Pya Nu I Dap Nɔ Aāloo Baɛ Pya Kpa Pita Bee Ɛm

1. Sɔ̄ nɛɛ lɛɛratam Pita ebee sah e’u, ena Jɛhova bee doo kɔ a doo a?

NƐƐ lɛɛratam Pita bee suā kɔ a gae u’e sɔ̄ sɔ̄ naa binia. Bu ye esiatam bu gbɛnɛkpo zua, a bee nyɔɔnɛ Jizɔs siniātam, si uwe zue ue pya aā kɛ̄ a sii bee lu esi, sa bee le yɛɛ eku a baɛbee. Mɛ esiatam Pita sii bee ina kuma. Dee bu zua 62-64 C.E., Jɛhova bee doo kɔ a ɛm baɛ kpa a le bu Baibol, lo a le 1 le 2 kpa Pita. A bee kɔ kɛ̄ a ɛrɛ bɛābu doo kɔ pya kpa ama eyerebah nɛ Pya Nɛɛ Kraist sɔ̄ a naale na e.—2 Pit 1:12-15.

2. Ena anua i dap kɔ Pita bee ɛm pya ye kpa taɛ sɔ̄ a bɔloo a?

² Pita bee ɛm pya kpa ama sɔ̄ Pya Nɛɛ Kraist bee le bu “ekiɛ̄nu loo keekee ɛma ɛp.” (1 Pit 1:6) Pya bag dogo aa bee gbī esu ekwɔ tɔgɛnu le dogo a naa ɛɛ yerebu bɔŋanaloo. (2 Pit 2:1, 2, 14) Pya Nɛɛ Kraist ba bee tɔɔ̄ Jerusalɛm ebee sah ekpesī “kuma dɛ̄dɛɛ̄ nu,” lo a le gbeerasī Jerusalɛm le ye tɔkaɛ tɛ̄mabah pya nɔ̄ Rom. (1 Pit 4:7) I suā leere kɔ baɛ pya kpa Pita bee ɛm ama bee yerebah nɛ Pya Nɛɛ Kraist kɔ ba a muɛ nu ba dap doo lo e’egerebu bu pya doā-ɛp ba bee le bu le lo a gaa lu li deesī.b

3. Ena anua i ɛrɛ ekɛɛrɛ nyɔɔ pya kpa Pita bee ɛm sɔ̄ edɔɔ̄ Bari bee ye le nyɔɔ a?

³ Kere Pita bee ɛm pya kpa ama nɛ Pya Nɛɛ Kraist a bee le bu ye dee, Jɛhova su pya kpa ama yere yɛɛ Ye Muɛ̄ Ue. Nyɔɔwo, nyaawo i dap ɛrɛ biī aāloo pya kpa ama. (Rom 15:4) Kuma sɔ̄ i tɔɔ̄dum bu nyɔuwe a yerekpotɛ̄ tɔɔ̄dum a naa ɛɛ a, i kpenagesī pya doā-ɛp a doo kɔ a aga i loo etaāŋabah Jɛhova. Gbaāloo wo, sɔ̄ sɔ̄ naa binia i kpesī taāŋa a ee lo pya Juu bee kpesī sɔ̄ a bee lu egbeesī Jerusalɛm le ye tɔkaɛ. I muɛ pio ue a eyerebah i nɛ bu baɛ pya kpa Pita bee ɛm ama. Eyerebah i nɛ kɔ i kiisī lo etɔɔ̄ baɛ dee Jɛhova, be eebah ɛrɛ bɔɔ loo nɛɛ, sa ɛrɛ e’agatɛ̄ wereloo kumaloo ziī. Dua ue ama dapnage yerebah nɛ pya kanɛɛ kɔ ba a muɛ kɛ̄ ekuūdɛɛ̄loo ebɛɛ̄ pya nɛɛ a le bu bɔŋanaloo leere doo.

