Iyẹnrẹn Ọrẹ i Matiu
10 Omarana Jesu no se idibo yi awan 12, nọ ji yẹ aye omẹgbanhon rẹ aye ine le ikpodje nẹ oma ihworho, ji simi aruẹ emiamo ọrhẹ emiamiamo ephian.
2 Edẹ inyikọ awan 12 na yẹ: Saimọn re se i Pita ọrhẹ Andru ro rhiẹ omizie, Jems ọmọ i Zẹbẹdi ọrhẹ i Jọn ro rhiẹ omizie. 3 Filip ọrhẹ Batolomio, Tọmọs ọrhẹ Matiu ro vwiosa urhomu na, Jems ọmọ Afiọs ọrhẹ i Tadiọs. 4 Saimọn ro vwo oruru na,* ọrhẹ i Judas Iskariọt rọ rhẹ i Jesu ọke oru.
5 Awan 12 enana yi Jesu o dje ye ghwoghwo, nọ ji yẹ aye ọkpọvi enana: “Are i vwa vwẹriẹ izede erẹ egbamwa na-a, are i vwa ji ruẹ amwa i Sameria owuorowu-u. 6 Ukpomaran, are i gba rha gwọlọ igegede oghwa Izrẹl ri vruru. 7 Rẹ are a nyarhẹn na, are i ghwoghwo taghene: ‘Uvie idjuwu na o tikẹrẹ ne.’ 8 Are i simi ere kpomẹ, rhọmọ eri hwuru, ruẹ ere kpomu emiamo oti fon, ji le ikpodje nẹ oma ihworho. E tiobọnu rẹn are ọphẹ, are i ji tiobọnu rẹn awọrọ ọphẹ. 9 Are i vwe fiẹ oro, idọlọ ọfuanfon yanghene erẹnmo rhẹ ẹkpa igho are-e. 10 Are i vwa ji kpare ẹkpa emaren ba-a, yanghene ha ewun eva, isabatu yanghene ukorọkpọ lele oma-a, fọkime o fori na yẹ ọrọ wian owian na emariẹn.
11 “Kamwa kamwa yanghene kọko kọko are i ruoro, are i gwọlọ ohworho ro no rhiabọ dede are, nẹ are i daji avwaye bọmọke are ine ki nẹ avwaye. 12 Koghwa koghwa are i ruoro, are i mroma eri ha oghwa na. 13 Eri ha oghwa na i rhe rhiabọ dede are, jenẹ ufuoma are i rhua rhe o lele aye rhirhiẹ ye. Ọrẹn aye erhe rhiabọ dede are-e, jenẹ ufuoma are ọ ghwẹrioma bru are. 14 Orhianẹ ohworho o kwe rhiabọ dede are yanghene kerhọ ẹmro are-e, are erhe nẹ oghwa ọrana yanghene amwa ọrana, are i gbe tue eyẹn nẹ aghwẹ are. 15 Itiọrurhomẹmro mia ta rẹn are, ojẹriọ ra na harẹn amwa ọrana uvuẹn Ẹdẹ Ẹzenguon na, ọnọ gbanhon ghwẹ ọrẹ otọre i Sodọm ọrhẹ Gomora.
16 “Nughe! Mie dje are nyarhẹn jerẹ igegede uvwre erimwamwa egbo. Omarana, are i dje ẹghwanren phia jerẹ ibodirin, ọrẹn are i ru dẹndẹn jerẹ erurẹ. 17 Are i dabu ni oma so, fọkime ihworho ina kpare are riẹ oghwa ẹghware ji fa are uvuẹn i sinagọg aye. 18 Ene ji mwu are riẹ obaro igọvunọ ọrhẹ irodje fọkiẹ omẹmẹ, no rhiẹ oseri rẹn aye ọrhẹ egbamwa na. 19 Ọrẹn erhe mwu are, are i vwe brudu kpahen oborẹ are ina ta yanghene oborẹ are ina tẹmro na lele-e, fọkime ana yẹ are oborẹ are ina ta uvuẹn unọke ọrana. 20 Fọkime rhẹ are ọvo yi na tẹmro na-a, ọrẹn ẹhẹn ọfuanfon Ọsẹ are yo no mwu are tẹmro. 21 Habaye, omizu ọnọ ha omizu kpahontọre ne kpe yi hwu, ọsẹ ọnọ ha ọmọyen kpahontọre, emọ ni na kparehaso eri vwiẹre aye, ji kpe aye hwu. 22 Ihworho ephian ine vwo utuoma kpahen are fọkiẹ odẹ mẹ, ọrẹn ohworho ro vwo edirin ye toba yo no simirhọ. 23 Arha kparehaso are uvuẹn amwa owu, are i zẹ riẹ amwa ọrọrọ. Itiọrurhomẹmro mia ta rẹn are, bọmọke are ine ki kiẹn ọsoso emwa Izrẹl hin, jẹ Ọmọ onyakpọ na ọ rhe ne.
