Iyẹnrẹn Ọrẹ i Matiu
12 Ọke owu uvuẹn Ẹdẹ Omeronmo na, Jesu nọ nyavrẹn ikebi owu ra wọ iwiti rhọ. Orhọmo no kpe idibo yi, aye na kọrọ ikeri iwiti na ria. 2 Ọke itu i Farisi na a mẹrẹn ọnana, aye ni ta rẹn i Jesu: “Nughe! Idibo enọ e ruẹ oborẹ ọ haso urhi uvuẹn Ẹdẹ Omeronmo na.” 3 Nọ nọren aye: “Are e ji se oborẹ i Devid o ruru ọke orhọmo o kpe yi ọrhẹ ehworhare ri lelirie? 4 Ọrhẹ oborẹ o ru ruẹ oghwa Osolobrugwẹ ji riẹ ibrẹdi ra ha ze izobo rẹn Osolobrugwẹ?* O fo nẹ ọye ọrhẹ ehworhare ri lelirie i riẹ ibrẹdi na-a, jokpanẹ irherẹn na ọvo. 5 Gbinẹ are e ji seyi uvuẹn Urhi na taghene uvuẹn Ẹdẹ Omeronmo na, irherẹn ri ha uvuẹn oghwa ẹga na e gbe Ẹdẹ Omeronmo na ghwẹ, ọrẹn aye i vwa riẹ iborhi-in? 6 Ọrẹn, mia ta rẹn are taghene oborẹ ọ do ghwẹ oghwa ẹga na ọ ha aran ne. 7 Orhianẹ are i vwẹruọ ẹmro enana, ‘Mi gwọlọ arodọmẹ rhẹ izobo-o,’ manẹ are i vwe brorhiẹn kpe ihworho ri vwa riẹ iborhi-in. 8 Fọkime Ọmọ onyakpọ na yẹ Ọrovwori Ẹdẹ Omeronmo na.”
9 Ọke ro nẹ avwaye hin, no riẹ i sinagọg aye. 10 Uvuẹn avwaye, o vwo ọhworhare owu rẹ obọ ye o tidan!* Neneyo ihworho na i mẹrẹn ekete mọren i Jesu, aye ni nọriẹn, “O fori ne simi ohworho uvuẹn Ẹdẹ Omeronmo na?” 11 Nọ ta rẹn aye: “Orhianẹ are i vwo ogegede owu, ogegede na no se rhẹ ọgọdọ uvuẹn Ẹdẹ Omeronmo na, o vwo owuọwan usuẹn are na rọ nọ jọ kpariẹ nẹ ọgọdọ na? 12 Itiọrurhomẹmro, onyakpọ ọ ghanren ghwẹ ogegede gbegberegbe! Omarana, o fori ne ruẹ oborẹ orhomurun uvuẹn Ẹdẹ Omeronmo na.” 13 Jesu nọ ta rẹn ọhworhare na: “Rionbọ phia.” Nọ rionbọ ye phia, obọ ye no serhọ jerẹ obọ ọreva ye na. 14 Ọrẹn, itu i Farisi na ni nẹ avwaye ya djiroro hasuẹ i Jesu, neneyo aye i sabu kpe yi hwu. 15 Ọke i Jesu o rhe kpahen irorẹdjẹ aye, no nẹ avwaye. Ihworho buebun ni ji lelie, no simirin aye ephian. 16 Ọrẹn, nọ yẹrẹ aye orhetio ọgbogbanhon taghene aye i vwa ta rẹn ihworho kpahen ọye-e. 17 Ọnana nọ ha oborẹ ọmẹraro Aizaya ọ tare te orugba taghene:
18 “Nughe! Ọnana odibo mẹ mi djẹha, ri mi vwo ẹgwọlọ kpahen, mi ji vwo ekwerhọ kpahiẹn! Mi ne fiẹ ẹhẹn mẹ rhẹ omayen, no no dje oborẹ orhienbro ọsoso o mevirhọ rẹn egbamwa na. 19 Ọ vwọ samọ kunu yanghene va-an. O vwo ohworho owuorowu ro no rhon uvwele yi uvuẹn idumu eduado na-a. 20 Ọ vwọ samọ burhun ugbẹn ewawọ rọ luẹ ne-e, o ji fun iwiki ukpẹ rọ joma fun hin ne-e, ye te ọke rọ nọ ha orhienbro ọsoso te orugba. 21 Itiọrurhomẹmro, egbamwa na ina bọn ifiẹrorhọ aye kpahen odẹ ye.”
