Pya Zege Wuga Nɛɛdam—Luaa Pya Nɛɛ Kraist A Nyim Tura

1. Ena nɛɛdam alu Nɛɛ Kraist ɛrɛ edoo lokwa a kiisī leere a?

MƐNƐ Devid bee zuurabahtɔ̄ Solomɔn kɔ: “Ɛrɛ e’agaloo, sa tɔgɛ loo a siā doodoo nɛɛdam.” (1 Mɛnɛ 2:1-3) Alu nu a kuī kɔ dɛ̄dɛɛ̄ pya nɛɛdam alu Nɛɛ Kraist anii’ee a su zuurabahtɔ̄ ama. Lokwa ba kiisī leere, ba ɛrɛ enɔ sa gbaɛ̄tɔ̄loo lok Bari sa su pya daakuu Baibol yere bu wa tɔɔ̄dum. (Luk 2:52) Ena anua alu nu a kuī kɔ pya wuga nɛɛdam a le zege alu Pya Nɛɛ Kraist a nyim tura a?

2-3. Ena anua alu nu a kuī kɔ zege wuga nɛɛdam alu Nɛɛ Kraist a nyim tura a?

² Nɛɛdam alu Nɛɛ Kraist ɛrɛ booboo tam a kuī a ye le bah bu ye tɔ le bu bɔŋanaloo. Baɛbaɛ beenyiɛ naale loo kɔ bɔɔlo pya zege nɛɛdam edaba kɛɛrɛbu loo pya tam bui si li deesī. O dap gbī eyii bu tam mmɛɛ sɔ̄, lu nɛɛ yerebahtam, e sɔ̄ esaa o lu nɛɛ kanɛɛ bu bɔŋanaloo. O dapnage gbī e’ii wa sa ɛrɛ gbomiɔŋɔ. (Ɛfɛs 6:4; 1 Tim 3:1) Lokwa o dap doo pya nu ama sa kiisī leere, o ɛrɛ elu Nɛɛ Kraist a nyim tura.b

³ Ena edap a yerebah nɛ kɔ o lu Nɛɛ Kraist a nyim tura a? A ɛrɛ pya elap dogo a kuī lo a bɔloo kɔ o ɛrɛ. Nyɔɔwo, ena o doo anyaawo lokwa o kiisī leere sa dap doo gbɔ̄mɛɛ pya tam ele a bah li deesī a?

PYA NU EDOO KƆ O LU NƐƐ KRAIST A NYIM TURA

4. Mɛ kɛ̄ na o dap nɔ le edoba aā a? (Ɛpnage foto.)

⁴ Sagɛ pya le edoba o nɔ. Lele edoba pya zege nɛɛdam dap nɔ le emma bu Baibol. Pya nɛɛdam a bee le a dee kere ama bee wereloo Bari sa aabaloo pya tam alu enɛ wa leere bu ekuūdɛɛ̄loo pya nɛɛ Bari. O dapnage muɛ pya wuga nɛɛdam enyima tura ba lu le edoba yɛɛ pya o butɔ le bu o bɔŋanaloo. (Hib 13:7) E o ɛrɛ lo edoba a lee eera lo a le edoba Jizɔs Kraist. (1 Pit 2:21) Kuma sɔ̄ o gaa nɔ pya edoba ama, kɛɛrɛbu loo pya lele elap dogo ba ɛrɛ. (Hib 12:1, 2) Lɛɛ o biaɛfii lo enɔ pya nɛɛdam ama.

