Iyẹnrẹn Ọrẹ i Mak

14 Ẹdọke eva i rha vrẹn hin, ne ne ruẹ Orẹ Ọnyavrẹn na ọrhẹ Orẹ Ibrẹdi ro Vwo Phie na. Ilori irherẹn ọrhẹ eyẹbe na, na gwọlọ izede ona rẹ aye ine mwu i Jesu ji kpe yi hwu. 2 Ọrẹn, aye na ta: “E vwe mwuien ọke orẹ na-a, fọkime ọyanghan ọnọ sabu homaphia uvwre ihworho na.”

3 Ọke oru, Jesu nọ riẹ emaren* uvuẹn i Bẹtani, uvuẹn oghwa i Saimọn ro kpomu emiamo oti bi na. Ọmase owu nọ rhere rhẹ ukoko alabasta ro vwo ichani ro gbon phanphanphan, ro rhiẹ obọdẹn inad rọ ghanranren omamọ. No rhie ukoko alabasta na, ji rhie ichani rhẹ urhomu i Jesu. 4 Omarana, ihworho ezẹko ne biomevwan ji nọ omoma aye taghene: “Mesoriẹ ọ ghwọghọ ichani ọnana fughwẹ? 5 Manẹ a sabu rhẹ ichani na i dinariọs* rọ ghwẹ 300, ji ha igho na rẹn ivwiegbere!” Omarana, aye na tuekwẹre kpahen* ọmase na omamọ. 6 Ọrẹn, Jesu nọ tare: “Are i nyajevwo. Mesoriẹ are a gwọlọ ẹmro ọmase na? Omamọ emru yo ru ha mẹ. 7 Fọkime ivwiegbere na ọrhẹ are i havwiẹ ọke ephian, are ina ji sabu ruẹ orhorhomu rẹn aye ọke ro jeri are ephian. Ọrẹn, mẹmẹ ọrhẹ are i rhirhiẹ ye ọke ephia-an. 8 Ọmase na o ru oborẹ ọnọ sabu ru. O rhie ichani ro gbon phanphanphan na rhẹ ugboma mẹ, ha mwuegbe mẹ hẹrhẹ orinmi esion mẹ. 9 Itiọrurhomẹmro mia ta rẹn are, ekete ephian re ne ghwoghwo iyẹnrẹn esiri na uvuẹn akpọ na, ana ta kpahen oborẹ ọmase ọnana o ruru na ha karorhọ yẹ.”

10 Judas Iskariọt ro rhiẹ owuọwan usuẹn awan Ikpereva na, no bru ilori irherẹn na, neneyo ọ rhẹ i Jesu rẹn aye. 11 Ọke aye e rhon oborẹ ọ tare, oma nọ merhenren aye omamọ, aye ni veri taghene aye ina yẹ ye idọlọ efuanfon. Omarana, nọ gwọlọ uphẹn rọ nọ rhẹ i Jesu.

12 Vwana, uvuẹn ẹdẹ ọrukaro ọrẹ Orẹ Ibrẹdi ro Vwo Phie na, ro rhiẹ ọke itu i Ju e ze izobo Orẹ Ọnyavrẹn na, idibo i Jesu ni nọriẹn: “Bọgo wu gwọlọre nẹ ame i mwuegbe ha wẹn ne wu ha riorẹ Ọnyavrẹn na?” 13 Omarana, no dje idibo yi awanva urhomu, ji ta rẹn aye: “Are i ruẹ uvuẹn amwa na, ọhworhare owu rọ kparẹ eriẹ ame ọnọ vwa are. Are i ha kpahiẹn 14 ruẹ koghwa koghwa rọ ruoro, nẹ are i ta rẹn onini oghwa na, ‘Oyono na aghene: “Bọgo yẹ obuvun epha na ọ havwọ? Mẹmẹ ọrhẹ idibo mẹ i gwọlọ riorẹ Ọnyavrẹn na avwaye.”’ 15 No no dje obuvun ọduado rọ ha oberun oghwa rẹn are, ra dabu kwaphiẹrhọ ne. Are i mwuegbe orẹ Ọnyavrẹn na avwaye.” 16 Omarana, idibo na ni nyarhẹn ji ruẹ uvuẹn amwa na, aye ni mẹrenriẹn jerẹ oborẹ i Jesu ọ ta rẹn aye na, aye ni mwuegbe hẹrhẹ Orẹ Ọnyavrẹn na.

