Iyẹnrẹn Ọrẹ i Mak

6 Jesu no nẹ avwaye riẹ amwa ọnẹyen, idibo yi ni ji lelie. 2 Ọke Ẹdẹ Omeronmo na o te, no yono ihworho uvuẹn i sinagọg na. No gbe ihworho buebun unu ọke aye e rhon ẹmriẹn, aye na ta: “Bọgo yẹ ọhworhare ọnana o yono ekwakwa enana? Mesoriẹ a yẹ ye ẹghwanren ọnana, ọrhẹ omẹgbanhon ro ruẹ aruẹ ekwakwa igbevwunu enana? 3 Ọnana yẹ ikapita na ro rhiẹ ọmọ i Meri, ọye omizu i Jems, Josẹf, Judas ọrhẹ Saimọn, rhomaran? Rhẹ ọwan ọrhẹ imizie emẹse yi gba havwiẹ?” Omarana, aye erhe vwo esegburhomẹmro kpahiẹ-ẹn. 4 Ọrẹn, Jesu nọ ta rẹn aye: “A họghọ rẹn ọmẹraro uvuẹn ekete ephian jokpanẹ uvuẹn amwa yen, uvwre ekruien ọrhẹ uvuẹn oghwa ye ọvo.” 5 Omarana, orho ruẹ igbevwunu owuorowu uvuẹn avwaye-e, ọrẹn nọ ghwai ha abọ kpahen ibiẹ ihworho ezẹko re kpomẹ, ji simi aye. 6 Itiọrurhomẹmro, o gbe i Jesu unu omamọ fọkime aye e vwo esegburhomẹmro-o. Omarana, no yo kiẹn ọko sansan ji yono ihworho.

7 Jesu no se awan Ikpereva na ji ghalẹ aye eveva, no djerẹ aye ye ghwoghwo. Nọ ji yẹ aye omẹgbanhon rẹ aye ine le ikpodje nẹ ihworho oma. 8 Habaye, no jurhi rẹn aye taghene aye i vwa kpare emru owuorowu lele oma uvuẹn onya na-a, jokpanẹ ukorọkpọ ọvo. Aye i vwa kpare ibrẹdi, ẹkpa emaren, yanghene fiẹ igho* rhẹ ẹkpa aye-e. 9 Ukpomaran aye i kuẹ isabatu rhọ, ọrẹn aye i vwe kuẹ ewun eva rhọ-ọ. 10 Nọ ji ta rẹn aye: “Koghwa koghwa are i ruoro, are i daji avwaye bọmọke are ine ki nẹ avwaye. 11 Ekete ephian re vwe kwe rhiabọ dede are yanghene kerhọ are, are erhe nẹ avwaye, are i gbe tue eyẹn nẹ aghwẹ are no rhiẹ oseri rẹn aye.” 12 Omarana, aye ni nyarhẹn ye ghwoghwo taghene ihworho i ghwẹriẹ. 13 Aye ni le ikpodje buebun nẹ ihworho oma, aye ni ha emri olivi lerhe ihworho buebun re kpomẹ ji simi aye.

14 Vwana, Orodje Hẹrọd no mo rhon kpahen ekwakwa enana, fọkime odẹ i Jesu o kperusi lele ekete ephian ne. Ihworho na ta: “A rhọmọ i Jọn rọ Brawanrhame na nuhwu ne, ọ yọ soriẹ ọ sabu wian ewian igbevwunu enana.” 15 Ọrẹn, awọrọ na ta: “Ọye Ẹlaijah.” Ihworho erọrọ na ji ta: “Ọye ọmẹraro jerẹ emẹraro ọke ahwanren.” 16 Ọrẹn, ọke i Hẹrọd o rhon kpahiẹn, nọ tare: “Jọn ri mi bru urhomuie nie na, ya rhọmọ nuhwu na.” 17 Hẹrọd ọvo yo dje ihworho ye mwu i Jọn ji gba ye fi rhẹ ekanron fọkiẹ Hẹrodias ro rhiẹ ane omizie re se Filip, ri Hẹrọd ọ rọnmọren. 18 Fọkime i Jọn ọ ta rẹn Hẹrọd ọgbọ buebun ne taghene: “O fo ne wu rọnmọ ane omizuo-o.” 19 Omarana, Hẹrodias no fiẹ i Jọn rhẹ ephan, nọ ji gwọlọ kpe yi hwuẹ, ọrẹn ọ sabu ruie-e. 20 Ofẹn no mwu i Hẹrọd fọkiẹ i Jọn, fọkime o rheri taghene i Jọn ọvwata ọrhẹ ohworho ọfuanfon. Omarana, nọ sẹroriẹ ọke ephian. Kọke kọke orho rhon ẹmro i Jọn, o vwo rho rhe oborẹ ono ruo-o. Udabọ ọrana, oma ọ ji merhiẹn rọ nọ kerhọ ye.

