Iyẹnrẹn Ọrẹ i Matiu
18 Uvuẹn unọke ọrana, idibo na ni bru i Jesu rhe ma nọ yen: “Ọrọmo yọ ghini maido uvuẹn Uvie idjuwu na?” 2 Omarana, Jesu no se ibiẹ ọmọvwerhe owu kẹroma, nọ hariẹ mevi erhẹrhẹ aye. 3 Nọ tare: “Itiọrurhomẹmro mia ta rẹn are, are i sabu ruẹ Uvie idjuwu na-a, jokpanẹ are i wenerin* ji họhọ ibiẹ emọvwerhe. 4 Omarana, kohworho kohworho rọ homariotọre jerẹ ibiẹ ọmọvwerhe ọnana, yọ maido uvuẹn Uvie idjuwu na. 5 Kohworho kohworho ro rhiabọ dede aruẹ ibiẹ ọmọvwerhe ọnana fọkiẹ odẹ mẹ, o ji rhiabọ dedi mẹ. 6 Ọrẹn, kohworho kohworho ro rhiẹ ọgbanrhọ rẹn ihworho ekokamu enana ri vwo esegburhomẹmro kpahen mẹ, ono rhomu riẹn arha gba ulọ rẹ ekẹrẹkẹtẹ ọ lọrọ mwu owọriẹ, ji donrien rhẹ urhie ọduado no dimi.
7 “Ukpokpogho o rhirhiẹ ye rẹn akpọ na fọkiẹ ekwakwa ra suẹ egbanrhọ! Itiọrurhomẹmro egbanrhọ ina vi rhe, ọrẹn ukpokpogho o rhirhiẹ ye rẹn ohworho rẹ ọgbanrhọ ọ nyoma yen rhe! 8 Omarana, orhianẹ obọ yanghene oghwọ o rhiẹ ọgbanrhọ ha wẹn, bruie nie ne wu donrien fughwẹ. Fọkime ono rhomu wu ne vwo arhọ ji krabọ kraghwẹ yanghene rhiẹ ukpolo, ghwẹ ọrẹ ene donruon rhẹ erhanren i bẹmẹdẹ rhẹ abọ eva yanghene aghwẹ eva. 9 Habaye, orhianẹ ukẹruọ o rhiẹ ọgbanrhọ ha wẹn, ghwolie nie ne wu donrien fughwẹ. Fọkime ono rhomu wu ne vwo arhọ rhẹ ukẹro owu, ghwẹ ọrẹ ene donruon rhẹ erhanren i Gẹhẹna rhẹ ikẹro eva. 10 Are i ni oma so, nẹ are i ja rha ha ukẹro sakamu ni owu usuẹn ihworho ekokamu enana, fọkime mia ta rẹn are taghene kọke kọke yẹ emakashe aye obẹ odjuwu e ni ughwaro Ọsẹ mẹ rọ ha obẹ odjuwu. 11 ——
12 “Me yẹ are i rorori? Orhianẹ ọhworhare owu o vwo igegede 100, ọrẹn owu no beghe vru, ọ nyaji 99 ri hẹrhẹre na vwo rhẹ oberun ugbenu na ji ya gwọlọ ọro beghe vru na? 13 Itiọrurhomẹmro mia ta rẹn are taghene ọrhọ mẹriẹn, ọnọ ghọghọ omamọ fọkiẹ ogegede ọrana, ghwẹ 99 ri vwe beghe vru na. 14 Omaran ọ ji havwọ, Ọsẹ mẹ* obẹ odjuwu ọ gwọlọ nẹ owuọwan usuẹn ihworho ekokamu enana dede, ọ ghwọghọ-ọ.
15 “Riobarorhọ, omizuo orho ruẹ ọdandan, nyarhẹn ya ta riẹn kpahen orusọ* ye uvwre are awanva ọvo. Ọrhọ kerhọ, nọyẹ wu lẹrhẹ omizuo ruẹ oborẹ ọgbare ne. 16 Ọrẹn, orho kwe kerhọ-ọ, gba ha owuọwan yanghene awanva lele oma, neneyo nyoma ẹmro* iseri awanva yanghene awansa, kẹmro kẹmro ọnọ sabu fiotọre. 17 Orho kwe kerhọ aye-e, gba ta rẹn ukoko na kpahiẹn. Orho kwe kerhọ ukoko na-a, gbe nie jerẹ ohworho egbamwa na ọrhẹ ọro vwiosa urhomu.