17 Ọke owuọwọn o te, ọye ọrhẹ awan Ikpereva na ni rhere. 18 Ọke aye e siyẹ ekete imẹdjẹ na ji riẹ emaren, Jesu nọ tare: “Itiọrurhomẹmro mia ta rẹn are, owuọwan usuẹn are ro leli mẹ riẹ emaren na, ọnọ rhẹ mẹ.” 19 Aye ni mwuomarhọ omamọ, aye owuowọnwan na nọ yen: “Rhẹ omẹmẹ-ẹ, gbinẹ omẹmẹ?” 20 Nọ ta rẹn aye: “Owuọwan usuẹn awan Ikpereva na, ohworho omẹmẹ rhẹ ọye e gbe dumu obọ rhẹ ọmoze na. 21 Fọkime Ọmọ onyakpọ na ono hwuo jerẹ oborẹ a ya kpahiẹn, ọrẹn ukpokpogho ọ havwiẹ rẹn ohworho ra nyoma yen rhẹ Ọmọ onyakpọ na! Manẹ o rhomu rẹn ohworho ọrana orhianẹ e vwiẹ ye-e.”

22 Ọke aye a ji riẹ emaren na, nọ ha ibrẹdi, ọke rọ nẹrhomo hin, no brurie ji haye rẹn aye, nọ tare: “Are i mie, ọnana o mevirhọ ugboma mẹ.” 23 Nọ ji ha uko enyo, nọ kpẹmẹ Osolobrugwẹ ji haye rẹn aye, aye ephian ni da nẹ uvuien. 24 Nọ ta rẹn aye: “Ọnana o mevirhọ ‘ọbara mẹ ro sekpahen ọphọ na,’ re ne rhie rhotọre fọkiẹ ihworho buebun. 25 Itiọrurhomẹmro mia ta rẹn are, mi rha da iwaini ra ha ivaini ru ghwomara-an, bọmọke ẹdẹ ọrana ono ki te mi na da ọkpokpọ ye uvuẹn Uvie Osolobrugwẹ.” 26 Obẹtaye, ọke aye a so ijoro ujiri hin, aye ni riẹ Ugbenu Oliv.

27 Jesu nọ ta rẹn aye: “Are ephian ina sẹrerhumuji mẹ vwo, fọkime a yariẹ rhotọre: ‘Mi na ghwiẹ osuingegede na, igegede na ni na hrabọ lele ekete ephian.’ 28 Ọrẹn, arha rhọmi mẹ nuhwu ne, mi na kobaro rẹn are riẹ i Galili.” 29 Omarana, Pita nọ ta riẹn: “Ọrhọ tobọ rhianẹ eri hẹrhẹre na i sẹrerhumujo vwo, mi sẹrerhumujo vwo-o.” 30 Jesu nọ ta riẹn: “Itiọrurhomẹmro mia ta wẹn taghene inyenana, ee, uvuẹn ason ọnana dede, bọmọke ogberhualẹ ono bo ọgbeva, wu na ten mẹ ọgbesa.” 31 Ọrẹn, no ji tiẹmro na taghene: “Ọrhọ tobọ rhianẹ mi ne leluo hwu dede, mi tiẹn owẹwẹ-ẹ.” Ọsoso idibo ri hẹrhẹre na ni ji ta omaran.

