Tɔgɛ Pya O Gaa Nɔɛ̄ Baibol Kɛ̄ Enɔ Nu Akiiloo Bari Nyɔɔ Wa Loo Doo

Lokwa i dap wa yerebah nɛ kɔ ba a suā loo Jɛhova sa lu Pya Nɛɛ Kraist a agaloo, naale aba sɔ̄ i wa nyɔɔnɛ nɔnu na ba enɔ kaka ue a le bu Baibol a. (Mat 5:3; Hib 5:12–6:⁠2) Ba ɛrɛnage enɔ nu akiiloo Bari nyɔɔ wa loo.

Aā sɔ̄ o bɔātɛ̄ enyɔɔnɛ ye nɔnu, tɔgɛ nɛɛ o aa nɔɛ̄ Baibol kɛ̄ ekpɛ̄naloo ye enɔānu Baibol doo, sa ye yere mɛm loo lo edoo wo. (mwb18.03 6) Yere wa mɛm loo kɔ ba a yere kara lɛɛ ba ebɔātɛ̄ wa enɔānu nyɔɔ wa loo. Yerebah wa nɛ lo e’ɛrɛ pya nutam a le i dɔ intanɛt le kɛ̄ ba esu nɔānu doo. Baatɛ̄ wa nɛ kɛ̄ ba edap gbī pya aā aā nu alu eyere nyɔɔ jw.org le JW Broadcasting^® doo. Tɔgɛ wa kina kina kɛ̄ ebuū Baibol ziī ziī biradee doo, kɛ̄ ekpɛ̄naloo enɔānu bu bɔŋanaloo, le kɛ̄ egbītɛ̄ nu lo e’ɛrɛ ture akiiloo pya wa ebip doo. Yerebah wa nɛ kɔ ba a ɛrɛ ekɛɛrɛ nyɔɔ nu ba gaa nɔ.

SI EE VIDIO A KURA YEREBAH NƐ PYA O GAA NYƆƆNƐ NƆ BAIBOL KƆ BA A NƆ NU AKIILOO BARI NYƆƆ WA LOO, LƐƐ BUI AGARA PYA EBIP A NYƆƆNƐ AMA:

• 

  Bu mɛ sīdee na Neeta bee yerebah nɛ Jade kɔ a muɛ kɔ nɔnu eenyɔɔ aba suā ye ture a?

• 

  Ena a bee yerebah nɛ Jade lo eyiga kɔ a bɔloo sɔ̄ Jɛhova kɔ aa lu emaloo nɛɛ a naale o wa ale o dam a?

• 

  Ena Jade bee dābeeloo akiiloo ɛrɛ ekɛɛrɛ nyɔɔ nu a?