Bɛābu O Ɛrɛ Kiiloo Deesī Naale Elɔ

1. Ena anua Abreham bee dap kiisī lo ebɛābu kɔ e’ɛrɛe nwiīnɛɛdam a?

JƐHOVA bee yira yii nɛ ye gbo Abreham kɔ tɛ̄maloo ye manamana na dɛ̄dɛɛ̄ edonyɔɔ bu nyɔuwe e’ɛrɛ leelee a. (Jɛn 15:5; 22:18) Abreham bee suā leere kɔ yii Bari ama edooa nyɔnɛbee a bee ɛrɛ e’agatɛ̄ yira bu Bari. Kerewo, sɔ̄ Abreham ebee lu 100 zua e ye wa ebee lu 90 zua, dam le wa a ɛrɛ yira ama sii bee ɛrɛge nwiī. (Jɛn 21:1-7) Mɛ Baibol kɔ: “Abraham bee bɛābu sa yira sɔ̄ lɔgɔ nu bɛābu naale, nyɔɔwo alu tɛ booboo edonyɔɔ dookɛ̄ a bee lu ekɔ doo.” (Rom 4:18) O suā kɔ nu Abreham bee bɛābu ama bee dooa. A bee buɛ̄ ye nwiīnɛɛdam Aizik lo a gaa bee bɛābu. Ena a bee doo kɔ Abreham a ɛrɛ lo bɛābu a?

2. Ena anua Abreham bee suā leere kɔ yii Jɛhova ɛrɛge edooa a?

² Nyɔnɛbee Abreham bee ɛrɛ kaāna gbanialoo kiikɛ̄ Jɛhova le a, bee doo kɔ “a suā leere kɔmɛ Bari dapge doo nu a ebee yira.” (Rom 4:21) Jɛhova bee yerekpotɛ̄ Abreham sa ye su kure nɛɛ kaāna dogo nyɔɔ ye yira. (Jem 2:23) Dookɛ̄ alu ekɔ doo bu Pya Rom 4:18, Abreham bee ɛrɛ bɛābu le yira. Nyaawo, dooraa i naa kɛɛrɛbu nu nɛɛ lɛɛratam Pɔɔl kɔ akiiloo bɛābu dookɛ̄ alu e’ɛm doo bu Pya Rom 5 ekobee.

3. Ena Pɔɔl kɔ akiiloo bɛābu a?

³ Pɔɔl baatɛ̄ leere nu anua i suā kɔ i “bɛābu naa [le enua] bɔp kɛɛ.” (Rom 5:5) A yerenagebah i nɛ kɔ i dābeeloo kɛ̄ bɛābu Pya Nɛɛ Kraist dap agatɛ̄ doo. Kuma sɔ̄ i gaa ɛp pya nu Pɔɔl tubobaloo bu Pya Rom 5:1-5 a, kɛɛrɛbu oloo kɛ̄tɔɔ̄. Lo o doo wo, o dap muɛ kɔ o bɛābu doodoo Nɛɛ Kraist esiakɛ̄ agɛrɛbah agatɛ̄. Nu i nɔ eyerenagebah a nɛ kɔ o suā nu o doo lokwa o bɛābu agɛrɛbah agatɛ̄ ee kɛ̄ a le doo anyaawo. Mɛ bu tua dɔ, i naa ɛp ziī bɛābu alu nyɛŋia lo Pɔɔl kɔ a naale elɔ.

I BƐĀBU ALU NYƐŊIA

4. Ena alu ekɔ bu kpa Pya Rom 5:1, 2 a?

⁴ Buū Pya Rom 5:1, 2. Pɔɔl bee ɛm pya ue ama ma bɔŋanaloo a bee le Rom. Pya wuga nɛɛdam le nɛɛwa a bee le bu lo bɔŋanaloo ebee nɔ nu akiiloo Jɛhova le Jizɔs, ɛrɛ yira sa lu Pya Nɛɛ Kraist. Nyɔɔwo, Bari bee wa “kue . . . pya kaāna dogo nyɔɔ [wa] yira,” e a bee su ye kaɛ edɔɔ̄ wa tɔā nɔɔ̄ bee. Aiī, ba bee ɛrɛ bɛābu alu nyɛŋia lo ba suā kɔ a ɛrɛge edoo a.

