Iyẹnrẹn Ọrẹ i Matiu
17 Ẹdọke erhan a vrẹn hin, Jesu nọ ha i Pita, Jems ọrhẹ omizie re se i Jọn lele oma, ọye ọrhẹ aye ọvo ni riẹ ugbenu owu ro rierun omamọ. 2 Jesu no wene oma udaro aye. Ughwariẹ no lo jerẹ ọren na, ewun otafiẹ ne lo omamọ* jerẹ ukpẹ. 3 Nughe! aye ni mẹrẹn i Mosis ọrhẹ Ẹlaijah re leli Jesu tẹmro. 4 Omarana, Pita nọ ta rẹn i Jesu: “Ọrovwori, ọ merhoma taghene ame i ha aran. Wu rha gwọlọ, mi na ha ibọkpọ esa vi rhẹ aran, owu ha wẹn, owu rẹn i Mosis, owu rẹn Ẹlaijah.” 5 Ọke rọ ji tẹmro, nughe! avwre ro lo no rhurhuru aye. Ogege, uvwele owu nọ tẹmro nẹ uvuẹn avwre na rhe taghene: “Ọnana Ọmọ mẹ mi vwo ẹgwọlọ kpahen na, ri mi ji vwo ekwerhọ kpahen. Are i kerhọ ye.” 6 Ọke idibo na e rhon ẹmro ọnana, ofẹn no mwurun aye omamọ, aye ni se gbughwaro rhotọre. 7 Jesu no tikẹrẹ aye ji hobọte aye, nọ tare: “Are i vẹnrẹn. Are i vwa zofẹ-ẹn.” 8 Ọke aye a kparughwaro rierun, aye arha mẹrẹn ohworho owuorowu-u, jokpanẹ i Jesu ọvo. 9 Ọke aye a ruotọre nẹ ugbenu na, Jesu no jurhi rẹn aye taghene: “Are i vwa ta rẹn ohworho owuorowu kpahen emena arudo na-a, jokpanẹ a rhọmọ Ọmọ onyakpọ na nuhwu vwẹre.”
10 Ọrẹn, idibo na ni nọriẹn taghene: “Ni mesoriẹ eyẹbe na a ta taghene Ẹlaijah ọnọ vi rhe vwẹre?” 11 Nọ kpahenrhọ rẹn aye: “Itiọrurhomẹmro, Ẹlaijah ọ sa, ọnọ ji kwaphiẹ ekwakwa ephian serhọ. 12 Ọrẹn, mia ta rẹn are taghene Ẹlaijah ọ ghwanreriẹn rhe ne, ọrẹn aye e vwrurhe yi-i, ukpomaran aye ni rurie oborẹ o jeri aye. Omaran Ọmọ onyakpọ na ọnọ ji rioja uvuẹn abọ aye.” 13 Omarana, idibo na ni vwẹruọ ye taghene ọ ta kpahen i Jọn ro Brawanrhame na.
14 Ọke aye e tikẹrẹ otu na, ọhworhare owu no bru i Jesu rhe ji sighwẹ riẹn, nọ tare: 15 “Ọrovwori, gbe arodọmẹ rẹn ọmọ mẹ, fọkime o vwo emiamo re hwuẹ surhe amwa, o ji kpomẹ. Ọgbọ buebun, o se rhẹ uvuẹn erhanren ọrhẹ uvuẹn ame. 16 Mi kpareriẹ vwe idibo enọ, ọrẹn aye a sabu simie-e.” 17 Jesu nọ tare: “O uvwiẹ ọkon ro vwo vwo esegburhomẹmro, marhẹ ono jiri te mi ne lele are rhirhiẹ ye? Marhẹ mi ne vwo edirin kpahen are jiri te? Kpare ọmọ na vwe mẹ.” 18 Omarana, Jesu nọ vanghwu okpodje na, okpodje na no nẹ oma ọmọ na. Nẹ unọke ọrana nyarhẹn, oma ọmọ na nọ gbanhonron. 19 Ọke oru, idibo na ni bru i Jesu nya ọke ọye ọvo ọ havwiẹ. Aye ni nọriẹn: “Mesoriẹ ame i vwa sabu le okpodje na?” 20 Nọ ta rẹn aye: “Fọkiẹ esegburhomẹmro ọkokamu are. Itiọrurhomẹmro mia ta rẹn are, are i rhe vwo esegburhomẹmro rọ havwọ jerẹ ukeri mọstad, are ina ta rẹn ugbenu ọnana, ‘Ghwie nẹ aran riẹ oboran,’ no no ghwie. Ọke ọrana, orho vwo emru owuorowu are ina ja sabu ru-u.” 21 ——
22 Ọke i Jesu ọrhẹ idibo na a vwoma kugbe uvuẹn i Galili, nọ ta rẹn aye taghene: “Ana rhẹ Ọmọ onyakpọ na rẹn ituakpọ. 23 Aye ni ne ji kpe yi hwu, ọrẹn uvuẹn ẹdẹ ọresa ye, na na rhọmiẹ nuhwu.” Ọke idibo na e rhon ẹmro ọnana, aye ni mwuomarhọ omamọ.
24 Ọke aye e te i Kapaniọm, ehworhare re vwiosa urhomu i drakma eva na, ni bru i Pita rhe ji nọ yen: “Oyono are ọ vwọ kwosa urhomu i drakma eva na?” 25 Nọ tare: “Ọ kwa ye.” Ọrẹn, ọke rọ ruẹ oghwa na, Jesu no kiki lelie tẹmro ji nọ yen: “Me wu rorori Saimọn? Ayọmo yẹ irodje akpọ na a ha arhọghọ yanghene osa urhomu mie? Emọ aye gbinẹ epha?” 26 Ọke i Pita ọ ta taghene: “Epha,” Jesu nọ ta riẹn: “Nọyẹ o fo nẹ emọ na i kwosa urhomu-u. 27 Ọrẹn, neneyo ephan o jo rho biomu aye, gbe ye fiẹ oghọle rhẹ urhie ọduado na, wu rhe rhie unu erhenrin ọrukaro wu mwurun, wu na mẹrẹn usele* idọlọ ọfuanfon owu. Haye kwosa ọnẹmẹ ọrhẹ ọnọ.”