Iyẹnrẹn Ọrẹ i Matiu

26 Vwana, ọke i Jesu ọ tẹmro enana ephian hin, nọ ta rẹn idibo yi: 2 “Are i rheri taghene ẹdọke eva vwaran, ana riorẹ Ọnyavrẹn na, na na ha Ọmọ onyakpọ na kpahontọre ne kpe yi mwu orhan no hwu.”

3 Ọke oru, ilori irherẹn na ọrhẹ ekpako ihworho na ni kokori uvuẹn egodo orherẹn ọduado na re se Keyafas. 4 Aye ni djiroro kugbe nẹ aye i sabu ha izede ona mwu* i Jesu, ji kpe yi hwu. 5 Ọrẹn, aye na ta: “E vwe mwuien ọke orẹ na-a, neneyo ọyanghan ọ jọ rhọ homaphia uvwre ihworho na.”

6 Ọke i Jesu ọ ha i Bẹtani uvuẹn oghwa i Saimọn ro kpomu emiamo oti bi na, 7 ọmase owu rọ kparẹ ukoko alabasta ro vwo ichani ọghoghanren ro gbon phanphanphan, no bru i Jesu rhe. No rhie ichani na rhẹ urhomu i Jesu ọke rọ riẹ emaren.* 8 Ọke idibo na a mẹrẹn ọnana, ephan ni biomirin aye omamọ, aye ni tare: “Mesoriẹ ọ ghwọghọ ichani na fughwẹ? 9 Manẹ a sabu rhẹ ichani na ọkpẹ igho, ji ha igho na rẹn ivwiegbere.” 10 Ọke i Jesu o rhe oborẹ aye a ta, nọ ta rẹn aye: “Mesoriẹ are a gwọlọ ẹmro ọmase na? Omamọ emru yo ru ha mẹ. 11 Fọkime ivwiegbere na ọrhẹ are i havwiẹ ọke ephian, ọrẹn mẹmẹ ọrhẹ are i rhirhiẹ ye ọke ephia-an. 12 Ọmase na o rhie ichani ro gbon phanphanphan na rhẹ ugboma mẹ, ha mwuegbe mẹ hẹrhẹ orinmi esion mẹ. 13 Itiọrurhomẹmro mia ta rẹn are, ekete ephian re ne ghwoghwo iyẹnrẹn esiri na uvuẹn akpọ na, ana ta kpahen oborẹ ọmase ọnana o ruru na ha karorhọ ye.”

14 Ọke oru, owuọwan usuẹn awan Ikpereva na re se Judas Iskariọt, no bru ilori irherẹn na. 15 Nọ nọren aye: “Me yẹ are ina yẹ mẹ ni mi rhẹ ye rẹn are?” Aye ni ta riẹn taghene idọlọ efuanfon 30. 16 Omarana, nẹ ọke ọrana nyarhẹn, nọ gwọlọ ọke ro serhọ rọ nọ rhẹ i Jesu.

17 Uvuẹn ẹdẹ ọrukaro ọrẹ Orẹ Ibrẹdi ro Vwo Phie na, idibo i Jesu ni brurie rhe ma nọ yen: “Bọgo wu gwọlọre nẹ ame i mwuegbe ha wẹn ne wu ha riorẹ Ọnyavrẹn na?” 18 Nọ kpahenrhọ rẹn aye: “Are i ruẹ uvuẹn amwa na bru ohworho omana ọrhẹ omana, nẹ are i ta riẹn taghene, ‘Oyono na aghene: “Ọke re bru mẹ o tikẹrẹ ne. Mẹmẹ ọrhẹ idibo mẹ ina riorẹ Ọnyavrẹn na uvuẹn oghwa ọnọ.” ’ ” 19 Omarana, idibo na ni ruẹ oborẹ i Jesu ọ ta rẹn aye na, aye ni mwuegbe hẹrhẹ orẹ Ọnyavrẹn na.

