Iyẹnrẹn Ọrẹ i Mak
7 Vwana, itu i Farisi ọrhẹ eyẹbe ezẹko ri nẹ Jerusalẹm rhe, ni koko kinhariẹ i Jesu. 2 Aye ni mẹrẹn idibo yi ezẹko ra riẹ emaren rhẹ abọ igbegbe, nọyẹ abọ re vwe ghwe.* 3 (Fọkime itu i Farisi na ọrhẹ ọsoso itu i Ju na i vwa riẹ emare-en, jokpanẹ aye i ghwe abọ aye te igidabọ vwẹre, aye ne tigban irueruo ihworho ahwanren i ru notọre rhe. 4 Aye i rhe nẹ eyi rhe, aye i vwa riẹ emare-en, jokpanẹ aye i ha ame ghworiẹ oma aye vwẹre. O ji vwo irueruo erọrọ buebun re yonirin aye rẹ aye i tigban, jerẹ omebrurhame iko, ijọgu ọrhẹ ekwakwa ra ha erẹnmo ru.) 5 Omarana, itu i Farisi enana ọrhẹ eyẹbe na ni nọ i Jesu: “Mesoriẹ idibo enọ i vwa nyalele irueruo ihworho ahwanren i ru notọre rhe? Ukpomaran, aye na ha abọ igbegbe riẹ emaren.” 6 Nọ ta rẹn aye: “Oborẹ Aizaya ọ mẹraro kpahen are ra gemai ruẹ na ọ ghini gba, jerẹ oborẹ a ya rhotọre, ‘Ihworho enana a họghọ mẹ rhẹ evwẹrugbunu aye, ọrẹn ọmudu aye o serabọ ha mẹ omamọ. 7 Ogame aye a ha mẹ ofefe, fọkime aye i bọn iyono aye kpahen ekama ituakpọ.’ 8 Are i gbobọhiẹn akama Osolobrugwẹ, are ne tigban oborẹ ihworho i ru notọre rhe.”
9 Nọ ji ta rẹn aye: “Are a ha izede ona gbobọhiẹn akama Osolobrugwẹ, neneyo are i sabu rhe ruẹ lele irueruo are i ru notọre rhe. 10 Jerẹ udje, Mosis ọ tare taghene, ‘Họghọ rẹn ọsọ ọrhẹ izuo,’ ọ ji ta taghene, ‘Kohworho kohworho rọ ta erharhere ẹmro kpahen* ọsẹ ye yanghene izie, jene kpe yi hwu.’ 11 Ọrẹn, are na ta, ‘Ohworho ọrhọ ta rẹn ọsẹ ye yanghene izie taghene: “Kemru kemru mi vwori mi na sa erhumu i kọban, (nọyẹ ẹghẹlẹ ra ha kpahontọre rẹn Osolobrugwẹ),”’ 12 are i vwe rhe kwe no ruẹ emru owuorowu rẹn ọsẹ ye yanghene izie-e. 13 Omarana, are na djẹ ẹmro Osolobrugwẹ fughwẹ fọkiẹ irueruo are i ru notọre rhe, rẹ are e ji yono awọrọ. Are e ji ruẹ ekwakwa erọrọ buebun jerẹ ọnana.” 14 Jesu nọ rharhumu se otu na kẹroma ji ta rẹn aye taghene: “Are ephian i kerhọ mẹ, nẹ are i vwẹruọ oborẹ mia ta na. 15 O vwo emru owuorowu rọ ruẹ uvuẹn oma ohworho rọ nọ sabu gbe yi aghwa-a. Ọrẹn, ekwakwa re nẹ oma ohworho sa ye gbe yi aghwa.” 16* ——
17 Ọke i Jesu ọ nyaji otu na vwo ruẹ uvuẹn oghwa owu, idibo yi na nọ yen kpahen udje na. 18 Omarana, nọ ta rẹn aye: “Are dede e vwẹruọ ye jerẹ aye-e? Are e rhe taghene oborẹ o nẹ otafe ruẹ oma ohworho ọ sabu gbe yi aghwa-a? 19 Fọkime ọ vwọ ruẹ ọmuduie-e, ukpomaran ephan yen yọ rua, orho ru no ne yi fughwẹ.” Omarana, Jesu nọ nyoma ọnana djephia taghene emaren ephian i fonron. 20 Nọ ji habaye taghene: “Oborẹ o nẹ uvuẹn oma ohworho sa yo gbe yi aghwa. 21 Fọkime uvuẹn ọmudu ohworho yẹ iroro evwiavwia e nẹ sa, jerẹ irueruo ọfanrhiẹn,* uhieso, ozighẹ-ede,* 22 ọvwiẹghwọ, ufiuvwele, irueruo ọkon, ọphiẹrhọ, uruemru aghwa,* ukẹro omẹriọ, ẹrhaphiẹ, omẹkpare ọrhẹ je roro te. 23 Ekwakwa evwiavwia enana ephian e nẹ uvuẹn ọmudu ohworho sa, ji gbe yi aghwa.”
