Iyẹnrẹn Ọrẹ i Matiu

13 Uvuẹn ẹdẹ ọrana, Jesu no vẹnrẹn nẹ oghwa na ye siyẹ okokọ urhie. 2 Ihworho buebun ni ghwiẹ bruie rhe, omarana no yo siyẹ owọ owu, ọrẹn ọsoso otu na ni mevi okokọ urhie na. 3 Jesu nọ ha idje yono aye ekwakwa buebun, nọ tare: “Ọghwẹrẹ owu nọ yọ wọ ikeri ewawọ. 4 Ọke rọ wọ ikeri na, ezẹko ni se rhẹ okokọ izede, efen ni dan rhe mọ riẹ aye. 5 Ikeri erọrọ ni se rhẹ otọre ro vwo itita, ọrẹn o vwo eyẹn bu-un. Aye ni mwurun ogege fọkime otọre na o kodo-o. 6 Ọke uvo ọ varhe ji lo mwu aye, aye ni hwuru fọkime aye e vwo esiri-i. 7 Ikeri erọrọ ni se rhẹ uvwre idjigbẹn, idjigbẹn na ni mwurun ji dumu aye kpe. 8 Ọrẹn, ikeri erọrọ i se rhẹ otọre orhorhomu. Aye ni mọ emamọ, owu ọ mọ 100 bun ghwẹ oborẹ a wọre, ọreva 60, ọrọrọ 30. 9 Jenẹ ọro vwo erhọ, ọ kerhọ.”

10 Omarana, idibo yi ni brurie rhe ma nọ yen: “Mesoriẹ wa ha idje yono aye?” 11 Jesu nọ kpahenrhọ rẹn aye: “E kwenu rẹn are nẹ are i vwẹruọ odjahen ọfuanfon ọrẹ Uvie idjuwu na, ọrẹn e kwenu rẹn aye-e. 12 Fọkime kohworho kohworho ro vwo emru, ana haba oborẹ o vwori na, no no vwo bunrhọ. Ọrẹn ohworho ro vwo vwo, oborẹ ọ tobọ vwo dede ana haye mie yi. 13 Ọnana yọ soriẹ mie yono aye nyoma idje. Aye e nughe, ọrẹn aye i vwa mẹrẹn emru owuorowu-u. Aye a kerhọ, ọrẹn aye i vwe rhon ẹmro owuorowu-u, aye i vwa ji tobọ vwẹruọ ye-e. 14 Aruẹmẹrẹn Aizaya o ruẹgba uvuẹn oma aye. Nọ tare: ‘Are ine rhon, ọrẹn are i vwẹruọ oborẹ are e rhon na-a. Are ine nughe, ọrẹn are i mẹrẹn emru owuorowu-u. 15 Ihworho enana i me rhiẹ iludu ne, aye e rhon ọrẹn aye i vwe ruẹ lelie-e. Aye i rhurhu ikẹro aye ji dienrhọ aye, nẹ aye i ja rha mẹrẹn emru owuorowu ji rhon emru owuorowu. Aye i gbanhon udu te erhirhiẹ aye i vwe vwẹruọ oborẹ a gwọlọ mie aye. Omarana, aye i vwa rha ghwẹriẹ bru mẹ sa, ni mi simi aye-e.’

16 “Ọrẹn, omamerhomẹ ọ havwiẹ rẹn are fọkime are a ha ukẹro are mẹrude, ji ha erhọ are rhon ẹmro. 17 Itiọrurhomẹmro mia ta rẹn are, emẹraro buebun ọrhẹ evwata i vwo oruru aye ina mẹrẹn ekwakwa are a mẹrẹn na, ọrẹn aye a mẹrẹn aye-e. Aye i ji gwọlọ rhon ẹmro are e rhon na, ọrẹn aye e rhon aye-e.