5. Ena o doo lokwa o ɛrɛ buābee a, e ena anua buābee lu nu a kuī a? (Yɔɔ 119:9)

⁵ Ɛrɛ sa “sere . . . buābee.” (Kam 3:21) Nɛɛdam a ɛrɛ buābee wee dasī kɛɛrɛ nu leere lɛɛ a gae doo dogo. Nyɔɔwo, wee piiga lokwa o dap kiisī lo e’ɛrɛ buābee. Ena anua a? Nyɔɔbee pya nɛɛdam a lɛɛbaloo kɔ kɛ̄ alaba kɛɛrɛ nu doo ale lɛɛbaloo kɔ kɛ̄ nu wa tɔɔ̄loo doo a baɛbee wa dogo mma bu nyɔuwe. (Kam 7:7; 29:11) Pya nu alu ekɔ bu ekpo-yɔɔ, Tɛlɛvisɔn le nyɔɔ intanɛt dapnage a ɛrɛ kaāna pah nyɔɔ. Mɛ ena o doo lokwa o ɛrɛ buābee a? Bɔātɛ̄ tɛ̄maloo enɔ pya daakuu a le bu Baibol le pya biī ba dɔ. Lɛɛ o su pya lo daakuu yeābah nɛ aba ɔɔ tɛ̄maloo esu biaɛma nu fii bu sīdee edoo kɔ bu Jɛhova a ɛɛ. (Buū Le-yɔɔ 119:9.) Lo o ɛrɛ elap dogo a kuī gbɛnɛ ama, o e’ɛrɛ ziī gbɛnɛ nu lo eyerebah a nɛ kɔ o lu Nɛɛ Kraist a nyim tura. (Kam 2:11, 12; Hib 5:14) Naa kɛɛrɛbu baɛ sīdee lo buābee edɔbiī a nɛ: (1) sɔ̄ o gaa nyɔɔnɛ pya wuga nɛɛwa dānia nu, eree (2) sɔ̄ o gaa biaɛfii pya nu o yaa le kɛ̄ o kwaaloo doo.

6. Bu mɛ sīdee na buābee dap yerebah nɛ zege nɛɛdam kɔ a tɔgɛ enwadɛɛ̄ loo pya wuga nɛɛwa a?

⁶ Buābee eyerebah a nɛ kɔ o dap nɛ enwadɛɛ̄ pya nɛɛwa. A naa bee piya kɔ ziī zege wuga nɛɛdam dap ɛrɛ taɛ bu ziī zege wuga nɛɛwa alu Nɛɛ Kraist sa gbī e’agɛrɛtɛ̄ wa gbanialoo. Kerewo, zege wuga nɛɛdam a ɛrɛ buābee naale ekɔ ale e’ɛm ue ale doo ziī nu a tɔgɛ taɛ maniakɛ̄ kumaloo ziī wuga nɛɛwa etaāge bee aa gbī e’ii ye. (1 Tim 5:1, 2) Lo a gaa gbī e’ii ziī wuga nɛɛwa, a naale egbee bee lo wuga nɛɛwa tɛ̄maloo etɔɔ̄ ye kpaɛ̄ kɛ̄ alu kɛ̄ gɔā, etaāge bee a aara dɔɔ̄na nɛɛ.—1 Kɔr 6:18.

7. Bu mɛ sīdee na buābee eyerebah nɛ zege wuga nɛɛdam sɔ̄ a gaa sagɛ pya nu eyaa le sīdee ekwaaloo a?

⁷ Dɔɔ̄na sīdee wuga nɛɛdam dap tɔgɛ kɔ a ɛrɛe buābee na tɛ̄maloo eyaanu sa kwaaloo leere. Gbɛnɛ-edo sɔ̄, a wee nia pya nɛɛ eyaa bɛloo pya a naa tɔgɛ enwadɛɛ̄ loo Jɛhova ale pya a doo dogo kunagā wee yaa, e dua lo bɛloo na pya gbanu wee gbanage gbɛnɛ a. Wa dogo a naa ɛɛ ama sirapie bu dua bɛloo ba yaa doodoo lo a wa bii ale bɛloo a doo kɔ nɛɛdam a bee nɛɛwa. Sɔ̄ zege wuga nɛɛdam a gaa nɔ edoba Kraist gaa sagɛ nu eyaa, edoo kɔ daakuu Baibol le pya nɛɛ ba sere le edoba a le bu bɔŋanaloo a baɛ ye loo. A dap bip aba ɛɛ kɔ: ‘Ekɔ pya nu m sagɛ lo eyaa, tɔgɛge kɔ m ɛrɛ le ekɛɛrɛ beenyiɛ sa kɛɛrɛbu pya dɔɔ̄na ni? Ekɔ kɛ̄ m yaa nu doo dooge kɔ a waɛbah pya nɛɛ lo esuā kɔ m gaa taāŋabah Bari ni?’ (1 Kɔr 10:31-33; Tait 2:6) Pya wuga nɛɛdam le nɛɛwa enɛ enwadɛɛ̄ zege wuga nɛɛdam a ɛrɛ buābee sa bu ye Tɛ a le li bunyɔɔ e’ɛɛ ye loo.

