Iyẹnrẹn Ọrẹ i Matiu

15 Ọke oru, itu i Farisi ọrhẹ eyẹbe ezẹko ni nẹ i Jerusalẹm bru i Jesu rhe, aye na ta: 2 “Mesoriẹ idibo enọ a hasuẹ irueruo ihworho ahwanren i ru notọre rhe? Jerẹ udje, aye i vwe ghwe* abọ aye ọke aye a gwọlọ riẹ emare-en.”

3 Nọ kpahenrhọ rẹn aye: “Mesoriẹ are a hasuẹ akama Osolobrugwẹ fọkiẹ irueruo are i ru notọre rhe? 4 Jerẹ udje, Osolobrugwẹ ọ tare taghene, ‘Họghọ rẹn ọsọ ọrhẹ izuo,’ ọ ji ta taghene, ‘Kohworho kohworho rọ ta erharhere ẹmro kpahen* ọsẹ ye yanghene izie, jene kpe yi hwu.’ 5 Ọrẹn are na ta, ‘Kohworho kohworho rọ ta rẹn ọsẹ ye yanghene izie taghene: “Kemru kemru mi vwori mi na sa erhumu, mi hariẹ ruẹ ẹghẹlẹ rẹn Osolobrugwẹ ne,” 6 orho fo nẹ ọravwọ ọ họghọ rẹn ọsẹ ye kakaka-a.’ Omarana, are na djẹ ẹmro Osolobrugwẹ fughwẹ fọkiẹ irueruo are i ru notọre rhe. 7 Era gemai ruẹ na, oborẹ Aizaya ọ mẹraro kpahen are ọ ghini gba, ọke rọ ta: 8 ‘Ihworho enana a họghọ mẹ rhẹ evwẹrugbunu aye, ọrẹn ọmudu aye o serabọ ha mẹ omamọ. 9 Ogame aye a ha mẹ ofefe, fọkime aye i bọn iyono aye kpahen ekama ituakpọ.’ ” 10 Omarana, no se otu na kẹroma ji ta rẹn aye taghene: “Are i kerhọ, nẹ are i vwẹruọ oborẹ mia ta na: 11 Rhẹ oborẹ ọ ruẹ unu ohworho yo gbe yi aghwa-a, ọrẹn oborẹ o nẹ unu ọravwọ rhe yo gbe yi aghwa.”

12 Ọke oru, idibo na ni bru i Jesu rhe ji ta riẹn: “Wu rheri taghene oborẹ wu tare na ọ lẹrhẹ ephan biomu itu i Farisi na?” 13 Jesu nọ kpahenrhọ rẹn aye: “Kowawọ kowawọ rẹ Ọsẹ mẹ obẹ odjuwu ọ vwọ wọ, ene ghwie yi. 14 Are i vwa damerhọ aye-e. Aye ituẹro re suẹn awọrọ. Omarana, otuẹro orho sun otuẹro, aye awanva ine se rhẹ ọgọdọ.” 15 Pita nọ ta riẹn: “Dabu dje udje na fiotọre rẹn ame.” 16 Jesu nọ kpahenrhọ rẹn aye: “Are dede e ji vwẹruọ ye? 17 Are e rhe taghene kemru kemru rọ ruẹ unu na, o yo sotọre uvuẹn ephan na, orho ru ne ne yi fughwẹ? 18 Ọrẹn, kemru kemru ro nẹ unu na sa, ọmudu na yo vi nẹ sa, ekwakwa erana ye gbe ohworho aghwa. 19 Jerẹ udje, uvuẹn ọmudu na yẹ iroro evwiavwia e nẹ sa, jerẹ ozighẹ-ede,* ọwiẹghwọ, irueruo ọfanrhiẹn,* uhieso, oseri efian ọrhẹ ẹrhaphiẹ. 20 Ekwakwa enana ye gbe ohworho aghwa. Ọrẹn ra na riẹ emaren rhẹ abọ re vwe ghwe,* o vwo gbe ohworho aghwa-a.”

