Iyẹnrẹn Ọrẹ i Matiu
22 Jesu nọ rharhumu ha idje tẹmro rẹn aye taghene: 2 “Ana sabu ha Uvie idjuwu na dje orodje owu ro mwuegbe akpẹriọ fọkiẹ irueruo orọnmo ọmọyen ọhworhare. 3 No dje evrẹn yen ye se ihworho ra ha use riẹn rhiẹ akpẹriọ na, ọrẹn aye e kwe rhe-e. 4 Nọ rharhumu dje evrẹn erọrọ nyarhẹn taghene, ‘Are i ta rẹn ihworho ra ha use riẹn na taghene: “Nughe! Mi mwuegbe emaren rhotọre ne, mi kpe erhuẹn mẹ ọrhẹ eranmo ri havwọ sọkọsọkọ ne, mi mwuegbe ekwakwa ephian ne. Are i rhiẹ akpẹriọ irueruo orọnmo na.” ’ 5 Ọrẹn, ihworho na a damerhọ-ọ, ezẹko ni riẹ ikebi aye, erọrọ ni riẹ eyẹsuọ. 6 Ọrẹn, eri hẹrhẹre ni mwu evrẹn orodje na, aye ni ha oja riẹ aye omamọ ji kpe aye hwu.
7 “Ephan no biomu orodje na omamọ, no dje isodja enẹyen ye kpe izighẹ erana hwu, ji torhẹ amwa aye. 8 Omarana, nọ ta rẹn evrẹn yen taghene, ‘E mwuegbe akpẹriọ irueruo orọnmo na ne, ọrẹn ihworho ra ha use riẹn e mwuovwa-an. 9 Omarana, are i riẹ izede ra nya ruẹ amwa na ya ha use rẹn kohworho kohworho rẹ are i mẹrẹnren, nẹ aye i rhiẹ akpẹriọ irueruo orọnmo na.’ 10 Omarana, evrẹn erana ni nyarhẹn riẹ izede na ye se kohworho kohworho aye i mẹrẹnren, te evwọkon ọrhẹ emamọ ihworho. Ekete re ruẹ irueruo orọnmo na nọ vuọnren rhẹ ihworho ra riẹ emaren.*
11 “Ọke orodje na o mo ni ihworho ra ha use riẹn na, nọ mẹrẹn ọhworhare owu ro vwo kuẹ ewun orọnmo rhọ. 12 Omarana, nọ nọriẹn, ‘Ọse, marhẹ wu ru ruẹ ekete aran, ọrẹn we kuẹ ewun orọnmo rhọ-ọ?’ Ọhworhare na ọ sabu kpahẹnmro owuorowu-u. 13 Omarana, orodje na nọ ta rẹn idibo yi, ‘Are i gba abọ ye ọrhẹ aghwẹ ye, nẹ are i donrien rhẹ otafe ro mwuokuku na. Avwaye yọ nọ viẹ ji riẹ ikanwuiẹn.’
14 “Fọkime ihworho buebun ya ha use riẹn, ọrẹn ibiẹ ihworho ya djẹha.”
15 Ọke oru, itu i Farisi na ni nyarhẹn ya djiroro kugbe nẹ aye i sabu mẹrẹn ekete mọrọn i Jesu fọkiẹ ẹmro enẹyen. 16 Omarana, aye ni dje idibo aye ọrhẹ ẹko ra hobọtua i Hẹrọd bru i Jesu, aye na ta: “Oyono, ame i rheri taghene wẹwẹ ohworho urhomẹmro, oborẹ we yono ihworho kpahen Osolobrugwẹ jẹ urhomẹmro. Wu vwe ji ni ohworho ruẹ-ẹ, fọkime rhẹ oborẹ ihworho i havwọ otafe yu we nẹ-ẹ. 17 Omarana, gba ta rẹn ame oborẹ wu rorori. O fori* na kwosa urhomu rẹn i Siza, gbinẹ o fo-o?” 18 Ọrẹn, fọkime i Jesu o rhe iroro ọkon aye, nọ nọren aye: “Mesoriẹ are a dami mẹ nẹ, era gemai ruẹ na? 19 Are i dje usele ra ha kwosa urhomu na mẹ.” Aye ni yẹriẹ i dinariọs owu. 20 Nọ nọren aye: “Ughwaro ọrhẹ eyaya ọrọmo yọ ha uvuien?” 21 Aye ni tare: “Ọrẹ i Siza.” Nọ ta rẹn aye: “Omarana, are i kwa ekwakwa i Siza rẹn i Siza, ọrẹn are i kwa ekwakwa Osolobrugwẹ rẹn Osolobrugwẹ.” 22 Ọke aye e rhon ọnana, no gberẹ aye unu, aye ni nyajevwo nyarhẹn.
