Kiisī Lo Ekpɛ̄naloo Baɛ Dee Jɛhova

1. Ena i ɛrɛ edoo lokwa i tɛɛ̄ yeebah dee Jɛhova a?

SƆ̄ BAIBOL kɔ nu akiiloo “dee Jɛhova,” a gaa kɔ nu akiiloo sɔ̄ Jɛhova ebiaɛ pya ye nɛɛ baa sa kpɔā pya ye nɛɛ. Sɔ̄ akii adumɛ, Jɛhova bee su kpɔ-te nua nyɔɔ pio edonyɔɔ. (Ais 13:1, 6; Ezek 13:5; Zef 1:8) Bu ilii dee ama, “dee Jɛhova” ebɔātɛ̄ sɔ̄ elu egbeesī Babilɔn Lo Gbɛnɛ sa e’ina kuma bu nɔ̄ Amagidɔn. I ɛrɛ ekpɛ̄naloo anyaawo lokwa alu ekpɔā i lo “dee.” Jizɔs bee tɔgɛ kɔ naale aba bee i kpɛ̄naloo baɛ “gbɛnɛ etɛɛrɛloo” mɛ i “kiisī lo etɔɔ̄baɛ.”—Mat 24:21; Luk 12:40.

2. Ena anua i dap ɛrɛ biī aāloo 1 Pya Tɛsalɔnaika a?

² Bu tua kpa nɛɛ lɛɛratam Pɔɔl bee ɛm ma pya Tɛsalɔnaika, a bee su pio edoba kɔā ue lo eyerebah nɛ Pya Nɛɛ Kraist kɔ ba a kiisī lo ekpɛ̄naloo baɛ gbɛnɛ dee biaɛ Jɛhova. Pɔɔl bee suā kɔ dee Jɛhova naale elu taɛ lo sɔ̄. (2 Tɛs 2:1-3) Kerewo, a bee yere mɛm loo pya ye wuga kɔ ba a kpɛ̄naloo baɛ lo dee doodoo bee a gaa lu ye nyɔɔ’ee, e ili dapnage su lo zuurabahtɔ̄ yere bu dogo. Dooraa i naa ɛp kɛ̄ alu ebaatɛ̄ pya ue ama doo: (1) kɛ̄ dee Jɛhova elu doo, (2) pya a naale etɛɛ̄ yeebah lo dee, eree (3) kɛ̄ i dap kpɛ̄naloo lo etɛɛ̄ yee bah lo dee doo.

BU MƐ SĪDEE NA DEE JƐHOVA ELU A?

3. Bu mɛ sīdee na dee Jɛhova elu doodoo lulu nɛɛ biu bu edɛɛ̄ a? (Ɛpnage foto.)

³ “Doodoo lulu nɛɛ biu bu edɛɛ̄.” (1 Tɛs 5:2) Lo ama na tuatua yɛɛ taa ue a tɔɔ̄dɔ nu alu esu kɔā ue kumaloo dee Jɛhova a. Pya biu wee nwaabah yib nu bu edɛɛ̄ sɔ̄ pya nɛɛ ba yib nu aābah naa bee ɛmadɛɛ̄. Dee Jɛhova enwaanage bah lu sɔ̄ gbɛnɛ-edo nɛɛ naa ɛmadɛɛ̄. Edapnage ɔbɛ pya kaka Nɛɛ Kraist loo kɛ̄ nu enwaabah sira doo. Mɛ a naale elu egbee i sī dookɛ̄ elu egbeesī pya bag dogo doo.

4. Bu mɛ sīdee na dee Jɛhova le doodoo dam-nwiī a?

⁴ “Doodoo dam-nwiī nɛɛ a maɛ̄ nwiī.” (1 Tɛs 5:3) Waa buloo naa wee suā taɛ sɔ̄ emaɛ̄ nwiī. Kerewo, a suā kɔ a ɛrɛge emaɛ̄ nwiī. Sɔ̄ e’ina lo sɔ̄, bu ebɔātɛ̄ ye dam sa ye ziloo, e a naale edap ɔbɛ. Bu aba lo sīdee ii suā dee ale awa sɔ̄ dee Jɛhova ebɔātɛ̄. Mɛ i suā kɔ a ɛrɛ elu, sa gbeerasī a aabah Bari ebugia dɔ nyɔɔ pya bag dogo, e ba naale edap sibah.

