Iyẹnrẹn Ọrẹ i Matiu
6 “Are i ni oma so nẹ are i je rhe ruẹ irueruo irhorhomu obaro ituakpọ, nẹ aye i djokarhọ are. Are i rhe ruẹ omaran, are i mẹrẹn osẹkwa owuorowu mie Ọsẹ are obẹ idjuwu-u. 2 Omarana, we rhe tiobọnẹ ẹghẹlẹ,* wu vwe kporo ukpori lele oma-a, jerẹ oborẹ era gemai ruẹ na e ruẹ uvuẹn i sinagọg ọrhẹ uvuẹn idumu na neneyo ihworho i jiri aye. Itiọrurhomẹmro mia ta rẹn are, aye i mẹrẹn osẹkwa aye vuọnvuọn ne. 3 Ọrẹn harẹn owẹwẹ, we rhe ruẹ ẹghẹlẹ, wu vwe je nẹ obohwẹre ọnọ o rhe oborẹ obọrhen ọnọ o ruẹ-ẹ. 4 Neneyo ẹghẹlẹ ọnọ ọ sabu rhiẹ ọrẹ odjahen. Ọke ọrana, Ọsọ rọ ha ekete odjahen na nọ nọ kwosa wẹn.
5 “Habaye are arha nẹrhomo, are i vwe ru jerẹ era gemai ruẹ na-a, fọkime aye i vwo uruemru aye e meviẹ nẹrhomo uvuẹn i sinagọg sansan ọrhẹ okokọ idumu eduado na, neneyo ihworho i mẹrẹn aye. Itiọrurhomẹmro mia ta rẹn are, aye i mẹrẹn osẹkwa aye vuọnvuọn ne. 6 Ọrẹn wa rha nẹrhomo, gba ruẹ uvuẹn obuvuon. Wu rhe biẹ ighwe ọnọ gbe hin, gba nẹrhomo vwe Ọsọ rọ ha ekete odjahen na. Ọke ọrana, Ọsọ rọ ha ekete odjahen na nọ nọ kwosa wẹn. 7 Wa rha nẹrhomo, wu vwa vwanriẹn emru owu ọgbọ buebun jerẹ oborẹ ihworho egbamwa na e ruẹ-ẹ, fọkime aye e roro taghene ana kpahenrhọ rẹn aye fọkiẹ ẹmro ibuebun aye i ha ruiruo. 8 Omarana, are i vwa họhọ aye-e, fọkime Ọsẹ are o rhe oborẹ are i gwọlọre bọmọke are i ki tobọ nọ yen.
9 “Omarana, are i vi nẹrhomo omana:
“ ‘Ọsẹ ame obẹ idjuwu, jene ruẹ odọ fon.* 10 Jenẹ Uvie ọnọ rhe. Jenẹ ọhọre ọnọ rugba uvuẹn otọrakpọ na jerẹ oborẹ ọ havwọ obẹ odjuwu. 11 Yẹ ame emaren* ẹdẹ ọrẹ inyenana. 12 Ne wu ji ha edandan* ame harhomu ame, jerẹ oborẹ ame i ji harhomu eri ruẹ edandan* haso ame ne. 13 Wu vwe jẹ ame se rhẹ ọdamuni-i,* ọrẹn simi ame nẹ abọ ọvwọkon na.’
14 “Are i rha ha orusọ awọrọ harhomu aye, Ọsẹ are obẹ odjuwu ọnọ ji harhomu are. 15 Ọrẹn, are arha ha orusọ awọrọ harhomu aye-e, Ọsẹ are ọ ji ha orusọ are harhomu are-e.
16 “Are erhe zinrin orhọmo, are i vwe mwughwarorhọ jerẹ era gemai ruẹ na-a, fọkime aye i vwa hẹrote oma aye-e,* neneyo ihworho i rhe taghene aye e zinrin orhọmo. Itiọrurhomẹmro mia ta rẹn are, aye i mẹrẹn osẹkwa aye vuọnvuọn ne. 17 Ọrẹn, we rhe zinrin orhọmo, gba ha amivi lerhe urhomuo, ne wu ji ghwe ughwaruọ. 18 Neneyo ihworho i je rhe taghene we zinrin orhọmo, jokpanẹ Ọsọ ọvo rọ ha ekete odjahen na. Ọke ọrana, Ọsọ rọ ha ekete odjahen na nọ nọ kwosa wẹn.
