Ii Le Aba Ii Doo Pippip

1-2. (a) Ena anua i dap kɔ ii le aba ii sɔ̄ i le bu taāŋa a? (b) Ena i nɔ bu ekobee ue ama a?

SƆ̄ I le bu gbɛnɛ taāŋa, a dap i tɔɔ̄loo kɔ aba ii le bu gbɛnɛ biira kuɛ. Kerewo, ii le aba ii, sɔ̄ i le bu taāŋa. I Tɛ a le li bunyɔɔ lo a i wereloo muɛ pya taāŋa i gaa tɛɛ̄ bu sa yiranage yii kɔ eyerebah i nɛ. Bu wereloo, Jɛhova yira yii nɛ pya ye zooro a ye tɔɔ̄ agara nɛ kɔ: “M gaa le yerebah a nɛ.”—Ais 41:10.

² Ekobee ue ama ebaatɛ̄ kɛ̄ Jɛhova wee i yerebah nɛ doo (1) tɛ̄maloo ebaɛ i loo, (2) tɛ̄maloo enɛ i nu a i bɛɛ̄, (3) tɛ̄maloo ekpega i, le (4) tɛ̄maloo egbɔ̄ i nyiɛ. Jɛhova kɔ i nɛ kɔ kaɛlɛɛ ɛrɛgebah taāŋa i gaa tɛɛ̄ bu bu dum, a naale e’ibere i doo pippip. A naale elɛɛ i bahloo bie. Nyɔɔwo, ii le aba ii doo pippip.

JƐHOVA WEE I BAƐLOO

3-4. Bu mɛ sīdee na Jɛhova wee i baɛloo a? (Le-yɔɔ 48:14)

³ Buū Le-yɔɔ 48:14. Jɛhova suā kɔ ii le edap baɛloo aba ii, le kɔ i gbī kɔ alɛ a baɛ i loo. Bu mɛ sīdee na Jɛhova gaa baɛloo pya a ye taāŋabah anii’ee a? Ziī sīdee a doo wo na tɛ̄maloo Baibol. (Yɔɔ 119:105) Tɛ̄maloo ye Muɛ̄ Ue, Jɛhova yerebah i nɛ kɔ i dap biaɛ nu fii leere sa ɛrɛ pya elap dogo lo edoo kɔ i ɛrɛ ɛɛbu anyaawo le dum anaatah li deesī.a Bu edobah, a tɔgɛ i kɔ i aaloo pɔrɔ nɛ pya dɔɔ̄na, sa i aa su pɔrɔ nu ba bee i doo loo biea nyiɛ i, le kɔ i kɔ kaka bu dɛ̄dɛɛ̄ nu i doo sa wereloo pya dɔɔ̄na kaāna aā taɛ bu i beenyiɛ. (Yɔɔ 37:8; Hib 13:18; 1 Pit 1:22) Sɔ̄ i doo pya nu ama, edoo kɔ i lu le tɛ̄ ale le ka, le dam ale le wa, le le gbo.

⁴ Bu Baibol, Jɛhova kɔ nu a bee siraloo pya nɛɛ a beenage ili lo ba bee tɛɛ̄bu keekee taāŋa. (1 Kɔr 10:13; Jem 5:17) Lo i buū nu a bee siraloo pya nɛɛ ama sa wa nɔnu aāloo, i ɛrɛ biī aāloo bu baɛ sīdee. Tuatua, edoo kɔ i muɛ kɔ naale aba ili na a le bu taāŋa a, mɛ pya dɔɔ̄na ebee tɛɛ̄nage bu dua taāŋa a le doo wo sa bee dap egerebu tāma tɛ̄maloo yerebah Jɛhova. (1 Pit 5:9) Eree baɛ, edoo kɔ i nɔ pya nu eyerebah i nɛ kɔ i egerebu bu i taāŋa sa lenage bu ɛɛbu.—Rom 15:4.