18 “Vwana, are i gba kerhọ oborẹ udje ọghwẹrẹ rọ wọ ikeri na o mevirhọ. 19 Ohworho orho rhon ẹmro Uvie na ọrẹn o vwẹruọ ye-e, ọvwọkon na nọ sa me so oborẹ a wọ rhẹ uvuẹn ọmuduie. Ọnana yẹ ukeri ro se rhẹ okokọ izede na. 20 Harẹn ukeri ro mwu rhẹ otọre itita i havwọ na, ọnana yẹ ohworho ro rhon ẹmro na, ogege no rhiabọ dedie rhẹ aghọghọ. 21 Dedevwo ọ havwiẹ ibiọke, ọrẹn ẹmro na o vwo esiri uvuẹn omaye-en, ọke ukpokpogho yanghene ẹkparehaso ọ homaphia fọkiẹ ẹmro na, no seri ogege. 22 Harẹn ukeri ro mwu rhẹ uvwre idjigbẹn, ọnana yẹ ohworho ro rhon ẹmro na, ọrẹn ọfiamu enyerakpọ ọnana ọrhẹ omẹgbanhon ọphiẹrhọ efe, ni kenken ẹmro na. Omarana, ọrhọ sabu mọ emamọ-ọ. 23 Harẹn ọrọ mwu rhẹ otọre orhorhomu na, ọnana yẹ ohworho ro rhon ẹmro na ji vwẹruọ ye, nọ ghini mọ emamọ, owu ọ mọ 100 bun ghwẹ oborẹ a wọre, ọreva 60, ọrọrọ 30.”

24 Jesu nọ ha udje ọrọrọ phia rẹn aye, nọ tare: “Ana sabu ha Uvie idjuwu na dje ọhworhare rọ wọ ukeri orhorhomu rhẹ ikebi ọnẹyen. 25 Ọke ihworho a merhẹn, ọvwreghrẹn yen nọ mọ wọ odin rhẹ uvwre iwiti na, nọ nyarhẹn. 26 Ọke ukeri iwiti na o mwu ji mọ emamọ, odin na ni ji mwu. 27 Omarana, evrẹn na ni bru onini ro vwo oghwa na ji ta riẹn, ‘Onini, rhẹ ukeri orhorhomu ye wu wọ rhẹ ikebi ọnọ? Ni marhẹ o ru vwo odin buebun?’ 28 Nọ ta rẹn aye, ‘Ohworho ro rhiẹ ọvwreghrẹn mẹ yo ruẹ emru ọnana.’ Evrẹn na ni nọriẹn, ‘Wu gwọlọre nẹ ame i nyarhẹn ye ghwie aye?’ 29 Nọ ta rẹn aye, ‘Ẹjo, fọkime ọnọ sabu sọ are obọ ghwie iwiti na ọke are e ghwie odin na. 30 Jenẹ aye i do kugbe bọmọke ọke orhọ na ono ki te. Uvuẹn ọke orhọ na, ni mi na ta rẹn era kọrọ ewawọ na: Are i kiki ghwie odin na ji gba aye kugbe, na torhẹ aye. Orho ru, are i gbe koko iwiti na rhẹ oghwa mia sẹrorẹ ekwakwa rhọ.’ ”

31 Jesu nọ ha udje ọrọrọ phia rẹn aye, nọ tare: “Uvie idjuwu na ọ họhọ ukeri mọstad rẹ ọhworhare owu ọ wọ rhẹ ikebi ọnẹyen. 32 Itiọrurhomẹmro, ukeri na yọ mai kamu usuẹn ikeri ephian. Ọrẹn ọrhọ do ne, nọ dẹrẹrhiẹ orhan ọduado ọrhẹ owawọ rọ ji maido, te erhirhiẹ efen ri ha ivwrevwrede na, a dan mwu eghọn yen ji rhirhiẹ avwaye.”

33 Jesu nọ ha udje ọrọrọ phia rẹn aye taghene: “Uvie idjuwu na ọ họhọ iyisti* rẹ ọmase owu o gbe kugbe rhẹ ovwanvwọn iflawa eduado esa bọmọke ọsoso iflawa na o ki phie.”

34 Ọsoso ekwakwa enana yi Jesu ọ ta rẹn otu na nyoma idje. Itiọrurhomẹmro ọ vwọ tẹmro rẹn aye-e, jokpanẹ ọ ha udje ruiruo. 35 Ọnana nọ ha oborẹ ọmẹraro na ọ tare te orugba taghene: “Mi na ha idje yono ihworho, mi ne ghwoghwo kpahen ekwakwa re tinu nẹ ọtonrhọ rhe.”*

