Tɔgɛ Nia Bu Pya Dɔɔ̄na Nua Biakɛ̄ Leelee

Na tɛ bee le yɛɛ pya tɛ tɔbari bu ziī tɔbari a kura United Church of Canada, nyɔɔwo, ziī ziī kaɛ a wee su na wuga nɛɛwa le mm ture tɔbari pya miɔŋɔ, sa i gbaa ye loo bie tɔbari sɔ̄ elua 11:00 a.m. [lɔɔrɛ]. E i wee nyɔɔnɛ i ka kii Tɔ Nɔnu Buɛ̄-mɛnɛ ye sɔɔ̄pie. Lo ama bee doo kɔ i dap nwaabah muɛ kee a le yɛɛ baɛ sīdee taāŋabah ama.

Na ka bee kɔ pya aā nu a gaa bee nɔ ama nɛ Bob le ye wa Marion Hutcheson lo ba bee le ye kaāna gbo, lo ba bee lunage Pya Ekeebee Jɛhova. Bu zua 1958 wuga Bob le Marion bee mɛ aara gbaāloo taa pya wa miɔŋɔ nɛɛdam kuma Divine Will International Assembly a bee lu e’ɛrɛ bu ɛrɛtaa biradee bie New York City. Nyaawo na m suā nu a bee wa su bah lo e’aara mɛ siā a, kerewo, lo asɛmbli lu ziī nu mm dap ibere bu na dum.

KƐ̄ PYA DƆƆ̄NA BEE MƐ TƆGƐ NIA LOO DOO BEE ƐRƐ PAH NYƆƆ DUA NƐƐ M LU BU DUM

Sɔ̄ m bee lege bu na lop le dɛrɛ zua, i wee kpɔā nam, naana pee, le zi. M bee gbī elu nɛɛ a doo pie loo kanu. Na ka bee kɔ ue ama nɛ ziī nɛɛ kanɛɛ bu bɔŋanaloo. Bu fɛgɛ a bee mɛ nyɛŋiabu kɔ i gaa tɔɔ̄ bu “kpɛdumɛ dee,” sa mɛ bip dua pah sisi gbɛnɛ tɔkpa bu gbɛnɛ-edo zua e’ɛrɛ nyɔɔ na gbanialoo kumaloo Jɛhova. (2 Tim 3:1) Nyɔɔwo, m bee biaɛfii kɔ mm le esi gbɛnɛ tɔkpa.

M bee lege aa bura nu m doo sɔ̄ m aa secondary school. Kereadoo m wee si uwe zue ue dɛ̄dɛɛ̄ Dee Nwīpinikaɛ le Deekaɛ, zue ue naa bee mɛ kpeloo, e mm bee kɛɛrɛ kɔ m dap si tam sɛmdee. E na tɛ le ye wuga nɛɛdam bee le aa mɛ zū kɔ m si tam ziī gbɛnɛ betam a le barasī Toronto. Wuga na tɛ bee le gbɛnɛ dɔ bu lo betam, nyɔɔwo m bee si.

Bie Toronto, m wee su gbɛnɛkpo sɔ̄ siātam sa tɔ̄manage kpaɛ̄ pya a naa taāŋabah Jɛhova, e lo ama bee doo kɔ m aa dap si enɔānu le tam zue ue eree sɔ̄ loo. Tua sɔ̄, m bee tɔɔ̄ kpaɛ̄ tɛ na tɛ lo a naa bee le Nɛɛ Ekeebee Jɛhova, mɛ sɔ̄ a u, m bee gbī dɔɔ̄na kɛ̄ m tɔɔ̄.

Pya butɔ Hutcheson lo ba bee mɛ aara kuma kɔnvɛnsɔn bu zua 1958 a, bee le doodoo na tɛ le ka. Ba bee kɔ m tɔɔ̄ wa kpaɛ̄ sa mɛ yerebah nɛ kɔ m nyim kiisī leere bu edɔɔ̄. Bu zua 1960, wa nwiī a kura John le mm bee gbaa liamaā. John bee bɔātɛ̄ esɛmdee, e lo ama bee mɛ yere mɛm loo kɔ m si tam zue ue eekɛ̄ m wee doo. Pya wuga a le bu lo bɔŋanaloo bee muɛ kɛ̄ m gaa bee kiisī leere bu edɔɔ̄ doo, e ba bee mɛ tubobaloo nua Theocratic Ministry School servant.a

M BEE ƐRƐ ZIĪ LE WA SA BƆĀTƐ̄ ESITAM SƐMDEE

Bu zua 1966, m bee ii Randi Berge alu nɛɛ sɛmdee a bɛamiā sa bee ɛrɛ taɛ lo esitam kɛ̄ ebɛɛ̄ le. Bu i nɛɛ kuūdɛɛ̄loo sɛkiut bee i ɛɛ loo, e a bee i yere mɛm loo kɔ i yerebah nɛ bɔŋanaloo a le Orillia, Ontario. Nyɔɔwo, i lap nu kii lo kɛ̄.