5. Amunu bɛābu na pya alu etɔ̄ nɔɔ̄ bee ɛrɛ a?

⁵ Sɔ̄ esaa, Pɔɔl bee sikɛ̄ ɛm kpa ma Pya Nɛɛ Kraist a bee le Ɛfɛsɔs kiiloo bɛābu a bee lu enɛ wa. Lo bɛābu ama kiinage loo ‘zɔ alu nyɛŋia lo pya kaɛ e’ɛrɛ.’ (Ɛfɛs 1:18) E Pɔɔl bee kɔnage nɛ pya Kɔlɔsi kɛ̄ ba e’ɛrɛ wa ekpɛanu bie. A kure ye “bɛābu . . . lo alu esere kɛ̄ i nɛ bɔɔlo li bunyɔɔ.” (Kɔl 1:4, 5) Nyɔɔwo, bɛābu Pya Nɛɛ Kraist alu etɔ̄ nɔɔ̄ bee ɛrɛ na kɔ, elu elɛɛ wa kɛ̄ bu luh kuma bunyɔɔ kɛ̄ ba enyɔɔnɛ Kraist bɛɛ.—1 Tɛs 4:13-17; Mum 20:6.

6. Ena ziī wuga nɛɛdam alu etɔ̄ nɔɔ̄ bee bee kɔ akiiloo ye bɛābu a?

⁶ Bɛābu ama kuī loo Pya Nɛɛ Kraist alu etɔ̄ nɔɔ̄ bee. Aāloo kɛ̄ wuga nɛɛdam a kura Frederick Franz a le yɛɛ pya alu etɔ̄ nɔɔ̄ bee dɛrɛ nyiɛ nyɔɔ bɛābu ama doo, a bee kɔ: “Ilii bɛābu lu kaka, e a edooa gbɔ̄mɛɛ nɛ dɛ̄dɛɛ̄ 144,000 nɛɛ a le yɛɛ nwīgbagbara eku naana pee, emanyɔɔ kɛ̄ i ɛmadɛɛ̄ doo.” Sɔ̄ Wuga Franz esiatam nɛ Bari bu gbɛnɛkpo zua, bu zua 1991 a bee kɔ: “[Ii] bee ɛp i bɛābu ama tɛrɛ bu lɔgɔ sīdee. . . . Kuma kɛ̄ i kiisī lo etɔɔ̄ baɛ doo, kɛ̄ i agɛrɛnage bah tɔgɛ nia loo lo bɛābu doo lo. Alu nu a bɔloo etɔɔ̄ baɛ, kere esu nu a eenyɔɔ ziī miliɔn zua. Nyaawo, i bɛābu ama kuī mɛ loo ee tua sɔ̄.”

7-8. Amunu bɛābu na gbɛnɛ-edo ii ɛrɛ a? (Pya Rom 8:20, 21)

⁷ Gbɛnɛ-edo pya a taāŋabah Jɛhova anii’ee ɛrɛ dɔɔ̄na bɛābu. Ɛɛ na bɛābu Abreham bee ɛrɛ, lo a le bɛābu tɔɔ̄dum mmɛ deedee a kɛnɛkɛ̄ kɛɛ̄ bɛbɛɛ Buɛ̄-mɛnɛ Bari. (Hib 11:8-10, 13) Pɔɔl bee ɛm nu akiiloo nyɛŋia nu esira nɛ pya a ɛrɛ lo bɛābu ama. (Buū Pya Rom 8:20, 21.) Tua sɔ̄ o bee dasī nɔ nu akiiloo yii Bari akiiloo deesī, amunu gah a le loo na a bee a nia gbɛnɛ a? Ekɔ a bee le kɔ ziī dee a ee o mmana sa oo ɛrɛna taɛ lo edoo pɔrɔ ni? Sɛh a bee a nia lo esuā kɔ pya e’ua lo o wereloo esikɛ̄ tɔɔ̄dum a kɛnɛkɛ̄ dɔɔ̄na sɔ̄ bu paradais ni? Nyɔɔ “bɛābu” Bari i nɛ ama a ɛrɛ pya lele nu o gaa ɛmadɛɛ̄.

⁸ Kere i bɛābu lo e’ɛrɛ dum a naatah li bunyɔɔ ale nyɔɔ kɛnɛkɛ̄, i bɛābu lu nyɛŋia lo a doo kɔ i ɛrɛ ɛɛbu. E i bɛābu dap sikɛ̄ agatɛ̄ kaāna. Nu Pɔɔl sikɛ̄ ɛm nyɔɔnɛ baatɛ̄ kɛ̄ lo ama dap sira doo. Dooraa i naa ɛp pya nu a bee ɛm kiiloo i bɛābu. Dodoo wo edoo kɔ i suā leere kɔ i bɛābu ekiisi lo e’agatɛ̄ sa naale elɔ edooa.