20 Ọke owuọwọn o te, Jesu ọrhẹ idibo awan 12 na ni siyẹ ekete imẹdjẹ. 21 Ọke aye a riẹ emaren, nọ tare: “Itiọrurhomẹmro mia ta rẹn are, owuọwan usuẹn are na ọnọ rhẹ mẹ.” 22 Aye ni mwuomarhọ omamọ fọkiẹ ẹmro ọnana, aye owuowọnwan na nọ yen: “Ọrovwori, rhẹ omẹmẹ-ẹ, gbinẹ omẹmẹ?” 23 Nọ kpahenrhọ rẹn aye taghene: “Ohworho omẹmẹ rhẹ ọye i gbe dumu obọ rhẹ ọmoze na, yọ nọ rhẹ mẹ. 24 Itiọrurhomẹmro, Ọmọ onyakpọ na ono hwuo jerẹ oborẹ a ya kpahiẹn, ọrẹn ukpokpogho ọ havwiẹ rẹn ohworho ra nyoma yen rhẹ Ọmọ onyakpọ na! Manẹ o rhomu rẹn ohworho ọrana orhianẹ e vwiẹ ye-e.” 25 Judas ro rhiẹ ohworho rọ nọ rhẹ ye phẹrẹkpẹ na, nọ nọriẹn: “Rabbai, rhẹ omẹmẹ-ẹ, gbinẹ omẹmẹ?” Jesu nọ kpahenrhọ riẹn: “Wẹwẹ ọvo yi tariẹ.”

26 Ọke aye a ji riẹ emaren na, Jesu nọ ha ibrẹdi. Ọke rọ nẹrhomo hin, no brurie ji haye rẹn idibo yi, nọ tare: “Are i mie, nẹ are i riẹ. Ọnana o mevirhọ ugboma mẹ.” 27 Nọ ji ha uko enyo, nọ kpẹmẹ Osolobrugwẹ ji haye rẹn aye, nọ tare: “Are ephian i da nẹ uvuien. 28 Fọkime ọnana o mevirhọ ‘ọbara mẹ ro sekpahen ọphọ na,’ re ne rhie rhotọre fọkiẹ ihworho buebun na sabu harhomu edandan aye. 29 Ọrẹn, mia ta rẹn are taghene: Mi rha da iwaini ọnana ra ha ivaini ru ghwomara-an, bọmọke ẹdẹ ọrana ono ki te rẹ omẹmẹ ọrhẹ are ina da ọkpokpọ ye kugbe uvuẹn Uvie Ọsẹ mẹ.” 30 Obẹtaye, ọke aye a so ijoro ujiri hin, aye ni riẹ Ugbenu Oliv.

31 Jesu nọ ta rẹn aye: “Are ephian ina sẹrerhumuji* mẹ vwo fọkiẹ oborẹ ọnọ phia mẹ uvuẹn ason ọnana, fọkime a yariẹ rhotọre: ‘Mi na ghwiẹ osuingegede na, igegede na ni na hrabọ lele ekete ephian.’ 32 Ọrẹn, arha rhọmi mẹ nuhwu ne, mi na kobaro rẹn are riẹ i Galili.” 33 Omarana, Pita nọ ta riẹn: “Ọrhọ tobọ rhianẹ eri hẹrhẹre na i sẹrerhumujo* vwo fọkiẹ oborẹ ọnọ phia wẹn, mi sẹrerhumujo vwo dẹ-ẹ!” 34 Jesu nọ ta riẹn: “Itiọrurhomẹmro mia ta wẹn, bọmọke ogberhualẹ ono bo uvuẹn ason ọnana, wu na ten mẹ ọgbesa.” 35 Pita nọ ta riẹn: “Ọrhọ tobọ rhianẹ mi ne leluo hwu dede, mi tiẹn owẹwẹ-ẹ.” Ọsoso idibo ri hẹrhẹre na ni ji ta omaran.

36 Ọke oru, Jesu ọrhẹ idibo na ni te ekete re se Gẹtsẹmẹni, nọ ta rẹn aye: “Are i siyẹ aran, ni mi riẹ oboran ya nẹrhomo.” 37 Nọ ha i Pita ọrhẹ emọ ehworhare i Zẹbẹdi awanva lele oma. Ẹhẹn yen no seriotọre omamọ, no ji mwuomarhọ. 38 Nọ ta rẹn aye: “Ẹhẹn mẹ o seriotọre omamọ tobọ te erhirhiẹ uhwu. Are i daji aran nẹ are i rhe leli mẹ dẹrẹ.” 39 Ọke rọ nya riẹ obaro ibiesuọn ji gbughwaro rhotọre, nọ nẹrhomo taghene: “Ọsẹ mẹ, orhianẹ ọnọ sabu phia, jenẹ uko ọnana ọ nyavrẹn mẹ. O vwo rhiẹ ọhọre mẹ-ẹ, ọrẹn je no rhiẹ ọhọre ọnọ.”