Aba sɔ̄ I bee ina Orillia, m bee nyɔɔnɛ Randi si tam sɛmdee dɛ̄dɛɛ̄ sɔ̄. Kɛ̄ a bee ɛrɛ mɛm doo bee mɛ yere mɛm loo! Sɔ̄ m bee su dɛ̄dɛɛ̄ na beenyiɛ siātam sɛmdee, m bee ɛrɛ ɛɛbu sɔ̄ m su Baibol daānu leere le sɔ̄ m muɛ kɛ̄ pya nɛɛ aa dābeeloo kaka ue doo. A bee lu kaāna leelee i nɛ kɔ i bee yerebah nɛ ziī dam le wa a le Orillia kɔ ba a nyaana baloo wa sīdee tɔɔ̄dum sa si tam nɛ Jɛhova.

I BEE NƆ AĀ MUƐ̄ UE SA KWABALOO KƐ̄ I KƐƐRƐ NU DOO

Sɔ̄ i bee si Toronto, m bee zɔ̄ŋia Arnold MacNamara, a bee lu ziī yɛɛ pya wuga nɛɛdam lo ba gaa bee zaāsī tam bie bɛtɛl. A bee i bip lo a le eniage i lo esitam sɛmdee bu keebee sīdee. Aba lo sɔ̄ m bee agara kɔ: “M sie, lo a naa lu Quebec lo!” Pɔrɔ ekɛɛrɛ pya nɛɛ Canada a wee kɔ beke ɛrɛ kumaloo pya a wee tɔɔ̄ barasī Quebec ba kɔ French bee mɛ ɛrɛ pah nyɔɔ. Lo sɔ̄ ama, pya nɛɛ bee le gaa bebe loo pya bɛbɛɛ lokwa Quebec dap tɔɔ̄ nyɔɔ ye loo aāloo Canada.

Arnold bee agara kɔ: “Quebec na aba kɛ̄ tɔ-naatam aa yere pya sɛmdee bu keebee sīdee ture anyaawo a.” M bee yiga aba lo sɔ̄ kɔ m sie. E m ebee suā kɔ Randi bee ɛrɛ taɛ lo esitam lo kɛ̄. Sɔ̄ esaa, m bee muɛ kɔ lo ama na ziī biaɛfii a lee eera lo i edoora bu i dum a!

Sɔ̄ i esua o’oo kaɛ nɔā muɛ̄ ue French sah, Randi le mm gbaāloo dɔɔ̄na dam le wa bee kii Rimouski, a dap lu 540 kilomita (336 mi) dee mmnyɔɔ loo kɛ̄ enaani wee sira aa li barasī Montreal. I bee ɛrɛ gbɛnɛ-edo nu enɔ, e lo ama bee sira kaāna sɔ̄ a bee lu ekɔ m buū pio nɛmuɛ̄ bie enɔānu. M bee kɔ elua kɔnvensɔn i ɛrɛ li, i ɛrɛ gbɛnɛ-edo “ostrich elu” taā m kɔ “pya a aa Austria elu.”

Bie Rimouski, dɔɔ̄na nia wuga nɛɛwa a sii iya dam bee i gbaaloo, gbaāloo wuga nɛɛdam le nɛɛwa Huberdeaus le baɛ pya wa miɔŋɔ nɛɛwa. Huberdeaus le ye wa bee bara ziī tɔ a ɛrɛ ɛrɛba tɛm, e dɛ̄dɛɛ̄ pya sɛmdee a tɔɔ̄ lo tɔ bee yerebah lo ekpɛ kpugi loo. I bee su tɔ ama kure Ɛɛ Tɔ, nyɔɔbee a bee lu etɛrɛ ɛɛ egba deesī lo tɔ le loo ye bābe. Nu alu 12 ale 14 nɛɛ wee tɔɔ̄ lo kɛ̄. Doodoo pya sɛmdee bu keebee sīdee, Randi le mm wee si uwe zue ue lɔɔrɛ, sɔɔ̄pie, le loo uunɛ, nyɔɔwo bu i bee ɛɛ kaāna kɔ i wee ɛrɛ nɛɛ egbaa i loo si uwe zue ue kere alu loo uunɛ sɔ̄ snow aa dɔɔ.