24 “Ohworho re yono ọ vwọ dua ghwẹ ọro yonie-e, ọvrẹn ọ vwọ ji dua ghwẹ oninie-e. 25 Ọ sọ rẹ ohworho re yono ọnọ họhọ ọro yonie-e, yanghene rẹ ọvrẹn ọnọ ji họhọ oninie-e. Orhianẹ ihworho i se onini oghwa na i Biẹlzibọb,* nẹ ihworho ri ha uvwioghwa ye nọ ye ne je se omaran? 26 Omarana, are i vwa zofẹn aye-e, fọkime o vwo emru owuorowu re rhurhuru re ne je rhiefirhọ-ọ, o vwo emru odjahen owuorowu rẹ ihworho ine je rhe kpahe-en. 27 Oborẹ mi ta rẹn are uvuẹn okuku, are i ta ye phia uvuẹn ude. Ẹmro mi bẹbẹ ta rẹn are, are i ghwoghwie phia uvuẹn oberun oghwa. 28 Are i vwa zofẹn ihworho ra sabu kpe ugboma na, ọrẹn aye i sabu ghwọghọ arhọ na-a.* Ukpomaran, are i zofẹn ohworho rọ nọ sabu ghwọghọ arhọ ọrhẹ ugboma na uvuẹn i Gẹhẹna. 29 Ibiẹ usele owu* ya rhẹ efen ighwe eva, rhomaran? Ọrẹn o vwo owuorowu usuẹn aye ro no se totọre rẹ Ọsẹ are ono jo rhe kpahe-en. 30 Itiọrurhomẹmro, ọ tobọ rhe uchunu ẹton ri ha urhomu are. 31 Omarana, are i vwa zofẹ-ẹn, are i ghanren ghwẹ efen ighwe buebun.
32 “Kohworho kohworho ro kweri taghene o rheri mẹ obaro ituakpọ, mi ne ji kwe taghene mi rherie obaro Ọsẹ mẹ obẹ idjuwu na. 33 Ọrẹn kohworho kohworho rọ tenren mẹ obaro ituakpọ, mi na ji tiẹn obaro Ọsẹ mẹ obẹ idjuwu na. 34 Are i vwe roro taghene mi rhe me fiẹ ufuoma rhẹ otọrakpọ na-a. Mia rhua ufuoma rhe-e, ọrẹn odan ọlọkọ mi rhua rhe. 35 Fọkime mi rhe mọ suẹ oghalẹ uvwre ọhworhare ọrhẹ ọsẹ ye, uvwre ọgbọtọ ọrhẹ izie, uvwre ane ọrhẹ izu esa ye. 36 Itiọrurhomẹmro, evwreghrẹn ohworho ine rhiẹ eri ha uvuẹn ekruien. 37 Kohworho kohworho ro vwo ẹgwọlọ okokodo kpahen ọsẹ ye yanghene izie ghwẹ omẹmẹ, o mwuovwan ro no rhiẹ odibo mẹ-ẹ. Kohworho kohworho ro vwo ẹgwọlọ okokodo kpahen ọmọyen ọhworhare yanghene ọmọyen ọgbọtọ ghwẹ omẹmẹ, o mwuovwan ro no rhiẹ odibo mẹ-ẹ. 38 Kohworho kohworho ro vwo kwe kpare orhan oja ọnẹyen ji nyaleli mẹ, o mwuovwan ro no rhiẹ odibo mẹ-ẹ. 39 Kohworho kohworho rọ gwọlọ simi arhọ ye, ọnọ va ye obọ. Ọrẹn kohworho kohworho rẹ arhọ ye ọ variẹ obọ fọkiẹ omẹmẹ, ọnọ rharhumu vwo yi.
40 “Kohworho kohworho ro rhiabọ dede are, o ji rhiabọ dedi mẹ. Kohworho kohworho ro rhiabọ dedi mẹ, o ji rhiabọ dede Ohworho ro djeri mẹ rhe. 41 Kohworho kohworho ro rhiabọ dede ọmẹraro fọkime ọravwọ ọmẹraro, ọnọ mẹrẹn osẹkwa ọmẹraro. Kohworho kohworho ro rhiabọ dede ọvwata fọkime ọravwọ ọvwata, ọnọ mẹrẹn osẹkwa ọvwata. 42 Kohworho kohworho rọ yẹ owu usuẹn ihworho ekokamu enana uko ame ọfọfọ owu da fọkime ọravwọ odibo mẹ, itiọrurhomẹmro mia ta rẹn are, osẹkwa ye ọ va ye obọ dẹ-ẹ.”