36 Ọke i Jesu o tiobọnu otu na hin, nọ ruẹ uvuẹn oghwa na. Idibo yi ni brurie rhe, aye ni tare: “Ta rẹn ame oborẹ udje odin ra wọ rhẹ ikebi na o mevirhọ.” 37 Nọ ta rẹn aye taghene: “Ọghwẹrẹ rọ wọ ukeri orhorhomu na yẹ Ọmọ onyakpọ na. 38 Ikebi na yẹ akpọ na. Ukeri orhorhomu na yẹ emọ Uvie na, ọrẹn odin na yẹ emọ ọvwọkon na. 39 Ọvwreghrẹn rọ wọ odin na yi Dẹbolo. Orhọ na yẹ ehion enyerakpọ ọnana,* era kọrọ ewawọ na yẹ emakashe. 40 Omarana, jerẹ oborẹ e koko odin na kugbe ji torhẹ aye na, omaran ono ji rhirhiẹ uvuẹn ehion enyerakpọ na.* 41 Ọmọ onyakpọ na ono dje emakashe enẹyen ye tiẹ ọsoso ekwakwa ra suẹ egbanrhọ ọrhẹ ihworho re gbe urhi ghwẹ nẹ Uvie ọnẹyen. 42 Emakashe na ni ne donron aye rhẹ erhanren rọ bara gidigidi na. Avwaye yẹ aye ina viẹ ji riẹ ikanwun aye. 43 Uvuẹn ọke ọrana, evwata na ni ne lo omamọ jerẹ ọren na uvuẹn Uvie Ọsẹ aye. Jenẹ ọro vwo erhọ, ọ kerhọ.

44 “Uvie idjuwu na ọ họhọ efe re tinu uvuẹn otọre. Ọke ọhworhare owu ọ mẹriẹn, nọ rharhumu tienu. Ọrẹn, fọkiẹ aghọghọ ro vwori, nọ nyarhẹn ya rhẹ ọsoso ekwakwa ro vwori ji dẹ otọre na.

45 “Uvie idjuwu na ọ ji họhọ ọleyi ro nẹ ekete owu riẹ ọrọrọ, rọ gwọlọ obọdẹn itama. 46 Ọke rọ mẹrẹn otama ọghoghanren owu, ogege nọ nyarhẹn ya rhẹ ọsoso ekwakwa ro vwori, ji dẹ ye.

47 “Uvie idjuwu na ọ ji họhọ obriki re donron rhẹ uvuẹn urhie ọduado, no mwu aruẹ irhenrin sansan. 48 Ọke rọ vuọn ne, ikpirhenrin na ni lọrọ obriki na riẹ okokọ urhie na ji siyẹ, aye ni rhọrọ omamọ irhenrin na rhẹ uvuẹn ikoroba, ọrẹn aye ni donron erharhere irhenrin na fughwẹ. 49 Omaran ono ji rhirhiẹ uvuẹn ehion enyerakpọ na.* Emakashe na ina nyarhẹn ya hẹriẹ evwọkon na nẹ uvwre evwata na. 50 Aye ni ne donron evwọkon na rhẹ erhanren rọ bara gidigidi na. Avwaye yẹ aye ina viẹ ji riẹ ikanwun aye.

51 “Are i vwẹruọ ọsoso oborẹ ekwakwa enana i mevirhọ ne?” Aye ni kpahenrhọ riẹn: “Ee.” 52 Jesu nọ ta rẹn aye: “Orhiomarana, koyono koyono re yonorin kpahen Uvie idjuwu na, ọ họhọ ọhworhare ro vwo oghwa, rọ ha ekwakwa ekpokpọ ọrhẹ erẹ ahwanren nẹ uvuẹn ekete rọ sẹrorẹ efe yi rhọ.”

53 Ọke i Jesu ọ ha idje enana phia hin, no nẹ avwaye. 54 Ọke ro te amwa ọnẹyen, no yono ihworho uvuẹn i sinagọg aye te erhirhiẹ ro gbe aye unu, aye na ta: “Bọgo yẹ ọhworhare ọnana o vwo ẹghwanren ọrhẹ omẹgbanhon rọ wian ewian igbevwunu enana? 55 Ọnana rhẹ ọmọ ikapita na? Rhẹ izie ye se i Meri? Rhẹ i Jems, Josẹf, Saimọn ọrhẹ i Judas yẹ imizie ehworhare? 56 Rhẹ ọwan ọrhẹ imizie emẹse yi gba havwiẹ? Ni marhẹ o ru sabu ruẹ ekwakwa enana ephian?” 57 Omarana, aye erhe vwo esegburhomẹmro kpahiẹ-ẹn. Ọrẹn, Jesu nọ ta rẹn aye: “A họghọ rẹn ọmẹraro uvuẹn ekete ephian, jokpanẹ uvuẹn amwa yen ọrhẹ uvuẹn oghwa ye ọvo.” 58 Omarana, orho ruẹ irueruo igbevwunu buebun uvuẹn avwaye-e, fọkime aye e vwo esegburhomẹmro-o.