21 Ọrẹn, uphẹn no rhiefirhọ rẹn Hẹrodias uvuẹn ẹdẹ i Hẹrọd ọ riorẹ ẹdẹ re vwiẹ ye. Hẹrọd no se ihworho ri vwo ẹrhẹ eduado ọrhẹ isodja ri vwo ẹrhẹ eduado kugbe ihworho ri titiri uvuẹn i Galili. 22 Ọmọ ọgbọtọ i Hẹrodias no mo gbigbegbe, ji lẹrhẹ oma merhen i Hẹrọd ọrhẹ ihworho re lelie riakpọ na.* Orodje na nọ ta rẹn ọgbọtọ na: “Nekpẹn i kemru kemru wu gwọlọre, mi na haye wẹn.” 23 Nọ tobọ dumirhonrin ji ta riẹn: “Kemru kemru wu nekpẹn yen mie mẹ, mi na haye wẹn, ọrhọ tobọ rhiẹ owuobọ uvie mẹ dede.” 24 Omarana, ọgbọtọ na nọ nyarhẹn ya nọ izie taghene: “Me mi na nekpẹn yen?” Izie nọ tare: “Urhomu i Jọn ro Brawanrhame na.” 25 Ogege, ọgbọtọ na no brokpakpa bru orodje na ji ta riẹn taghene: “Mi gwọlọre ne wu fiẹ urhomu i Jọn ro Brawanrhame na rhẹ ọmoze ọphophẹghẹ ha mẹ wanana.” 26 Dedevwo ọnana ọ da orodje na omamọ, ọ gwọlọ tiẹn oborẹ ọgbọtọ na ọ nekpẹn ye-en, fọkiẹ irhonrin ro dumurun na ọrhẹ epha* ri brurie rhe. 27 Ogege, orodje na no se isodja owu ji jurhi riẹn taghene ọ yọ ha urhomu i Jọn rhe. Omarana, nọ nyarhẹn ye bru urhomu i Jọn nie uvuẹn ekanron na. 28 Nọ kpare urhomu na rhẹ ọmoze ọphophẹghẹ na rhe, nọ hariẹ rẹn ọgbọtọ na, ọgbọtọ na nọ kpareriẹ vwe izie. 29 Ọke idibo i Jọn e rhon kpahen oborẹ ọ phiare, aye ni mọ kpare orinmie ye sion.

30 Inyikọ na ni koko kinhariẹ i Jesu, ji nẹ iyẹnrẹn riẹn kpahen ọsoso ekwakwa aye i ruru ọrhẹ oborẹ aye i yono ihworho lele. 31 Nọ ta rẹn aye: “Are i mọ ne riẹ ekete kologho, nẹ are i ye ronmoma ibiesuọn.” Fọkime ihworho buebun a sa ji nyarhẹn, aye erhe vwo ọke aye ina tobọ riẹ emare-en. 32 Omarana, aye ni ruẹ owọ riẹ ekete kologho neneyo aye ọvo i daji avwaye. 33 Ọrẹn, ihworho ni mẹrenrẹn aye ọke aye a nyarhẹn, ihworho buebun ni me rhe kpahiẹn, aye ni nẹ ọsoso emwa na rhe ji ha oghwẹ zẹ kobaro rẹn aye ji kiki aye te oboran. 34 Ọke i Jesu ọ ruotọre nẹ owọ na, nọ mẹrẹn ihworho buebun, aruo aye nọ dọnriẹn fọkime aye i họhọ igegede ri vwe vwo ohworho ro suẹn aye. Omarana, no yono aye ekwakwa buebun.