KIISĪ LO ETƆƆ̄ BAƐ

4. Dookɛ̄ 2 Pita 3:3, 4 kɔ doo, ena a dap ɔɛloo i yira a?

⁴ I le yɛɛ pya nɛɛ a naa ɛrɛ yira bu mɔmanudɛɛ̄ Baibol. Pya gbanasī dap i kɛgɛ, nyɔnɛbee i etɔ̄nabaɛ kuma bu gbɛnɛ-edo zua. Pio aba kɔ kuma naale elu doo pippip. (Buū 2 Pita 3:3, 4.) Lo i dā dua ue ama aānu nɛɛ i zue ue nɛ, nɛɛ le ii aa si tam, ale nɛɛ a nuūna i butɔ, dap doo kɔ i yira a ɔloo. Pita bee kɔ nu a i dap yerebah nɛ.

5. Ena eyerebah i nɛ kɔ i kiisī lo etɔɔ̄baɛ sɔ̄ pɔrɔ sɔ̄ eku ama e’ina kuma a? (2 Pita 3:8, 9)

⁵ Dap tɔɔ̄loo pio nɛɛ kɔ Jɛhova naa nwaabah su kuma nua loo pɔrɔ sɔ̄ eku ama. Pya ue Pita bee kɔ dap i yerebah nɛ kɔ i kiisī lo etɔɔ̄ baɛ, nyɔɔbee a nyɛŋia i bu kɔ kɛ̄ Jɛhova ɛp sɔ̄ doo lu kaāna kee loo kɛ̄ ili miɔŋɔ nɛɛ ɛp doo. (Buū 2 Pita 3:8, 9.) Jɛhova ɛp baɛ boo le lop tup zua nua ziī biradee. Jɛhova ɛrɛ egerebu sa naa gbī kɔ alu egbeesī kunɛ ziī nɛɛ. Kerewo, sɔ̄ dee Jɛhova elu, elu egbeesī pɔrɔ sɔ̄ eku ama. Naa ɛp dee a i kpaānɛ lo esu sɔ̄ a siga ama zuema ue nɛ pya a le dɛ̄dɛɛ̄ edo doo a!

6. Bu mɛ sīdee na i kiisī lo e “gbī agɛrɛ lulu dee” Jɛhova a? (2 Pita 3:11, 12)

⁶ Pita zū i kɔ i “gbī agɛrɛ lulu dee” Jɛhova. (Buū 2 Pita 3:11, 12.) Bu mɛ sīdee? Lee kɔ lo a waɛ dɛ̄dɛɛ̄ dee i ɛrɛ ekɛɛrɛ nyɔɔ pya leelee i ɛrɛ bu aā nyɔuwe. Naa kɛɛrɛ kɔ o e’ina bu aā nyɔuwe sa o waa zuura le efɔp, de le nuede, su baɛ bah suā pya o nɛɛ a aakɛ̄ bu luh sa tɔgɛ pya nɛɛ a bee tɔɔ̄dum booboo zua akii adumɛ kɛ̄ pya mɔmanudɛɛ̄ a le bu Baibol bee dooa gbɔ̄mɛɛ doo. Dua ekɛɛrɛ ama eyerebah a nɛ kɔ o kiisī lo etɔɔ̄ baɛ sa doo kɔ o tɔɔ̄dum a tɔgɛ kɔ o suāe kɔ lo dee ewaraloo kɛ̄. Lo i “suā pya lo nu ama aā tua sɔ̄” pya esah tɔgɛnu naale e “ture [i] aā.”—2 Pit 3:17.

