e’ɛɛŋa bu ye ɛɛdee bu nwīkere sɔ̄. 36 Mɛ mda doo nu a eenyɔɔ nu Jɔn bee kɔ, nyɔnɛbee taɛ pya tam na Tɛ bee mɛ yere kɔ m si lo m gaa si, lu nu ekeebee kɔ Tɛ na a bee mɛ yere a. 37 E Tɛ a bee mɛ yere yira ekeebee mɛ kumaloo. Bui sii ye dā muɛ̄ lɔgɔ sɔ̄ ale muɛ kɛ̄ a mɛā doo, 38 e ye ue naa i le bu, nyɔnɛbee buii yira nɛ nɛɛ a bee yere.
39 “Bui gaa gbī pya nu a le bu Kpa Kaɛ nyɔnɛbee bui kɛɛrɛ kɔ bui ɛrɛ dum anaatah wa tɛ̄maloo; e pya lo ba ama* na a mɛ yira ekeebee kumaloo a. 40 E kerewo, buii gbī elu mɛ loo lokwa bui ɛrɛ dum. 41 Mm gbī ka aābah pya nɛɛ, 42 mɛ m suā leere kɔ wereloo Bari naa i le bu. 43 M elua bu bee na Tɛ, mɛ buii mɛ su. Lo a le ziī dɔɔ̄na nɛɛ lu bu alɛɛ bee bui su lo nɛɛ. 44 Bui tɛɛ̄ doodoo wa yiga sɔ̄ bui gaa su ka aābah ɛnia bui, e buii gbī ka a aabah aba lo kaka Bari ni? 45 Bui aa kɛɛrɛ kɔ m dɛrɛ i ue kɛ̄sī na Tɛ, mɛ a ɛrɛ ziī nɛɛ a i dɛrɛ ue lo a le Mozis, nɛɛ bui bɛābu. 46 Bu kaka, lo a le bui bee yira nɛ Mozis, bui yiranage nɛ mda, nyɔnɛbee a bee ɛm nu a mɛ kiiloo. 47 Mɛ lo a le buii yiga pya nu a bee ɛm, bui tɛɛ̄ doodoo wa yiga nu m kɔ?”