Iyẹnrẹn Ọrẹ i Matiu

27 Ọke urhiọke o te, ọsoso ilori irherẹn na ọrhẹ ekpako ihworho na ni djiroro kugbe hasuẹ i Jesu, nẹ aye i sabu kpe yi hwu. 2 Ọke aye a gba i Jesu hin, aye ni kpareriẹ vwe i Pailet ro rhiẹ igọvunọ na.

3 Omarana, ọke i Judas rọ rhẹriẹ ọ mẹrẹnvwrurhe taghene e brorhiẹn kpe i Jesu ne, nọ dariẹ omamọ. Nọ ha idọlọ efuanfon 30 na ghwẹrioma vwe ilori irherẹn na ọrhẹ ekpako na. 4 Nọ tare: “Mi ruẹ ọdandan ọke mie fiẹ arhọ* ohworho ro vwo ruẹ emru owuorowu sọ rhẹ abọ are.” Aye ni ta riẹn: “Marhẹ ọrana o ru te ame? Ọrana ẹmruọ!” 5 Omarana, no donron idọlọ efuanfon na rhẹ oghwa ẹga na ji nẹ avwaye. Ọke oru, no yo surhe hwu. 6 Ọrẹn, ilori irherẹn na ni ha idọlọ efuanfon na ji ta: “O fo ne fiẹ aye rhẹ ekiri igho ọfuanfon na-a, fọkime aye igho ọbara.” 7 Ọke aye a djiroro kugbe hin, aye ni ha igho na dẹ otọre ohworho rọ ma eriẹ na, neneyo aye i haye ruẹ ekete re ne siẹn epha rhọ. 8 Omarana, ne se ekete na Otọre ra ha Ọbara dẹ, me te inyenana. 9 Ọnana nọ ha oborẹ ọmẹraro Jerimaya ọ tare te orugba taghene: “Aye ni ha idọlọ efuanfon 30 na, ro rhiẹ osa ra kwa rhẹ urhomu ọhworhare na, ọhworhare rẹ emọ Izrẹl ezẹko i bru osa rhọye urhomu. 10 Aye ni hariẹ dẹ otọre ohworho rọ ma eriẹ na lele oborẹ i Jehova o jurhi mẹ.”

11 Jesu no mevi obaro igọvunọ na, igọvunọ na nọ nọriẹn: “Wẹwẹ yẹ Orodje itu i Ju na?” Jesu nọ kpahenrhọ riẹn: “Wẹwẹ ọvo yi tariẹ.” 12 Ọrẹn, ọke ilori irherẹn na ọrhẹ ekpako na e guẹn ekwakwa buebun rhọye urhomu, Jesu ọ kpahẹnmro owuorowu-u. 13 Pailet nọ nọriẹn: “Wu vwe rhon ọsoso ekwakwa rẹ ihworho na a ta kpahuọn na?” 14 Ọrẹn, ọ kpahen ukorẹmro owuorowu hariẹ-ẹn, te erhirhiẹ o gbe igọvunọ na unu omamọ.

15 Kọke kọke ra riorẹ Ọnyavrẹn na, igọvunọ na o vwo uruemru ro tiobọnu ohworho owu nẹ ekanron rẹn otu na, kohworho kohworho aye i gwọlọre. 16 Uvwrọke ọrana, ologbozighi owu re se Barabas ọ ha ekanron. 17 Omarana, ọke otu na e koko, Pailet nọ nọren aye: “Ọrọmo yẹ are i gwọlọre taghene mi tiobọnu rẹn are, Barabas gbinẹ i Jesu re se Kristi na?” 18 Fọkime Pailet o rheri taghene fọkiẹ omẹriọ yẹ aye e mwu i Jesu bruie rhe. 19 Habaye, ọke ro siyẹ aga ẹzenguon na, aniẹ no dje urhomu vwe yi taghene: “Wu vwe ruẹ ohworho ọvwata ọrana emru owuorowu-u, fọkime mi rioja omamọ inyenana uvuẹn emena fọkiẹ ọye.” 20 Ọrẹn, ilori irherẹn na ọrhẹ ekpako na ni riẹriẹ otu na, nẹ aye i ta taghene e tiobọnu i Barabas rẹn aye, ọrẹn e kpe i Jesu hwu. 21 Igọvunọ na nọ rharhumu nọ aye: “Ọrọmo usuẹn aye awanva na yẹ are i gwọlọre ni mi tiobọnu rẹn are?” Aye ni tare: “Barabas.” 22 Pailet nọ nọren aye: “Ni me mi ne ruẹ i Jesu re se i Kristi na?” Aye ephian ni tare: “E kpe yi mwu orhan!”* 23 Nọ nọren aye: “Mesoriẹ? Emru obiobiomu ọgo yo ruru?” Ọrẹn, aye ne ji korunu gbangbanhon taghene: “E kpe yi mwu orhan!”