21 Ọke i Jesu o nẹ avwaye hin, no riẹ uvwrotọre i Taya ọrhẹ i Saidọn. 22 Nughe! ọmase onyẹ i Fonisha owu ro nẹ uvwrotọre ọrana rhe, no brurie rhe. Nọ viẹ ji rẹ ye: “Ọrovwori, gbe arodọmẹ ha mẹ, Ọmọ i Devid. Okpodje ọ ha oja riẹ ọmọ mẹ ọgbọtọ omamọ.” 23 Ọrẹn, ọ kpahẹnmro owuorowu rẹn ọmase na-a. Omarana, idibo yi ni brurie rhe, aye na ta riẹn taghene: “Ta rẹn ọmase na nọ nyarhẹn, fọkime ọ viẹ lele ọwan.” 24 Jesu nọ tare: “E dje mẹ bru awọrọ-ọ, jokpanẹ igegede oghwa Izrẹl ri vruru.” 25 Ọrẹn ọmase na no mo gburhomu rhotọre riẹn, nọ ta: “Ọrovwori, ha userhumu mẹ!” 26 Jesu nọ tare: “O fo na ha ibrẹdi emọvwerhe mie aye, ji donrien rẹn erimwamwa ekokamu-u.” 27 Ọmase na nọ tare: “Ọrana urhomẹmro Ọrovwori, ọrẹn erimwamwa ekokamu na a ria nẹ iwuwu emaren ri se nẹ imẹdjẹ eri vwori aye.” 28 Omarana, Jesu nọ kpahenrhọ riẹn: “O ọmase na, esegburhomẹmro ọnọ ọ gbanhonron omamọ, je nọ phia wẹn lele oborẹ wu gwọlọre.” Nẹ unọke ọrana nyarhẹn, oma ọmọyen nọ gbanhonron.

29 Ọke i Jesu o nẹ avwaye hin, no riẹ ekete rọ kẹrẹ Urhie i Galili. Ọke ro rhenren te oberun ugbenu na hin, no siyẹ avwaye. 30 Omarana, ihworho buebun ni ghwiẹ bruie rhe, aye ni ji kpare ikpolo, eri krabọ kraghwẹ, ituẹro, eri diunu ọrhẹ ihworho buebun erọrọ lele oma. Aye ni kparerẹ aye rhẹ obaruiẹ, Jesu no simirin aye. 31 Omarana, no gbe otu na unu omamọ ọke aye a mẹrẹn eri diunu ra tẹmro, eri krabọ kraghwẹ rẹ oma aye ọ gbanhonron, ikpolo ra nya ọrhẹ ituẹro ra mẹrude, aye ni jiri Osolobrugwẹ Izrẹl.

32 Ọrẹn, Jesu no se idibo yi ji ta rẹn aye: “Aruo otu na ọ dọn mẹ, fọkime aye i leliri mẹ rhirhiẹ ye ẹdọke esa ne, ọrẹn aye a ji riẹ emru owuorowu-u. Mia gwọlọ tiobọnu aye rie rhẹ ephan ọkaka-a, fọkime aye ina sabu dophie uvuẹn izede.” 33 Ọrẹn, idibo na ni nọriẹn: “Bọgo yẹ ame ina mẹrẹn ibrẹdi rọ nọ vuọn otu enana ephan uvuẹn ekete kologho ọnana?” 34 Omarana, Jesu nọ nọren aye: “Ibrẹdi emwa yẹ are i vwori?” Aye ni tare: “Irhiruẹ ọrhẹ ibiẹ irhenrin ekokamu.” 35 Omarana, ọke rọ ta rẹn otu na nẹ aye i siyẹ totọre hin, 36 nọ ha ibrẹdi irhiruẹ ọrhẹ irhenrin na. Ọke rọ kpẹmẹ Osolobrugwẹ hin, no bruru aye ji kpare aye rẹn idibo yi. Idibo na ni ghaleriẹ rẹn otu na. 37 Aye ephian ni riẹ ephan vuọn. Ọke oru, aye ni koko oborẹ aye i re hẹrhẹ na vuọn ekalokpọ eduado irhiruẹ.* 38 Vwana ehworhare awan 4,000 yi riẹ emaren na, e kele emẹse ọrhẹ emọvwerhe ba aye-e. 39 Ọke ro tiobọnu otu na hin, nọ ruẹ owọ riẹ uvwrotọre i Magadan.