Iyẹnrẹn Ọrẹ i Matiu
14 Uvwrọke ọrana, Hẹrọd ro suẹn okogho ọrana no rhon iyẹnrẹn kpahen i Jesu. 2 Nọ ta rẹn idibo yi: “Ọnana i Jọn ro Brawanrhame na. A rhọmeriẹn nuhwu ne, ọ yọ soriẹ ọ sabu wian ewian igbevwunu enana.” 3 Hẹrọd* o mwu i Jọn ji gba ye firhọ ekanron bi, fọkiẹ Hẹrodias ro rhiẹ ane omizie re se i Filip. 4 Fọkime Jọn ọ ta riẹn ọgbọ buebun ne taghene: “O fo ne wu rọnmọ ọmase na-a.” 5 Dedevwo Hẹrọd ọ gwọlọ kpe i Jọn, ọrẹn nọ zofẹn otu na fọkime aye i vwo imwẹro taghene i Jọn ọmẹraro. 6 Ọke i Hẹrọd ọ riorẹ ẹdẹ re vwiẹ ye, ọmọ ọgbọtọ i Hẹrodias no gbigbegbe uvuẹn orẹ na, ọnana nọ lẹrhẹ oma merhen i Hẹrọd omamọ 7 te erhirhiẹ ro dumirhonrin ji vive taghene ọnọ yẹ ye i kemru kemru rọ nekpẹn yen. 8 Omarana, ọgbọtọ na no ru lele oborẹ izie ọ ta riẹn, nọ tare: “Fiẹ urhomu i Jọn ro Brawanrhame na rhẹ ọmoze ọphophẹghẹ ha mẹ.” 9 Dedevwo ọ da orodje na, ọrẹn fọkiẹ irhonrin ro dumurun na ọrhẹ ihworho re lelie riorẹ* na, no jurhi na ha urhomu i Jọn rẹn ọgbọtọ na. 10 Omarana, no dje ohworho ye bru urhomu i Jọn nie uvuẹn ekanron na. 11 Ne fiẹ urhomu i Jọn rhẹ ọmoze ọphophẹghẹ rẹn ọgbọtọ na, nọ kpareriẹ vwe izie. 12 Ọke oru, idibo i Jọn ni ma kpare orinmi na ye sion, aye ni ji ya nẹ iyẹnrẹn rẹn i Jesu. 13 Ọke i Jesu o rhon iyẹnrẹn na, nọ ruẹ owọ nẹ avwaye riẹ ekete kologho nẹ ọye ọvo ọ daji avwaye. Ọrẹn ọke otu na e rhon kpahiẹn, aye ni nẹ emwa na rhe ji ha aghwẹ nyalelie.
14 Ọke i Jesu o te akpa, nọ mẹrẹn ihworho buebun. Aruo aye nọ dọnriẹn, no ji simi ere kpomẹ usuẹn aye. 15 Ọrẹn ọke owuọwọn o te, idibo yi ni mọ ta riẹn: “Ekete arana ọ havwọ kologho, ọke ọ ji nya seri ne. Omarana, tiobọnu otu na neneyo aye i riẹ ọko ri kẹrẹ aran ya dẹ oborẹ aye ina riọ.” 16 Ọrẹn, Jesu nọ ta rẹn aye: “O vwo oborẹ ọsoriẹ aye ina nyarhẹ-ẹn, are i yẹ aye oborẹ aye ina riọ.” 17 Aye ni ta riẹn: “Ame e vwo emru owuorowu ara-an, jokpanẹ ibrẹdi isionrin ọrhẹ irhenrin eva.” 18 Nọ ta rẹn aye: “Are i ha aye vwe mẹ.” 19 Jesu nọ ta rẹn otu na nẹ aye i siyẹ oberun odin na. Nọ ha ibrẹdi isionrin ọrhẹ irhenrin eva na, nọ kparughwaro ni odjuwu ji nẹrhomo. Ọke ro bru ibrẹdi na hin, nọ hariẹ rẹn idibo na, idibo yi ni ghaleriẹ rẹn otu na. 20 Omarana, aye ephian ni riẹ ephan vuọn. Ọke oru, aye ni koko oborẹ aye i re hẹrhẹ na, ekalokpọ 12 yi vuọnren. 21 Vwana, ehworhare ri te emrẹ 5,000 yi riẹ emaren na, e kele emẹse ọrhẹ emọvwerhe ba aye-e. 22 Ogege, Jesu nọ ta rẹn idibo yi nẹ aye i ruẹ owọ danvrẹn riẹ obọreva urhie na. Ọke idibo na a nyarhẹn, no tiobọnu otu na.
23 Ọke ro tiobọnu aye hin, ọye ọvo no riẹ oberun ugbenu na ya nẹrhomo. Ọye ọvo nọ daji avwaye ye te owuọwọn. 24 Uvwrọke ọnana, owọ idibo na ọ ghwa seri* nẹ akpa ne, ọrẹn aye na damoma aye ina wọnrọn haso ukolame na, fọkime aphẹrẹ na ọ hasuẹ aye. 25 Ọrẹn, ọke igidurhiọke* o te ne, Jesu nọ nya oberun urhie ọduado na bru aye sa. 26 Ọke aye a mẹrẹn ohworho rọ nya oberun ame na, ofẹn no mwu idibo na, aye na ta: “Oghẹnren emru ọgo yọ nya sa na?”* Aye ne kperẹ phia fọkiẹ ofẹn. 27 Ogege, Jesu nọ ta rẹn aye taghene: “Are i fiudugbere! Omẹmẹ, are i vwa zofẹ-ẹn.” 28 Pita nọ kpahenrhọ riẹn: “Ọrovwori, orho rhiẹ owẹwẹ, gba ta mẹ ni mi nya oberun ame na bruo rhe.” 29 Nọ ta riẹn: “Mọ!” Omarana, Pita no nẹ owọ na, nọ nya oberun ame na bru i Jesu. 30 Ọrẹn, ọke ro ni ogiribo na, ofẹn no mwurien. Ọke ro dimẹ, no kperi phia: “Ọrovwori, simi mẹ!” 31 Ogege, Jesu nọ rionbọ ji mọrẹn i Pita. Nọ ta riẹn: “Wẹwẹ ri vwo esegburhomẹmro ọkokamu na, mesoriẹ we vwo ẹhẹn eveva?” 32 Ọke aye a ruẹ owọ na hin, ogiribo na nọ dobọji. 33 Omarana, eri ha uvuẹn owọ na ni gburhomu rhotọre riẹn, aye ni tare: “Wẹwẹ ghini Ọmọ Osolobrugwẹ.” 34 Aye ni danvrẹn riẹ obọreva urhie na, aye ni dumufi otọre i Gẹnẹsẹrẹt.
35 Ọke ihworho ri ha ekete ọrana e rhe taghene i Jesu, aye ni dje urhomu vwe ọsoso emwa ri ha okogho ọrana, aye ni kpare ọsoso ihworho re kpomẹ bruie rhe. 36 Aye na rẹ i Jesu nẹ aye i ghwai hobọte ejẹnjẹn ewun otafiẹ. Oma ọsoso ihworho ri hobọte yi ni gbanhonron phẹlẹphẹlẹ.