O Suāge Ni?

Mɛ dua fah na kookoo nɛɛ Etiopia bee le bu sɔ̄ Filip bee ye yii kpaɛ̄ a?

BEE ue a kura “fah kɛnɛkɛ̄” alu esu kɔā ue bu New World Translation dap kiiloo ɛrɛgebah bee fah a mɛā doo wo. (Doonu 8:​28, 29, 38) Kerewo, a bee kɔ lo nɛɛ Etiopia bee le bu fah kɛnɛkɛ̄ a kuīka ee fah kɛnɛkɛ̄ ba wee beā nɔ̄ ale biābii tee lo a naa wee kuīka gbɛnɛ. Naa ɛp pio nu anua alu ekɔ doo wo ama.

Lo nɛɛ Etiopia bee le gbɛnɛ nɛɛ bu bɛbɛɛ a bee aa kɛ̄ a binia. A bee le “nɛɛ a ɛrɛ gbɛnɛ ekpo kɛɛ̄ Kandasi wa-mɛnɛ pya Etiopia, nɛɛ anua nɛɛ-bee loo dɛ̄dɛɛ̄ ye nu zɔ.” (Doonu 8:27) Kɛ̄ a bee lu Etiopia a dee kere na Sudan le kɛ̄ alu dee kerekɛ̄ loo Ijipt anii’ee. Kere lo nɛɛ naa bee yiibu aba ziī ka fah sɔ̄ a bee le nyɔɔ lo kiā, a bee dap aara bɛrɛ le pya dɔɔ̄na nu alu ebɛɛ̄. Pio fah a wee lu esu ɔma pya nɛɛ bu tua sɔ̄ o’oo tup zua C.E. na kpe a wee ɛrɛ nia ekaɛtɔ lo a wee lu esu nu kpeg loo ye kɛ̄ ɛŋɛtɛ̄. Kpa a kura Acts—An Exegetical Commentary kɔ: “Dua fah kɛnɛkɛ̄ ama wee ɛrɛ dee a dap lu eyere pya dɔɔ̄na nu bu, lo a wee doo kɔ si kiā a kpeloo, e a wee dapnage lu e’aara siā kiā a nyɔɔ dɛɛ̄.”

Lo nɛɛ Etiopia aa bee buū kpa sɔ̄ Filip bee ye lu loo. Lo e’ɛma kɔ “Filip teera ye pii, sa dā [kookoo nɛɛ] a gaa buū kpa nɛɛ zue ue Aisaia.” (Doonu 8:30) Fah kɛnɛkɛ̄ ama naa bee lu ekwa kɔ a nwaabah teera. Nyɔɔbee lo fah kɛnɛkɛ̄ gaa bee kɛɛrɛloo teera a, a bee doo kɔ lo kookoo nɛɛ a dap buū nu sa doonage kɔ Filip a dap teā tɔ ye tura.

Lo nɛɛ Etiopia bee “bara Filip kɔ alu wee ye yɔe e’ɛŋɛtɛ̄” kɛ̄. (Doonu 8:31) Pya a wee ɔp fah kɛnɛkɛ̄ a wee lu esu biā bii tee, wee yira yah bu. Kerewo, fah kɛnɛkɛ̄ a wee lu esu siā kiā wee bɛɛa sa ɛrɛ dee lo a bee doo kɔ lo kookoo nɛɛ Etiopia le Filip a ɛrɛ kɛ̄ ɛŋɛtɛ̄ bu lo fah.

Bu sīdee a gbaaloo nu alu e’ɛm bu kpa Doonu pya Nɛɛ-lɛɛratam 8 ekobee lo alu ue a aabah Bari, gbaāloo pya nu alu egbī muɛ, bu aā dee ama pya i kpa tɔgɛ kɔ fah kɛnɛkɛ̄ lo kookoo nɛɛ Etiopia bee yii bu bee lu lo a bee kuīka sa ɛrɛ dee, e a naale lo a wee lu esu beā nɔ̄ ale biā bii tee.