5. Ba mɛɛ na Jɛhova wee i su baɛma loo nyɔɔ dee dum ama a?

⁵ Jɛhova wee sunage pya i wuga nɛɛdam le nɛɛwa bu yira i baɛma loo.b Bu edobah, pya kuūdɛɛ̄loo sɛkuit wee i inaloo aā ziī sɔ̄ yii ziī lo eyere i mɛm loo. Wa ekɔaue wee yere mɛm loo i yira sa doo kɔ i tɔɔ̄ bu gbaaloo. (Doonu Pya Nɛɛ Lɛɛratam 15:40–16:5) Pya kanɛɛ a le bu bɔŋanaloo wee piiganage lo eyerebah nɛ ziī ziī ii kɔ i tɔɔ̄ waɛ loo Jɛhova. (1 Pit 5:​2, 3) Pya tɛ le ka wee tɔgɛ nu pya wa nwiī kɔ ba a wereloo Jɛhova, sa wa tɔgɛ kɛ̄ ba dap biaɛ nu fii bu sīdee suānu le loo doo, sa ɛrɛ lele elap dogo. (Kam 22:6) E pya wuga nɛɛwa a agaloo bu edɔɔ̄ wee yerenage bah nɛ pya wuga nɛɛwa a le zege tɛ̄maloo esere le edobah wa nɛ, sa wa nɛ zuurabahtɔ̄ suānu le loo, sa wa yerenage mɛm loo.—Taitɔs 2:​3-5.

6. Ena i ɛrɛ edoo lokwa i dap ɛrɛ biī aāloo baɛloo Jɛhova a?

⁶ Jɛhova edoora dɛ̄dɛɛ̄ nu a kuu alɛ lo edoo tɛ̄maloo enɛ i dɛ̄dɛɛ̄ nu ebaɛ i loo lokwa i dap biaɛ nu fii leere sa ɛrɛ ɛɛbu bu dum. Bu mɛ sīdee na i dap tɔgɛ nia loo dɛ̄dɛɛ̄ nu Jɛhova edoora i nɛ a? Kam 3:​5, 6 kɔ: “Ture nyiɛ loo Jɛhova tɛ̄maloo dɛ̄dɛɛ̄ o beenyiɛ, e o a ture nyiɛ loo oloo suā bu-kɛ̄-ue.” Lo i doo wo, “alɛ gaa le doo kɔ dɛ̄dɛɛ̄ [i] nwī dee a lera,” lo a kura kɔ, alɛ gaa le yerebah i nɛ kɔ i aa dɔbu gbɛnɛ-edo nu eyere i taāŋa loo bu dum sa ɛrɛ ɛɛbu. I doo Jɛhova yaa kaāna kɔ a suāloo ziī ziī ii leere sa i wereloo mmɛ kɛ̄ a i nɛ zuurabahtɔ̄ a bɔloo ziī ziī ii!—Yɔɔ 32:8.

JƐHOVA WEE I NƐ PYA NU A I BƐƐ̄

7. Bu pio amunu sīdee na Jɛhova wee nɛ nu a i bɛɛ̄ a? (Pya Filipai 4:19)

⁷ Buū Pya Filipai 4:19. Gbaāloo baɛloo bu edɔɔ̄ lo Jɛhova gaa i nɛ, a nɛnage leelee i epiaga lo e’ɛrɛ nuede, nu eyaa, le tɔ etɔɔ̄ bu. (Mat 6:33; 2 Tɛs 3:12) Kereadoo alu nu a wee sira kɔ nɛɛ wee bura kɛ̄ etɛɛ̄ doo ɛrɛ pya nu ama, Jɛhova naa gbī kɔ i bura gbɛnɛ. (Buū study note a nyɔɔnɛ ue a le bu Matiu 6:25.) Ena anua a? Nyɔnɛbee ilii Tɛ naale elɛɛbahloo pya a ye tɔɔ̄ agara nɛ sɔ̄ ba le bu taāŋa. (Mat 6:8; Hib 13:5) Sɔ̄ a i kɔ nɛ kɔ ekuūe i dɛɛ̄loo, i dɛrɛ ye nyiɛ nyɔɔ mmɛnɛ sa yiga kɔ edoo nu a i kɔ nɛ.