8. Ena wuga nɛɛdam a le zege dap doo lokwa alu edɛrɛ ye nyiɛ nyɔɔ a?

⁸ Lu nɛɛ a dap lu edɛrɛ nyiɛ nyɔɔ. Zege nɛɛdam a dap lu edɛrɛ nyiɛ nyɔɔ wee suelookɛ̄ si pya tam a ye le bah. (Luk 16:10) Naa kɛɛrɛbu le edoba Jizɔs. A naa bee ɛp nu tɛrɛ ale kɔ a naa bee dap si pya tam a ye kuu. Taāwo, a bee si dɛ̄dɛɛ̄ tam Jɛhova bee kɔ a si kere sɔ̄ a bee aga edoo wo. A bee wereloo pya nɛɛ eetɔɔ̄ na pya a wee ye nyɔɔnɛ dumɛ sa a bee wa u bee. (Jɔn 13:1) Bu enɔ Jizɔs, piiga lo esi ɛrɛgeba tam alu enɛ a. Lo oo suā kɛ̄ esi doo, kumaloo a kɛ̄ sa bara yerebah aābah pya dɔɔ̄na wuga nɛɛdam enyima tura. O aa aadee gbī esi aba lo a tera sa naa aga. (Rom 12:11) Taāwo, si o tam gbɔ̄mɛɛ, sa si doodoo bee o gaa “si tam nɛ Nɛɛ-a-i-ɛrɛ, mɛ a naale lo nɛɛ.” (Kɔl 3:23) Bu kaka oo mmana, nyɔɔwo kumaloo a kɛ̄ sa yiga ɛrɛgeba ekwɔ o tɛɛ̄.—Kam 11:2.

NƆ KARI EDƆBIĪ A NƐ

9. Ena anua alu ebɛɛ̄ kɔ zege wuga nɛɛdam a nɔ pya kari a dɔbiī a?

⁹ Lo elu Nɛɛ Kraist a nyim tura, lu ebɛɛ̄ kɔ o nɔ pya kari a dɔbiī. Lo ama edoo kɔ o dap si pya tam alu enɛ a bu bɔŋanaloo, ɛrɛ tam o gaa si lo esu yeākpotɛ̄ pya o butɔ sa nyɔɔnɛ pya dɔɔ̄na ɛnia le gbanialoo. Naa ɛp pio kari alu ebɛɛ̄ kɔ o nɔ ama.

10-11. Bu mɛ sīdee na nɔ lo ebuū nu sa para ɛm nu edap dɔbiī nɛ zege wuga nɛɛdam sa dɔnagebiī nɛ bɔŋanaloo a? (Yɔɔ 1:1-3) (Ɛpnage foto.)

¹⁰ Nɔ ebuū sa ɛm nu leere. Baibol kɔ nɛɛ a le bu ɛɛbu sa gaa kiisī leere wee buū Muɛ̄ Ue Bari sa ɛrɛ ekɛɛrɛ nyɔɔ ziī ziī biradee. (Buū Le-yɔɔ 1:1-3.) Tɛ̄maloo ebuū Baibol ziī ziī biradee, edābeeloo kɛ̄ Jɛhova kɛɛrɛ nu doo lo eyerebah ye nɛ kɔ a dap kɛɛrɛ nu leere sa kɛɛrɛ kɛ̄ eyere bu dogo doo. (Kam 1:3, 4) Bɔŋanaloo aa gbī dua pya nɛɛdam ama. Ena anua a?

