Iyẹnrẹn Ọrẹ i Matiu
11 Ọke i Jesu ọ ha ọkpọvi rẹn idibo yi awan 12 hin, no nẹ avwaye ye yono ihworho ji ghwoghwo uvuẹn emwa erọrọ.
2 Ọrẹn, ọke i Jọn o rhon uvuẹn ekanron kpahen ewian i Kristi na, no dje idibo yi 3 ya nọ yen taghene: “Wẹwẹ yẹ Ohworho rọ sa na, gbinẹ ame i fiẹrorhọ ohworho ọrọrọ?” 4 Jesu nọ kpahenrhọ rẹn aye: “Are i nyarhẹn ya nẹ iyẹnrẹn rẹn i Jọn kpahen oborẹ are e rhon ji mẹrẹn na: 5 Ituẹro a mẹrude ne, ikpolo a nya ne, e ruẹ ere kpomu emiamo oti fuan ne, idienrhọ e rhon ẹmro ne, a rhọmọ eri hwuru nuhwu ne, e ji ghwoghwo iyẹnrẹn esiri na rẹn ivwiegbere ne. 6 Omamerhomẹ ọ havwiẹ rẹn ohworho rọ vwọ mẹrẹn emru rọ nọ suẹ ọgbanrhọ riẹn uvuẹn omamẹ.”
7 Ọke idibo i Jọn a ghwẹrioma nyarhẹn, Jesu nọ tẹmro rẹn otu na kpahen i Jọn: “Me yẹ are i nyarhẹn ye ni uvuẹn ato na? Odin rẹ aphẹrẹ o zuẹ sa zuẹ rie? 8 Me yẹ are i tobọ ye ni? Ọhworhare ro kuẹ obọdẹn ewun rhọ? Itiọrurhomẹmro, ihworho ri ha eghwa irodje ye kuẹ obọdẹn ewun rhọ. 9 Omarana, mesoriẹ are e riẹ avwaye? Are i ya mẹrẹn ọmẹraro? Itiọrurhomẹmro mia ta rẹn are, ọ tobọ ghwẹ ọmẹraro dede. 10 Ohworho ọnana ya ya kpahen taghene: ‘Nughe! Mie dje ọnyikọ mẹ kobaro wẹn, ro no mwuegbe izede ọnọ hẹrhuọ!’ 11 Itiọrurhomẹmro mia ta rẹn are, usuẹn ihworho emẹse i vwiẹ ne, o vwo ọrọ do ghwẹ i Jọn ro Brawanrhame-e, ọrẹn ohworho rọ mai kamu uvuẹn Uvie idjuwu na ọ do ghwẹ ye. 12 Nẹ ẹdẹ i Jọn ro Brawanrhame me te ọke ọnana, ihworho a damoma rẹ aye ina ruẹ Uvie idjuwu na. Ọrẹn, ihworho ri vwe fiobọrhotọre yi na ruẹ uvuien. 13 Fọkime bọmọke i Jọn ọ ki rhe, Emẹraro na ọrhẹ Urhi na ephian i ta kpahen oborẹ ọnọ phia. 14 Orho mwu are, are i kwerhọ ye yanghene tiẹn, ọye yẹ ‘Ẹlaijah rọ nọ rhiọ na.’ 15 Jenẹ ọro vwo erhọ, ọ kerhọ.
16 “Ayọmo mi na ha uvwiẹ ọnana dje? Ọ họhọ emọ ri siyẹ ekete eyi, ra ta rẹn igbehian aye rẹ aye e lele ruiruẹn 17 taghene: ‘Ame i kporo ikpekporo rẹn are, ọrẹn are e gbigbegbe-e. Ame i viẹre gbangbanhon, ọrẹn are e mwuomarhọ kakaka-a.’ 18 Omaran ọ ji havwọ, Jọn ọ riẹ emaren yanghene da jerẹ awọrọ-ọ, ọrẹn ihworho a ta, ‘Okpodje ọ ha omayen.’ 19 Ọke Ọmọ onyakpọ na ọ rhe, ọ riẹ emaren ji da, ọrẹn ihworho na ta, ‘Nughe! Ọgbọre ọrhẹ ọdinyo yo ruẹ, jeghwai ugbehian ere vwiosa urhomu ọrhẹ iruedandan.’ O vwo ẹmro-o, e dje ẹghwanren rhiẹ ọvwata* nyoma ewian yen.”*
20 Ọke oru, no brorhiẹn kpe emwa ezẹko rọ vi mai wian ewian igbevwunu enẹyen, fọkime aye e kwe ghwẹriẹ-ẹ: 21 “Ukpokpogho o rhirhiẹ ye wẹn Korezin! Ukpokpogho o rhirhiẹ ye wẹn Bẹtseda! fọkime orhianẹ ewian igbevwunu re ruru uvuẹn emwa are, e ruru aye uvuẹn i Taya ọrhẹ Saidọn, manẹ aye i ghwẹriẹre ọke jijiri ne nyoma aye ine kuẹ ewun omemwurhọ rhọ ji siyẹ iphirhikerewi. 22 Ọrẹn mia ta rẹn are, ojẹriọ ra na harẹn are uvuẹn Ẹdẹ Ẹzenguon na, ọnọ gbanhon ghwẹ ọrẹ i Taya ọrhẹ Saidọn. 23 Harẹn owẹwẹ Kapaniọm, wu rorori taghene ana kparuọ riẹ odjuwu? Usin* ye wu na nya. Fọkime orhianẹ ewian igbevwunu re ruru uvuẹn amwa ọnọ, e ruru aye uvuẹn i Sodọm, manẹ ọ ji havwiẹ me te inyenana. 24 Ọrẹn mia ta rẹn are, ojẹriọ ra na harẹn are uvuẹn Ẹdẹ Ẹzenguon na, ọnọ gbanhon ghwẹ ọrẹ otọre i Sodọm.”
25 Ọke oru, Jesu nọ tare: “Ọsẹ mẹ, Ọrovwori odjuwu ọrhẹ otọrakpọ, mie jiruo ọrẹ afiede fọkime wu tiẹ ekwakwa enana nu rẹn evwẹghwanren ọrhẹ egbirherhe, ọrẹn wu djerẹ aye rẹn emọvwerhe. 26 Ee, Ọsẹ mẹ, fọkime ọnana yẹ izede wu kwerhọ. 27 Ọsẹ mẹ o tiobọnu ekwakwa ephian ha mẹ ne, o vwo ohworho ro rhe Ọmọ na fiotọre-e, jokpanẹ Ọsẹ na. O ji vwo ohworho ro rhe Ọsẹ na fiotọre-e, jokpanẹ Ọmọ na, kugbe ohworho rẹ Ọmọ na ọ gwọlọre no rhe Ọsẹ na. 28 Are i bru mẹ rhe, are rẹ oma ọ ghwọghọ ne, ri ji kpare ohwan ọghwaghwa, ni mi ne ruẹ are gbanhon.* 29 Are i kpare orhan ọven mẹ ji yono mie mẹ. Fọkime mi havwọ dẹndẹn, mi ji vwo omeriotọre, are ni na rharhumu vwo omẹgbanhon. 30 Fọkime orhan ọven mẹ ọphophare, ohwan mẹ ọ ji ghwa-a.”