8. Ena Jɛhova bee doo nɛ Devid a?

⁸ Naa kɛɛrɛbu loo sīdee Jɛhova bee yerebah nɛ Devid. Bu pya zua Devid le pya ye nɛɛ gaa bee teera nɛ sī nɛ dumɛ nyɔɔ taāŋa Sɔɔl, Jɛhova bee wa nɛ nu a wa bɛɛ̄ lo etɔɔ̄dum. Bu sɔ̄ Devid gaa bee kɛɛrɛbu loo kɛ̄ Jɛhova bee ye kuūdɛɛ̄loo bu pya zua ama doo, a bee ɛm kɔ: “M bee le aā, e nyaawo m e’anna; mɛ m sii muɛ nɛɛ kaāna dogo alu ekiī bie, ale pya ye miɔŋɔ ba gaa bara fituru.” (Yɔɔ 37:25) Doodoo Devid, olo edabanage muɛ sɔ̄ Jɛhova nɛ nu a bɛɛ̄ olo ale pya o wuga nɛɛdam le nɛɛwa sɔ̄ kɛ̄tɔɔ̄ bee aga.

9. Bu mɛ sīdee na Jɛhova nɛ nu pya ye nɛɛ anii’ee sɔ̄ bugia siranu sira a? (Ɛpnage foto.)

⁹ Jɛhova gaa nɛnage nu a bɛɛ̄ pya ye nɛɛ sɔ̄ bugia siranu sira. Bu edobah, sɔ̄ kii bee dɔ bu tua sɔ̄ o’oo tup zua a, pya wuga nɛɛdam le nɛɛwa ba aa keekee barasī bee dɔɔ̄ nu nɛ pya wa wuga a le bu ebɛɛ̄. (Doonu Pya Nɛɛ Lɛɛratam 11:​27-30; Rom 15:​25, 26) Pya nɛɛ Bari anii’ee gaa yerenage bah nɛ pya wa wuga nɛɛdam le nɛɛwa ba le bu ebɛɛ̄. Sɔ̄ bugia siranu sira, Jɛhova wee zū pya ye nɛɛ kɔ ba a dɔɔ̄ nuede, maā, nu eyaa, le pie nɛ pya a le kɛ̄ bugia siranu sira. Pya wu be wee sikɛ̄ sitam loo tɔ pya nɛɛ le pya Tɔ Nɔnu Buɛ̄-mɛnɛ a bee lu egbee. E pya zooro Jɛhova wee nwaabah yere mɛm loo sa gbɔ̄nyiɛ pya a peere wa nɛɛ le pya wa tɔ gbesī lokwa ba dap kiisī lo etaāŋabah Bari.c

10-11. Ena o nɔ aāloo nu a bee siraloo Borys a?

¹⁰ Jɛhova dɔɔ̄nage nu nɛ pya a sii ye taāŋabah. Bu aba lo sīdee, ili i gbīnage pya sīdee lo elu fɛgɛ loo pya a naa nyɔɔnɛ i taāŋabah Jɛhova. (Gal 6:10) Sɔ̄ i doo wo, gbɛnɛ-edo sɔ̄ a wee doo kɔ a taɛ wa enɔ nu akiiloo Jɛhova sa suānage loo ili. Doo i naa ɛp nu a bee siraloo Borys a tɔɔ̄ Ukraine, lo alu nɛɛ a wee le bee ziī tɔkpa a le lo kɛ̄. Kereadoo Borys naale Nɛɛ Ekeebee Jɛhova, a wee lu fɛgɛ loo pya miɔŋɔ Ekeebee sa nwadɛɛ̄ wa yira. Sɔ̄ Borys bee biaɛfii lo eteera aa be kii kɛ̄ nɔ̄ naa ina, pya i wuga bee ye yerebah nɛ. Sɔ̄ esaa, Borys bee si Doonu Nyɛŋiabu Loo Luh Kraist. Sɔ̄ Borys nyɛŋiabu loo dɛ̄dɛɛ̄ nu pya wuga bee ye doo nɛ, a bee kɔ: “Pya Ekeebee bee mɛ lu fɛgɛ loo kaāna sa mɛ kuūdɛɛ̄loo. M doo yaa Pya Ekeebee Jɛhova.”

¹¹ Ili dapnage nɔ i Tɛ a le li bunyɔɔ lo a ɛrɛ toesaɛ̄ tɛ̄maloo etɔgɛ wereloo loo pya a le bu ebɛɛ̄, ale ba nyɔɔnɛ i taāŋabah Jɛhova ale ba naa nyɔɔnɛ. (Luk 6:​31, 36) I bɛābu kɔ i epiaga lo ewereloo pya nɛɛ edoo kɔ ba alu pya a nyɔɔnɛ dumɛ Kraist. (1 Pit 2:12) Kerewo, ɛrɛgebah kɛ̄ a sira doo, i gaa le ɛrɛ gbɛnɛ ɛɛbu aāloo nɛnɛ.—Doonu Pya Nɛɛ Lɛɛratam 20:35.