32 Omarana, aye ni te ekete owu re se Gẹtsẹmẹni, nọ ta rẹn idibo yi taghene: “Are i siyẹ aran, ni mi ya nẹrhomo.” 33 Nọ ha i Pita, Jems ọrhẹ Jọn lele oma. Ẹhẹn yen no seriotọre omamọ, no ji mwuomarhọ. 34 Nọ ta rẹn aye: “Ẹhẹn mẹ o seriotọre omamọ tobọ te erhirhiẹ uhwu. Are i daji aran, nẹ are i rha dẹrẹ.” 35 Ọke rọ nya riẹ obaro ibiesuọn, no sighwẹ totọre ji nẹrhomo taghene unọke na ọ nyavrẹn yen, orhianẹ ọnọ sabu phia. 36 Nọ tare: “Abba,* Ọsẹ mẹ, wa sabu ruẹ ekwakwa ephian, tiẹ uko ọnana nie ha mẹ. Ọrẹn, o vwo rhiẹ oborẹ mi gwọlọre-e, ukpomaran o rhiẹ oborẹ wu gwọlọre.” 37 Nọ ghwẹrioma rhe ji mẹrẹn aye ra merhẹn, nọ ta rẹn i Pita: “Saimọn, wa merhẹn? We vwo omẹgbanhon wu na dẹrẹ unọke owu ọvo dede? 38 Are i rha dẹrẹ ji nẹrhomo ọke ephian, nẹ are i je rhe se rhẹ ọdamuni. Itiọrurhomẹmro, ẹhẹn na o vwo oruru,* ọrẹn ugboma na ọ vwiẹlẹre.” 39 Nọ rharhumu nyarhẹn ya nẹrhomo ji vwanriẹn ẹmro rọ tare bi na. 40 Nọ ghwẹrioma rhe ji mẹrẹn aye ra merhẹn, fọkime omerhẹn ọ vuọn ikẹro aye. Omarana, aye erhe rhe oborẹ aye ina kpahenrhọ riẹ-ẹn. 41 Nọ ghwẹrioma rhe ọgbọresa ye ji ta rẹn aye: “Are a merhẹn ji ronmoma uvwrọke omana? O te ne! Unọke na o te ne! Nughe! A gwọlọ rhẹ Ọmọ onyakpọ na rhẹ abọ iruedandan ne. 42 Are i vẹnrẹn na nyarhẹn. Nughe! Ọrọ nọ rhẹ mẹ na o tikẹrẹ aran ne.”

43 Ogege, ọke i Jesu ọ ji tẹmro, Judas ro rhiẹ owuọwan usuẹn awan Ikpereva na, no bruru aye rhe rhẹ ihworho buebun rẹ ilori irherẹn na, eyẹbe na ọrhẹ ekpako ihworho na i dje rhe, aye i kpare edan ọlọkọ ọrhẹ uphrophro erhan. 44 Vwana, Judas rọ rhẹriẹ na ọ yẹrẹ aye oka bi ne taghene: “Kohworho kohworho mi fiọnfiọnren, ọrana yẹ ohworho na; are i mwuien nyarhẹn, ji mọriẹn neneyo ọ jọ rhọ zẹ.” 45 Omarana, nọ ghwai nya bru i Jesu ji ta: “Rabbai!” no bibiesuọn fiọnfiẹn. 46 Omarana, aye ni sanbọmwu i Jesu ji mwuien. 47 Ọrẹn, owuọwan usuẹn eri mevi avwaye no shoro odan ọlọkọ ye phia, ji fian orhọ ọvrẹn orherẹn ọduado na nie. 48 Ọrẹn, Jesu nọ ta rẹn aye: “Are i rhiẹ aran me mwu mẹ rhẹ edan ọlọkọ kugbe uphrophro erhan kamẹriẹn mẹmẹ ohi? 49 Kẹdẹkẹdẹ, mẹmẹ ọrhẹ are i ha uvuẹn oghwa ẹga na ọke mie yono ihworho, ọrẹn are e mwu mẹ-ẹ. Itiọrurhomẹmro, ọnana ọ phiare neneyo Eyaya Ọfuanfon na i sabu te orugba.”

50 Idibo na ephian ni sẹrerhumuje vwo ji zẹ. 51 Ọrẹn, o vwo idama owu ro kuẹ obọdẹn ewun rhurhu ẹban yen rọ nyaleli Jesu kpẹnkpẹnkpẹn, aye na gwọlọ mwu idama na. 52 Ọrẹn nọ nyaji ewuien vwo, ji zẹ rhẹ ẹbẹnban.*

