Iyẹnrẹn Ọrẹ i Matiu

23 Ọke oru, Jesu nọ tẹmro rẹn otu na ọrhẹ idibo yi taghene: 2 “Eyẹbe na ọrhẹ itu i Farisi na i ha oma aye siyẹ aga i Mosis ne. 3 Omarana, are i gbe ru ji nyalele kemru kemru aye i ta rẹn are, ọrẹn are i vwa hẹrokele irueruo aye-e. Fọkime aye a tẹmro, ọrẹn aye i vwe ruẹ lele oborẹ aye a ta-a. 4 Aye e hrun ohwan ọghwaghwa kpara rhẹ akoko ihworho, ọrẹn aye a tobọ mwuegbe aye ina ha urhianbọ aye te ohwan na-a. 5 Aye a wian ewian aye ephian neneyo ihworho i mẹrẹn aye, fọkime ekpeti aye e fiẹ eyaya ọfuanfon rhọ nọ sẹrorẹ aye, aye i rurie dorhọ ji ko ejẹnjẹn ewun aye no seri omamọ. 6 Aye i vwo ẹgwọlọ kpahen ekete ri mai titi uvuẹn akpẹriọ re ruẹ owuọwọn, ọrhẹ ega ri karo* uvuẹn i sinagọg na. 7 Aye i ji gwọlọ nẹ ihworho i rha mroma aye uvuẹn ekete eyi, ne ji rhe se aye i Rabbai.* 8 Ọrẹn, are i vwe jene se are i Rabba-ai, fọkime owuọwan ọvo yẹ Oyono are, habaye are ephian imizu. 9 Habaye, are i vwe se ohworho owuorowu ọsẹ uvuẹn otọrakpọ na-a, fọkime owuọwan ọvo yẹ Ọsẹ are, Ọrọ ha obẹ odjuwu na. 10 Are i vwe jene se are osu-un, fọkime owuọwan ọvo yẹ Osun are, nọyẹ i Kristi na. 11 Ọrẹn, ọrọ maido uvwre are, ono vi rhiẹ odibo are. 12 Kohworho kohworho rọ kparoma, ana phọphiẹ. Ọrẹn kohworho kohworho rọ homariotọre, ana kpariẹ rierun.

13 “Ukpokpogho o rhirhiẹ ye rẹn are, eyẹbe ọrhẹ itu i Farisi na, era gemai ruẹ na! fọkime are i kanren ighwe Uvie idjuwu na ze ituakpọ ne. Are i vwe kwe ruẹ uvuie-en, are i vwe ji kwe nẹ eri gwọlọ ruẹ uvuien i ruiẹ-ẹ. 14 ——

15 “Ukpokpogho o rhirhiẹ ye rẹn are, eyẹbe ọrhẹ itu i Farisi na, era gemai ruẹ na! fọkime are a dan urhie ọduado vrẹn, ji nya otọre ọkaka ya ghwẹriẹ ohworho owu rhiẹ ogame i Ju. Ọrẹn ọrhọ ghwẹriẹ hin, are ne ruie no fo ohworho ro no riẹ i Gẹhẹna ọgbeva, tobọ ghwẹ are dede.

16 “Ukpokpogho o rhirhiẹ ye rẹn are, ituẹro re suẹn awọrọ ji ta taghene, ‘Ohworho ọrhọ ha oghwa ẹga na dumirhonrin, o fiemru-u. Ọrẹn ohworho ọrhọ ha oro oghwa ẹga na dumirhonrin, ọnọ vi nyamwu irhonrin na.’ 17 Evwidjigbo orhẹ ituẹro na! Ọgo yọ ghini mai ghanren? Oro na gbinẹ oghwa ẹga na rọ lẹrhẹ oro na fon? 18 Habaye, are a ji ta, ‘Ohworho ọrhọ ha agbarha na dumirhonrin, o fiemru-u. Ọrẹn ohworho ọrhọ ha ẹghẹlẹ rọ ha oberuien dumirhonrin, ọnọ vi nyamwu irhonrin na.’ 19 Ituẹro na! Ọgo yọ ghini mai ghanren? Ẹghẹlẹ na gbinẹ agbarha na ro ruẹ ẹghẹlẹ na fuan? 20 Omarana, kohworho kohworho rọ ha agbarha na dumirhonrin, ọ hariẹ ọrhẹ kemru kemru rọ ha oberuien dumirhonrin. 21 Habaye, ohworho rọ ha oghwa ẹga na dumirhonrin, ọ hariẹ ọrhẹ Osolobrugwẹ ro rhirhiẹ uvuien dumirhonrin. 22 Kohworho kohworho rọ ha odjuwu dumirhonrin, ọ ha aga usun Osolobrugwẹ ọrhẹ Ohworho ro siyẹ ye dumirhonrin.

23 “Ukpokpogho o rhirhiẹ ye rẹn are, eyẹbe ọrhẹ itu i Farisi na, era gemai ruẹ na! fọkime are a kwa akwa ọrẹ ikpe i mint ọrhẹ dil kugbe kumin na.* Ọrẹn are i gbobọhiẹn ekwakwa eghoghanren uvuẹn Urhi na, nọyẹ orhienbro ọsoso, arodọmẹ kugbe evwẹnfuọn. O fori nẹ are i ruẹ ekwakwa enana, ọrẹn o fo nẹ are i gbobọhiẹn ekwakwa ri hẹrhẹre na-a. 24 Ituẹro re suẹn awọrọ, are a rhẹn unye nẹ oborẹ are a da, ọrẹn are ne simi ijaki rọ!

25 “Ukpokpogho o rhirhiẹ ye rẹn are, eyẹbe ọrhẹ itu i Farisi na, era gemai ruẹ na! fọkime are e ghwe otafe uko ọrhẹ ọmoze na, ọrẹn uvuẹn aye o gberi. Omaran ufiuvwele* ọrhẹ ojemẹ ra vwa sabu suẹn ọ ji vuọn ọmudu are. 26 Itu i Farisi ri tuẹro na, are i kiki ghwe uvuẹn uko ọrhẹ ọmoze na, neneyo otafe aye ọ ji fon.

27 “Ukpokpogho o rhirhiẹ ye rẹn are, eyẹbe ọrhẹ itu i Farisi na, era gemai ruẹ na! fọkime are i họhọ usin ra ha ọda ọfuanfon gbe. Itiọrurhomẹmro, otafiẹ o ghini vwo erhumu, ọrẹn uvuien ọ vuọnren rhẹ isuaso irinmi ọrhẹ aruẹ ijẹfuọn ephian. 28 Omaran ọ ji havwọ rẹn are, are i họhọ evwata uvuẹn obaro ihworho, ọrẹn ọmudu are ọ vuọnren rhẹ omeru ọrhẹ urhi egbeghwu.

29 “Ukpokpogho o rhirhiẹ ye rẹn are, eyẹbe ọrhẹ itu i Farisi na, era gemai ruẹ na! fọkime are a bọn isin emẹraro na jeghwai ruẹ isin* evwata na rhorhomu. 30 Are na ta, ‘Orhianẹ ame i nyerẹnren uvuẹn ọke esẹ ame ride, manẹ ame i vwe kwomakugbe aye kpe emẹraro na hwu-u.’ 31 Omarana, are ọvo ne se oseri kpe oma are taghene are emọ ihworho ri kpe emẹraro na hwu. 32 Omarana, are i gba wian ewian rẹ esẹ are ride i tonrhọ na hin.

33 “Ibodirin ọrhẹ emọ ibodirin, marhẹ are ine ru zẹ vabọ ẹzenguon i Gẹhẹna? 34 Fọkiẹ ọnana, mie dje emẹraro ọrhẹ evwẹghwanren kugbe iyono vwe are. Ọrẹn, are ine kpe ezẹko hwu, ji kanren aye mwu erhan nẹ aye i hwu, are ina ji fa ezẹko uvuẹn i sinagọg are, ji kparehaso aye uvuẹn amwa owu riẹ ọrọrọ. 35 Neneyo ọsoso ọbara evwata are i kperi uvuẹn otọrakpọ na o rhirhiẹ urhomu are, nẹ ọbara Ebẹl ro rhiẹ ọvwata ye te ọbara i Zẹkaraya ro rhiẹ ọmọ i Barakaya, rẹ are i kperi uvwre ekete ọfuanfon na ọrhẹ agbarha izobo na. 36 Itiọrurhomẹmro mia ta rẹn are, uvwiẹ ọnana yọ nọ rioja fọkiẹ ekwakwa enana ephian.

37 “Jerusalẹm, Jerusalẹm, ọro kpe emẹraro na hwuẹ jeghwai fiẹ ihworho re dje vwe yi. Ọgbọ buebun, mi gwọlọ koko emọ enọ kugbe jerẹ oborẹ izu ọrilele o koko emọyen rhẹ otọre ibekpe yi! Ọrẹn, are a gwọliẹ omara-an. 38 Nughe! A nyaji oghwa are vwo rẹn are ne.* 39 Mia ta rẹn are taghene are i rha mẹrẹn mẹ ghwomara-an, bọmọke are ina ki ta taghene, ‘Ebrurhọ o rhirhiẹ ye rẹn ohworho rọ rhere rhẹ odẹ i Jehova!’ ”