KƐ̄ BƐĀBU WEE AGATƐ̄ DOO

9-10. Dookɛ̄ edoba Pɔɔl tɔgɛ doo, ena Pya Nɛɛ Kraist e’ɛmadɛɛ̄ a? (Pya Rom 5:3) (Ɛpnage foto.)

⁹ Buū Pya Rom 5:3. Yere nukuādɛɛ̄ loo kɔ etɛɛrɛloo dap doo kɔ i bɛābu a sikɛ̄ agatɛ̄. Lo ama dap i lu nyɛŋia loo. Bu kaka, dɛ̄dɛɛ̄ pya a nyɔɔnɛ dumɛ Kraist a suā kɔ ba dabe kpesī etɛɛrɛloo. Naa kɛɛrɛ nu a bee siraloo Pɔɔl. A bee kɔ nɛ pya Tɛsalɔnaika kɔ: “Sɔ̄ i bee i le loo i bee i kɔ siā nɛ tua sɔ̄ kɔmɛ i ɛrɛ emuɛ pɔrɔ; dookɛ̄ a bee sira doo, sa bɔɔlo suā.” (1 Tɛs 3:4) E a bee ɛm ma pya Kɔrint kɔ: “Nyɔnɛbee ii gbī egɔ̄ i loo, pya na wuga, akiiloo etɛɛrɛloo i bee muɛ . . . nyɔɔwo i bee ɛrɛ baɛbaɛ beenyiɛ na i sikɛ̄ lege dum naa e.”—2 Kɔr 1:8; 11:23-27.

¹⁰ Pya Nɛɛ Kraist anii’ee ɛmanage dɛɛ̄ kɔ ba ekpeesī pio etɛɛrɛloo. (2 Tim 3:12) E olo a? Aā sɔ̄ o bee ɛrɛ yira bu Jizɔs sa ye nyɔɔnɛ dumɛ, eluage etɛ̄ŋa a loo ni? Pya o gbo le pya o manamana edaba a kɛgɛ. Ba edaba a aaranage bu pɔrɔ sīdee. Ekɔ o biaɛfii lo ekaāna bu dɛ̄dɛɛ̄ nu enua a taāŋa loo bie o kɛ̄tam ni? (Hib 13:18) Ekɔ o ekpeasī gbanasī a aabah pya bɛbɛɛ nyɔɔbee o zue o bɛābu nɛ pya dɔɔ̄na ni? Kɛādoo, kaɛlɛɛ etɛɛrɛloo i gaa kpesī, Pɔɔl kɔ i ɛrɛ ɛɛbu. Ena anua a?

11. Ena anua alu ebɛɛ̄ kɔ i biaɛfii lo egerebu bu ɛrɛgeba etɛɛrɛloo i kpesī a?

¹¹ I dap ɛrɛ ɛɛbu sɔ̄ i gaa kpesī etɛɛrɛloo nyɔnɛbee i suā kɔ a dap doo kɔ i ɛrɛ ziī elap dogo a kuī. Dookɛ̄ Pya Rom 5:3 kɔ doo, “etɛɛrɛloo nua egerebu.” Dɛ̄dɛɛ̄ Pya Nɛɛ Kraist kpesī etɛɛrɛloo, nyɔɔwo dɛ̄dɛɛ̄ Pya Nɛɛ Kraist ɛrɛ e’egerebu. Alu ebɛɛ̄ kɔ i biaɛfii kɔ i egerebu bu ɛrɛgeba etɛɛrɛloo i kpesī. Dodoo wo edoo kɔ i muɛ dooa gbɔ̄mɛɛ nu i bee bɛābu. Ii gbī ebee pya nɛɛ Jizɔs bee ɛrɛ bu ekɛɛrɛ sɔ̄ a bee kɔ nu akiiloo eyuu a bee dɔ nyɔɔ dɛm. Tua sɔ̄ ba bee su ɛɛbu suā muɛ̄ ue a, mɛ “sɔ̄ etɛɛrɛloo le taāŋa” aakɛ̄, ba dɔ. (Mat 13:5, 6, 20, 21) Lu kaka kɔ etɛɛrɛloo le taāŋa naa wee i kpeloo, mɛ sɔ̄ i kiisī lo egerebu i ɛrɛ biī aāloo. Bu mɛ sīdee?

