Iyẹnrẹn Ọrẹ i Matiu

25 “Ana sabu ha Uvie idjuwu na dje egbọtọ awan ikpe ri vwe ji chiọghọ, ri kpare ikpẹ aye ya vwa ọhworhare rọ rọnmọ na. 2 Awan isionrin ivwidjigbo, awan isionrin ri hẹrhẹre evwẹghwanren. 3 Ivwidjigbo na i kpare ukpẹ aye, ọrẹn aye a kpare ikransi* lele oma-a. 4 Ọrẹn, evwẹghwanren na i kpare ukpẹ aye ji rhie ikransi rhẹ ulolo ba lele oma. 5 Ọke ọhworhare rọ rọnmọ na o kpọke, omerhẹn no sunrun aye ephian, aye ni merhẹnren. 6 Uvuẹn erhẹrhẹ ason, ohworho owu no kperi phia: ‘Ọhworhare rọ rọnmọ na ọ rhe ne! Are i bruie nya.’ 7 Omarana, ọsoso egbọtọ erana ri vwe ji chiọghọ na ni vẹnrẹnren ji mwuegbe ukpẹ aye. 8 Ivwidjigbo na ni ta rẹn evwẹghwanren na taghene, ‘Are i yẹ ame ibiẹ ikransi, fọkime ukpẹ ame ọ gwọlọ fuẹn ne.’ 9 Evwẹghwanren na ni ta rẹn aye taghene: ‘Ọ họhọre taghene ikransi ame, o te ame ọrhẹ are-e. Omarana, are i gbe bru ihworho ra rhẹ ikransi, nẹ are i dẹ ibiesuọn rẹn oma are.’ 10 Ọke aye a nyarhẹn ya dẹ ye, ọhworhare rọ rọnmọ na nọ rhere. Egbọtọ ri mwuegbe ne na, ni lelirie ruẹ ekete irueruo akpẹriọ orọnmo na ọ havwọ, na kanren ighwe na. 11 Ọke oru, egbọtọ ri hẹrhẹre na ni ji rhe, aye na ta, ‘Ọga, Ọga, je ighwe rẹn ame!’ 12 Nọ kpahenrhọ rẹn aye, ‘Itiọrurhomẹmro mia ta rẹn are, mie rhe are-e.’

13 “Omarana, are i rha dẹrẹ, fọkime are e rhe ẹdẹ na yanghene unọke na-a.

14 “Uvie idjuwu na ọ họhọ ọhworhare owu rọ gwọlọ riẹ ẹkwotọre ọrọrọ, no se evrẹn yen ji tiobọnu enyerẹn enẹyen rẹn aye. 15 Nọ yẹ owu italẹnti* isionrin, nọ yẹ ọrọrọ italẹnti eva, ji yẹ ọrọrọ italẹnti owu. Ọ yẹrẹ aye owuowọnwan lele omẹgbanhon aye, no riẹ ẹkwotọre ọrọrọ. 16 Ogege, ọvrẹn ra yẹre italẹnti isionrin na nọ nyarhẹn ya ha aye sueyi, nọ mẹrẹn erere italẹnti isionrin erọrọ ba ye. 17 Ọrẹ a yẹre italẹnti eva na, nọ ji mẹrẹn erere italẹnti eva erọrọ ba ye. 18 Ọrẹn, ọvrẹn ra yẹre italẹnti owu ọvo na, nọ nyarhẹn ya tọn igho* oninie rhẹ uvuẹn otọre.

