Iyẹnrẹn Ọrẹ i Mak
8 Uvuẹn ẹdẹ erana, ihworho buebun ni rharhumu koko, ọrẹn aye e vwo oborẹ aye ina riọ-ọ. Omarana, Jesu no se idibo yi ji ta rẹn aye: 2 “Aruo otu na ọ dọn mẹ, fọkime aye i leliri mẹ rhirhiẹ ye ẹdọke esa ne, ọrẹn o vwo oborẹ aye ina riọ-ọ. 3 Mi rhe tiobọnu aye rie rhẹ ephan ọkaka, aye ine dophie uvuẹn izede. Ezẹko usuẹn aye i tobọ nẹ ekete oseseri rhe.” 4 Ọrẹn, idibo yi ni ta riẹn: “Bọgo yẹ ohworho ọnọ mẹrẹn ibrẹdi rọ nọ vuọn ihworho enana ephian ephan uvuẹn ekete kologho ọnana?” 5 Omarana, Jesu nọ nọren aye: “Ibrẹdi emwa yẹ are i vwori?” Aye ni tare: “Irhiruẹ.” 6 Nọ ta rẹn otu na nẹ aye i siyẹ totọre. Ọke rọ ha ibrẹdi irhiruẹ na ji kpẹmẹ Osolobrugwẹ hin, no bruru aye jeghwai ha aye rẹn idibo yi nẹ aye i ghaliẹ, aye ni ghaleriẹ rẹn otu na. 7 Aye i ji vwo irhenrin ekokamu ezẹko, ọke rọ kpẹmẹ Osolobrugwẹ hin, nọ ta rẹn idibo yi nẹ aye i ghalẹ aye. 8 Aye ni riẹ ephan vuọn, ji koko oborẹ aye i re hẹrhẹ na vuọn ekalokpọ* eduado irhiruẹ. 9 Vwana, emrẹ ehworhare awan 4,000 yi ha avwaye. Ọke oru, no tiobọnu otu na.
10 Ogege, ọye ọrhẹ idibo yi ni ruẹ owọ riẹ uvwrotọre i Damanuta. 11 Itu i Farisi na ni brurie rhiẹ avwaye me lelie frẹfro. Aye na ta riẹn no dje oka ro nẹ odjuwu rhe rẹn aye, neneyo aye i sabu damiẹ ni. 12 Omarana, nọ da i Jesu te ẹhẹn, nọ tare: “Mesoriẹ uvwiẹ ọnana ọ gwọlọ oka? Itiọrurhomẹmro mia ta rẹn are taghene, o vwo oka owuorowu re ne dje rẹn uvwiẹ ọnana-a.” 13 Omarana nọ nyaji aye vwo, nọ rharhumu ruẹ owọ ji danvrẹn riẹ obọreva urhie na.
14 Ọrẹn, idibo na arha karorhọ kpare ibrẹdi lele oma-a, emru owuorowu orho gberẹ aye uvuẹn owọ na-a, jokpanẹ ibrẹdi owu ọvo. 15 Jesu nọ dabu ha orhetio rẹn aye taghene: “Are i rhie ikẹro are firhọ, ji ni oma so fọkiẹ iyisti* itu i Farisi na ọrhẹ iyisti Hẹrọd.” 16 Omarana, aye ne kperi omoma aye fọkime aye a kpare ibrẹdi lele oma-a. 17 Ọke i Jesu ọ djokarhọ ọnana, nọ ta rẹn aye: “Mesoriẹ are e kperi omoma are fọkime are a kpare ibrẹdi-i? Are e ji rhe jeghwai vwẹruọ ekwakwa enana? Ọ ji bẹn rẹ are ine vwẹruọ ye uvuẹn ọmudu are? 18 ‘Dedevwo are i vwo ukẹro, are i vwa mẹrude-e. Dedevwo are i vwo erhọ, are i vwe rho-on.’ Are a karorhọ 19 ọke mie bru ibrẹdi isionrin rẹn ehworhare awan 5000 na? Ekalokpọ emwa yẹ are i koko oborẹ a re hẹrhẹ vuọn?” Aye ni ta riẹn: “Ikpereva.” 20 “Ọke mie bru ibrẹdi irhiruẹ rẹn ehworhare awan 4,000 na, ekalokpọ eduado emwa yẹ are i koko oborẹ a re hẹrhẹ vuọn?” Aye ni ta riẹn: “Irhiruẹ.” 21 Omarana, nọ nọren aye: “Are i vwẹruọ ye ne?”