12. Amunu biī na i ɛrɛ sɔ̄ i egerebu kɛ̄bah etɛɛrɛloo a?

¹² Jems a wee nyɔɔnɛ dumɛ Jizɔs bee tɔgɛ pio biī i dap ɛrɛ sɔ̄ i egerebu kɛ̄bah etɛɛrɛloo. A bee ɛm kɔ: “Doolo nyɔɔnyɔɔ egerebu ɛrɛ ye mmɛɛ tam, lokwa a mma sa lee, e lɔgɔ nu naa bɛɛ̄ i.” (Jem 1:2-4) Jems baatɛ̄ egerebu doodoo bee a ɛrɛ tam a si. Amunu tam na egerebu wee si a? A dap i yerebah nɛ kɔ i agɛrɛbah lu pya a ziireloo, ɛrɛ yira, sa dɛɛa nyɔɔ Bari. Kerewo, i dapnage ɛrɛ dɔɔ̄na biī aāloo ɛrɛ egerebu.

13-14. Ena a wee sira sɔ̄ i egerebu a, e i bɛābu wee mɛā doodoo wa sɔ̄ i egerebu? (Pya Rom 5:4)

¹³ Buū Pya Rom 5:4. Pɔɔl kɔ egerebu wee nua “le dogo.” O egerebu edoo kɔ Jɛhova a su o taāŋabah. Lo ama naa kura kɔ bu Jɛhova ɛɛ sɔ̄ o gaa kpesī doā-ɛp ale taāŋa. Mɛ nu a ye nɛ ɛɛbu na olo. O egerebu doo kɔ alu eyere a kpotɛ̄. Naa ɛp kɛ̄ lo ama lu gbɛnɛ leelee doo a!—Yɔɔ 5:12.

¹⁴ Nyɛŋiabu kɔ Abreham bee egerebu kɛ̄bah doā-ɛp, e a bee ɛrɛ yerekpotɛ̄ a aabah Jɛhova. Jɛhova bee ye su nua ye gbo sa ye kure nɛɛ kaāna dogo. (Jɛn 15:6; Rom 4:13, 22) Dapnage le doo wo loo ili. Naale nu anua bu Jɛhova ɛɛ i loo na kɛ̄ tam i si kuī doo ale dua dee esiatam i ɛrɛ bu bɔŋanaloo. A yere i kpotɛ̄ nyɔɔ kɛ̄ i kiisī lo egerebu sa ɛrɛ yira doo. E kaɛlɛɛ kuma zua i elua, i kɛ̄tɔɔ̄ ale ekpo i ɛrɛ, dɛ̄dɛɛ̄ ii dap egerebu. O gaa kiigesī lo e’egerebu bu doā-ɛp o kpesī anyaawo ni? Lo a le wo, ɛrɛ egbɔ̄nyiɛ tɛ̄maloo esuā kɔ Jɛhova gaa a yerekpotɛ̄. Susuā kɔ Bari gaa i yerekpotɛ̄ dap i ɛrɛ gbɛnɛ pah nyɔɔ. A dap doo kɔ i bɛābu a agatɛ̄.

BƐĀBU A AGATƐ̄

15. Dɔɔ̄na ena Pɔɔl bee kɔ bu Pya Rom 5:4, 5 a, e ena anua lo ama dap lu ziī dua loo pio nɛɛ a?

¹⁵ Dookɛ̄ Pɔɔl baatɛ̄ doo, i ɛrɛ yerekpotɛ̄ a aabah Jɛhova lo i egerebu bu etɛɛrɛloo mmɛ kɛ̄. Yere nukuādɛɛ̄ loo kɛ̄ Pɔɔl sikɛ̄ kɔ ue ama doo kɔ: “E le dogo nua bɛābu, e bɛābu naa wee nua bɔp kɛɛ.” (Rom 5:4, 5) Lo ama dap lu ziī dua loo pio nɛɛ. Ena anua a? Nyɔnɛbee tua sɔ̄ Pɔɔl gaa ɛm kpa ma Pya Nɛɛ Kraist a bee le Rom bu Pya Rom 5:2, a bee kɔ pya lo Nɛɛ Kraist ebee ɛrɛ bɛābu, lo a le “bɛābu gogoro Bari.” Nyɔɔbee wo, pio nɛɛ dap bip kɔ, ‘Lo pya lo Nɛɛ Kraist ebee ɛrɛ bɛābu, ena anua Pɔɔl bee sikɛ̄ kue bee bɛābu yere bu ye ue a?’