24 Jesu no nẹ avwaye riẹ uvwrotọre i Taya ọrhẹ Saidọn. Nọ ruẹ oghwa owu, ọrẹn ọ gwọlọ nẹ ohworho owuorowu o rhe kpahiẹ-ẹn, udabọ ọrana ihworho i ji rhe kpahiẹn. 25 Ogege, ọmase owu rẹ okpodje ọ ha oma ibiẹ ọmọyen ọgbọtọ, no rhon kpahen i Jesu ji me sighwẹ rhẹ obaruiẹ. 26 Ọmase na onyẹ i Grik, o nẹ i Fonisha rọ ha i Siria rhe.* Nọ rẹ i Jesu no le okpodje na nẹ oma ọmọyen ọgbọtọ. 27 Ọrẹn, Jesu nọ ta riẹn: “Jenẹ emọvwerhe na i kiki riẹ ephan vuọn vwẹre, fọkime o fo na ha ibrẹdi emọvwerhe mie aye, ji donrien rẹn erimwamwa ekokamu-u.” 28 Ọrẹn, ọmase na nọ kpahenrhọ riẹn: “Ọrana urhomẹmro ọga, ọrẹn erimwamwa ekokamu na dede ri ha obotọre imẹdjẹ na, a ji ria nẹ iwuwu emaren ri se nẹ abọ emọ ekokamu na.” 29 Omarana, Jesu nọ ta rẹn ọmase na: “Fọkiẹ ẹmro ọnana wu tare na, gba nyarhẹn, okpodje na o nẹ oma ọmọ ne.” 30 Omarana, ọmase na nọ ghwẹrioma riẹ oghwa ye ji mẹrẹn ibiẹ ọmọ na ro semerhẹn ekpa, okpodje na o nirien oma ne.
31 Ọke i Jesu ọ ghwẹrioma nẹ uvwrotọre i Taya rhe, nọ nya i Saidọn ọrhẹ uvwrotọre i Dikapolis* riẹ Urhie ọduado i Galili. 32 Uvuẹn avwaye, aye ni kpare ọhworhare owu ro dienrhọ, rọ vwọ ji sabu tẹmro fiotọre vwe yi, aye na rẹ ye taghene ọ ha obọ kpahiẹn. 33 Nọ ha ọhworhare na riẹ okokọ nẹ ekete otu na i havwọ. No fiẹ irhianbọ ye rhẹ erhọ ọhworhare na. Ọke ro djen erhẹnrhen hin, nọ hobọte ẹrẹnmo ọhworhare na. 34 Ọke rọ kpare ughwaro ni odjuwu ji kwẹhẹn totọre hin, nọ ta rẹn ọhworhare na: “Ẹfata,” nọyẹ, “Gbe rhie.” 35 Omarana, erhọ ye ni rhieri, obẹnbẹn ẹmro ẹta na no nirien, nọ dabu tẹmro fiotọre. 36 Omarana, nọ ha orhetio rẹn aye taghene aye i vwa ta rẹn ohworho owuorowu kpahiẹ-ẹn. Ọrẹn udabọ orhetio na, aye na ji ta rẹn ihworho kpahiẹn. 37 Itiọrurhomẹmro, ekwakwa enana ephian i gberẹ aye unu omamọ, aye na ta: “Ọ dabu ruẹ ekwakwa ephian rhorhomu. Ọ tobọ lẹrhẹ idienrhọ rhon ẹmro, ji lẹrhẹ eri diunu tẹmro.”