19 “Are i vwe koko efe are rhẹ uvuẹn otọrakpọ na-a, ro rhiẹ ekete egẹngẹn ọrhẹ akogba a ghwọghọ, kugbe ekete ihi a kpanran rua ye suhi. 20 Ukpomaran, are i koko efe are rhẹ obẹ odjuwu, ro rhiẹ ekete egẹngẹn ọrhẹ akogba ina ja sabu ghwọghọ, kugbe ekete ihi ina ja sabu kpanren ro ye suhi. 21 Fọkime ekete efe ọnọ ọ havwọ, avwaye yẹ ọmuduo ono ji rhirhiẹ.
22 “Ukpẹ ugboma na yẹ ukẹro na. Omarana, wu rha tẹnrovi emru owu,* ọsoso ugboma ọnọ no no lo. 23 Ọrẹn, wu rhe vwo ukẹro omẹriọ,* ọsoso ugboma ọnọ no no mwuokuku. Orhianẹ ukpẹ rọ ha uvuẹn oma ọnọ ghini okuku, nọyẹ okuku na ọ gbanhonron omamọ!
24 “O vwo ohworho rọ nọ sabu rhiẹ ọvrẹn rẹn inini eva-a; fọkime ono vwo utuoma kpahen owu, o vwo rho vwo ẹgwọlọ kpahen ọreva ye, yanghene ono tigban owu ji ni ọreva ye sakamu. Are i sabu rhiẹ ọvrẹn rẹn Osolobrugwẹ ọrhẹ Efe-e.
25 “Fọkiẹ ọnana mia ta rẹn are: Are i dobọ ọfiamu ji kpahen arhọ are, fọkiẹ oborẹ are ina riọ yanghene oborẹ are ina da, yanghene oborẹ are ine kurhọ ugboma are. Gbinẹ arhọ ọ ghanren ghwẹ emaren? Ugboma na ọ ji ghanren ghwẹ ewun? 26 Are i dabu ni efen ra dan uvuẹn ivwrevwrede na; aye i vwa wọ ikeri ji vuẹ-ẹn, aye i vwe ji koko emaren rhẹ eghwa ra sẹrorẹ ekwakwa rhọ-ọ, ọrẹn Ọsẹ are obẹ odjuwu ọ ghẹrẹ aye. Are a ghanren ghwẹ aye? 27 Ọrọmo usuẹn are yọ nọ sabu ha ibiọke* ba arhọ ye fọkime o vwo ọfiamu? 28 Habaye, mesoriẹ are e vwo ọfiamu kpahen oborẹ are ine kurhọ? Are i yono nẹ oborẹ idodo ri ha egbo na a dua lele. Aye i vwa wian yanghene ko ewẹ-ẹn. 29 Ọrẹn, mia ta rẹn are taghene udabọ ọsoso ekwakwa irhorhomu ri Solomọn o vwori, ọ sẹ osẹme te owu usuẹn idodo enana-a. 30 Are ri vwo esegburhomẹmro ọkokamu na, orhianẹ Osolobrugwẹ ọ sẹ idodo ri ha egbo na osẹme, dedevwo aye i havwiẹ inyenana, ọrẹn odẹrọsa ne donron aye rhẹ erhanren, ọ ji sẹ are osẹme rọ ghwẹ omaran? 31 Omarana, are i vwe vwo ọfiamu ji ta taghene, ‘Me ame ina riọ?’ yanghene ‘Me ame ina da?’ yanghene ‘Me ame ine kurhọ?’ 32 Fọkime ọsoso ekwakwa enana yẹ egbamwa na e le tuatuatua. Ọsẹ are obẹ odjuwu o rheri taghene are i gwọlọ ọsoso ekwakwa enana.
33 “Omarana, are i gba rha gwọlọ Uvie na ọrhẹ irueruo ọvwata Osolobrugwẹ vwẹre, na na ha ọsoso ekwakwa enana ri hẹrhẹre ba rẹn are. 34 Omarana, are i vwe vwo ọfiamu kpahen odẹrọsa na-a, fọkime odẹrọsa na o vwo ebẹnbẹn enẹyen. Ẹdẹ owuowu ọ vuọnren rhẹ ukpokpoma enẹyen.