5. Bu mɛ sīdee na gbɛnɛ etɛɛrɛloo le doodoo ɛɛ’dee a?

⁵ Doodoo ɛɛ’dee. Dɔɔ̄na sɔ̄, bu eree taa ue a tɔɔ̄dɔ nu, Pɔɔl kɔ nu akiiloo pya biu a gaa yib nu uunɛ. Mɛ lo sɔ̄ ama, bee kɔ Pɔɔl aa bee su dee Jɛhova dooreloo ɛɛdee. (1 Tɛs 5:4) Pya biu alu uunɛ dap le aa yib nu sa naa suā kɛ̄ sɔ̄ e’ina. Dee dap wa ɛɛloo sa pya nɛɛ muɛ wa. Bu aba lo sīdee, gbɛnɛ etɛɛraloo esu pya a le doodoo pya biu ɛɛ’ee, lo ba bia bu zii tɛ̄maloo ewee doo nu a naa nia Bari. Ii le ebee wa, mɛ i kiisī lo ekpɛ̄naloo tɛ̄maloo ekiī pya dogo a naa nia Jɛhova sa doo “dɛ̄dɛɛ̄ le dogo, le kaāna dogo le kaka ue.” (Ɛfɛs 5:8-12) Sɔ̄ esaa Pɔɔl bee su baɛ ue a tɔɔ̄dɔ nu a bee ziī kɔā nu akiiloo pya nɛɛ ba naale e’ɛrɛ kpɔā.

BA MƐƐ NA A NAALE ETƐƐ̄ YEE BAH DEE JƐHOVA A?

6. Bu mɛ sīdee na gbɛnɛ-edo nɛɛ gaa daadaa a? (1 Pya Tɛsalɔnaika 5:6, 7)

⁶ “Pya a daadaa.” (Buū 1 Pya Tɛsalɔnaika 5:6, 7.) Pɔɔl bee su pya a naale etɛɛ̄ yeebah dee Jɛhova dooreloo pya a daadaa. Ba naa suā nu a gaa kiisī kɛ̄ ba le, ale kɛ̄ sɔ̄ e’ina. Nyɔɔwo, ba naa suā sɔ̄ ziī gbɛnɛ nu sira, ale doo dogo kumaloo. Nii’ee, gbɛnɛ-edo nɛɛ le daa bu edɔɔ̄. (Rom 11:8) Ba naa suā kɔ i gaa tɔɔ̄dum bu kpɛdumɛ dee sa gbɛnɛ etɛɛrɛloo esaa esudɔ. Gbɛnɛ gbɛnɛ nu aa sira bu nyɔuwe anii’ee dap doo kɔ pio nɛɛ a lobia aa daa bu edɔɔ̄ sa ɛrɛ kina taɛ bu yereue Buɛ̄-mɛnɛ. Kerewo, gbɛnɛ-edo aba sikɛ̄ daa taā ba tɔɔ̄ yeere. Kere pio pya a yiga kɔ dee biaɛ gaa lu, kɛɛrɛnage kɔ a lege ebini. (2 Pit 3:3, 4) Kuma sɔ̄ lo dee aa tɔɔ̄ waɛloo kɛ̄ a, i suā kɔ alu ebɛɛ̄ kɔ i kiisī lo etɔɔ̄ yeere dookɛ̄ Kpa Kaɛ kɔ doo.