BE EEBAH ƐRƐ BƆƆ LOO NƐƐ

7. Mɛ sīdee na ɛrɛ bɔɔ loo nɛɛ dap i ɛrɛ pah nyɔɔ a?

⁷ Kuma sɔ̄ i aa tɔɔ̄ge baɛ dee Jɛhova a, i gbī ezue le yereue nɛ pya dɔɔ̄na. Kerewo, pio sɔ̄ i dap ɔbɛpiī sa ii zue ue. Ena anua a? Bɔɔ dap i aa loo nɛɛ pio sɔ̄. Bee siraloo Pita doo wo. Uunɛ sɔ̄ aa bee lu ebiaɛ biaɛ loo Jizɔs, bɔɔ bee aa Pita lo ekɔ ye loo siā kɔ a wee nyɔɔnɛe dumɛ Jizɔs sa a anna kɔ a naa ye suāe loo. (Mat 26:69-75) Mɛ aba nɛɛ lɛɛratam ama na a bee sinagekɛ̄ kɔ sɔ̄ esaa kɔ: “Bui aa wa ɛrɛ bɔɔ loo, ale nyɔnyɔŋa beenyiɛ.” (1 Pit 3:14) Pya ue Pita doo kɔ i suā leere kɔ i dap be eebah ɛrɛ bɔɔ loo nɛɛ.

8. Ena edap i yerebah nɛ kɔ i be eebah ɛrɛ bɔɔ loo nɛɛ a? (1 Pita 3:15)

⁸ Ena edap yerebah kɔ i aa ɛrɛ bɔɔ loo nɛɛ a? Pita kɔ i nɛ kɔ: “Bu bui beenyiɛ sereaa Kraist kaɛ.” (Buū 1 Pita 3:15.) Lo ama kura kɔ i ɛrɛ ekɛɛrɛ nyɔɔ dɔ a le bah i Mɛnɛ le Nɛɛ-a-i-ɛrɛ Kraist Jizɔs. Lo bu a dɔ ale bɔɔ aa a sɔ̄ dee a kpaā nɛ lo ezue ue nɛ pya dɔɔ̄na, kɛɛrɛbu loo i Mɛnɛ Jizɔs. Naa doodoo bee o waa ye muɛ a gaa bɛɛ li bunyɔɔ sa booboo pya ɛnjɛl le etɛɛ̄ ye ɛŋɛnɛ. Nyɛŋiabu kɔ “ebee lu enɛ [ye] dɛ̄dɛɛ̄ ekpo bunyɔɔ le kɛnɛkɛ̄” le kɔ e “le [a] loo dɛ̄dɛɛ̄ dee mmɛ kuma lo sɔ̄ ama.” (Mat 28:18-20) Pita yere i mɛm loo kɔ: “Tɔɔ̄naa baɛ dɛ̄dɛɛ̄ sɔ̄” lo ekɔ ue bee bui yira. Eniage a lo ezue ue bie kɛ̄tam, tɔkpa ale pya dɔɔ̄na kɛ̄ sɔ̄ oo bee nɔɔ ni? Kɛɛrɛbu loo sɔ̄ dee dap a kpaānɛ kɔ o doo wo, sa o kpɛ̄naloo nu o kɔ sere kɛ̄. Yere kara bara e’agaloo, sa dɛrɛ nyiɛ nyɔɔ Jɛhova kɔ eyerebah a nɛ kɔ o be eebah ɛrɛ bɔɔ loo nɛɛ.—Doonu 4:29.

“AARAA BUI WERELOO AGƐRƐ”

9. Mɛ sɔ̄ na Pita naa bee tɔgɛ wereloo a? (Ɛpnage foto.)

⁹ Pita bee nɔ kɛ̄ a dap tɔgɛ wereloo doo. A bee le kɛ̄ sɔ̄ Jizɔs bee kɔ: “Aā lok na m i nɛ a, lokwa bui wereloo ɛnia bui; dookɛ̄ mda i wereloo doo, lokwa bui weenage loo ɛnia bui.” (Jɔn 13:34) Kaɛlɛɛ wo, a ɛrɛ sɔ̄ Pita naa bee yiga enyɔɔnɛ pya ye wuga nɛɛdam le nɛɛwa ba lu Dɔɔ̄na Edo denu nyɔɔbee bɔɔ bee ye aa loo Pya Nɛɛ Kraist ba lu Juu. Nɛɛ lɛɛratam Pɔɔl bee su nu Pita bee doo ama kure ‘daā daā’ ale dogo baɛ sī. (Gal 2:11-14) Pita bee su lo zuurabahtɔ̄ sa nɔ nu aāloo. Bu baɛ pya kpa a bee ɛm, a bee kɔ siībahdɛɛ̄ kɔ naale aba bee i ɛrɛ wereloo kumaloo pya i wuga mɛ i tɔgɛnage wereloo wa kumaloo.