53 Aye ni kparẹ i Jesu vwe orherẹn ọduado na, ọsoso ilori irherẹn ọrhẹ ekpako na kugbe eyẹbe na ni kokori. 54 Ọrẹn, Pita ọ ha ugbo oseseri rọ nyalelie, bọmọke o ki te egodo orherẹn ọduado na. Pita ọrhẹ idibo ra wian uvuẹn oghwa na ni siyẹ obaro erhanren rọ bara omamọ, nọ karhẹ erhanren. 55 Vwana, ilori irherẹn na ọrhẹ ọsoso i Sanhẹdrin na, na gwọlọ ihworho ri ne se oseri kpe i Jesu nẹ aye i sabu kpe yi hwu, ọrẹn aye a mẹrẹn oseri owuorowu-u. 56 Dedevwo ihworho buebun i me se oseri efian kpahiẹn, ọrẹn ẹmro aye o serhọ owu-u. 57 Habaye, ihworho ezẹko ne meviẹ ji se oseri efian kpahiẹn taghene: 58 “Ame i rhonrien ọke rọ ta taghene, ‘Mi na ghwọghọ oghwa ẹga ọnana ra ha obọ bọn na, ji rharhumu bọn ọrọrọ ra vwa ha obọ bọn uvwre ẹdọke esa.’” 59 Ọrẹn, udabọ ẹmro enana dede, oborẹ aye i tare o ji serhọ owu-u.

60 Omarana, orherẹn ọduado na no mevi erhẹrhẹ aye ji nọ i Jesu: “Wu vwa kpahẹnmro owuorowu? Wu vwe rhon ẹmro rẹ ihworho enana a ta hasuọ na?” 61 Ọrẹn nọ fọdu, ọ kpahẹnmro owuorowu-u. Orherẹn ọduado na nọ rharhumu nọ yen taghene: “Wẹwẹ yi Kristi na ro rhiẹ Ọmọ Osolobrugwẹ Ọfuanfon na?” 62 Omarana, Jesu nọ kpahenrhọ riẹn: “Ee, omẹmẹ, are ina mẹrẹn Ọmọ onyakpọ na ro siyẹ obọrhen Ohworho ro vwo omẹgbanhon na, rọ ji sa rhẹ avwre odjuwu na.” 63 Omarana, orherẹn ọduado na nọ bẹrẹ ewuien ji ta: “Mesoriẹ a ji gwọlọ iseri erọrọ? 64 Are i rhon ẹmro rọ ha rhaphiẹ Osolobrugwẹ ne. Me yẹ orhienbro are?”* Aye ephian ni brorhiẹn taghene o fo uhwu. 65 Ihworho ezẹko ne djen erhẹnrhen ghwuie ji rhurhu ughwaruiẹ, aye na ha ọchẹn bọmiẹ ji ta: “Mẹraro!” Ọke elọkpa oghwa ẹghware na a ghwiẹ ye ughwaro hin, aye ni kpareriẹ nyarhẹn.

66 Vwana, ọke i Pita ọ ha otọre egodo na, ọvrẹn ọgbọtọ owu rọ wian rẹn orherẹn ọduado na, nọ rhere. 67 Ọke rọ mẹrẹn i Pita rọ karhẹ erhanren, nọ tẹnrovie ji ta: “Wẹwẹ rhẹ i Jesu ọnana ro rhiẹ onyẹ i Nazarẹt na, a nya usun.” 68 Ọrẹn, nọ tenriẹn taghene: “Mie rhe ọhworhare na-a, mie ji vwẹruọ oborẹ wa ta kpahan na-a,” nọ nya nẹ avwaye riẹ anurẹsẹ egodo na. 69 Ọke ọvrẹn ọgbọtọ na ọ rharhumu mẹriẹn avwaye, nọ ta rẹn ihworho ri mevi avwaye taghene: “Ọnana ọ ha usuẹn aye.” 70 Ọrẹn, nọ rharhumu tiẹn. Ọke o jiri bẹn, ihworho ri mevi avwaye na rharhumu ta rẹn i Pita: “O mwẹro taghene wu ha usuẹn aye, fọkime ọrẹ urhomẹmro, wẹwẹ onyẹ i Galili.” 71 Ọrẹn, no djekan ji dumirhonrin taghene: “Mie rhe ọhworhare ọnana rẹ are a tẹmro kpahan na-a!” 72 Ogege, ogberhualẹ no bori ọgbọreva ye, Pita nọ karorhọ oborẹ i Jesu ọ ta riẹn bi taghene: “Bọmọke ogberhualẹ ono bo ọgbeva, wu na ten mẹ ọgbesa.” Omarana, ọrhọ sabu mọren omaye-en, nọ tuẹn oviẹ rhọ.