40 Nọ ghwẹrioma bru idibo na ji mẹrẹn aye ra merhẹn, nọ ta rẹn i Pita: “Nọyẹ are i sabu leli mẹ dẹrẹ unọke owu ọvo dede? 41 Are i rha dẹrẹ ji nẹrhomo ọke ephian, nẹ are i je rhe se rhẹ ọdamuni. Itiọrurhomẹmro, ẹhẹn na o vwo oruru,* ọrẹn ugboma na ọ vwiẹlẹre.” 42 Nọ rharhumu nyarhẹn ọgbọreva ye ya nẹrhomo taghene: “Ọsẹ mẹ, orhianẹ uko ọnana ọ sabu nyavrẹ-ẹn, jokpanẹ mi da nẹ uvuien vwẹre, jenẹ ọhọre ọnọ rugba.” 43 Nọ rharhumu ghwẹrioma rhe ji mẹrẹn aye ra merhẹn, fọkime omerhẹn ọ vuọn ikẹro aye. 44 Omarana, nọ nyaji aye vwo ya nẹrhomo ọgbọresa ye, nọ rharhumu vwanriẹn ẹmro rọ tare bi na. 45 Nọ ghwẹrioma bru idibo na ji ta rẹn aye: “Are a merhẹn ji ronmoma uvwrọke omana? Nughe! Ọke ra na rhẹ Ọmọ onyakpọ na rẹn iruedandan o tikẹrẹ ne. 46 Are i vẹnrẹn na nyarhẹn. Nughe! Ọrọ nọ rhẹ mẹ na o tikẹrẹ aran ne.” 47 Ọke i Jesu ọ ji tẹmro, Judas ro rhiẹ owuọwan usuẹn awan Ikpereva na, no bruru aye rhe rhẹ ihworho buebun rẹ ilori irherẹn na ọrhẹ ekpako ihworho na i dje rhe, aye i kpare edan ọlọkọ ọrhẹ uphrophro erhan.

48 Vwana, Judas rọ rhẹriẹ na ọ yẹrẹ aye oka bi ne taghene: “Kohworho kohworho mi fiọnfiọnren, ọrana yẹ ohworho na; are i mwuien.” 49 Omarana, nọ ghwai nya bru i Jesu ji ta riẹn: “Doo, Rabbai!” no bibiesuọn fiọnfiẹn. 50 Ọrẹn, Jesu nọ nọriẹn: “Ọse, me yọ kpareruọ rhiẹ aran?” Omarana, ihworho na ni sanbọmwu i Jesu ji mwuien. 51 Ọrẹn, nughe! owuọwan usuẹn ere leli Jesu no shoro odan ọlọkọ ye phia, ji fian orhọ ọvrẹn orherẹn ọduado na nie. 52 Jesu nọ ta riẹn: “Ha odan ọlọkọ ọnọ ghwẹrioma, fọkime eri ha odan ọlọkọ ruiruo, ine hwu uhwu odan ọlọkọ. 53 Gbinẹ we roro taghene mi sabu rẹ Ọsẹ mẹ no dje ẹko emakashe ri ghwẹ lijọn 12 vwe mẹ wanana-a? 54 Ọrẹn, mi rhe ruẹ omaran, ni marhẹ oborẹ Eyaya Efuanfon na i tare taghene ekwakwa ina phia izede omana, ine ru te orugba?” 55 Uvuẹn unọke ọrana, Jesu nọ ta rẹn otu na: “Are i rhiẹ aran me mwu mẹ rhẹ edan ọlọkọ kugbe uphrophro erhan kamẹriẹn mẹmẹ ohi? Kẹdẹkẹdẹ, mie siyẹ uvuẹn oghwa ẹga na ji yono ihworho, ọrẹn are e mwu mẹ-ẹ. 56 Ọrẹn, ekwakwa enana ephian i phiare neneyo eyaya* emẹraro na i sabu te orugba.” Idibo na ephian ni sẹrerhumuje vwo ji zẹ.