35 Vwana, ọke ọ nya seri omamọ ne, omarana idibo i Jesu ni brurie rhe mọ ta riẹn: “Ekete arana ọ havwọ kologho, ọke ọ ji nya seri ne. 36 Gbe tiobọnu otu na nẹ aye i riẹ emwa ri kẹrẹ aran ọrhẹ ọko sansan ya dẹ oborẹ aye ina riọ.” 37 Jesu nọ ta rẹn aye: “Are i yẹ aye oborẹ aye ina riọ.” Aye ni nọriẹn: “Ame i nyarhẹn ya dẹ ibrẹdi dinariọs* 200, ji ghaliẹ rẹn ihworho na?” 38 Nọ nọren aye: “Ibrẹdi emwa yẹ are i vwori? Are i ye nie vwẹre!” Ọke aye e nie hin, aye ni tare: “Ibrẹdi isionrin, ọrhẹ irhenrin eva.” 39 Jesu nọ ta rẹn ọsoso ihworho na nẹ aye i siyẹ ẹkuẹko rhẹ oberun odin na. 40 Omarana, aye ni siyẹ ẹkuẹko, ezẹko awan 100, ezẹko awan 50. 41 Ọke rọ ha ibrẹdi isionrin ọrhẹ irhenrin eva na, nọ kparughwaro ni odjuwu ji nẹrhomo vwe Osolobrugwẹ. No bru ibrẹdi na ji haye rẹn idibo yi nẹ aye i ghaliẹ rẹn ihworho na, nọ ji ghalẹ irhenrin eva na rẹn aye ephian. 42 Omarana, aye ephian ni riẹ ephan vuọn. 43 Aye ni koko ibrẹdi ri hẹrhẹre na vuọn ekalokpọ 12, irhenrin na a ha usuẹn aye-e. 44 Ehworhare awan 5,000 yi riẹ ibrẹdi na.

45 Omarana, vabọ ọke ekpe, Jesu nọ ta rẹn idibo yi nẹ aye i ruẹ owọ ji dan urhie na vrẹn riẹ obọrẹ i Bẹtseda, ọye ọvo no tiobọnu otu na. 46 Ọrẹn, ọke ro tiobọnu otu na hin, ọye ọvo no riẹ oberun ugbenu owu ya nẹrhomo. 47 Vwana, owuọwọn o te ne, owọ idibo na o ji te erhẹrhẹ urhie ọduado na ne, ọrẹn Jesu ọvo ọ ha akpa. 48 Omarana, Jesu nọ mẹrenriẹn taghene aye a damoma aye ine bi owọ na fọkime aphẹrẹ ọgbogbanhon ọ hasuẹ aye. Emrẹ igidurhiọke,* nọ nya oberun ame na bru aye sa, ọrẹn nọ họhọre taghene ọ gwọlọ nyavrẹn aye. 49 Ọke aye a mẹriẹn rọ nya oberun ame na, aye ne roro: “Oghẹnren emru ọgo yọ nya sa na?”* Aye ni kperi phia. 50 Ọke aye ephian a mẹriẹn, ofẹn no mwurun aye. Ọrẹn ogege, Jesu nọ ta rẹn aye taghene: “Are i fiudugbere! Omẹmẹ, are i vwa zofẹ-ẹn.” 51 Omarana, nọ ruẹ owọ aye i havwọ na, aphẹrẹ ọgbogbanhon na nọ dobọji. Ọke aye a mẹrẹn ọnana, no gberẹ aye unu omamọ. 52 Fọkime aye e ji vwẹruọ oborẹ igbevwunu ibrẹdi na o mevirhọ-ọ. Habaye, ọmudu aye o ji vwẹruọ oborẹ ọ phia na-a.

53 Ọke aye a dan urhie na vrẹn, aye ni dumufiẹ i Gẹnẹsẹrẹt ji gba owọ na kẹrẹ avwaye. 54 Ọrẹn, ogege aye a ruotọre nẹ owọ na, ihworho ni vwrurhe i Jesu. 55 Aye ni zẹ lele ọsoso okogho ọrana ji ha abiba kpare ihworho re kpomẹ vwe i Jesu, uvuẹn ekete aye i rhonrin taghene ọ havwọ. 56 Kọke kọke ọrhọ ruẹ ọko yanghene amwa owuorowu yanghene ekogho ri kẹrẹ emwa na, aye na kpare ihworho re kpomẹ rhẹ ekete eyi. Aye na rẹ i Jesu nẹ aye i ghwai hobọte ejẹnjẹn ewun otafiẹ. Oma ọsoso ihworho ri hobọte yi ni gbanhonron.