7. Mɛ sīdee na pya ekpesī saŋ Bari le doodoo pya a ɔ̄ miī tɛɛā dɛɛ̄ a?

⁷ “Pya a ɔ̄ miī . . . tɛɛā dɛɛ̄.” Nɛɛ lɛɛratam Pɔɔl su pya nɛɛ ekpesī saŋ Bari dooreloo pya a ɔ̄ miī tɛɛā dɛɛ̄. Pya a ɔ̄ miī tɛɛā dɛɛ̄ naa wee nwaabah doo dogo nyɔɔnɛ nu aa sira kɛ̄ ba le, e suānu naa wee le bu wa biaɛfii. Bu aba lo sīdee, pya bag dogo naa gbaɛ̄tɔ̄loo zuurabahtɔ̄ Bari. Ba biaɛfii lo etɔɔ̄dum bu sīdee esu wa mmɛ loo gbeerasī. Mɛ alu ekɔ nɛ pya Nɛɛ Kraist kɔ ba a tɔɔ̄ baɛ sa nwaɛ̄dɛɛ̄, sa kɛɛrɛ nu leere. (1 Tɛs 5:6) Ziī nɛɛ enɔā gbɛnɛ kpa a wee gbītɛ̄ pya ue a le bu Baibol baatɛ̄ ue a kura kɛɛrɛ nu leere nua “nɛɛ a fɛɛrɛloo, a naa nyɔŋa sa kiisī lo e’ɛp bu ziī nu kinakina sa kɛɛrɛ nu a dap sira aabu, e wo doo kɔ ye biaɛfii a lee.” Ena anua i ɛrɛ esueloo kɛ̄ sa ii doo nu bu gbaragbara a? Ɛɛ na lokwa ii yere bee bu bira bɛbɛɛ ale pya taāŋa a le yɛɛ miɔŋɔ nɛɛ anii’ee. Taɛ le ezū lo e’ɛrɛbah bu pya nu ama e’agɛrɛbah agatɛ̄ sɔ̄ dee Jɛhova aa tɔɔ̄ waɛloo kɛ̄ a. Kerewo, a naa lu ebɛɛ̄ kɔ i ɛrɛ gbɛnɛ ekɛɛrɛ kumaloo nu i kɔ ale nu i doo. Edɔɔ̄ Bari eyerebah i nɛ kɔ i ɛrɛ efɛɛloo beenyiɛ sa i nɛ kaāna ekɛɛrɛ lokwa i dap biaɛ nu fii bu sīdee a lee.—Luk 12:11, 12.

ENA I DAP DOO LO EKPƐ̄NALOO BAƐ DEE JƐHOVA A?

8. Bu mɛ sīdee na 1 Pya Tɛsalɔnaika 5:8 baatɛ̄ pya elap dogo eyerebah i nɛ kɔ i tɔɔ̄baɛ sa nwaɛ̄dɛɛ̄ a? (Ɛpnage foto.)

⁸ “Kpɛɛra nu-nɔ̄ beenyiɛ . . . [sa yaa] pɛgɛrɛ nɔ̄.” Pɔɔl su i dooreloo pya nɔ̄ lo ba le ekpɛ̄naloo sa yaa nu-nɔ̄. (Buū 1 Pya Tɛsalɔnaika 5:8.) Wee lu e’ɛmadɛɛ̄ kɔ nɛɛ nɔ̄ a le nyɔɔ tam a kpɛ̄naloo ebe nɔ̄ ɛrɛgebah sɔ̄ alu ebɛɛ̄. Lo ama lunage kaka kiiloo ili. I kiisī lo ekpɛ̄naloo baɛ dee Jɛhova tɛ̄maloo eyaa nu-nɔ̄ kpɛɛra beenyiɛ lo a le yira, wereloo, le pɛgɛrɛ nɔ̄ lo a le bɛābu. Pya elap dogo ama dap i yerebah nɛ kaāna.