10. Ena a i yerebah nɛ kɔ i ɛrɛ “wereloo . . . baɛ sī naale loo” a? Naa baatɛ̄. (1 Pita 1:22)

¹⁰ Pita kɔ i tɔgɛ “wereloo . . . baɛ sī naale loo” kumaloo pya wuga bu bɔŋanaloo. (Buū 1 Pita 1:22.) I ɛrɛ dua wereloo ama lo i “gbaɛ̄tɔ̄loo kaka ue.” Ziī lo kaka ue na tɔgɛnu a kɔ “Bari naa wee ɛp sī nɛɛ.” (Doonu 10:34, 35) Ii le edap sere lok Jizɔs nɛ kiiloo wereloo lo a le ii wereloo dɛ̄dɛɛ̄ nɛɛ a le bu bɔŋanaloo. Lu kaka kɔ i dap tɔɔ̄ waɛloo pio nɛɛ bu bɔŋanaloo ee pya dɔɔ̄na dookɛ̄ Jizɔs bee doo. (Jɔn 13:23; 20:2) Kerewo, Pita gaa i nyɛŋiabu kɔ i piiga lo “[ewereloo] pya wuga.” E i gbī ewereloo pya i wuga nɛɛdam le nɛɛwa doodoo pya i nuūna ziī butɔ.—1 Pit 2:17.

11. Ena i doo lo ewereloo pya dɔɔ̄na “agɛrɛ aā bu beenyiɛ” a?

¹¹ Pita yere i mɛm loo kɔ “werealoo ɛnia bui agɛrɛ aā bu beenyiɛ.” Bu dɔ ama, sɔ̄ alu ekɔ “agɛrɛ” nu a kura na tɔgɛ wereloo kere sɔ̄ a i agaloo ewereloo ziī nɛɛ. Bu edoba, lo alu kɔ ziī wuga doo nu bu i biira ni a? Tua nu i gbī edoo na e’obara ye kpɛ taā i tɔgɛ wereloo. Kerewo, Pita bee nɔ aābah Jizɔs kɔ obara kpɛ naa nia Bari. (Jɔn 18:10, 11) Pita bee ɛm kɔ: “Bui aa obara pɔrɔ kpɛā pɔrɔ, ale kɔ gbee loo kɔ gbee; mɛ taāwo bui nɛaa leelee.” (1 Pit 3:9) Doo kɔ wereloo a zū a kɔ o lu fɛgɛ sa kɛɛrɛ pya dɔɔ̄na kere pya a a tɛɛ̄ ekwɔ loo.

12. (a) Dɔɔ̄na ena e’agatɛ̄ wereloo ezū i kɔ i doo a? (b) Dookɛ̄ vidio a kura Preserve the Precious Gift of Unity tɔgɛ doo, ena o piiga lo edoo a?

¹² Bu tua kpa Pita bee ɛm, a bee su ue a kɔ “aaraa bui wereloo agɛrɛ” kɔā ue. Dua wereloo ama naa uu nwīepoo loo pɔrɔ, mɛ “gbɛnɛ-edo pɔrɔ.” (1 Pit 4:8) Naadaba Pita bee nyɛŋiabu nu Jizɔs bee ye tɔgɛ akiiloo aaloo pɔrɔ pio zua akii adumɛ. Taɛ lo sɔ̄ ama, Pita bee dap kɛɛrɛ kɔ alue fɛgɛ sɔ̄ a bee kɔ e’aae loo nɛ ye wuga “mmɛ ɛrɛba sɔ̄.” Kerewo, Jizɔs tɔgɛ Pita le ili kɔ i aaloo mmɛ ‘taa tup le lop le ɛrɛba’ sɔ̄, lo a kura kɔ kuma naale loo. (Mat 18:21, 22) Lo a aga a bah lo esu zuurabahtɔ̄ ama yerebu dogo, loo a aa ɔ. Wee aganage loo pya zooro Jɛhova lo e’aaloo pɔrɔ pio sɔ̄, nyɔɔbee ba naa mmana. Nyɔɔwo, nu alu gbɛnɛ na lo edoo dɛ̄dɛɛ̄ nu o dap lo e’aaloo pɔrɔ nɛ o wuga, sa ye nyɔɔnɛ tɔɔ̄bu efɛɛloo.c