22 Ọke oru, na kpare ọhworhare owu rẹ okpodje ọ ha omayen vwe i Jesu. Ọhworhare na o tuẹro, o ji diunu. Omarana, Jesu no simirien. Ọhworhare na nọ tẹmro ji mẹrude. 23 Ọnana no gbe otu na ephian unu omamọ, aye na ta: “Takpu ọnana rhẹ ọmọ i Devid na rẹ?” 24 Ọke itu i Farisi na e rhon ẹmro enana, aye na ta: “Omẹgbanhon i Biẹlzibọb* ro suẹn ikpodje na, yẹ ọhworhare ọnana ọ ha le ikpodje.” 25 Ọke i Jesu o rhe oborẹ aye e roro, nọ ta rẹn aye: “Kuvie kuvie rọ kparehaso omayen, ọnọ ghwọghọ. Kamwa kamwa yanghene oghwa rọ kparehaso omayen ọ sabu meviẹ-ẹ. 26 Omaran ọ ji havwọ, orhianẹ Echu o le Echu, nọyẹ ọye ọvo ọ kparehaso omayen ne, ni marhẹ uvie ọnẹyen ono ru mevi? 27 Ọrẹn, orhianẹ mie le ikpodje nyoma omẹgbanhon i Biẹlzibọb, nẹ omẹgbanhon ọrọmo yẹ emọ are e le ikpodje? Ọnana yọ soriẹ emọ are ina ha are guẹnzọn. 28 Habaye, orhianẹ nyoma ẹhẹn ọfuanfon Osolobrugwẹ yi mie le ikpodje, nọyẹ Uvie Osolobrugwẹ ọ ghini nyajẹ are vwo ne. 29 Gbinẹ o vwo ohworho rọ nọ sabu ruẹ oghwa aduaran ji kpare enyerẹn yen ha, ọrẹn ọ dabu gba ye-e? Ọnọ dabu gba ye vwẹre nọ ki sabu kpare enyerẹn oghwa ye ha. 30 Ohworho rọ vwọ ha obọ ọnẹmẹ ọ haso mẹ, ohworho ro vwo leli mẹ koko ihworho, o le aye nẹ obọ ọnẹmẹ.
31 “Fọkiẹ ọnana mia ta rẹn are taghene, Osolobrugwẹ ọnọ harhomu ihworho ri vwobọrhọ aruẹ ọdandan ephian ọrhẹ eri tẹmro aghwa, ọrẹn ọ harhomu ohworho rọ rhaphiẹ ẹhẹn ọfuanfon na-a. 32 Jerẹ udje, kohworho kohworho rọ tẹmro haso Ọmọ onyakpọ na, Osolobrugwẹ ọnọ harhomie. Ọrẹn, ohworho rọ tẹmro haso ẹhẹn ọfuanfon na, Osolobrugwẹ ọ harhomie uvuẹn enyerakpọ* ọnana yanghene ọrọ sa na-a.
33 “Are i rha dabu hẹrote orhan, nọ nọ mọ emamọ irhorhomu. Ọrẹn, are arha dabu hẹrote orhan na-a, emamọ yen ni ne gbon. Fọkime e vwrurhe orhan nyoma emamọ yen. 34 Emọ ibodirin, marhẹ are ri rhiẹ evwọkon ine ru sabu tẹmro irhorhomu? Fọkime ekwakwa ri vuọn ọmudu na, yẹ unu na ọ ta. 35 Omamọ ohworho o tiobọnẹ ekwakwa irhorhomu nẹ usuẹn omamọ efe ro kokori, ọrẹn ọvwọkon o tiobọnẹ ekwakwa ọkon nẹ usuẹn erharhere efe ro kokori. 36 Mia ta rẹn are taghene uvuẹn Ẹdẹ Ẹzenguon na, ene brorhiẹn kpe ihworho fọkiẹ erharhere ẹmro ephian rẹ aye i tare. 37 Fọkime ene so ọvwata nyoma ẹmro enọ. Habaye, ene ji brorhiẹn kpo nyoma ẹmro enọ.”
