Iyẹnrẹn Ọrẹ i Mak
1 Ọnana ọtonrhọ iyẹnrẹn esiri ro sekpahen i Jesu Kristi, ro rhiẹ Ọmọ Osolobrugwẹ: 2 Jerẹ oborẹ a ya rhẹ uvuẹn ọbe ọmẹraro Aizaya taghene: “(Nughe! Mie dje ọnyikọ mẹ kobaro wẹn, ro no mwuegbe izede ọnọ.) 3 Uvwele owu o korunu phia uvuẹn ato na taghene: ‘Are i mwuegbe izede i Jehova!* Are i ruẹ izede yi phiọn.’” 4 Jọn ro Brawanrhame na ọ ha uvuẹn ato na, no ghwoghwo taghene ihworho i bromarhame, no rhiẹ oka ẹghwẹriẹ rẹn aye, na ji harhomu edandan aye. 5 Omarana, ọsoso uvwrotọre i Judia ọrhẹ ihworho re rhirhiẹ i Jerusalẹm ephian, na ghwiẹ bruie sa. No bruru aye rhẹ ame uvuẹn Urhie i Jọdan, ọke aye a rhian edandan aye hin uvuẹn afiede. 6 Ọke ọrana, ewun ra ha ẹton ijaki ru yi Jọn o kuẹrhọ, ọ ji ha umwaya ọphiẹn mwu ugbewuien, ebaka ọrhẹ amiahon yẹ emariẹn. 7 No ghwoghwo taghene: “Ohworho ro vwo omẹgbanhon ghwẹ mẹ ọ sa, mie mwuovwan mi ne rhuẹn ji rhan ufi isabatu ọnẹye-en. 8 Mi bruru are rhẹ ame, ọrẹn ọye ono bru are rhẹ ame nyoma ẹhẹn ọfuanfon na.”
9 Uvwrọke ọrana, Jesu no nẹ Nazarẹt ọrẹ i Galili riẹ Urhie i Jọdan na, Jọn no brurie rhẹ ame. 10 Ogege i Jesu o nẹ uvuẹn ame na rhe, nọ mẹrẹn idjuwu na ri rhiefirhọ, ẹhẹn ọfuanfon na no bruie sa jerẹ erurẹ. 11 Uvwele owu nọ tẹmro nẹ idjuwu na rhe taghene: “Wẹwẹ Ọmọ mẹ mi vwo ẹgwọlọ kpahen, mi vwo ekwerhọ kpahuọn.”
12 Ogege, ẹhẹn ọfuanfon na no suẹn i Jesu ruẹ uvuẹn ato na. 13 Omarana, nọ daji uvuẹn ato na ẹdọke 40, avwaye yẹ Echu ọ damiẹ ni. Eranmo egbo i ji ha uvuẹn ato rọ havwọ na. Ọke oru emakashe na, na ha userhumu riẹn.
14 Vwana, ọke e mwu i Jọn rhẹ ekanron hin, Jesu no riẹ i Galili ye ghwoghwo iyẹnrẹn esiri Osolobrugwẹ. 15 Nọ ta: “Ọke re bruru na o te ne, Uvie Osolobrugwẹ o tikẹrẹ ne. Are i ghwẹriẹ ji vwo esegburhomẹmro kpahen iyẹnrẹn esiri na.”
16 Ọke rọ nya okokọ Urhie ọduado ọrẹ i Galili, nọ mẹrẹn i Saimọn ọrhẹ omizu i Saimọn re se Andru, ra ha iriri tan Urhie ọduado na, fọkime aye ikpirhenrin. 17 Omarana, Jesu nọ ta rẹn aye: “Are i leli mẹ, ni mi ne ruẹ are rhiẹ ikpirhenrin ituakpọ.” 18 Ogege, aye ni nyajẹ iriri aye vwo ji leli Jesu. 19 Ọke rọ nya riẹ obaro ibiesuọn, nọ mẹrẹn i Jems ọrhẹ omizie re se i Jọn ri rhiẹ emọ i Zẹbẹdi, ra kwaphiẹ iriri aye uvuẹn owọ aye. 20 Ogege no serẹ aye. Omarana, aye ni nyaji ọsẹ aye re se Zẹbẹdi vwo ọrhẹ ihworho ra wian rẹn aye rhẹ uvuẹn owọ na, aye ni leli Jesu. 21 Aye ni riẹ i Kapaniọm.