I bee tɔɔ̄ waɛloo pya sɛmdee a bɔ ture nyiɛ loo ama mmɛ lo dɔ ba bee le doodoo pya i butɔ. Pio sɔ̄ i wee kwa miā sa tɔɔ̄ kpaɛ̄ ale i wee gbaaloo bui nuede de. Ziī wuga nɛɛdam a bee i le yɛɛ bee le nɛɛ a para uɛ yɔɔ, nyɔɔwo i wee uɛ yɔɔ sa yeb gbɛnɛ-edo uunɛ Dee Nwīpinikaɛ.

Gbɛnɛ-edo pya a wee tɔɔ̄ Rimouski bee ɛrɛ taɛ lo enɔ Baibol! Bu nu alu o’oo zua, bu i bee ɛɛ sɔ̄ i bee muɛ gbɛnɛ-edo pya ba bee nɔ Baibol nyim kiisī sa liamaā, sa i bee ɛrɛ 35 pya zue ue bu i bɔŋanaloo.

A bee lu ekpɔā i leere doodoo pya zue ue bie Quebec. I bee muɛ kɛ̄ Jɛhova i yerebah nɛ kɔ i dap si tam zue ue sa i nɛ pya nu a i bɛɛ̄ bu namloo doo. Gbaāloo wo, i bee nɔ lo ewereloo pya nɛɛ a kɔ French. Wa muɛ̄ ue, le wa sīdee doonu bee doo kɔ i werenageloo kɛ̄ pya dɔɔ̄na barasī wee doo nu doo.—2 Kɔr 6:13.

Sɔ̄ ii bee ɛmadɛɛ̄, tɔ-naatam bee i kɔ nɛ kɔ i kii buɛ̄ Tracadie a le dee kɛ̄ enaani wee sira aa loo New Brunswick. Lo ama bee lu nu finiabah i nɛ nyɔɔbee i ebee bara tɔ sa m ebee nyɔɔnɛ ziī tɔ-kpa biraloo kɔ m tɔgɛe nu wa tɔ-kpa bu pio kere sɔ̄. Gbaāloo wo, pio pya i wee nɔɛ̄ Baibol ebee lu pya ba zue ue aā, sa i aa bee top Tɔ Nɔnu Buɛ̄-mɛnɛ.

Lo tah kaɛ, i bee yere kara kumaloo kiā ama sa i bee si Tracadie lo a bee lu kee loo Rimouski. I bee biaɛfii kɔ kuma sɔ̄ Jɛhova gbī kɔ i kii li a, i gaa le si. I bee do Jɛhova ɛp sa i muɛ kɛ̄ a lɛɛ ziī ziī nu ebee i gbanasī doo. (Mal 3:10) Kuma sɔ̄ Randi bee ɛrɛ le gbanialoo kumaloo Jɛhova, para su loo nwaana zɔɔ, sa lu nɛɛ a su nu warɛ a, bee doo kɔ lo kiā a waɛ.

Bee le aba Robert Ross na a bee lu nɛɛ kanɛɛ bu i aā bɔŋanaloo a. A bee nyɔɔnɛ ye wa Linda si tam sɛmdee bie lo kɛ̄, e ba bee biaɛfii lo etɔɔ̄ lo kɛ̄ sɔ̄ wa tua nwiī bee mɛā. Kere sɔ̄ ba aa bee kuūdɛɛ̄loo wa gbagbara nwiīnɛɛdam, ba bee yere mɛm loo Randi le mm kaāna tɛ̄maloo kɛ̄ ba i su baɛ bah suā doo, kɛ̄ ba ɛrɛ mɛm sa bɛa miā bu tam zue ue doo.

