Adam le Iv bee ɛrɛ gbomiɔŋɔ sɔ̄ ba e’aara bu gɔh Idɛn. Wa tua nwiī bee le Ken, e a wee foh nu, lo eree baɛ bee le Ebɛl, e a wee tɔɔ̄loo naana-pee.

Ziī dee, Ken le Ebɛl bee wɔp zɔɔ nɛ Jɛhova. O suāge nu wɔp zɔɔ kura ni? Ɛɛ ziī keebee dɔɔ̄nu. Bu Jɛhova bee ɛɛ loo zɔɔ Ebɛl, mɛ bu ye naa bee ɛɛ loo zɔɔ Ken. E Ken bee ɛrɛ gbɛnɛ saŋ. Jɛhova bee zuurabahtɔ̄ Ken kɔ ye saŋ gaa le doo kɔ a doo nu a bee piya. Mɛ Ken naa bee gbaɛ̄tɔ̄.

Taā Ken gbaɛ̄tɔ̄ nu Jɛhova ye kɔ nɛ, a bee kɔ nɛ ye wuga Ebɛl kɔ: ‘Doo mɛ i si bu wii.’ E sɔ̄ aba baɛ aba le bu wii, Ken bee su nu zima ye wuga fɛ. Ena Jɛhova edoo kumaloo nu Ken doo ama ani? Jɛhova bee su kpɔte nua nyɔɔ Ken, tɛ̄maloo ekpo ye lɛɛ yɛɛ pya ye nɛɛ ture kɛ̄ a binia. E a naa bee ye lɛɛbahloo kɔ a sikɛ̄ wa obia pii.

Ekɔ a ɛrɛge nu ili dap nɔ aāloo ni? I dap bɔātɛ̄ ɛrɛ saŋ lo nu naa kiā leere dookɛ̄ i bee ɛmadɛɛ̄ doo. Lo i muɛ kɔ saŋ le i bu, ale pya dɔɔ̄na yere nukuādɛɛ̄loo kɔ i gaa ɛrɛ saŋ sa ba zuura i bahtɔ̄ akiiloo, a lee kɔ i nwaabah kwabahloo kɛ̄ nu i tɔɔ̄ loo doo, lokwa saŋ naa zū i kɔ i doo nu a bee piya.

Jɛhova naale e’ibere Ebɛl, nyɔɔbee a bee wereloo Jɛhova sa doo nu a lee. Sɔ̄ kɛnɛkɛ̄ ama elu paradais, Jɛhova elɛɛ Ebɛl kɛ̄ bu luh sa sere dum.

Sɔ̄ sɔ̄ gaa kiisī, pya nɛɛ bee kuī kpo bu nyɔuwe. E gbɛnɛ-edo aba bee doo nu a bee piya. Kere pio pya ɛnjɛl a le bunyɔɔ bee beenage piya. Ba bee aa wa kɛ̄ etɔɔ̄ li bunyɔɔ sa lu nyɔɔ kɛnɛkɛ̄. O suāge nu anua ba bee doo wo ni? Ba bee doo wo lokwa ba dap yaa namloo nɛɛ sa ii pya nɛɛwa.

Pya lo ɛnjɛl bee buɛ̄ nwiī bu pya lo nɛɛwa, e pya lo miɔŋɔ bee ɛrɛ keebee ekpo sa wee sibag loo pya nɛɛ, sa yeregi muū loo pya nɛɛ. Jɛhova naa bee lɛɛbahloo kɔ dua dogo a le doo wo a wee kiisī. Nyɔɔwo, a bee biaɛfii lo esu yii maā gbemasī pya bag dogo.

Mɛ a ɛrɛ ziī nɛɛ a bee lu kee. Lo nɛɛ bee wereloo Jɛhova, ye bee kura Noa. Noa bee ɛrɛ wa le taa miɔŋɔ nɛɛdam, wa bee kura Shem, Ham, le Jafɛt. Ziī ziī pya lo miɔŋɔ nɛɛdam bee ɛrɛnage wa. Jɛhova bee kɔ nɛ Noa kɔ a ka gbɛnɛka fah, lokwa alɛ le pya ye tɔ dap tɛɛ̄ yee lo Yii Maā. Fah alu eka ɛɛ gbɛnɛka ekpo a dap yɛɛ nyɔɔ maā. Jɛhova bee kɔ nɛ Noa kɔ a su gbɛnɛ-edo nam yerebu lo fah lokwa alunage ekpɔā wa.

Noa naa bee pee sɔ̄, a bee bɔātɛ̄ ka lo fah. A bee su nu alu 50 zua bah Noa le pya ye butɔ lo eka lo fah lɛɛ. Ba bee ka lo fah taɛ kɛ̄ Jɛhova bee wa kɔ nɛ doo. Sɔ̄ ba aa bee ka lo fah, Noa bee zuurabahtɔ̄ pya nɛɛ akiiloo lo Yii Maā. Mɛ lɔgɔ nɛɛ naa bee ye gbaɛ̄tɔ̄.

Bu kpɛdumɛ, e’ina sɔ̄ ba eyii bu lo fah. Doo i naa ɛp nu a sira nyɔɔnɛ.