PYA KANƐƐ, KŪNAADƐƐ̄ LOO NAANA PEE BARI

13. Ena a dap doo kɔ a aga bah pya kanɛɛ lo ekuūdɛɛ̄loo pya wuga nɛɛdam le nɛɛwa a?

¹³ Bu kaka, Pita naa ibere nu Jizɔs bee ye kɔ nɛ sɔ̄ a bee aakɛ̄ bu luh kɔ: “Ɛp na gbo naana pee.” (Jɔn 21:16) Lo o lu nɛɛ kanɛɛ, suā kɔ zuurabahtɔ̄ ama kuunage a. Kerewo, a dap aga bah nɛɛ kanɛɛ lo e’ɛrɛ sɔ̄ esiātam a kuī ama. Pya kanɛɛ ɛrɛ edasī nɛ nu alu ebɛɛ̄ pya wa butɔ, bu namloo, bu ekɛɛrɛ, le bu edɔɔ̄. Ba wee zaānage sī tam zue ue sa kpɛ̄naloo nu edoo alu enɛ wa bie pya i enɔānu, asɛmbli, le kɔnvɛnsɔn. Pio aba aa yerenage bah lo esitam yɛɛ Hospital Liaison Committee ale ba gaa nyɔɔnɛ Local Design/Construction Department siniatam. Bu kaka pya kanɛɛ gaa si gbɛnɛ-edo tam!

14. Ena a dap zū pya kanɛɛ kɔ ba a kuūdɛɛ̄loo pya naana pee Bari a? (1 Pita 5:1-4)

¹⁴ Pita bee kɔ nɛ pya le ɛɛ gbaa lu nɛɛ kanɛɛ kɔ “luaa pya tɔɔ̄loo naana pee Bari.” (Buū 1 Pita 5:1-4.) Lo o lu nɛɛ kanɛɛ i suā kɔ o wereloo pya wuga nɛɛdam le nɛɛwa sa o gbī ekuū wa dɛɛ̄ loo. Kerewo, pio sɔ̄ o dap kɛɛrɛ kɔ oo ɛrɛe sɔ̄ ale loo a ɔe gbɛnɛ lo ekuū wa dɛɛ̄ loo. Ena o dap doo a? Kɔ kɛ̄ a a tɔɔ̄loo doo nɛ Jɛhova bu kara. Pita bee ɛm kɔ: “Lo a le ɛrɛgeba nɛɛ si tam, doodoo nɛɛ, a edoo tɛ̄maloo ekpo Bari nɛ.” (1 Pit 4:11) Pya o wuga nɛɛdam le nɛɛwa dap le gaa kpesī pya taāŋa a naale edap lu elɛɛ bu lo sɔ̄ nyɔuwe ama. Mɛ nyɛŋiabu kɔ Jizɔs Kraist alu “Nɛɛ ekobee tɔɔ̄loo naana pee,” dap wa yerebah nɛ eekɛ̄ o dap doo. A dap doo wo anyaawo mmɛ bu aā nyɔuwe. Nu Jɛhova gbī kɔ pya kanɛɛ a doo na wereloo pya wuga, kuū wa dɛɛ̄ loo, sa “lu edoba [nɛ] gbo naana.”