¹¹ Pya wuga nɛɛdam le nɛɛwa gaa gbī pya wuga nɛɛdam a nyim tura lo edap tɔgɛ nu sa nɛ zuurabahtɔ̄ a dɛɛa nyɔɔ Baibol. (Tait 1:9) Lo o para ebuū sa ɛm nu leere edoo kɔ o dap kpɛ̄naloo ekɔaue leere sa agara ebip bu sīdee eyere mɛm loo nɛɛ. Edoonage kɔ o dap ɛm pya nu o dābeeloo sɔ̄ o gaa nɔ nu le sɔ̄ o gaa gbaɛ̄tɔ̄loo ekɔaue bie enɔānu, asɛmbli, le kɔnvɛnsɔn. Pya nu o ɛm ama e’agɛrɛtɛ̄ o yira sa doo kɔ o dap yere mɛm loo pya dɔɔ̄na.

12. Ena edap a yerebah nɛ kɔ o para nyɔɔnɛ pya nɛɛ kɔnia ue leere a?

¹² Nɔ kɛ̄ enyɔɔnɛ nɛɛ kɔnia ue leere doo. Nɛɛdam alu Nɛɛ Kraist ɛrɛ enɔ lo enyɔɔnɛ nɛɛ kɔnia ue leere. Nɛɛ a para kɔ ue wee para egbaɛ̄tɔ̄loo pya dɔɔ̄na sa suā nu alu wa ekɛɛrɛ le kɛ̄ nu wa tɔɔ̄loo doo. (Kam 20:5) A dap suā kɛ̄ nu tɔɔ̄loo pya dɔɔ̄na doo tɛ̄maloo kɛ̄ ba sere muɛ̄ doo, kɛ̄ ba sere sī doo, le kɛ̄ ba tɔɔ̄ doo sɔ̄ ba gaa kɔ ue. Oo le edap doo lo ama lo oo nyɔɔnɛ pya nɛɛ gbaa tɔɔ̄. Lo o bialoo wee su kɔmputa yeā ue ma nɛɛ tɛ̄ma bu email le pya dɔɔ̄na sīdee ɛm nu ma nɛɛ tɛ̄ma bu kɔmputa edoo kɔ o aa parana ekɔ ue nɛ nɛɛ sī le sī. Nyɔɔwo, nɔɔ lo enyɔɔnɛ pya nɛɛ kɔnia ue sī le sī.—2 Jɔn 12.

13. Dɔɔ̄na ena nɛɛdam a le zege dap nɔ a? (1 Timɔti 5:8) (Ɛpnage foto.)

¹³ Ɛrɛ tam o gaa si. Nɛɛdam alu Nɛɛ Kraist enyima tura ɛrɛ elu nɛɛ a dap yerebah nɛ aba ɛɛ sa dap nɛ nu a bɛɛ̄ pya ye butɔ. (Buū 1 Timɔti 5:8.) Bie pio barasī, pya zege nɛɛdam dap nɔ kari aābah wa tɛ ale dɔɔ̄na wa wuga. Bie pya dɔɔ̄na barasī, pya zege wee nɔ lo e’uradu ale pya dɔɔ̄na tam bie tɔkpa. Kaɛlɛɛ kɛ̄ o nɔ aā, a lee kɔ o nɔ tam o muɛ pya ekue a loo. (Doonu 18:2, 3; 20:34; Ɛfɛs 4:28) Lu nɛɛ pya nɛɛ suāloo nua nɛɛ a para si tam sa wee sah tam alu enɛ ye. Lo o doo wo, edoo kɔ o ɛrɛ tam. Lunage ebɛɛ̄ kaāna kɔ nɛɛdam alu Nɛɛ Kraist a ɛrɛ pya elap dogo le kari i ekɔa nu akiiloo ama, lokwa a dap si pya dɔɔ̄na tam li deesī leere. Dooraa i naa kɛɛrɛbu pio lo tam.

