Nyimɛ I Kari Bu Tam Zue Ue—Bɔātɛ̄ Kɔnia Sɔh Bu Sīdee Edoo Kɔ O Dap Zue Ue

Jizɔs bee dap zue ue nɛ waa Sameria bu bugia nyɔɔbee a bee bɔātɛ̄ tɛ̄maloo eyɔ ye kɔnia sɔh. Bu mɛ sīdee na i dap nyimɛ i kari bu enyɔɔnɛ pya nɛɛ ii suāloo kɔnia sɔh ani?

• Lu fɛgɛ sa kɔ ue nɛ pya nɛɛ. Kere loo Jizɔs ebee ɔ, a bee bɔātɛ̄ ye ekɔaue tɛ̄maloo ebara maā e’ɔ̄. Nyɔɔwo, o dap bɔātɛ̄ tɛ̄maloo le ba kana muɛ̄ le kɔ nu akiiloo kɛ̄ budee mɛā doo, ale ɛrɛgeba nu a gaa sira lo barasī. Nyɛŋiabu kɔ, tuatua nu o seea sī na edasī ye nyɔɔnɛ kɔnia sɔh, nyɔɔwo, kɔ nu akiiloo ɛrɛgeba nu edana taɛ lo nɛɛ. O aa pee beenyiɛ a lo a le a naa kɔ lɔgɔ nu. Pii dɔɔ̄na nɛɛ. Bara kɔ Jɛhova a nɛ a e’agaloo.​—Neh 2:4; Doonu 4:29.

• Suā sɔ̄ a lee eyere le yereue yɛɛ, mɛ o aa gbara. Doo kɔ lo kɔnia sɔh a lu kina kina. Lo o su bah ekpo daā, bu lo nɛɛ dap biira sa a naale egbīna ekɔ lɔgɔ ue. O aa pee beenyiɛ a lo a le lo kɔnia sɔh ina kuma sɔ̄ o sii ye dap zue ue nɛ. Lo a aga a bah lo ezue ue sɔ̄ oo bee kpɛ̄naloo, nɔ kɛ̄ enyɔɔnɛ nɛɛ kɔnia ue doo e a naale doodoo bee o gaa gbī ezue ue ye nɛ. [Bira sa kɔnia ue nyɔɔ lo Tua vidio.]

• Piiga lo ekwa dee nɛ oloo lo ezue ue tɛ̄maloo ekɔ o yira siā bu sīdee a lee, lo a dap zū nɛɛ a gaa a gbaɛ̄tɔ̄loo kɔ a gbī edā nu lo ue kura. Jizɔs bee kɔ ue a doo kɔ lo waa Sameria a bip ebip. Bee le sɔ̄ a gaa agara ebip lo wa na a ye zue ue a. [Bira sa kɔnia ue nyɔɔ eree Baɛ vidio, lɛɛ o bira sa kɔnia ue nyɔɔ lo eree Taa vidio.]