16. Bu mɛ sīdee na bɛābu nɛɛ ɛrɛ wee bɔātɛ̄ e’agatɛ̄ a? (Ɛpnage foto.)

¹⁶ I dap dābeeloo nu Pɔɔl gaa kɔ sɔ̄ i nyɛŋiabu kɔ bɛābu lu nu a wee nyim sa agatɛ̄. Lo enɛ edoba: O gaa nyɛŋiage bu tua sɔ̄ o bee dā nyɛŋia bɛābu a le bu Muɛ̄ Ue Bari ni? Taɛ lo sɔ̄, o sii bee suā leere kɔ tɔɔ̄dum mmɛɛ deedee bu Paradais a nyɔɔ kɛnɛkɛ̄ ɛrɛge edooa. Mɛ sɔ̄ o agɛrɛbah nɔ nu akiiloo Jɛhova le pya yii a le bu Baibol, o suā leere kɔ o bɛābu ama ɛrɛge edooa.

17. Bu mɛ sīdee na o bɛābu kiisī lo e’agatɛ̄ sɔ̄ o ekīnaloo nɛ sa liamaā sah a?

¹⁷ Kere o ekīnaloo nɛ sa liamaā sah, kɛ̄ o kiisī lo enɔ nu sa agaloo bu edɔɔ̄ doo, kɛ̄ o bɛābu e’aganagetɛ̄ doo lo. (Hib 5:13–6:1) Naadaba o emɔna kɔ nu Pya Rom 5:2-4 kɔ a, esira a loo. O ekpeasī gbɛnɛkpo taāŋa, mɛ o bee egerebu sa muɛ kɛ̄ Bari a yerekpotɛ̄ doo. Nyaawo, o ɛrɛ gbɛnɛ nu anua o ɛmadɛɛ̄ lo e’ɛrɛ pya ye yii nyɔnɛbee o suā kɔ Bari gaa a yerekpotɛ̄. O bɛābu esiakɛ̄ agatɛ̄ ee kɛ̄ a bee le doo tua sɔ̄. O suā kɔ a ɛrɛ edooa, e olo ɛrɛge e’ɛrɛ lo leelee. A ɛrɛ kaāna pah nyɔɔ dɛ̄dɛɛ̄ gah loo o tɔɔ̄dum, sa o nyaana kɛ̄ o aara pya o butɔ doo, kɛ̄ o biaɛ nu fii doo, le kunɛ kɛ̄ o su o sɔ̄ daānu doo.

18. Ena Jɛhova doo kɔ i suā leere a?

¹⁸ Lo nɛɛ lɛɛratam kɔ ziī gbɛnɛ nu akiiloo bɛābu lo o ɛrɛ sɔ̄ Jɛhova a yerekpotɛ̄. A doo kɔ o suā kɔ o bɛābu elu edoo gbɔ̄mɛɛ. Ena anua o suā leere doo wo a? Pɔɔl kɔ ue agɛrɛ nyiɛ a aabah Bari ama nɛ Pya Nɛɛ Kraist kɔ: “Bɛābu naa wee nua bɔp kɛɛ, nyɔnɛbee a bee lu e’egara wereloo Bari bu dɛ̄dɛɛ̄ i beenyiɛ tɛ̄maloo kaɛ edɔɔ̄, lo a bee lu enɛ i.” (Rom 5:5) Nyɔɔwo a bɔloo kɔ o yiga leere kɔ bɛābu Jɛhova a nɛ ɛrɛge edooa.

19. Ena o dap suā leere akiiloo o bɛābu a?

¹⁹ Kɛɛrɛbu yii Jɛhova bee yira nɛ Abreham le kɛ̄ a bee ye yerekpotɛ̄ doo sa ye su nua ye gbo. Bɛābu Abreham bee ɛrɛ naa bee lu yɔrɔ. Baibol kɔ: Kɛ̄ “Abreham . . . bee ɛrɛ nyɔɔnyɔɔ egerebu doo, bee ɛrɛ lo yii.” (Hib 6:15; 11:9, 18; Rom 4:20-22) Bu kaka ye bɛābu naa bee lu yɔrɔ doo pippip. Suānage leere kɔ lo a le o kiisī lo e’ɛrɛ yira o ɛrɛ pya nu o bɛābu. Nyɔɔwo, o ɛrɛ gbɛnɛ-edo nu anua a lee kɔ o ɛrɛ ɛɛbu loo o bɛābu; nyɔnɛbee nu o bɛābu ɛrɛge edooa! (Rom 12:12) Pɔɔl bee ɛm kɔ: “Naale Bari bɛābu nɛ i dɛ̄dɛɛ̄ ɛɛbu le efɛɛloo bu bui yira, lokwa bɛābu i mma loo egia, bu ekpo kaɛ edɔɔ̄.”—Rom 15:13.