JƐHOVA WEE I KPEGA

12. Amunu kpega na Jɛhova yira yii loo kɔ enɛe dɛ̄dɛɛ̄ pya ye nɛɛ a? (Le-yɔɔ 91:​1, 2, 14)

¹² Buū Le-yɔɔ 91:​1, 2, 14. Nii’ee, Jɛhova yira yii kɔ ekpegae i bu edɔɔ̄. A naale elɛɛbahloo kɔ Setan a gbee kaka taāŋabah doo pippip. (Jɔn 17:15) Sɔ̄ “gbɛnɛ etɛɛrɛloo” ebɔātɛ̄, i suā leere kɔ Jɛhova gaa le mmɛnɛ ye yii lo ekpega pya ye nɛɛ bu namloo le bu edɔɔ̄.—Mum 7:​9, 14.

13. Bu pya amunu sīdee na Jɛhova kpega ziī ziī ii a?

¹³ Amunu kpega na Jɛhova gaa nɛ ziī ziī ii a? Tɛ̄maloo Kpa Kaɛ, Jɛhova doo kɔ i suā nu a lee le nu a bee piya. (Hib 5:14) Sɔ̄ i tɔɔ̄dum dookɛ̄ Muɛ̄ Ue Bari kɔ doo, a kpega i lɛɛloo nu ebee i gbee bu namloo le bu edɔɔ̄. (Yɔɔ 91:4) Jɛhova gaa i kpeganage tɛ̄maloo ye bɔŋanaloo. (Ais 32:​1, 2) Sɔ̄ i tɔɔ̄ kpaɛ̄ pya a wereloo Jɛhova sa tɔɔ̄dum dookɛ̄ a gbī doo, ba wee i yere mɛm loo sa i yerebah nɛ kɔ i aa doo pɔrɔ.—Kam 13:20.

14. (a) Ena anua Bari naa kpega i lɛɛ bu dɛ̄dɛɛ̄ taāŋa a? (b) Ena Le-yɔɔ 9:10 doo kɔ i suā leere a? (Ɛpnage ue a le kɛɛ̄.)

¹⁴ A ɛrɛ pio sɔ̄ Jɛhova bee kpega pya a wee ye taāŋabah bu sɔ̄ akii adumɛ a lɛɛloo nu ebee wa gbee bu namloo. Kerewo, a naa bee doo wo dɛ̄dɛɛ̄ sɔ̄. Pio sɔ̄, ‘bugia siranu’ dap dɔ nyɔɔ ɛrɛgebah nɛɛ. (Eklis 9:11) Gbaāloo wo, aa kere Jɛhova elɛrabahloo pya ye zooro kɔ ba a kpesī tɛ̄ŋaloo le luh lokwa alu etɔgɛ kɔ Setan lu nɛɛ esah. (Job 2:​4-6; Mat 23:34) Kɛ̄ a gaa siranage doolo anii’ee. Kereadoo Jɛhova naale elɛɛ dɛ̄dɛɛ̄ taāŋa i gaa tɛɛ̄bu, i suā leere kɔ a naale elɛɛbahloo pya a ye wereloo.d—Yɔɔ 9:10.