22 Vwana, aye ni domaji uvuẹn i Bẹtseda. Ihworho ni kpare ọhworhare owu ro tuẹro vwe i Jesu, aye na rẹ ye nọ hobọte ọhworhare na. 23 Omarana, nọ mọren obọ ọhworhare ro tuẹro na ji suien riẹ otafe ọko na. Ọke ro djen erhẹnrhen rhẹ ikẹro ọhworhare na hin, nọ ha abọ kpahiẹn ji nọ yen: “Wa mẹrẹn emru owuorowu?” 24 Ọhworhare na nọ kparughwaruiẹ ji ta: “Mia mẹrẹn ihworho, ọrẹn aye i họhọ erhan ra nya sa nya rie.” 25 Jesu nọ rharhumu hobọte ikẹro ọhworhare na, nọ dabu mẹrude fiotọre. Ikẹruiẹ ni rhieri, nọ dabu mẹrẹn ekwakwa ephian fiotọre. 26 Omarana, Jesu nọ ta riẹn no riẹ oboghwa, ọrẹn nọ ta riẹn taghene: “Wu vwa ruẹ uvuẹn ọko na-a.”
27 Jesu ọrhẹ idibo yi ni riẹ ọko sansan ri ha i Sẹseria i Filipai. Ọke aye a nyarhẹn izede, Jesu nọ nọ idibo yi: “Ọrọmo yẹ ihworho a ta taghene mi havwọ?” 28 Aye ni ta riẹn: “Jọn ro Brawanrhame na, awọrọ aghene Ẹlaijah, ezẹko a ji ta taghene wẹwẹ owuọwan usuẹn emẹraro na.” 29 Omarana, Jesu nọ nọren aye: “Nẹ are vwo, ọrọmo yẹ omẹmẹ?” Pita nọ kpahenrhọ riẹn: “Wẹwẹ yi Kristi na.” 30 Omarana, nọ ha orhetio ọgbogbanhon rẹn aye taghene aye i vwa ta rẹn ohworho owuorowu kpahen ọye-e. 31 Habaye, no yono aye taghene Ọmọ onyakpọ na ọnọ vi rioja ekwakwa buebun. Ekpako na, ilori irherẹn na ọrhẹ eyẹbe na ina tiẹn ji kpe yi hwu, ọrẹn ana rhọmiẹ nuhwu ẹdọke esa i rha vrẹn ne. 32 Itiọrurhomẹmro, ọ tẹmro ọnana udaro aye ephian. Ọrẹn, Pita nọ hariẹ riẹ okokọ ya ghwọghwie. 33 Omarana, ọke i Jesu ọ dẹrughwaroghwu idibo yi ji ni aye, nọ ghwọghwu i Pita taghene: “Riẹ oberhumu mẹ, Echu! fọkime iroro ituakpọ yu we roro, rhẹ iroro Osolobrugwẹ-ẹ.”
34 Vwana, Jesu no se otu na ọrhẹ idibo yi kẹroma, nọ ta rẹn aye: “Orhianẹ o vwo ohworho rọ gwọlọ leli mẹ, je nọ tiẹn omayen ji kpare orhan oja* ọnẹyen, no rho leli mẹ. 35 Fọkime kohworho kohworho rọ gwọlọ simi arhọ ye, ọnọ va ye obọ. Ọrẹn kohworho kohworho rẹ arhọ ye ọ variẹ obọ fọkiẹ omẹmẹ ọrhẹ fọkiẹ iyẹnrẹn esiri na, ọnọ rharhumu vwo yi. 36 Itiọrurhomẹmro, erere ọgo yo no te ohworho obọ orhianẹ o vwo ọsoso akpọ na, ọrẹn arhọ ye nọ variẹ obọ? 37 Me yẹ ohworho ọnọ ghini sabu tiobọnu ha wene arhọ ye? 38 Fọkime kohworho kohworho rọ zofa fọkiẹ omẹmẹ ọrhẹ ẹmro mẹ uvuẹn uvwiẹ igberadja* ọnana, rọ ji vuọn rhẹ ọdandan na, Ọmọ onyakpọ na ọnọ ji zofa fọkiẹ ọravwọ ọke ọnọ rhiọ uvuẹn odidi Ọsẹ ye rhẹ emakashe efuanfon na.”