BIĪ A LE BU SI TAM ƐRƐGEBAH KƐ̄ EBƐƐ̄ LE

Sɔ̄ ii bee ɛmadɛɛ̄ bee lu ekɔ i si tam kuūdɛɛ̄loo sɛkiut sɔ̄ i esiatam sɛmdee loo baɛ zua bie Tracadie sah. I bee si tam bu pya bɔŋanaloo a kɔ muɛ̄ ue Beke loo ɛrɛba zua, e sɔ̄ esaa bee lu e’obara i yere ture sɛkiut ba kɔ French li Quebec. Léonce Crépeault alu i district overseer li Quebec wee mɛ kaɛgɛ loo na ekɔaue. Mɛ sɔ̄ esaa, a wee bip kɔ: “Ɛrɛge kɛ̄ o dap kwabaloo doo sa a waɛ esu yere bu dogo ni?”b Kɛ̄ a mɛ kɛɛrɛbu loo doo ama bee doo kɔ m sere ekɛɛrɛ nyɔɔ kɛ̄ m doodoo lokwa na tɔgɛnu waɛ edābeeloo.

Ziī tam a bee lu enɛ mɛ a naa ibere mɛ na lo m bee ɛrɛ bu zua 1978 bie “Victorious Faith” International Kɔnvensɔn li Montreal. M bee si tam tɔ tam bui nuede. I bee ɛmadɛɛ̄ 80,000 pya nɛɛ, e ebee lu enɔɔ aā sīdee elu esu wa nɛā nuede. Dɛ̄dɛɛ̄ nu bee lu aā, nu ebūma nu, pya nu ebui, le kɛ̄ ebui doo. I bee ɛrɛ nu alu 20 gbɛnɛ ka fah a wee doo kɔ nu a fiitɔɔ lo a wee gbe pio sɔ̄. Lɛɛ a gae lu tua dee lo doonu bɔātɛ̄, ii bee dap yii kɛ̄ a bee lu etɔɔ̄ ɛrɛ lo doonu mmɛ sɔ̄ elua uunɛ, nyɔɔbee ebee lu enɔɔ kɔ ba etɔɔ̄ lo kɛ̄ bira ekɔ. E i ɛrɛ eyere miā loo nuede elu ede lɔɔrɛ lɛɛ dee gae yira! Loo i bee ɔ, kerewo, m bee nɔ gbɛnɛ-edo nu aāloo kɛ̄ pya a bee su loo nɛ lo esiatam bee su mɛm le ɛɛbu siā lo tam doo, le kɛ̄ ba aabaloo lo tam leere doo. I bee tɔɔ̄ waɛloo zii kaāna e lo ama doo kɔ i lege aa lu gbo mmɛ nii’ee. Ɛp dua ɛɛbu i bee ɛrɛ lo esi keebee kɔnvɛnsɔn a bee lu e’ɛrɛ bie Quebec, taɛ kɛ̄ aa bee lu etɛ̄ŋaloo pya wuga aābu zua 1940 mmɛ 1960 doo a!

M bee nɔ gbɛnɛ-edo nu aābah pya nɛɛ le mm bee le gaa baɛbee lo gbɛnɛ kɔnvensɔn bie Montreal. A ɛrɛ ziī zua, David Splane, lo a le yɛɛ Eku A Baɛbee anyaawo bee baɛbee lo kɔnvensɔn. Sɔ̄ i bee sikɛ̄ ɛrɛ kɔnvensɔn, bee lu ekɔ m baɛbee lo kɔnvensɔn. E David bee mɛ yerekpotɛ̄ kaāna.

Bu zua 2011, sɔ̄ Randi le mm esua 36 zua siātam kuūdɛɛ̄loo sɛkiut sah, bee lu ekue mɛ kɔ m tɔgɛnu Tɔkpa A Le Nɛ Pya Kanɛɛ Bu Bɔŋanaloo. I bee ma nyɔɔ 75 keekee daɛ bu baɛ zua, mɛ i epiaga naa pe. Sɔ̄ ziī ziī kaɛ e’ina kuma, bu pya kanɛɛ wee ɛɛ kaāna nyɔɔbee ba muɛ kɛ̄ Eku A Baɛbee gaa wa kuūdɛɛ̄loo bu edɔɔ̄ doo.

