Lo Luk Bee Ɛm
15 Lo sɔ̄ pya tup etup le pya pɔrɔ bee ye tɛɛ̄ ɛŋɛnɛ lo egbaɛ̄ ye tɔ̄ loo. 2 E pya Farisii le pya ɛm kpa bee kiisī lo enuumi num kɔ: “Nɛɛ ama su baɛ bah suā pya pɔrɔ sa wa nyɔɔnɛ denu.” 3 Lɛɛ a su edobah nu wa kɔā ue nɛ kɔ: 4 “Amunu nɛɛ a i le yɛɛ na lo a ɛrɛ 100 naana pee sa ziī aba pe wa aa yɛɛ, a naale elɛɛbahloo 99 pya elua a bie bu kpo-sagara-wii sa kii wee gbī lo a bee pe mmɛ sɔ̄ emuɛ ye ani? 5 E sɔ̄ emɔna ye, a su ye yaa bee gāŋana sa ɛrɛ ɛɛbu. 6 E sɔ̄ e’ina be, a kue pya ye gbo le pya nɛɛ le ɛɛ le bɔŋɛnɛloo sa wa kɔ nɛ kɔ, ‘Nyɔɔnɛaa mɛ ɛrɛ ɛɛbu, nyɔnɛbee m emɔna na naana pee a bee pe.’ 7 M kɔ i nɛ kɔ bu aba lo sīdee, ɛɛbu ele bunyɔɔ loo ziī nɛɛ pɔrɔ a kiiya ee 99 pya kaāna dogo lo ba naa ɛrɛ ebɛɛ̄ loo kikiiya.
8 “Ale amunu wa na lo a ɛrɛ lop kpɔgɔrɔ kpugi drakma sa a pee ziī aba, a naale emuī miā sa kpaɛ ye tɔ sa kɛɛrɛloo gbī, mmɛ sɔ̄ egbī muɛ ani? 9 E sɔ̄ emɔna, a kue pya ye gbo* le pya nɛɛ le ɛɛ le bɔŋɛnɛloo sa kɔ, ‘Nyɔɔnɛaa mɛ ɛrɛ ɛɛbu, nyɔnɛbee m emɔna na kpɔgɔrɔ kpugi drakma a bee pe.’ 10 Bu aba lo sīdee m kɔ i nɛ, pya ɛnjɛl Bari ɛrɛnage ɛɛbu sɔ̄ ziī nɛɛ pɔrɔ kiiya.”
11 Lo sɔ̄ a bee kɔ: “Ziī gbara bee ɛrɛ baɛ miɔŋɔ nɛɛdam. 12 E lo nwīgbagbara bee kɔ nɛ ye tɛ kɔ, ‘Na tɛ, dɔɔ̄ nu o ɛrɛ mɛ nɛ lo a mɛ kuu.’ Nyɔɔwo, ye tɛ bee dɔɔ̄ nu a ɛrɛ sa nɛ baɛ aba. 13 Sɔ̄ pio dee etɛ̄na, ye lah bee lap dɛ̄dɛɛ̄ ye nu sa kii buɛ̄ a binia, e a bee pee nu a ɛrɛ bie lo kɛ̄ tɛ̄maloo tɔɔ̄dum pe. 14 Sɔ̄ epeera dɛ̄dɛɛ̄ nu a bee ɛrɛ, gbɛnɛ kii bee dɔ lo barasī, e a bɔātɛ̄ etɔɔ̄ bu naɛ̄nu. 15 A bee sinage wee tɔɔ̄ loo ziī nɛɛ alu lo buɛ̄, lo a bee ye yere ture bu ye uwe kɔ a tɔɔ̄loo gbo zi. 16 E a bee ye taɛ lo ede nuede zi* wee de, mɛ lɔgɔ nɛɛ naa nɛ ye.
17 “Sɔ̄ esuāloo ye, a bee kɔ, ‘Ku nɛɛ na tɛ aa su loo tam sa aa nɛ nuede a wa gbɔɛ̄ loo, sɔ̄ m le akɛāma aa u loo lɛɛraloo! 18 M aakɛ̄ si loo na tɛ sa ye kɔ nɛ kɔ: “Tɛ, m esia pɔrɔ loo bunyɔɔ le olo. 19 Mm bɔnaloo kɔ alu ekure mɛ o nwiī. Su mɛ doodoo ziī pya o nɛɛtam.”’ 20 Nyɔɔwo, a bee aakɛ̄ sa pii ye tɛ. E sɔ̄ a bee lege kɛ̄ a binia, ye tɛ bee ye muɛ sa ye ɛrɛ toesaɛ̄ loo, e a teera sa ye pigara bahloo* sa ye kuɛ̄ nyɔɔnu loo. 21 Lo sɔ̄ ye nwiī bee ye kɔ nɛ kɔ, ‘Tɛ, m esia pɔrɔ pima bunyɔɔ le olo. Mm bɔnaloo kɔ alu ekure mɛ o nwiī.’ 22 Mɛ ye tɛ bee kɔ nɛ pya ye zooro kɔ, ‘Nwanaabah! su nyɔɔnyɔɔ bɛloo a lee kaāna nua wee yere ye loo, sa ye su nwīkpebah yere bah sa ye yere kpa ekaɛtɔ tɔ. 23 Suaanage nwiī nam a kuīka nua sa fɛ, e dooraa i denu sa ɛrɛ ɛɛbu, 24 nyɔnɛbee na nwiī ama ebee u, mɛ esiakɛ̄ le dum; ebee pe mɛ elua emuɛ ye.’ E ba bee bɔātɛ̄ e’ɛrɛ ɛɛbu.
25 “Lo sɔ̄ ye saaro bee le wii, mɛ sɔ̄ e’aara dee sa waɛloo tɔ, a bee dā muɛ̄ yɔɔ le yep. 26 Nyɔɔwo, a bee kue ziī pya zooro sa ye bip nu a gaa sira. 27 A bee ye kɔ nɛ kɔ, ‘O wuga e’obia lu, e o tɛ kɔ alu efɛ nwiī nam a kuīka nyɔɔbee a obia lu bu nwanaloo.’* 28 Mɛ bu ye bee biira sa a naa yiga eyii tɔ. Lo sɔ̄ ye tɛ bee lu sa bɔātɛ̄ ebara ye. 29 A bee ture nɛ ye tɛ kɔ, ‘Ɛp! M esiatam a nɛ bu gbɛnɛ-edo zua, e m sii a lɛɛbeekɛɛ̄ lɔgɔ sɔ̄, mɛ o sii mɛ nɛ kunɛ ziī nwiī pee kɔ m su nyɔɔnɛ pya na gbo ɛā ɛɛbu. 30 Mɛ aba sɔ̄ o nwiī a bee pee* dɛ̄dɛɛ̄ o nu nɛ pya kiā uwe obia lu, o fɛ nwiī nam a kuīka ye nɛ.’ 31 Lo sɔ̄, a kɔ ye nɛ kɔ, ‘Na nwiī, o wee mɛ le kpaɛ̄ dɛ̄dɛɛ̄ sɔ̄, e dɛ̄dɛɛ̄ nu m ɛrɛ lu olo. 32 Mɛ a lee kɔ i ɛɛŋa sa ɛrɛ ɛɛbu nyɔnɛbee o wuga nɛɛdam ebee u, mɛ esiakɛ̄ le dum; a bee pe mɛ elua emuɛ ye.’”