JƐHOVA WEE I GBƆ̄NYIƐ

15. Bu mɛ sīdee na i wee ɛrɛ egbɔ̄nyiɛ aāloo yere kara, Muɛ̄ Ue Bari, le pya i wuga bu yira a? (2 Pya Kɔrint 1:​3, 4)

¹⁵ Buū 2 Pya Kɔrint 1:​3, 4. Pio sɔ̄, i wee le bu gbɛnɛ biirabu, ale gbɛnɛ bura. Naadabah o le bu e’aga kɛ̄tɔɔ̄ anyaawo lo a doo kɔ a tɔɔ̄ a loo kɔ o le aba ɔɔ. Ekɔ a ɛrɛge nɛɛ a dābeeloo kɛ̄ nu a tɔɔ̄loo doo ni? Aiī, Jɛhova dābeeloo. Naale aba kɛ̄ nu o gaa tɛɛ̄bu a ziloo doo na a dābeeloo a, mɛ a “agɛrɛ nyiɛ dɛ̄dɛɛ̄ ii bu ebɛaloo.” Bu mɛ sīdee ni? Sɔ̄ i kɔ dɛ̄dɛɛ̄ nu a i le bu beenyiɛ nɛ Jɛhova bu kara, a wee i nɛ “efɛɛloo Bari lo a eenyɔɔ dɛ̄dɛɛ̄ suānu.” (Fil 4:​6, 7) Sɔ̄ i buū pya ue Jɛhova i kɔ nɛ aābu Baibol, a wee i nɛnage egbɔ̄nyiɛ. Pya ue a le bu Baibol tɔgɛ kɛ̄ Jɛhova i wereloo doo, e a tɔgɛnage i kɛ̄ i dap su suānu daānu doo sa i nɛnage bɛābu. E i wee ɛrɛnage egbɔ̄nyiɛ aāloo pya i enɔānu nyɔɔbee gbaaloo i wee yɔ pya i wuga ɛnia le pya ue yere mɛm loo a aabu Baibol.

16. Ena o nɔ aāloo nu a bee siraloo Nathan le Priscilla a?

¹⁶ Lo enɛ edobah akiiloo kɛ̄ Jɛhova wee i nɛ egbɔ̄nyiɛ le yere mɛm loo tɛ̄maloo ye Muɛ̄ Ue doo, dooraa i naa ɛp nu a bee siraloo Nathan le Priscilla, lo ba tɔɔ̄ United States. Bu pio zua akii adumɛ, ba bee biaɛfii lo ekii kɛ̄ ebɛɛ̄ pya zue ue Buɛ̄-mɛnɛ le. Nathan bee kɔ: “I bee dɛrɛ nyiɛ nyɔɔ Jɛhova kɔ enɛ leelee i kiā sa doo kɔ dɛ̄dɛɛ̄ nu i bee nɔɔ a kiā leere.” Kerewo, sɔ̄ ba e’ina lo kɛ̄, loo wa bee bugia dumɛ, e kpugi bee wa tabah. Lo ama bee doo kɔ dam le wa ama a obia kii be, e kere sɔ̄ ba ina be, ba bee lenage bu naɛ̄bah. Sɔ̄ Nathan nyɛŋiabu nu a bee sira, a kɔ. “M bee bura kɔ, ena anua Bari naa nɛ leelee pya nu i bee nɔɔ sa doo kɔ a kiā leere dookɛ̄ i bee kɛɛrɛ doo a? M bee bɔātɛ̄ ekɛɛrɛ kɔ alu a ɛrɛ ziī piya nu m edoora ni?” Mɛ sɔ̄ sɔ̄ gaa kiisī, Nathan le Priscilla bee bɔātɛ̄ emuɛ kɔ Bari naa bee wa lɛɛbahloo sɔ̄ ba bee le bu ebɛɛ̄. Nathan bee kɔ, “Bu pya e’aga sɔ̄ ama, Baibol bee le doodoo ziī kaāna gbo a i yere mɛm loo sa i baɛloo. Taā i sere ekɛɛrɛ nyɔɔ taāŋa i bee le bu, i bee sere ekɛɛrɛ nyɔɔ kɛ̄ Jɛhova bee i yerebah nɛ kɔ i dap tāma lo taāŋa doo, e lo ama bee i yerebah nɛ kɔ i suā kɔ Jɛhova eyerenage bah i nɛ lo i kpesī dɔɔ̄na taāŋa li deesī.”