Ogege Ẹdẹ Omeronmo na o te, Jesu nọ ruẹ i sinagọg na ye yono ihworho. 22 Ona rọ ha yono aye no gberẹ aye unu omamọ, fọkime o yono aye jerẹ ohworho ro vwo omẹgbanhon, ọ họhọ eyẹbe aye-e. 23 Ọrẹn, o vwo ọhworhare owu uvuẹn i sinagọg na rẹ okpodje o kpokpo, no korunu phia taghene: 24 “Me yẹ ame ọrhẹ owẹwẹ i vwo kugbe, Jesu ro rhiẹ onyẹ Nazarẹt na? Wu rhiẹ aran mọ ghwọghọ ame? Mi dabu rhe ohworho wu havwọ, wẹwẹ yẹ Ohworho Ọfuanfon Osolobrugwẹ!” 25 Ọrẹn, Jesu nọ vanghwu okpodje na: “Fọdu, ne wu nẹ oma ọhworhare na!” 26 Ọke okpodje na ọ lẹrhẹ ọhworhare na phariẹ gbangbanhon* ji korunu phia hin, no nẹ omayen. 27 Emru ọnana no gbe ihworho na ephian unu omamọ, te erhirhiẹ aye a ta uvwre omoma aye taghene: “Ọnana i me? Ọnana uyono ọkpokpọ! Ọ tobọ vwo omẹgbanhon ro jurhi rẹn ikpodje na, aye na huvwele yi.” 28 Omarana, iyẹnrẹn kpahiẹn no kerabọ phẹphẹrẹ lele ekete ephian uvuẹn uvwrotọre i Galili.
29 Ọke oru, aye ni nẹ i sinagọg na riẹ oghwa i Saimọn ọrhẹ Andru. Jems ọrhẹ i Jọn ni ji lele aye. 30 Vwana, izu ane i Saimọn o semerhẹn fọkime o kpomu emiamo ifiva,* ogege aye ni ta rẹn i Jesu kpahiẹn. 31 Jesu no brurie nya ji mọrẹn obọ ye, nọ kpareriẹ vẹnrẹn. Ifiva na no nẹ omayen, ọmase na no gbodibo rẹn aye.
32 Ọke owuọwọn o te, rẹ ọren na o ji riotọre ne, ihworho na kpare ọsoso ere kpomẹ ọrhẹ erẹ ikpodje e kpokpo bru i Jesu. 33 Ọsoso ihworho ri ha amwa na, ni koko rhẹ obaro anurẹsẹ oghwa na. 34 Omarana, Jesu no simi ihworho buebun re kpomu aruẹ emiamo sansan, no ji le ikpodje buebun nẹ ihworho oma. Ọrẹn, o vwo kwe nẹ ikpodje na i tẹmro-o, fọkime aye i rheri taghene ọye yi Kristi na.*
35 Jesu no vẹnrẹnren igidurhiọke, ọke ekete ephian o ji mwuokuku, nọ ruẹ otafe ya nẹrhomo uvuẹn ekete kologho. 36 Ọrẹn, Saimọn ọrhẹ ereva ye, na gwọlọ i Jesu lele ekete ephian. 37 Ọke aye a mẹriẹn, aye ni ta riẹn: “Ihworho ephian a gwọluọ.” 38 Ọrẹn, nọ ta rẹn aye: “Jene riẹ ekete ọrọrọ, ne riẹ emwa ri kẹrẹ aran, ni mi ji ye ghwoghwo oboran, fọkime ọnana yọ soriẹ mia rhe.” 39 Nọ nyarhẹn ye ghwoghwo uvuẹn i sinagọg ri ha ọsoso i Galili, no ji le ikpodje nẹ oma ihworho.
40 Ohworho owu ro kpomu emiamo oti, nọ rhe me sighwẹ rhẹ obaruiẹ, nọ rẹ ye taghene: “Wu rha gwọlọ, wu na sabu ru mẹ fon.” 41 Omarana, aruo ọhworhare na nọ dọnriẹn, nọ rionbọ ji hobọte yi, nọ ta riẹn: “Mi gwọlọ simuo! Gba fon.” 42 Ogege, emiamo oti na no nẹ omayen, omayen nọ fonron. 43 Ọke oru, nọ yẹriẹ orhetio ọgbogbanhon, ji ta riẹn nọ nyarhẹn ogege, 44 nọ ta riẹn: “Wu vwa ta rẹn ohworho owuorowu kpahiẹ-ẹn. Ọrẹn nyarhẹn ye dje oma rẹn orherẹn na, ne wu ji ze izobo erufon ra ta kpahen uvuẹn Urhi Mosis na, no rhiẹ oseri rẹn aye.” 45 Ọrẹn, ọke ọhworhare na o nẹ avwaye, nọ nyarhẹn ya ta rẹn ihworho buebun kpahiẹn ji kerabọ iyẹnrẹn na lele ekete ephian. Fọkiẹ ọrana, Jesu ọ vwọ rhọ ruẹ amwa owuorowu udaro ihworho-o, ukpomaran nọ daji ekete kologho uvuẹn otafe amwa na. Udabọ ọrana, ihworho na ji ghwiẹ nẹ ekete ephian bruie sa.