24 Ọke i Pailet ọ mẹrẹnvwrurhe taghene omẹdamiẹ ọ vwọ wia-an, ukpomaran ọyanghan nọ yọ homaphia, nọ ha ame ghwe abọ ye obaro otu na. Nọ tare: “Mi ghwe ọbara ọhworhare ọnana nẹ abọ mẹ. Ọnana ohwan ro teri are.” 25 Omarana, ọsoso ihworho na ni tare: “Jenẹ ọbara ye o rhirhiẹ urhomu ame ọrhẹ urhomu emọ ame.” 26 Omarana, no tiobọnu i Barabas rẹn aye, ọrẹn nọ tare taghene a fa i Jesu. No tiobọnie rẹn aye ne ye kpe yi mwu orhan no hwu.

27 Isodja igọvunọ na ni ha i Jesu ruẹ egodo igọvunọ na, aye ni koko ọsoso isodja ri ha avwaye kinhariẹ ye. 28 Ọke aye e kuẹ ewun nie oma hin, aye ni ha ewun ọbobare oseseri rhuon yi. 29 Aye ni ha idjigbẹn rhuon erhu orodje ji kuie rhẹ urhomie, aye ni fiẹ orhan rhẹ obọrhiẹn nọ mọriẹn. Aye ni sighwẹ rhẹ obaruiẹ ji haye djechẹẹ, aye na ta: “Orodje itu i Ju na, ame a mroma!”* 30 Aye ni djen erhẹnrhen ghwuie ji ha orhan na mie yi, aye na haye fa ye urhomu. 31 Obẹtaye, ọke aye a haye djechẹẹ hin, aye ni rhan ewun oseseri na nẹ omayen, ji rharhumu kuẹ ewun otafiẹ rhọ ye, aye ni kpareriẹ nyarhẹn ya kanriẹn mwu orhan.

32 Ọke aye a nyarhẹn, aye ni mẹrẹn ọhworhare owu re se Saimọn ro rhiẹ onyẹ Sairini. Aye ni gbariẹ nọ kpare orhan oja i Jesu. 33 Ọke aye e te ekete owu re se Gọgọta ro mevirhọ Ekete Okakurhomu, 34 aye ni yẹriẹ iwaini re gbe kugbe rhẹ oborẹ o mwenu. Ọrẹn ọke rọ damiẹ, orho kwe da ye-e. 35 Ọke aye a kanriẹn mwu orhan na hin, aye ni bọ itẹ ha ghalẹ ewun otafiẹ. 36 Aye ni siyẹ avwaye ji dẹriẹ kiọkiọkiọ. 37 Aye ni ya ẹmro ra ha mọriẹn na rhẹ ophanphan re kpe mwu oberun orhan oja na, rọ tare: “Ọnana yi Jesu ro rhiẹ Orodje itu i Ju na.”

38 Ọke oru, na kanren ihi awanva mwu erhan kẹriẹ, owu ọ ha obọrhiẹn, ọreva ye ọ ha obohwẹriẹ. 39 Ihworho ra nyavrẹn na ta erharhere ẹmro kpahiẹn, ji kpogho urhomu aye. 40 Aye na ta: “Wẹwẹ ri tare taghene wu na ghwọghọ oghwa ẹga na ji rharhumu bọn yen hin ẹdọke esa, gbe simi oma! Wu rhe ghini rhiẹ Ọmọ Osolobrugwẹ, gba ruotọre nẹ orhan oja na!” 41 Omarana, ilori irherẹn na, eyẹbe na kugbe ekpako na, na ji haye djechẹẹ taghene: 42 “O simi awọrọ, ọrẹn ọ sabu simi omaye-en! Orho ghini rhiẹ Orodje Izrẹl, ọ gbọ ruotọre nẹ orhan oja na, ame ni ne vwo imwẹro kpahiẹn. 43 Osolobrugwẹ yọ hẹroso, o gbo simie orhianẹ o vwo ekwerhọ kpahiẹn, fọkime ọye ọ tare taghene, ‘Mẹmẹ Ọmọ Osolobrugwẹ.’ ” 44 Omaran yẹ ihi ra kanren mwu erhan kẹriẹ na, i ji hinmaro kpahiẹn.