9. Bu mɛ sīdee na i yira i kpega a?

⁹ Nu-nɔ̄ kpɛɛra beenyiɛ wee kpega beenyiɛ nɛɛ nɔ̄. Yira le wereloo kpega i beenyiɛ a tɔɔ̄dɔ nu. Ba eyerebah i nɛ kɔ i kiisī lo etaāŋabah Bari sa nyɔɔnɛ dumɛ Jizɔs. Yira doo kɔ i suā kɔ Jɛhova enɛ i ekpɛanu nyɔɔbee i gbī ye tɛ̄maloo dɛ̄dɛɛ̄ i beenyiɛ. (Hib 11:6) E zū i kɔ i tɔɔ̄ agara nɛ i Nɛɛ Zaāsī Jizɔs, kere a kura kɔ i egerebu bu e’aga kɛ̄tɔɔ̄. I dap agɛrɛtɛ̄ i yira lo edoo kɔ i dap egerebu sɔ̄ i kpesī nu finiabah bu dum tɛ̄maloo enɔ nu aāloo edoba pya nɛɛ a le bu ilii dee ama lo ba bee kiisī lo etɔɔ̄ agara kaɛlɛɛ tɛ̄ŋaloo ale naɛbah. E i dap kiī taɛ lo ewereloo kpugi le zɔ tɛ̄maloo enɔ edoba pya nɛɛ ba doo kɔ wa dum a waɛbah sa su Buɛ̄-mɛnɛ Bari nua tua tua.b

10. Mɛ sīdee na wereloo i ɛrɛ loo Bari le loo pya nɛɛ le ii le i yerebah nɛ kɔ i egerebu a?

¹⁰ Lunage ebɛɛ̄ kɔ i ɛrɛ wereloo lokwa i dap kiisī lo etɔɔ̄ baɛ sa nwaɛ̄dɛɛ̄. (Mat 22:37-39) Wereloo i ɛrɛ loo Bari yerebah i nɛ kɔ i egerebu kaɛlɛɛ ɛrɛgebah taāŋa i kpesī sɔ̄ i aa zue ue. (2 Tim 1:7, 8) Nyɔɔbee i werenage loo pya a naa taāŋabah Jɛhova a, i kiisī lo ezue ue bie i kɛ̄ zue ue sa zuenage ue tɛ̄ma nyɔɔ fon le tɛ̄maloo lɛta. Ii pee beenyiɛ i nyɔɔbee i bɛābu kɔ pya nɛɛ i gaa zue ue nɛ dap nyaa sa bɔātɛ̄ edoo nu a lee ziī dee a ee.—Ezek 18:27, 28.

11. Bu mɛ sīdee na wereloo i ɛrɛ kumaloo pya wuga bu yira i yerebah nɛ a? (1 Pya Tɛsalɔnaika 5:11)

¹¹ Pya i wuga bu yira lenage yɛɛ pya nɛɛ le ii le lo i wereloo. I tɔgɛ dua wereloo ama tɛ̄maloo e’agɛrɛ “beenyiɛ ɛnia [ii] sa wu ziī . . . agɛrɛ.” (Buū 1 Pya Tɛsalɔnaika 5:11.) Doodoo pya nɔ̄ a gaa gbaaloo bebe, i yere mɛm loo ɛnia ii. Kɛādoo, nɛɛ nɔ̄ dap yere muū loo nɛɛ le ɛɛ gaa gbaa be nɔ̄ sɔ̄ a naa suā, mɛ a naale e’ɛmɛnɛbee doo wo doo pip pip. Bu aba lo sīdee, ii le ɛmɛnɛbee doo piya nu loo pya i wuga ale i obara pɔrɔ kpɛā pɔrɔ loo pya i wuga nɛɛdam le nɛɛwa. (1 Tɛs 5:13, 15) I tɔgɛnage wereloo sɔ̄ i nɛ enwadɛɛ̄ pya a gaa kuūdɛɛ̄loo bɔŋanaloo. (1 Tɛs 5:12) Sɔ̄ Pɔɔl bee ɛm lɛta ama, bɔŋanaloo pya Tɛsalɔnaika sii bee lu ziī zua aā sɔ̄ a bee lu eyere. Pya a bee lu etubobaloo sii bee dābeeloo gbɛnɛ-edo nu, e ba bee dap tɛɛ̄ ekwɔ. Kerewo, ba bɔloo enwadɛɛ̄. Sɔ̄ gbɛnɛ etɛɛrɛloo ebɔātɛ̄, elu ebɛɛ̄ kɔ i dɛɛa nyɔɔ pya leeredeebah a aabah pya kanɛɛ a le bu i bɔŋanaloo eekɛ̄ i gaa doo anyaawo. Pio sɔ̄ ii le e’ɛrɛna ue aā beekɛ̄ le tɔ-naatam; nyɔɔwo, alu nu a kuī kɔ i wereloo sa nɛ enwadɛɛ̄ pya kanɛɛ a le bu i bɔŋanaloo anyaawo. Kaɛlɛɛ ɛrɛgebah nu a sira, dooraa i kiisī lo enɛ wa enwadɛɛ̄ sa ii bie ekɛɛrɛ nyɔɔ wa tɛɛ̄ ekwɔ, mɛ i kiisī lo esuā kɔ Jɛhova gaa leredeebah pya nɛɛ a bɔ ture nyiɛ loo ama tɛ̄maloo Kraist.

