Iyẹnrẹn Ọrẹ i Matiu
4 Ọke oru, ẹhẹn ọfuanfon na no suẹn i Jesu ruẹ uvuẹn ato na, Dẹbolo nọ dameriẹn ni. 2 Ọke ro zinrin orhọmo te ẹdọke 40 ọrhẹ ason 40 ne, orhọmo no kpe yi. 3 Dẹbolo no bru i Jesu rhe mọ damiẹ ni, nọ ta riẹn: “Wu rhe ghini rhiẹ ọmọ Osolobrugwẹ, gba ta rẹn itita enana nẹ aye i ghwẹriẹ rhiẹ ibrẹdi.” 4 Ọrẹn Jesu nọ kpahenrhọ riẹn: “A yariẹ rhotọre: ‘Onyakpọ ono vi nyerẹn nyoma kẹmro kẹmro ro nẹ unu i Jehova rhe, ukperẹ ono rhiẹ ibrẹdi ọvo.’ ”
5 Ọke oru, Dẹbolo nọ hariẹ riẹ amwa ọfuanfon na ji haye mevi ekete rọ mai rierun uvuẹn oghwa ẹga na. 6 Nọ ta riẹn: “Wu rhe ghini rhiẹ ọmọ Osolobrugwẹ, gbe pho rhotọre. Fọkime a yariẹ rhotọre taghene: ‘Ono dje emakashe enẹyen bruo rhe, aye ni na ha abọ aye kparuọ, neneyo wu ja rha ha oghwọ ze atita.’ ” 7 Jesu nọ ta riẹn: “A ji ya ye rhotọre: ‘Wu vwa vi dami Jehova Osolobrugwẹ ọnọ ni-i.’ ”
8 Dẹbolo nọ rharhumu haye riẹ ugbenu ro rierun omamọ, ji dje ọsoso ivie era akpọ na ọrhẹ erhumu aye rẹn i Jesu. 9 Nọ ta riẹn: “Mi na ha ọsoso ekwakwa enana wẹn, wu rhe sighwẹ ji ha ẹga mẹ ukwọgbọ ọvo.” 10 Omarana, Jesu nọ ta riẹn: “Nya nẹ aran, Echu! Fọkime a yariẹ rhotọre: ‘Jehova Osolobrugwẹ ọnọ ọvo ye wu na vi ha ẹga riẹn, ọye ọvo ye wu na vi ha ogame rọ fonron riẹn.’ ” 11 Omarana, Dẹbolo nọ nyajevwo. Ogege, emakashe ni bru i Jesu rhe mọ ha userhumu riẹn.
12 Ọke i Jesu o rhon taghene e mwu i Jọn ne, no tiomaha riẹ i Galili. 13 Habaye, ọke ro nẹ i Nazarẹt, no yo rhirhiẹ amwa i Kapaniọm, rọ kẹrẹ urhie ọduado rọ ha otọre i Zẹbiulọn ọrhẹ Naftalai. 14 Ọnana nọ ha oborẹ ọmẹraro Aizaya ọ tare te orugba taghene: 15 “O, otọre i Zẹbiulọn ọrhẹ otọre i Naftalai ri ha okokọ izede urhie ọduado na, ọrhẹ obọreva Urhie i Jọdan rọ ha uvuẹn i Galili ọrẹ egbamwa na! 16 Ihworho ri siyẹ uvuẹn okuku ni mẹrẹn ukpẹ ro lo omamọ. Ukpẹ no lo mwu ihworho ri siyẹ uvwrotọre rẹ uhwu ọ họhọ okuku rode.” 17 Nẹ ọke ọrana nyarhẹn, Jesu no ghwoghwo taghene: “Are i ghwẹriẹ, fọkime Uvie idjuwu na o tikẹrẹ ne.”
18 Ọke i Jesu ọ nya okokọ Urhie ọduado ọrẹ i Galili, nọ mẹrẹn imizu awanva. Edẹ aye yẹ Saimọn re se i Pita ọrhẹ omizie re se Andru, aye a ha iriri tan urhie ọduado na fọkime aye ikpirhenrin. 19 Nọ ta rẹn aye: “Are i leli mẹ, ni mi ne ruẹ are rhiẹ ikpirhenrin ituakpọ.” 20 Ogege, aye ni nyajẹ iriri aye vwo ji leli Jesu. 21 Ọke ro nẹ avwaye, nọ mẹrẹn imizu awanva erọrọ, Jems ọrhẹ omizie re se i Jọn ri rhiẹ emọ i Zẹbẹdi. Jesu no seri aye ọke aye ọrhẹ ọsẹ aye Zẹbẹdi a kwaphiẹ iriri aye uvuẹn owọ. 22 Ogege, aye ni nyaji owọ na ọrhẹ ọsẹ aye vwo ji leli Jesu.
23 Omarana, Jesu no kiẹn ọsoso i Galili ji yono ihworho uvuẹn sinagọg aye. No ghwoghwo iyẹnrẹn esiri Uvie na ji simi aruẹ emiamo ephian uvwre ihworho na. 24 Iyẹnrẹn i Jesu no kperusi lele ọsoso i Siria, aye ni kpare ọsoso ihworho ri vwo aruẹ emiamo sansan ọrhẹ era rioja omiamiamo vwe yi. Omaran ji te ihworho ikpodje e kpokpo, ere hwuẹ surhe amwa ọrhẹ erẹ ugboma aye i hwuru, Jesu no simirin aye ephian. 25 Omarana, otu buebun ri nẹ i Galili, Dikapolis,* Jerusalẹm ọrhẹ i Judia rhe, kugbe obọreva Urhie i Jọdan na ni lelirie.