17. Bu mɛ sīdee na ziī wuga nɛɛwa a kura Helga bee ɛrɛ egbɔ̄nyiɛ a? (Ɛpnage foto.)

¹⁷ Jɛhova wee sunage pya wuga nɛɛdam le nɛɛwa i nɛā egbɔ̄nyiɛ. I dap muɛ lo ama aāloo nu a bee siraloo Helga, lo a tɔɔ̄ Hungary. Bu gbɛnɛ-edo zua, a bee tɛɛ̄bu keekee e’agabah taāŋa lo a bee doo kɔ a dɔ bu gbɛnɛ bura sa ɛp aba ɛɛ kɔ a naa lenaedɛɛ̄ lɔgɔ nu. Mɛ sɔ̄ a kɛɛrɛbu loo nu a bee ye siraloo bu pya lo zua, a muɛ kɔ Jɛhova gaa bee su pya wuga nɛɛdam le nɛɛwa bu bɔŋanaloo ye nɛā egbɔ̄nyiɛ. A bee ɛm kɔ: “Jɛhova wee mɛ yerebah nɛ sɔ̄ a muɛ kɔ na tam, kuūdɛɛ̄loo na nwiī a bee le bu dumɛloo, le pya dɔɔ̄na taāŋa doo kɔ ekpo a tah mɛ loo. Bu 30 zua akii adumɛ, a naa ɛrɛ lɔgɔ biradee Jɛhova naa bee doo gbɔ̄mɛɛ̄ yii a bee yira lo enɛ mɛ egbɔ̄nyiɛ. A wee mɛ nɛ e’agaloo tɛ̄maloo pya ue a tɔgɛ nia sa yere mɛm loo nɛɛ lo pya dɔɔ̄na mɛ kɔ nɛ. Gbɛnɛ-edo sɔ̄, a wee le taɛ sɔ̄ m gbī yere mɛm loo na pya wuga wee mɛ yere ue ma tɛ̄mabu fon, ɛm kpa ma, ale kaɛgɛ mɛ loo nu m doo leere a.”

18. Bu mɛ sīdee na i dap gbɔ̄nyiɛ pya dɔɔ̄na a?

¹⁸ I dap nɔ ilii Bari tɛ̄maloo enɛ egbɔ̄nyiɛ pya dɔɔ̄na. Bu mɛ sīdee na i dap doo wo a? I egerebu sa wa gbaɛ̄tɔ̄loo sɔ̄ ba gaa i kɔ ue nɛ, kɔ ue bu sīdee enɛ wa egbɔ̄nyiɛ, sa wa yerebah nɛ bu pya dɔɔ̄na sīdee. (Kam 3:27) I piiga lo enɛ egbɔ̄nyiɛ dɛ̄dɛɛ̄ pya a le bu taāŋa, gbaāloo pya a sii taāŋabah Bari anyaawo. Sɔ̄ pya a le kɛ̄ i tɔɔ̄ le bu biirabu, dumɛloo ale gbɛnɛ bura, i si wa loo, wa gbaɛ̄tɔ̄loo, sa wa nyɔɔnɛ kɔnia pya dɔ Baibol eyere wa mɛm loo. Sɔ̄ i nɔ Jɛhova, lo alu “Bari dɛ̄dɛɛ̄ egbɔ̄nyiɛ,” a dap doo kɔ pya i wuga bu yira a egerebu tāma pya wa taāŋa sa doonage kɔ beenyiɛ pya a sii taāŋabah Bari a buɛ sa ba gbaa i loo bu logaloga taāŋabah.—Mat 5:16.

JƐHOVA KPƐ̄NALOO EYEREBAH I NƐ DƐ̄DƐƐ̄ SƆ̄

19. Ena Jɛhova i doo nɛ a, e bu mɛ sīdee na i dap ye nɔ a?

¹⁹ Jɛhova wee kuūdɛɛ̄loo dɛ̄dɛɛ̄ pya a ye wereloo kaāna. A naa wee i lɛɛbahloo bie sɔ̄ i le bu taāŋa. Dookɛ̄ tɛ ale ka wee kuūdɛɛ̄loo ye nwiī bu wereloo doo, kɛ̄ Jɛhova kuūnage dɛɛ̄loo dɛ̄dɛɛ̄ pya a ye taāŋabah bu bɔ ture nyiɛloo doolo. A baɛ i loo, i nɛ nu a i bɛɛ̄, i kpega, sa i nɛ egbɔ̄nyiɛ. Sɔ̄ i yerebah nɛ pya nɛɛ a le bu e’aga kɛ̄tɔɔ̄ sa wa yere mɛm loo, a tɔgɛ kɔ i gaa nɔ i Tɛ a le li bunyɔɔ lo a i wereloo. Kereadoo keekee taāŋa dap i gbānasī, nu i suā leere na kɔ Jɛhova le i loo. I suā doo wo, nyɔɔbee ebee i yira yii nɛ kɔ: “Bɔɔ aa a aa, nyɔnɛbee mda le a loo.” (Ais 41:10) Naa ɛp kɛ̄ pya ue ama i agɛrɛ beenyiɛ doo a! Bu kaka, ii le aba ii doo pippip.