12. Bu mɛ sīdee na i bɛābu kpega i ekɛɛrɛ a?

¹² Dookɛ̄ pɛgɛrɛ nɔ̄ wee kpega ekobee nɛɛ nɔ̄ doo, kɛ̄ bɛābu kpɔā i ɛrɛ kpeganage i ekɛɛrɛ doolo. Nyɔɔ kɛ̄ i bɛābu agatɛ̄ doo, i suā kɔ lɔgɔ nu nyɔuwe ama nɛ naa dɔ lɔgɔ biī. (Fil 3:8) I bɛābu yerebah i nɛ kɔ i sueloo kɛ̄ sa ii nyɔŋa. Kɛ̄ a bee siraloo Wallace le Laurinda lo ba gaa si tam bie Africa doolo. Bu aba taa kaɛ, tɛ Wallace bee u, e ka Laurinda unage. Nyɔɔbee dumɛloo COVID-19, ba naa bee dap kii be wee muɛ pya wa butɔ. Wallace ɛm kɔ: “Bɛābu aakɛ̄ bu luh yerebah mɛ nɛ kɔ m aa kɛɛrɛbu kɛ̄ ba bee le doo lɛɛ ba gae u, mɛ kɛ̄ ba ele doo tua sɔ̄ ba e’aakɛ̄ bu luh bu aā nyɔuwe. Bɛābu ama doo kɔ m sueloo kɛ̄ sɔ̄ bu mɛ biira ale sɔ̄ m ɛrɛ ekiɛ̄nu nyɔɔbee wa luh.”

13. Ena i dap doo lo e’ɛrɛ kaɛ edɔɔ̄ a?

¹³ “Bui aa zimɛ [miā edɔɔ̄].” (1 Tɛs 5:19) Pɔɔl bee su kaɛ edɔɔ̄ dooreloo miā a i le bu. Sɔ̄ i ɛrɛ edɔɔ̄ Bari, i wee ɛrɛ e’agabah taɛ sa bɛamiā lo edoo nu a lee, e i wee ɛrɛ mɛm lo esiātam nɛ Jɛhova. (Rom 12:11) Ena i dap doo lokwa i ɛrɛ edɔɔ̄ Bari a? I dap yere kara bara, nɔ Muɛ̄ Ue Bari, sa gbaaloo ye bɔŋanaloo lo ye kaɛ edɔɔ̄ aa baɛbee. Dodoo wo eyerebah i nɛ kɔ i ɛrɛ ‘eyuu edɔɔ̄.’—Gal 5:22, 23.