15. Bu mɛ sīdee na ziī nɛɛ kanɛɛ bee kuūdɛɛ̄loo pya naana pee Bari a? (Ɛpnage foto.)

¹⁵ William, lo elua nɛɛ kanɛɛ bu nyɔɔnyɔɔ sɔ̄ dābeeloo kɛ̄ kuūdɛɛ̄loo pya wuga lu ebɛɛ̄ doo. Sɔ̄ dumɛloo COVID-19 bee bɔātɛ̄, alɛ le pya dɔɔ̄na nɛɛ kanɛɛ bee su kɔ ue nɛ ziī ziī pya a le bu wa eku tam zue ue dɛ̄dɛɛ̄ kaɛ nua nu a wa kuī loo. A kɔ nu anua ba bee doo wo kɔ: “Gbɛnɛ-edo pya i wuga tɔɔ̄ bia tɔ aba aba sa pɔrɔ ekɛɛrɛ dap nwaabah wa yiibu.” Sɔ̄ ziī wuga gaa kɔ ue, William wee gbaɛ̄tɔ̄ leere lo esuā nu a ye bɛɛ̄ le nu a ye taɛ̄ŋɛ. Gbɛnɛkpo sɔ̄ a wee su pya i vidio le pya dɔɔ̄na nu a aa i dɔ intanɛt wa yeābah nɛ. A kɔ: “Tam kuūdɛɛ̄loo lu ebɛɛ̄ anyaawo ee dɛ̄dɛɛ̄ sɔ̄. I wee piiga lo eyerebah nɛ pya nɛɛ kɔ ba a nɔ nu akiiloo Jɛhova; e alunage ebɛɛ̄ kaāna lo ekuū wa dɛɛ̄ loo sa wa yerebah nɛ kɔ ba a bia bu kaka.”

LƐƐBALOO KƆ JƐHOVA A KPƆĀ A LEERE

16. Pya amunu sīdee na i dap su pya nu i enɔā aābu pya kpa Pita bee ɛm yerebu dogo a?

¹⁶ I enɔā aba kunɛ nwīepoo loo nu aāloo nu a le bu baɛ pya kpa Pita bee ɛm. Naadaba o emɔna kɛ̄ a bɔloo kɔ o kwabaloo bu o dum. Bu edoba, eniage a lo e’ɛrɛ ekɛɛrɛ nyɔɔ pya leelee i gaa le ɛrɛ bu aā nyɔuwe yereloo ni? O esuage nua nu o seeasī lo ezue ue bie tɔkpa, kɛ̄tam le pya dɔɔ̄na kɛ̄ sɔ̄ oo bee nɔɔ ni? O muɛge pya sīdee o dap agɛrɛtɛ̄ wereloo o ɛrɛ loo pya o wuga nɛɛdam le nɛɛwa ni? Pya kanɛɛ, bui kpɛ̄nage loo ekuūdɛɛ̄loo gbo naana pee Jɛhova ni? Lo o ɛp aba ɔɔ leere o dap muɛ kɛ̄ pio kɛ̄ oo aa doo leere, kerewo loo a aa ɔ. ‘Nɛɛ-a-i-ɛrɛ lu fɛgɛ’ sa a dap a yerebah nɛ kɔ o nyim kiisī. (1 Pit 2:3) Pita doo kɔ i suā leere kɔ: “Bari . . . edoo kɔ bui mma, wu i yira sa i agɛrɛ.”—1 Pit 5:10.

17. Ena esira aabu lo i piiga sa lɛɛbaloo kɔ Jɛhova a kpɔā i ani?

¹⁷ A ɛrɛ sɔ̄ Pita bee ɛp kɔ a naa bɔeloo eyira kɛ̄sī Nwiīnɛɛdam Bari. (Luk 5:8) Mɛ tɛ̄maloo yerekpotɛ̄ a aabah Jɛhova le Jizɔs, Pita bee kiisī lo enyɔɔnɛ dumɛ Jizɔs. Nyɔɔwo, Pita bee ɛrɛ dee lo “enyima Buɛ̄-mɛnɛ a naa wee tah lo Nɛɛ-a-i-ɛrɛ le Nɛɛ-kpɔā Jizɔs Kraist.” (2 Pit 1:11) Lo ama lu nyɛŋia! Lo o piiga dookɛ̄ Pita bee doo sa lɛɛbaloo kɔ Jɛhova a kpɔā a, olo o ɛrɛnage dum anaatah. O “ɛrɛ . . . yira [sa] ɛɛnɛge kpɔā nɛ [o] piogi.”—1 Pit 1:9.