19 “Ọke jijiri ọ vrẹn, onini evrẹn erana nọ rhe me ni oborẹ aye i ha igho yi ru. 20 Omarana, ọvrẹn ra yẹre italẹnti isionrin na nọ rhere, ji ha italẹnti isionrin erọrọ ba kpahontọre, nọ tare, ‘Onini, wu yẹre mẹ italẹnti isionrin. Ọrẹn nughe, mi mẹrẹn erere italẹnti isionrin erọrọ ba ye.’ 21 Oninie nọ ta riẹn: ‘Wẹ nobiruo owian, omamọ ọvrẹn rọ fuephan! Wu fuephan kpahen ibiẹ ekwakwa. Omarana, mi na ha mwu ne wu hẹrote ekwakwa buebun. Mọ, me lele oninuo ghọghọ.’ 22 Ọke oru, ọrẹ a yẹre italẹnti eva na nọ rhere ji ta, ‘Onini, wu yẹre mẹ italẹnti eva. Ọrẹn nughe, mi mẹrẹn erere italẹnti eva erọrọ ba ye.’ 23 Oninie nọ ta riẹn: ‘Wẹ nobiruo owian, omamọ ọvrẹn rọ fuephan! Wu fuephan kpahen ibiẹ ekwakwa. Omarana, mi na ha mwu ne wu hẹrote ekwakwa buebun. Mọ, me lele oninuo ghọghọ.’

24 “Obẹtaye, ọvrẹn ra yẹre italẹnti owu na nọ rhere ji ta: ‘Onini, mi rheri taghene ekwakwa enọ a bẹn eruo, we vuẹn uvuẹn ekete wu vwa wọ rhọ, we ji koko ikeri ewawọ wu vwa fa. 25 Omarana, ofẹn no mwurun mẹ, ni mi ye tiẹ italẹnti na nu rhẹ uvuẹn otọre. Nughe, italẹnti wu yẹre mẹ na, ọye na.’ 26 Oninie nọ kpahenrhọ riẹn: ‘Wẹwẹ ọvwọkon ọrhẹ ọvwiẹlẹ, wu rheri taghene mie vuẹn uvuẹn ekete mi vwa wọ rhọ, ji koko ikeri ewawọ ri mi vwa fa, rhomaran? 27 Ni mesoriẹ wu vwe fiẹ igho* mẹ rhẹ ekete ra sẹrorẹ igho, neneyo mi ha igho mẹ ọrhẹ erere rọ ha oberuien, mi rha ghwẹrioma rhe?

28 “ ‘Omarana, are i ha italẹnti na mie yi ji haye rẹn ọro vwo italẹnti ikpe na. 29 Fọkime kohworho kohworho ro vwo emru, ana haba oborẹ o vwori na, no no vwo bunrhọ. Ọrẹn, ohworho ro vwo vwo, oborẹ ọ tobọ vwo dede ana haye mie yi. 30 Are i donron orharhere ọvrẹn na rhẹ otafe ro mwuokuku na. Avwaye yọ nọ viẹ ji riẹ ikanwuiẹn.’

31 “Ọke Ọmọ onyakpọ na ọnọ rhiọ uvuẹn odidi ọnẹyen rhẹ ọsoso emakashe enẹyen, no no siyẹ aga usun odidi ọnẹyen. 32 Egbamwa na ephian ni ne koko rhẹ obaruiẹ, nọ nọ hẹriẹ ihworho jerẹ oborẹ osuingegede ọ hẹriẹ igegede nẹ ẹvwe. 33 No no fiẹ igegede na rhẹ obọrhen ọnẹyen, ọrẹn no no fiẹ ẹvwe na rhẹ obohwẹre ọnẹyen.

34 “Omarana, Orodje na nọ nọ ta rẹn ihworho ri ha obọrhen ọnẹyen: ‘Are i mọ, are rẹ Ọsẹ mẹ ọ ha ebrurhọ riẹn ne na, are i ha Uvie re mwuegbe yi rẹn are nẹ ọtonrhọ akpọ na riuku. 35 Fọkime ọke orhọmo o kpe mẹ, are ni yẹre mẹ emaren re. Ọke uhrun ame ọ ka mẹ, are ni yẹre mẹ ame da. Ọke mie rhiẹ ọpha, are ni rhiabọ dedi mẹ. 36 Ọke mia banfirhọ,* are ni yẹre mẹ ewun kurhọ. Ọke mie kpomu, are ni hẹrote mẹ. Ọke mia ha ekanron, are ni mọ nekpẹn mẹ.’ 37 Ọke ọrana, evwata na ni na nọ yen: ‘Ọrovwori, ọkiọgo yẹ ame a mẹruọn rