Iyẹnrẹn Ọrẹ i Matiu

24 Vwana, ọke i Jesu o nẹ oghwa ẹga na, idibo yi ni brurie rhe me dje ọsoso oghwa ẹga na riẹn. 2 Jesu nọ ta rẹn aye: “Are a mẹrẹn ekwakwa enana ephian? Itiọrurhomẹmro mia ta rẹn are, a vwa samọ nyaji atita owuorowu vwo rhẹ oberun atita ọrọrọ uvuẹn ekete aran, ra na ja ghwọghọ totọre-e.”

3 Ọke ro siyẹ oberun Ugbenu Oliv, idibo na ọvo ni brurie rhe, aye ni nọriẹn: “Ta rẹn ame, ọkiọgo yẹ ekwakwa enana ina phia? Me yẹ oka ro no djephia taghene wu rhe ne, ọrhẹ oka ehion enyerakpọ ọnana?”

4 Jesu nọ kpahenrhọ rẹn aye: “Are i ni oma so nẹ ohworho owuorowu o jo rho suẹn are vru. 5 Fọkime ihworho buebun ina rhiọ ji ha odẹ mẹ ruiruo, aye ina ta taghene ‘Mẹmẹ yi Kristi na,’ aye ni ne suẹn ihworho buebun vru. 6 Are ine rhon kpahen ipheri ọrhẹ iyẹnrẹn ipheri. Ọrẹn, are i vwa zofẹ-ẹn, fọkime ekwakwa enana ina vi phia, ọrẹn oba na o ji te-e.

7 “Fọkime agbamwa ọnọ kparehaso agbamwa, uvie ọnọ kparehaso uvie, emaren ina kanren, etọre ine ji kpogho nẹ ekete owu riẹ ọrọrọ. 8 Ekwakwa enana ephian yẹ ọtonrhọ ọke ukpokpogho.*

9 “Ọke ọrana, ihworho ina kparehaso are ji kpe are hwu, egbamwa na ephian ine vwo utuoma kpahen are fọkiẹ odẹ mẹ. 10 Habaye, ihworho buebun ni ne se nẹ esegburhomẹmro na,* aye ina rhẹ ereva aye, ji vwo utuoma kpahen owuowọnwan. 11 Emẹraro efian buebun ina homaphia ji suẹn ihworho buebun vru. 12 Fọkiẹ urhi egbeghwu ro no bunrhọ, ẹgwọlọ ihworho buebun no no seriotọre. 13 Ọrẹn, ohworho ro vwo edirin ye toba yo no simirhọ. 14 Ene ghwoghwo iyẹnrẹn esiri Uvie na lele ọsoso ekete re rhirhiẹ uvuẹn otọrakpọ na, no rhiẹ oseri rẹn egbamwa na ephian. Orho ru, oba na nọ nọ rhiọ.

15 “Omarana, are i rha mẹrẹn emru aghwa rọ suẹ oghwọghọ ro mevi ekete ọfuanfon na, jerẹ oborẹ ọmẹraro Daniẹl ọ tare, (jenẹ ọro seyi ọ ha ọmẹrẹnvwrurhe ruiruo), 16 e gbe jenẹ ihworho ri ha i Judia i rha zẹ riẹ igbenu na. 17 Ohworho rọ ha oberun oghwa ọ vwọ ruotọre mọ kpare ehwan ri ha oghwa ye-e. 18 Habaye, ohworho rọ ha ikebi ọ vwọ ghwẹrioma ya rhọrọ ewun otafiẹ-ẹ. 19 Ukpokpogho ono rhirhiẹ ye rẹn emẹse ri mẹrenvwan ọrhẹ emẹse ra yẹ emeboban enye uvuẹn ẹdẹ erana! 20 Are i rha nẹrhomo neneyo ẹdẹ are ina zẹ, o jo rho se rhẹ ọke erinrin yanghene Ẹdẹ Omeronmo. 21 Fọkime ọke ọrana, ono vwo ukpokpogho rode ra vwa ji mẹrẹn aruiẹ dẹ, nẹ ọtonrhọ akpọ na me te ọke ọnana, a ji mẹrẹn aruiẹ ghwomara-an. 22 Itiọrurhomẹmro, jokpanẹ e bru ẹdẹ erana kpẹtẹ, o vwo ohworho owuorowu ro no simirhọ-ọ. Ọrẹn fọkiẹ ihworho ra djẹha na, ene bru ẹdẹ erana kpẹtẹ.

23 “Ọke ọrana, ohworho ọrhọ ta rẹn are taghene, ‘Nughe! Kristi na ọ ha aran,’ yanghene ‘Ọ ha oboran!’ are i vwe kwerhọ ye-e. 24 Fọkime i Kristi efian ọrhẹ emẹraro efian ina homaphia ji ruẹ eka eduado ọrhẹ igbevwunu, neneyo aye i sabu phiẹ era djẹha na rhọ, aye i rha sabu ru te omaran. 25 Nughe! Mi ha orhetio rẹn are ne. 26 Omarana, ihworho i rha ta rẹn are taghene ‘Nughe! Ọ ha uvuẹn ato na,’ are i vwa nya-a. Yanghene ‘Nughe! Ọ ha uvuẹn ibuvun na,’ are i vwe kwerhọ ye-e. 27 Fọkime jerẹ oborẹ ukpẹ agbranran ọ homaphia uvuẹn obọrẹ ọren ọ va nẹ sa na, no ji lo te obọrẹ ọren na o se gbe, omaran ono ji rhirhiẹ ọke Ọmọ onyakpọ na ọ rhe ne. 28 Ekete ephian rẹ irinmi i havwọ, avwaye yẹ ugo buebun e ji koko rhọ.

29 “Ogege ukpokpogho ẹdẹ erana ọrhọ phia hin, ọren na no no mwuokuku, ubiamo na o ji lo-o, ikereti na ni ne se nẹ odjuwu rhe, omẹgbanhon idjuwu na ni ne kpogho. 30 Ọke ọrana, oka Ọmọ onyakpọ na nọ nọ homaphia obẹ odjuwu, ọsoso ivwiẹ ri ha otọrakpọ na ni ne vwerhoma gbangbanhon, aye ni na ji mẹrẹn Ọmọ onyakpọ na rọ sa uvuẹn avwre odjuwu na rhẹ omẹgbanhon kugbe odidi rode. 31 No no dje emakashe enẹyen phia rhẹ edon ukpori ọgbogbanhon, aye ni ne koko ihworho ra djẹha riẹn na nẹ igogo ẹne akpọ na ọrhẹ nẹ ẹta fiẹ ẹta idjuwu na.

32 “Vwana, are i yono nẹ udje ọnana ro sekpahen orhan ifigi na: Ogege eghọn yen eboban i rhe mwu phia ji kwrọ ẹbe rhọ ne, are ne rhe taghene ọke uvo o tiẹkẹrẹ ne. 33 Omaran ọ ji havwọ, are arha mẹrẹn ọsoso ekwakwa enana ne, are i gbe rhe taghene Ọmọ onyakpọ na o tikẹrẹ anurẹsẹ na ne. 34 Itiọrurhomẹmro mia ta rẹn are taghene, uvwiẹ ọnana ọ nyavrẹ-ẹn, jokpanẹ ọsoso ekwakwa enana i phiare vwẹre. 35 Odjuwu ọrhẹ otọrakpọ na ina nyavrẹn, ọrẹn ẹmro mẹ i sefughwẹ dẹ-ẹ.

36 “Sekpahen ẹdẹ ọrana ọrhẹ unọke na, o vwo ohworho owuorowu ro rherie-e, emakashe ri ha idjuwu na yanghene Ọmọ na e rheyi-i, jokpanẹ Ọsẹ na ọvo. 37 Fọkime jerẹ oborẹ ẹdẹ i Noa i havwọ, omaran ono ji rhirhiẹ ọke Ọmọ onyakpọ na ọ rhe ne. 38 Fọkime uvuẹn ẹdẹ erana bọmọke Ukude na ọ ki phia, ihworho a ria ji da, ehworhare a rọnmọ, a ji ha emẹse brọgọ, bọmọke i Noa ọ ki ruẹ owọ na. 39 Aye arha djokarhọ oborẹ ọ phia-a, Ukude na nọ rhere ji ghwọghọ aye ephian. Omaran ono ji rhirhiẹ ọke Ọmọ onyakpọ na ọ rhe ne. 40 Ọke ọrana, ehworhare awanva ina ha uvuẹn ikebi, na na ha owu nyaji ọreva ye vwo. 41 Emẹse awanva ina rha lọ emru uvuẹn ekete ra lọ ekwakwa, na na ha owu nyaji ọreva ye vwo. 42 Omarana, are i rha dẹrẹ fọkime are e rhe ẹdẹ Ọrovwori are ọnọ rhe-e.

43 “Ọrẹn, are i rhe ọnana taghene: Orhianẹ ọrovwoghwa o rhe ọke* ohi ọnọ rhe, manẹ ọ dẹrẹ, o vwo ji kwe ne me suhi uvuẹn oghwa ye-e. 44 Fọkiẹ ọnana, are i gbe ji mwuegbe oma are, fọkime Ọmọ onyakpọ na ọ sa uvuẹn unọke are i vwe roro rhọ.

45 “Ọrọmo yẹ ọvrẹn ra hẹrosua ro ji vwo ẹghwanren na, rẹ oninie ọ ha mwu nọ hẹrote idibo ri ha oghwa ye, nọ ji yẹ aye emaren aye uvuẹn ọke ro serhọ? 46 Omamerhomẹ ono rhirhiẹ ye rẹn ọvrẹn ọrana, orhianẹ oninie ọ vwariẹ ro ruẹ te omaran! 47 Itiọrurhomẹmro mia ta rẹn are, oninie ọnọ haye mwu nọ hẹrote ọsoso enyerẹn yen.

48 “Ọrẹn, ọvrẹn ọrana orho vwo ẹhẹn ọkon ji ta uvuẹn ọmuduie taghene, ‘Onini mẹ ọ kiki sa-a,’ 49 no kpe evrẹn ri hẹrhẹre na jeghwai lele egba enyo ẹda riẹ emaren ji da kugbe, 50 onini ọvrẹn ọrana ọnọ rhiọ uvuẹn ẹdẹ ro vwo fiẹrorhọ ọrhẹ unọke ro vwo rhe. 51 Oninie nọ nọ ha oja riẹ gbangbanhon ji donrien rhẹ ekete era gemai ruẹ na i havwọ. Avwaye yọ nọ viẹ ji riẹ ikanwuiẹn.