23 Uvuẹn ẹdẹ ọrana, itu i Sadusi ra ta taghene o vwo ẹrhọmọnuhwu-u, ni bru i Jesu rhe mọ nọ yen: 24 “Oyono, Mosis ọ tare taghene: ‘Ọhworhare orho hwu, ọrẹn o vwiẹ emọ-ọ, omizie ọnọ vi rọnmọ aniẹ neneyo o vwiẹ ọmọ rẹn omizie ro hwuru na.’ 25 Vwana, o vwo imizu irhiruẹ rẹ ame rhẹ aye i gba havwiẹ. Ọrukaro na nọ rọnmọren. Ọke oru no hwuru, ọrẹn o vwiẹ ọmọ owuorowu-u, omizie nọ rọnmọ aniẹ. 26 Emru owu ọvo na nọ ji phia rẹn omizie ọreva ye ọrhẹ omizie ọresa ye, omaran ye te ọrẹ irhiruẹ ye. 27 Obẹtaye, ọmase na no hwuru. 28 Omarana, uvuẹn ẹrhọmọnuhwu na, ọrọmo yo no rhiẹ esa ye usuẹn imizu awan irhiruẹ na? Fọkime aye ephian i rọnmọ ọmase na.”
29 Jesu nọ kpahenrhọ rẹn aye: “Iroro are ọ sọre, fọkime are e rhe Eyaya Efuanfon na yanghene omẹgbanhon Osolobrugwẹ-ẹ. 30 Fọkime uvuẹn ẹrhọmọnuhwu na, ehworhare i rọnmọ-ọ, emẹse i ji riẹ orọnmo-o. Ukpomaran, aye ina họhọ emakashe obẹ odjuwu. 31 Sekpahen ihworho ra na rhọmọ nuhwu na, are e se oborẹ Osolobrugwẹ ọ ta rẹn are? Nọ tare: 32 ‘Mẹmẹ yẹ Osolobrugwẹ Ebraham, Osolobrugwẹ Aizik ọrhẹ Osolobrugwẹ i Jekọb.’ Ọye rhẹ Osolobrugwẹ ihworho ri hwuru-u, ukpomaran ọye Osolobrugwẹ ihworho re nyerẹn.” 33 Ọke otu na e rhon ọnana, no gberẹ aye unu omamọ fọkiẹ uyono rọ haphia.
34 Ọke itu i Farisi na e rhon taghene itu i Sadusi na a sabu kpahenrhọ rẹn i Jesu-u, aye ni koko kugbe rhiẹ ẹko owu. 35 Owuọwan usuẹn aye rọ dabu rhẹ Urhi na, nọ damu i Jesu ni nyoma rọ nọ yen: 36 “Oyono, akama ọgo yọ maido uvuẹn Urhi na?” 37 Nọ ta riẹn: “ ‘Wu ne vi vwo ẹgwọlọ kpahen i Jehova Osolobrugwẹ ọnọ rhẹ ọsoso ọmuduo ọrhẹ ọsoso arhọ ọnọ, kugbe ọsoso iroro ọnọ.’ 38 Ọnana yẹ akama rọ maido, ro ji rhiẹ ọrukaro. 39 Ọreva ye rọ họheriẹ yẹ: ‘Wu ne vi vwo ẹgwọlọ kpahen ọreva jerẹ oma ọnọ.’ 40 Ekama eva enana ya bọn ọsoso Urhi na ọrhẹ eyaya Emẹraro na kpahen.”
41 Ọke itu i Farisi na e koko, Jesu nọ nọren aye: 42 “Me yẹ are i rorori kpahen i Kristi na? Ọye ọmọ ọrọmo?” Aye ni kpahenrhọ riẹn: “Ọmọ i Devid.” 43 Nọ nọren aye: “Ni mesoriẹ ẹhẹn ọfuanfon na o mwu i Devid se yi Ọrovwori, ji ta taghene, 44 ‘Jehova nọ ta rẹn Ọrovwori mẹ: “Siyẹ obọrhen mẹ bọmọke mi ne fiẹ evwreghrẹn enọ rhẹ obotọre aghwọ” ’? 45 Orhianẹ i Devid o serie Ọrovwori, ni marhẹ o ru rhiẹ ọmọyen?” 46 O vwo ohworho rọ sabu kpahẹnmro owuorowu riẹ-ẹn. Nẹ ẹdẹ ọrana nyarhẹn, o vwo ohworho ro hinmi nọ yen onọ ghwomara-an.