38 Omarana, eyẹbe na ezẹko ọrhẹ itu i Farisi na ni ta riẹn: “Oyono, ame i gwọlọre ne wu dje oka rẹn ame.” 39 Jesu nọ kpahenrhọ rẹn aye: “Uvwiẹ ọkon ro ji rhiẹ igberadja* yọ gwọlọ oka, ọrẹn o vwo oka owuorowu re ne dje riẹ-ẹn, jokpanẹ oka i Jona ro rhiẹ ọmẹraro na. 40 Jerẹ oborẹ i Jona ọ daji uvuẹn ephan erhenrin ọduado na ẹdọke esa ọrhẹ ason esa, omaran Ọmọ onyakpọ na ọnọ ji daji uvuẹn Usin* ẹdọke esa ọrhẹ ason esa. 41 Ihworho i Ninivẹ ọrhẹ uvwiẹ ọnana ina rhọmọ nuhwu uvuẹn ẹdẹ ẹzenguon na. Aye ni ne brorhiẹn kpe uvwiẹ ọnana, fọkime aye i ghwẹriẹre fọkiẹ oborẹ i Jona o ghwoghwori. Ọrẹn nughe! oborẹ ọ ghwẹ i Jona ọ ha aran ne. 42 Orodje ọmase obọrẹ o riotọre na ọrhẹ uvwiẹ ọnana ina rhọmọ nuhwu uvuẹn ẹdẹ ẹzenguon na. No no brorhiẹn kpe uvwiẹ ọnana, fọkime o nẹ obẹta akpọ na mọ kerhọ ẹghwanren i Solomọn. Ọrẹn nughe! oborẹ ọ ghwẹ i Solomọn ọ ha aran ne.
43 “Okpodje orho nẹ oma ohworho ji nyavrẹn ekete ri vwe vwo ame, nọ gwọlọ ekete ro no ronmoma. Ọrhọ mẹrẹn ekete owuorowu-u, 44 nọ ta rẹn omayen, ‘Mi na ghwẹrioma riẹ oghwa mi kwa nu na.’ Ọke ro te avwaye, nọ mẹrẹnvwrurhe taghene oghwa na o vwo ohworho-o, ọrẹn a dabu kwerhie ji kwaphiẹ ye rhorhomu. 45 Omarana, nọ nyarhẹn ye se ikpodje irhiruẹ erọrọ ri vwia ghwẹ ye rhe, ọke aye a ruẹ oghwa na, aye ne rhirhiẹ uvuien. Erhirhiẹ ohworho ọrana ukperhumu na, no mo biomu ghwẹ ọke ukaro. Omaran ono ji rhirhiẹ rẹn uvwiẹ ọkon ọnana.”
46 Ọke i Jesu ọ ji tẹmro rẹn otu na, izie ọrhẹ imizie ni mevi otafe ra gwọlọ lelie tẹmro. 47 Omarana, owuọwan nọ ta riẹn: “Oyono, izuo ọrhẹ imizuo i mevi otafe, aye a gwọlọ leluo tẹmro.” 48 Ọrẹn, nọ kpahenrhọ rẹn ohworho rọ tẹmro riẹn na: “Ọrọmo yẹ izu mẹ, ayọmo yẹ imizu mẹ?” 49 Omarana, nọ rionbọrhọ idibo yi ji ta: “Nughe! Izu mẹ ọrhẹ imizu mẹ na! 50 Fọkime kohworho kohworho ro ruẹ ọhọre Ọsẹ mẹ rọ ha obẹ odjuwu, ọravwọ yẹ omizu mẹ ọhworhare, omizu mẹ ọgbọtọ ọrhẹ izu mẹ.”