45 Ekete ephian no mwuokuku uvuẹn otọre na nẹ emrẹ ughwọdjọ ikpereva erhẹrhuvo* ye te emrẹ ughwọdjọ esa erhẹrhuvo.* 46 Emrẹ ughwọdjọ esa erhẹrhuvo, Jesu no kperi phia rhẹ uvwele gorigori taghene: “Ẹli Ẹli lama sabaktani?” nọyẹ, “Osolobrugwẹ mẹ, Osolobrugwẹ mẹ, mesoriẹ wa sẹrerhumuji mẹ vwo?” 47 Ọke ihworho ezẹko ri mevi avwaye e rhon oborẹ ọ tare, aye na ta: “Ọhworhare ọnana o se Ẹlaijah.” 48 Ogege, owuọwan usuẹn aye nọ zẹ ya ha akworhẹ ji dumie rhẹ enyo rọ fiunu, nọ ha orhan kpariẹ vwe yi nọ da. 49 Ọrẹn, eri hẹrhẹre ni tare: “Nyajevwo! Jene nie sẹ Ẹlaijah ono mo simie.” 50 Jesu nọ rharhumu kperi phia rhẹ uvwele gorigori, ọke oru no fuẹhẹn.*

51 Nughe! ikọtini ekete ọfuanfon na nọ bẹrẹre akwava nẹ oberun ye te otọre, otọre na no kpoghori, itita ni ji va. 52 Isin* ni rhiefirhọ, irinmi ihworho efuanfon na buebun ni ghwie notọre rhe. 53 Ihworho buebun ni mẹrẹn irinmi na. (Ihworho re nẹ uvwre ekete isin na sa ọke ra rhọmọ i Jesu nuhwu hin, ni ruẹ amwa ọfuanfon na.) 54 Ọrẹn, ọke olotu isodja na ọrhẹ isodja ra dẹrẹ i Jesu, a mẹrẹn otọre ro kpoghori na ọrhẹ ekwakwa ra phia, ofẹn no mwurun aye omamọ. Aye ni tare: “Itiọrurhomẹmro, ọnana ghini Ọmọ Osolobrugwẹ.”

55 Emẹse buebun ri leli Jesu nẹ i Galili rhe, nẹ aye i ha userhumu riẹn, ni mevi ekete oseseri ji ni oborẹ ọ phia. 56 Usuẹn aye yẹ Meri Magdalin, Meri ro rhiẹ izu i Jems ọrhẹ Josis kugbe izu emọ i Zẹbẹdi.

57 Vwana, ọke owuọwọn ọ joma te ne, ọdafe owu re se Josẹf ro rhiẹ onyẹ Arimatia nọ rhere, ọye jẹ odibo i Jesu. 58 Ọhworhare ọnana no bru i Pailet ya nekpẹn orinmi Jesu mie yi. Pailet nọ tare taghene a kpare orinmi na riẹn. 59 Josẹf nọ kpare orinmi na ji ha obọdẹn ewun rọ dabu fon ha fariẹ. 60 Nọ kpareriẹ rhẹ usin ọkpokpọ rọ tọn rhẹ uvuẹn atita. Ọke ro ghonron atita ọduado rhurhu unu usin* na hin, no nẹ avwaye. 61 Ọrẹn, Meri Magdalin ọrhẹ Meri ọreva ye na ni daji avwaye, aye ni siyẹ obaro usin na.

62 Ọke ẹdẹ Egbemwuo na ọ vrẹn hin, ilori irherẹn na ọrhẹ itu i Farisi na ni koko rhẹ obaro i Pailet ẹdẹ ọreva ye. 63 Aye ni ta riẹn: “Ọrovwori, ame i karorhọ taghene ọmọrenfian ọrana ọ tare ọke rọ ji ha akpọ taghene, ‘Ẹdọke esa i rha vrẹn, ana rhọmi mẹ nuhwu.’ 64 Omarana, gbe jurhi nẹ isodja i ya dẹrẹ usin na ye te ẹdọke ọresa ye, neneyo idibo yi i ja rha nyarhẹn ye so orinmie ji ta rẹn ihworho taghene, ‘A rhọmeriẹn nuhwu ne!’ Ọke ọrana, ọphiẹrhọ ọnana no no biomu ghwẹ ọrukaro na.” 65 Pailet nọ ta rẹn aye: “Are ina sabu ha isodja lele oma. Nẹ are i ya dẹriẹ jerẹ oborẹ are i gwọlọre.” 66 Omarana, aye ni dabu ya ha atita rọ ha unu usin na diẹn kokoroko, ji fiẹ isodja rhẹ avwaye.