Iyẹnrẹn Ọrẹ i Matiu
3 Ọke oru, Jọn ro Brawanrhame no ghwoghwo uvuẹn ato i Judia. 2 Nọ ta: “Are i ghwẹriẹ fọkime Uvie idjuwu na o tikẹrẹ ne.” 3 Itiọrurhomẹmro, Jọn yẹ ọmẹraro Aizaya ọ tẹmro enana kpahen: “Uvwele owu o korunu phia uvuẹn ato na taghene: ‘Are i mwuegbe izede i Jehova! Are i ruẹ izede yi phiọn.’ ” 4 Ewun ra ha ẹton ijaki ru yi Jọn o kuẹrhọ, ọ ji ha umwaya ọphiẹn e mwu ugbewuien. Ebaka ọrhẹ amiahon yẹ emariẹn. 5 Omarana, ọsoso ihworho ri ha i Jerusalẹm ọrhẹ eri ha i Judia kugbe ọsoso uvwrotọre ri kinhariẹ Urhie i Jọdan na, na ghwiẹ bruie sa. 6 Jọn no bruru aye rhẹ ame uvuẹn Urhie i Jọdan na, ọke aye a rhian edandan aye hin uvuẹn afiede.
7 Ọke rọ mẹrẹn itu i Farisi ọrhẹ itu i Sadusi buebun ra rhiẹ ekete ro bru awan rhẹ ame na, nọ ta rẹn aye: “Emọ ibodirin na, ọrọmo yọ ha orhetio rẹn are nẹ are i zẹ vabọ rẹn ekwẹre ọgbogbanhon Osolobrugwẹ rọ sa na? 8 Omarana, are i gbe ruẹ oborẹ o djerie phia taghene are i ghwẹriẹ ne. 9 Are i vwa namu ta rẹn oma are taghene Ebraham yẹ ọsẹ are-e. Fọkime mia ta rẹn are taghene Osolobrugwẹ ọnọ sabu ha emọ rẹn Ebraham nẹ uvuẹn itita enana rhe. 10 Nughe! Ukeke na ọ ghwanrenriẹn ha esiri erhan na ne. Omarana, korhan korhan rọ vwọ mọ emamọ irhorhomu, ana hẹn yen se ji donrien rhẹ uvuẹn erhanren. 11 Harẹn omẹmẹ, mi bruru are rhẹ ame fọkime are i ghwẹriẹre. Ọrẹn, ohworho rọ sa na o vwo omẹgbanhon ghwẹ mẹ, mie mwuovwan mi ne kuẹ isabatu nie aghwẹ-ẹ. Ọye ono bru are rhẹ ame nyoma ẹhẹn ọfuanfon na ọrhẹ erhanren. 12 Ọye ọ mọrẹn isọboro rọ ha fa ikeri ewawọ rhẹ obọ. No no ruẹ ekete ra fa ikeri ewawọ na dabu fon jeghwai koko iwiti ọnẹyen rhẹ oghwa ra sẹrorẹ ekwakwa rhọ. Ọrẹn, nọ nọ torhẹ ephianron iwiti na rhẹ erhanren ra na ja sabu fun.”
13 Ọke oru, Jesu no nẹ i Galili riẹ Urhie i Jọdan, neneyo i Jọn o bruie rhẹ ame. 14 Ọrẹn, Jọn nọ damoma rọ nọ dobọ ye ji nyoma rọ ta: “Wẹwẹ yi fo ohworho ro no bru mẹ rhẹ ame, nu wa rharhumu bru mẹ sa?” 15 Jesu nọ ta riẹn: “Wu vwa da mẹ obọ ji-i, fọkime nyoma izede ọnana ya na sabu ruẹ ọsoso oborẹ ọgbare uvuẹn obaro Osolobrugwẹ.” Omarana, ọrhọ da ye ji ghwomara-an. 16 Ọke i Jesu o bromarhame hin, no nẹ uvuẹn ame na rhe ogege. Nughe! idjuwu na ni rhiefirhọ, nọ mẹrẹn ẹhẹn ọfuanfon Osolobrugwẹ ro bruie sa jerẹ erurẹ. 17 Habaye, uvwele owu nọ tẹmro nẹ idjuwu na rhe taghene: “Ọnana Ọmọ mẹ mi vwo ẹgwọlọ kpahen na, ri mi ji vwo ekwerhọ kpahen.”