Sɔ̄ esaa, m bee tɔgɛ nu bie Tɔkpa A Le Nɛ Pya Zue Ue Buɛ̄-mɛnɛ. Pya a bee si lo tɔkpa wee ɛrɛ e’ɔaloo nyɔɔbee gbɛnɛ-edo nu edoo a wa le bah, lo a le: ɛŋɛtɛ̄kɛ̄ nɔnu loo ɛrɛba awa ziī zii biradee, su taa awa daānu edoo alu enɛ wa dɛ̄dɛɛ̄ loo uunɛ, sa aabaloo nia ale o’oo nu edoo alu enɛ wa bu ziī ziī kaɛ. Mda le dɔɔ̄na nɛɛ a wee wa tɔgɛ nu bee kɔ ba naale bee dap doo dɛ̄dɛɛ̄ nu ama lo Jɛhova naa bee wa yerebah nɛ. Naale e’ibere mɛ kɛ̄ a bee lu nyɛŋialoo pya a bee si lo tɔkpa doo sɔ̄ ba bee muɛ kɔ ba doo emanyɔɔ kɛ̄ ba bee ɛmadɛɛ̄ doo sɔ̄ ba dɛɛa nyɔɔ Jɛhova.

TƆTƆGƐ NIA BU PYA DƆƆ̄NA NUA BIAKƐ̄ LEELEE

Kɛ̄ na ka bee ɛrɛ nia bu pya dɔɔ̄na doo, bee doo kɔ pya a wee nɔɛ̄ Baibol a nyim kiisī leere, e a bee doonage kɔ na tɛ a bɔātɛ̄ ɛp kaka ue bu le sīdee. Sɔ̄ taa biradee etɛ̄na aā sɔ̄ na ka bee u, a bee i ɔbɛ sɔ̄ na tɛ bee lu Tɔ Nɔnu Buɛ̄-mɛnɛ sɔ̄ aa bee lu enɛ ekɔaue taɛ kɛ̄, e a bee kiisī lo esi enɔānu bu 26 zua. Kereadoo na tɛ naa bee liamaā, pya kanɛɛ bee mɛ kɔ nɛ kɔ na tɛ na alu tua nɛɛ a wee lu enɔānu ziī ziī kaɛ a.

Na ka bee lu kaāna le edoba mɛ nɛ le pya na wuga nɛɛwa. Taa pya na wuga nɛɛwa le wa dam gaa si tam nɛ Jɛhova bu bɔ ture nyiɛ loo. Baɛ aba gaa si tam bie tɔ-naatam a le Portugal, e elua bie Haiti.

Randi le mm gaa si tam sɛmdee bu keebee sīdee anyaawo bie Hamilton, Ontario. Sɔ̄ i bee le aa si tam kuudɛɛ̄loo sɛkiut, a wee i nia enyɔɔnɛ pya dɔɔ̄na si uwe zue ue sa tɔgɛ nu pya nɛɛ. Mɛ bu i ɛɛ anyaawo sɔ̄ i muɛ pya i wee tɔgɛ nu a gaa taāŋabah Jɛhova. E sɔ̄ i yii gbo pya wuga nɛɛdam le nɛɛwa bu bɔŋanaloo a nɛ i e’agaloo sɔ̄ i muɛ kɛ̄ Jɛhova wa yerebah nɛ sɔ̄ nu wa lee loo le sɔ̄ nu wa bee loo doo.

Sɔ̄ i kɛɛrɛbu sɔ̄ akii adumɛ, i tɔgɛ nia loo kɛ̄ gbɛnɛ-edo nɛɛ bee i ɛrɛ nia bu doo. Lo ama edora kɔ i piiga lo etɔgɛ ‘kaāna nia’ bu pya dɔɔ̄na, wa yere mɛm loo kɔ ba a nyim kiisī bu edɔɔ̄. (2 Kɔr 7:6, 7) Bu edoba, bu ziī butɔ, wa ka, wa nwiīnɛɛdam le wa nwiīnɛɛwa, bee le bu esiatam mmɛɛ sɔ̄. M bee bip wa tɛ lo a le ebee kɛɛrɛge lo eyii bu tam sɛmdee. A bee mɛ agara nɛ kɔ a gaa yereekpotɛ̄ taa pya sɛmdee. Nyɔɔwo, m bee ye bip kɔ: “O dapge wa yerekpotɛ̄ ee Jɛhova ni?” M bee ye yere mɛm loo kɔ a doo nu ba gaa doo. A bee lu nɛɛ sɛmdee sɔ̄ ini’ī enɔɔ̄ etɛ̄na.

Randi le mm ekiisī lo etɔgɛ “dɛ̄dɛɛ̄ sɔ̄ eku nyɔuwe a gaa lu” nu akiiloo “ekpo . . . baɛbah” Jɛhova, e i bɛābu kɔ ba gaa le ɛrɛ ɛɛbu bu ye esiatam dookɛ̄ ili e’ɛrɛ doo.—Yɔɔ 71:17, 18.