NƆƆ PYA NU O DOO LI DEESĪ

14. Ena wuga nɛɛdam a le zege edoo lokwa a dap si tam mmɛɛ sɔ̄ a?

¹⁴ Si tam mmɛɛ sɔ̄. Booboo pya wuga nɛɛdam enyima tura bee yii bu tam mmɛɛ sɔ̄ aā sɔ̄ ba le zege. Tam sɛmdee wee yerebah nɛ pya zege nɛɛdam kɔ ba a dap nyɔɔnɛ keekee nɛɛ dānianu. Eyerenagebah ye nɛ kɔ a para su kpugi daānu leere sa naa yaɛ nu emanyɔɔ nu a gaa ɛrɛ. (Fil 4:11-13) Ziī gbɛnɛ nu eyerebah nɛ nɛɛ kɔ a dap yii bu tam mmɛɛ sɔ̄ na bɔātɛ̄ tam sɛmdee bu nwīkere sɔ̄. Sɛmdee bu nwīkere sɔ̄ eyerebah nɛ gbɛnɛ-edo nɛɛ kɔ ba a bɔātɛ̄ si tam sɛmdee dɛ̄dɛɛ̄ sɔ̄. Tam sɛmdee ekpaāna dee a nɛ loo pya dɔɔ̄na esiatam mmɛɛ sɔ̄, gbaāloo tam wuwu pya i tɔ etɔɔ̄ taāŋabah ale si tam Bɛtɛl.

15-16. Ena wuga nɛɛdam a le zege edoo lokwa a dap nyim tura lo esitam doodoo nɛɛ yerebahtam ale nɛɛ kanɛɛ bu bɔŋanaloo a?

¹⁵ Lu nɛɛ yerebahtam ale nɛɛ kanɛɛ. Alu nu a kuī kɔ pya nɛɛdam alu Nɛɛ Kraist a nyim tura lokwa ba dap si tam nɛ pya wa wuga nɛɛdam le nɛɛwa bu bɔŋanaloo doodoo nɛɛ kanɛɛ. Baibol kɔ nɛɛ a gbī esi tam bu sīdee ama “gbī le tam.” (1 Tim 3:1) Lɛɛ ziī wuga nɛɛdam gae si tam doodoo nɛɛ kanɛɛ, a ɛrɛ edasī nyim tura lo elu nɛɛ yerebahtam. Pya yerebahtam wee yerebah nɛ pya kanɛɛ bu gbɛnɛ-edo sīdee. Pya kanɛɛ le pya yerebahtam kumalookɛ̄ yerebah nɛ pya wa wuga nɛɛdam le nɛɛwa sa zaasī tam zue le yereue. Pya zege wuga nɛɛdam dap nyim tura lo esitam doodoo nɛɛ yerebahtam aā sɔ̄ ba esaa elu 20 zua. E nɛɛ yerebahtam a nyim tura kaāna lo elua 20 le dɛrɛ zua dap lu etubo ye bahloo nua nɛɛ kanɛɛ.

¹⁶ Ena o dap doo lokwa o nyim tura lo elu nɛɛ yerebahtam le nɛɛ kanɛɛ a? Baibol naa kɔ etaānu o doo. Kerewo, pya nu o doo lokwa o dap nyim tura dɛɛa nyɔɔ nu a le bu Baibol, wereloo o ɛrɛ loo Jɛhova, pya o butɔ, le bɔŋanaloo. (1 Tim 3:1-13; Tait 1:6-9; 1 Pit 5:2, 3) Piiga lo edābeeloo ziī ziī pya nu alu ebɛɛ̄ kɔ o doo. Yere kara nɛ Jɛhova kɔ a yerebah a nɛ kɔ o dap nyim tura dɛɛ̄ pya nu ama.c