57 Ihworho ri mwu i Jesu ni kpareriẹ vwe Keyafas ro rhiẹ orherẹn ọduado na. Eyẹbe na ọrhẹ ekpako na i kokori avwaye. 58 Ọrẹn, Pita ọ ha ugbo oseseri rọ nyalelie, bọmọke o ki te egodo orherẹn ọduado na. Ọke rọ ruẹ uvuien hin, no siyẹ kẹrẹ idibo ra wian uvuẹn oghwa na, nọ sabu mẹrẹn oborẹ ọnọ phia.

59 Vwana, ilori irherẹn na ọrhẹ ọsoso i Sanhẹdrin na, na gwọlọ ihworho ri ne se oseri efian kpe i Jesu, nẹ aye i sabu kpe yi hwu. 60 Dedevwo ihworho buebun i me se oseri ofian, ọrẹn aye a mẹrẹn ekete mọrọn i Jesu-u. Ọke oru, iseri awanva ni homaphia. 61 Aye ni tare: “Ọhworhare ọnana ọ tare taghene, ‘Mi na sabu ghwọghọ oghwa ẹga Osolobrugwẹ, ji rharhumu bọn yen hin ẹdọke esa ọvo.’ ” 62 Omarana, orherẹn ọduado na no vẹnrẹn mevi, nọ nọ i Jesu: “Wu vwa kpahẹnmro owuorowu? Wu vwe rhon ẹmro rẹ ihworho enana a ta hasuọ na?” 63 Ọrẹn, Jesu nọ fọdu. Omarana, orherẹn ọduado na nọ ta riẹn: “Dumirhonrin obaro Osolobrugwẹ ro nyerẹn na, ne wu ta rẹn ame sẹ owẹwẹ yi Kristi na ro rhiẹ Ọmọ Osolobrugwẹ!” 64 Jesu nọ ta riẹn: “Wẹwẹ ọvo yi tariẹ. Ọrẹn mia ta rẹn are: Nẹ ọke ọnana nyarhẹn, are ina mẹrẹn Ọmọ onyakpọ na ro siyẹ obọrhen Ohworho ro vwo omẹgbanhon na, rọ ji sa uvuẹn avwre odjuwu na.” 65 Omarana, orherẹn ọduado na nọ bẹrẹ ewun otafiẹ ji ta: “Ọ rhaphiẹ Osolobrugwẹ ne! Mesoriẹ a ji gwọlọ iseri erọrọ? Nughe! Are i rhon ẹmro rọ ha rhaphiẹ Osolobrugwẹ ne. 66 Me yẹ are i rorori?” Aye ni kpahenrhọ riẹn: “O fo ohworho ro no hwuo.” 67 Omarana, aye ni djen erhẹnrhen ghwuie ughwaro, ji ha ọchẹn bọmiẹ. Awọrọ ni ghwiẹriẹ ughwaro, 68 aye na ta: “Mẹraro rẹn ame, wẹwẹ ri rhiẹ i Kristi na. Ọrọmo yọ ghwiẹruọ?”

69 Vwana, ọke i Pita o siyẹ otafe uvuẹn egodo na, ọvrẹn ọgbọtọ owu no brurie rhe ji ta riẹn: “Wu ha usuẹn era nyaleli Jesu ro rhiẹ onyẹ i Galili na!” 70 Ọrẹn, nọ tenriẹn obaro aye ephian taghene: “Mie rhe oborẹ wa ta kpahan na-a.” 71 Ọke ro riẹ anurẹsẹ egodo na, ọgbọtọ ọrọrọ nọ mẹrenriẹn ji ta rẹn ihworho ri ha avwaye taghene: “Ọhworhare ọnana o ji leli Jesu ro rhiẹ onyẹ Nazarẹt na.” 72 Nọ rharhumu tiẹn, ji dumirhonrin taghene: “Mie rhe ọhworhare na-a!” 73 Ọke o jiri bẹn, ihworho ri mevi avwaye ni bru i Pita rhe, ji ta riẹn taghene: “Itiọrurhomẹmro, wẹwẹ owuọwan usuẹn aye, oborẹ wa tobọ tẹmro lele o djerie phia.” 74 Omarana, Pita no djekan ji dumirhonrin taghene: “Mie rhe ọhworhare na-a!” Ogege, ogberhualẹ no bori. 75 Pita nọ karorhọ oborẹ i Jesu ọ ta riẹn bi taghene: “Bọmọke ogberhualẹ ono bo, wu na ten mẹ ọgbesa.” Omarana, no riẹ otafe ya viẹ gbangbanhon.