Jɛhova Bee Ɛrɛ Egerebu Loo Jona

Pya nɛɛ a bee le buɛ̄ Nineve bee lu pya bag dogo. Jɛhova bee kɔ nɛ nɛɛ mɔmanudɛɛ̄ Jona kɔ a si Nineve wee zuura wa bahtɔ̄ lokwa ba kiiya aaloo wa bag dogo. Mɛ Jona bee teera kii dɔɔ̄na kɛ̄. A bee yii bu ziī gbɛnɛ fah maā a gaa kii Tarshish.

Sɔ̄ ba le bu lo fah maā gaa kii li, gbɛnɛ fii efɔp bee dɔ, e bɔɔ bee aa pya a gaa ɔp lo fah maā. Ba bee yere kara nɛ wa bari sa bip kɔ: ‘Ena anua gbɛnɛ fii efɔp ama gaa dɔ a?’ Lo sɔ̄ Jona bee wa kɔ nɛ kɔ: ‘Ɛɛ mda na alu bah a. M maa teera aaloo esitam Jɛhova bee mɛ lɛɛra. Tobaa mɛ tɛrɛ bu gbɛnɛ pɛnɛ ama, e fii efɔp ama e’ɔp.’ Pya a gaa ɔp lo fah maā naa bee gbī etop Jona tɛrɛ maā, mɛ a bee kɔ agɛrɛ kɔ ba a topbe ye tɛrɛ maā. E sɔ̄ ba bee ye top lɛɛ fah tɛrɛ maā, lo fii efɔp bee ɔp.

Jona bee kɛɛrɛ kɔ a gaa le u e, mɛ kuma sɔ̄ aa dɛp kii tɛ̄kɛ̄ pɛnɛ a bee le aa yere kara nɛ Jɛhova. E Jɛhova bee yere ziī gbɛnɛka bari, e lo bari bee yɔgara Jona mɛ a naa bee ye fɛ. Sɔ̄ Jona bee le bu edɛ lo bari, a bee yere kara kɔ: ‘M yira yii kɔ m gbaɛ̄ a tɔ̄loo dɛ̄dɛɛ̄ sɔ̄.’ Jɛhova bee doo kɔ Jona a tɔɔ̄dum bu lo bari loo taa biradee, lɛɛ lo bari gbɔ Jona sere kagarakɛ̄.

Kuma sɔ̄ Jɛhova ekpɔā Jona a, lo ama kurage kɔ a naale ekii Nineve wee sitam a bee ye lɛɛra ni? Eeye doo pippip. Jɛhova bee sikɛ̄ kɔ nɛ Jona kɔ a obia kii Nineve. Jona bee gbaɛ̄tɔ̄ lo sɔ̄ ama. A bee kii Nineve wee zuurabahtɔ̄ pya lo buɛ̄ sa kɔ: ‘40 biradee aā anyaawo, elu egbeesī Nineve.’ Mɛ nu a naa bee lu e’ɛmadɛɛ̄ bee sira, pya nɛɛ Nineve bee nyaana wa sīdee tɔɔ̄dum. E wa mɛnɛ-buɛ̄ bee wa kɔ nɛ kɔ: ‘Yereaa kara nɛ Bari, sa bui kiiya. Naa dapba a naale egbee i sī.’ Sɔ̄ Jɛhova bee muɛ kɛ̄ ba kiiya doo, a naa bee gbeenasī lo buɛ̄.

Jona bee ɛrɛ gbɛnɛ saŋ kɔ Jɛhova naa gbeesī Nineve. Naa kɛɛrɛ kɛ̄ Jɛhova bee ɛrɛ egerebu loo Jona sa ye tɔgɛ toesaɛ̄ kumaloo doo, mɛ Jona naa dap tɔgɛ toesaɛ̄ kumaloo pya nɛɛ a le buɛ̄ Nineve. Taāwo, a bee ɛŋɛtɛ̄ kɛ̄-ee loo lo buɛ̄ kɛɛ̄ zū-ekɔp-te, e sɔ̄ lo te u, a bee ɛrɛ gbɛnɛ saŋ. Lo sɔ̄ Jɛhova bee kɔ nɛ Jona kɔ: ‘Zū-ekɔp-te ama kuī a loo ee pya nɛɛ a le Nineve lo m bee tɔgɛ toesaɛ̄ loo sa doo kɔ ba a tɔɔ̄dum.’ Ena i nɔ aāloo a? Nu i nɔ na kɔ, pya nɛɛ Nineve bee kuī loo Jɛhova ee te.