18 “Itiọrurhomẹmro mia ta rẹn are, kemru kemru are i gbare uvuẹn otọrakpọ na, a ghwanreriẹn gba aye obẹ odjuwu ne. Kemru kemru are i rhanren uvuẹn otọrakpọ na, a ghwanreriẹn rhan aye obẹ odjuwu ne. 19 Itiọrurhomẹmro mia ji ta rẹn are, orhianẹ ihworho awanva usuẹn are uvuẹn otọrakpọ na i kweri rẹ aye ina nẹrhomo kpahen emru ọghoghanren, Ọsẹ mẹ obẹ odjuwu ono ruie rẹn aye. 20 Fọkime ekete ihworho awanva yanghene awansa a vwoma kugbe fọkiẹ odẹ mẹ, mi ha erhẹrhẹ aye.”
21 Ọke oru, Pita no bru i Jesu rhe mọ nọ yen: “Ọrovwori, ọgbọ emwa mi na harhomu omizu mẹ orho ru ọdandan haso mẹ? Ono te ọgbọ irhiruẹ?” 22 Jesu nọ ta riẹn: “Mia ta wẹn, rhẹ ọgbọ irhiruẹ ọvo-o, ọrẹn ono te ọgbọ 77.
23 “Ọrana yọ soriẹ ana sabu ha Uvie idjuwu na dje orodje rọ gwọlọre nẹ evrẹn yen i kwosa aye i rere. 24 Ọke ro vwiosa na, na ha ọhworhare owu rhe rọ riosa ye italẹnti* 10,000. 25 Ọrẹn, fọkime ọvrẹn na o vwo oborẹ ọnọ ha kwosa na-a, orodje na nọ tare taghene a rhẹ ọvrẹn na, aniẹ, emọyen ọrhẹ ọsoso oborẹ o vwori, na haye kwosa na. 26 Omarana, ọvrẹn na no se gburhomu rhotọre, nọ tare, ‘Vwo erhionrin kpahen mẹ, mi na kwa ọsoso oborẹ mi riosa ye wẹn.’ 27 Fọkiẹ aruẹdọn, orodje na nọ nyaji ọvrẹn na vwo, ji kpariroro vrẹn osa rọ rere na. 28 Ọrẹn, ọke ọvrẹn ọrana o nẹ avwaye, nọ mẹrẹn ọvrẹn ọrọrọ rọ riosa ye i dinariọs 100, nọ sanbọ mwuien ji mọriẹn owọre, nọ tare, ‘Kwosa i kemru kemru wu riosa mẹ.’ 29 Omarana, ọvrẹn na no sighwẹ totọre ji rẹ ye taghene, ‘Vwo erhionrin kpahen mẹ, mi na kwosa na wẹn.’ 30 Ọrẹn, o kwe kakaka-a, ukpomaran no yo fiẹ ọvrẹn na rhẹ ekanron bọmọke ọnọ ki kwa oborẹ ọ riosa ye na. 31 Ọke evrẹn ri hẹrhẹre a mẹrẹn oborẹ ọ phiare, nọ darẹ aye omamọ. Aye ni nyarhẹn ya nẹ iyẹnrẹn rẹn orodje na kpahen ọsoso oborẹ ọ phiare na. 32 Omarana, orodje na no se ọvrẹn na ji ta riẹn: ‘Ọvwọkon na, mi kpariroro vrẹn ọsoso osa wu rere ọke wa rẹ mẹ. 33 Orho fo ne wu ji gbe arodọmẹ rẹn ọvrẹn ọrọrọ jerẹ oborẹ mi gbe arodọmẹ wẹn na?’ 34 Ọnana nọ lẹrhẹ ephan biomu orodje na omamọ, no tiobọnie rẹn era dẹrẹ ekanron na ne fie rhẹ ekanron, bọmọke ọnọ ki kwa ọsoso oborẹ ọ riosa ye na. 35 Omaran Ọsẹ mẹ obẹ odjuwu ono ji ruẹ are, orhianẹ are owuowọnwan a harhomu omizie nẹ ọmudu rhe-e.”