17. Bu mɛ sīdee na zege nɛɛdam ekpɛ̄naloo lo elu le dam le le tɛ bee tɔ a? (Ɛpnage foto.)

¹⁷ Lulu dam le ekobee loo butɔ. Dookɛ̄ Jizɔs bee kɔ doo, pio pya nɛɛdam alu Nɛɛ Kraist a nyim tura naa ii wa. (Mat 19:12) Kerewo, lo o biaɛfii lo e’ii wa, ɛrɛ dɔɔ̄na tam lo eyii a bah, lo a le lu dam le tɛ bee tɔ. (1 Kɔr 11:3) Jɛhova gbī kɔ pya dam a wereloo wa wa, sa wa kuūdɛɛ̄loo bu namloo le bu edɔɔ̄ sa ɛp kɛ̄ nu wa tɔɔ̄loo doo. (Ɛfɛs 5:28, 29) Pya elap dogo le kari i ekɔa nu akiiloo bu ekobee ue ama, doodoo ɛrɛ buābee, nɛ enwadɛɛ̄ pya nɛɛwa, lu nɛɛ a dap lu edɛrɛ nyiɛ nyɔɔ, eyerebah a nɛ kɔ o lu le dam. Edoo kɔ o kpɛ̄naloo esitam a a kuu doodoo dam le tɛ bee tɔ.

18. Bu mɛ sīdee na zege wuga nɛɛdam ekpɛ̄naloo lo elu le tɛ a?

¹⁸ Lulu tɛ. Sɔ̄ o e’ira wa sah, o dap ɛrɛ nwiī. Ena o dap nɔ aāloo Jɛhova kiiloo lu le tɛ a? A ɛrɛ gbɛnɛ-edo nu o dap nɔ. (Ɛfɛs 6:4) Jɛhova bee kɔ siā nɛ ye Nwiīnɛɛdam Jizɔs kɔ a weree ye loo sa ye yerekpotɛ̄. (Mat 3:17) Lo o lu tɛ, muɛ kɔ o kiisī lo ekɔ nɛ pya o miɔŋɔ kɔ o weree wa loo. Wee wa kaɛgɛ loo pya lenu ba doo. Pya tɛ a nɔ edoba Jɛhova eyerebah nɛ wa miɔŋɔ nɛɛdam ale nɛɛwa kɔ ba a dap lu Nɛɛ Kraist a nyim tura. O dap kpɛ̄naloo aā anyaawo lo edoo wo tɛ̄maloo ekuūdɛɛ̄loo pya dɔɔ̄na nɛɛ a le o butɔ le bu bɔŋanaloo bu wereloo sa piiga lo edoo kɔ ba a suā kɔ o weree wa loo sa tɔgɛ nia loo pya le nu ba doo. (Jɔn 15:9) Lo ama edoo kɔ a waɛ a bah lo elu le dam le le tɛ li deesī. Mɛ nyaawo, o dɔ kaāna biī nɛ Jɛhova, pya o butɔ le bɔŋanaloo.

ENA O DOO ANYAAWO A?

19-20. Ena edap yerebah nɛ pya zege wuga nɛɛdam kɔ ba alu Nɛɛ Kraist a nyim tura a? (Ɛp foto a le nyɔɔ eko.)

¹⁹ Pya zege wuga nɛɛdam, buii le epɛɛ lu Nɛɛ Kraist a nyim tura. Lu ebɛɛ̄ kɔ bui sagɛ sa nɔ le edoba, ɛrɛ buābee, lu pya a dap lu edɛrɛ nyiɛ nyɔɔ, nɔ pya kari edɔbiī i nɛ, sa nɔɔ pya nu bui doo li deesī.

²⁰ Pio sɔ̄ lo o kɛɛrɛbu loo pya tam o gaa le si li deesī, dap a ɔɛloo. Mɛ o dap doo dɛ̄dɛɛ̄ ɛɛ. Nyɛŋiabu kɔ Jɛhova le ekpɛ̄naloo lo eyerebah a nɛ. (Ais 41:10, 13) Bu kaka, pya wuga nɛɛdam le nɛɛwa a le bu bɔŋanaloo eyerenagebah a nɛ. Sɔ̄ o elua Nɛɛ Kraist a nyim tura dookɛ̄ o bee gbī doo o ɛrɛ gbɛnɛ-edo leelee le dum a dɔbiī. Bɔɔlo pya zege wuga nɛɛdam, i were i loo kaāna! Doolo Jɛhova nɛ leelee bui epiaga lo elu Pya Nɛɛ Kraist a nyim tura.—Kam 22:4.