14. Ena ii ɛrɛ edoo lo i gbī ekiisī lo e’ɛrɛ kaɛ edɔɔ̄ Bari a? (Ɛpnage foto.)

¹⁴ Sɔ̄ Bari enɛa i ye kaɛ edɔɔ̄, i ɛrɛ enwaɛ̄dɛɛ̄ lokwa ii “zimɛ [miā] edɔɔ̄.” Bari wee nɛ ye kaɛ edɔɔ̄ pya nɛɛ ba ɛrɛ logaloga ekɛɛrɛ sa tɔɔ̄dum a ɛɛ. A naale enɛ i ye kaɛ edɔɔ̄ lo i kiisī lo ekɛɛrɛ sa doo pya nu a naa ɛɛ. (1 Tɛs 4:7, 8) Lokwa i kiisī lo e’ɛrɛ kaɛ edɔɔ̄, ii ɛrɛ ‘e‘ɛp mɔmanudɛɛ̄ kuma kɛ̄.’ (1 Tɛs 5:20) Bu dɔ ama, nu bee ue a kura ‘mɔmanudɛɛ̄’ kura na pya yereue Jɛhova i nɛ tɛ̄maloo ye kaɛ edɔɔ̄, gbaāloo pya lo a ɛrɛ nu edoo kiiloo dee Jɛhova le kɛ̄ sɔ̄ i le ama lu gbaragbara doo. Ii le ebialoo kɛɛrɛ kɔ dee ama lege ebini, sa kɛɛrɛ kɔ Amagidɔn naale elu sɔ̄ i le dum ama. Taāwo, i tɔgɛ kɔ esaa elu, tɛ̄maloo ewee doo nu a lee sa lu kirikiri lo etɔɔ̄dum “enwadɛɛ̄ Bari” dɛ̄dɛɛ̄ dee.—2 Pit 3:11, 12.

“DOĀ ƐP DƐ̄DƐƐ̄ NU”

15. Bu mɛ sīdee na i kpooraloo lɛɛloo esah ue le ue dag pɔrɔ-edɔɔ̄ gaa yaari a? (1 Pya Tɛsalɔnaika 5:21)

¹⁵ Sɔ̄ sɔ̄ naa binia, pya ba gbanasī Bari ekɔ: “Efɛɛloo le kpɔā” (1 Tɛs 5:3) Pya gbo-yɔ eyaari esah bu yube nyɔuwe, sa dag gbɛnɛ-edo nɛɛ. (Mum 16:13, 14) E kiikɛ̄ ili le ni a? Naale edap lu edag i lo i “doā-ɛp [ale i ‘ɛp’] dɛ̄dɛɛ̄ nu” leere. (Buū 1 Pya Tɛsalɔnaika 5:21.) Bee ue Grik alu etap nua “doā-ɛp,” wee lu esu baātɛ̄ sīdee pya nɛɛ wee ɛp lo a le pya kpe a si gbɛnɛ du doodoo gold le silva luge lo le. Nyɔɔwo, alu ebɛɛ̄ kɔ i doā-ɛp pya nu i dā ale nu i buū lo esuā lo aluge kaka naa e. Lo ama bee kuī loo pya Tɛsalɔnaika kaāna, sa a kuīnage loo ili eewo kuma sɔ̄ gbɛnɛ etɛɛrɛloo gaa tɔɔ̄ waɛloo kɛ̄ a. Taā i aadee yiga ɛrɛgeba nu pya nɛɛ kɔ, i su buābee ɛma pya nu i buū le pya nu i dā sa dooreloo nu Baibol le bɔŋanaloo Jɛhova kɔ. Sɔ̄ i doo wo, naale edap lu edag i tɛ̄maloo esah pɔrɔ-edɔɔ̄ gaa yaari.—Kam 14:15; 1 Tim 4:1.

16. Amunu bɛābu alu kaka na i ɛrɛ a, e a zū i kɔ i doo wa?

¹⁶ Doodoo ziī eku nɛɛ, pya zooro Bari etɛɛ̄ yeebah gbɛnɛ etɛɛrɛloo. Kerewo, ziī ziī ii ii suā kɛ̄ nyɔɔ’ee li emɛā doo. (Jem 4:14) Mɛ kere i le dum sɔ̄ gbɛnɛ etɛɛrɛloo esira ale i u lɛɛ a gae lu lo sɔ̄, elu enɛ i dum anaatah lo i bɔ ture nyiɛ loo mmɛ kɛ̄. Pya alu etɔ̄ nɔɔ̄ bee ele kpaɛ̄ Jizɔs li bunyɔɔ. Pya dɔɔ̄na eku naana pee ele bu paradais a nyɔɔ kɛnɛkɛ̄. Naa lege bee i bie dɛɛ̄ nyɔɔ bɛābu alu nyɛŋia a i le si sa kpɛ̄naloo baɛ dee Jɛhova!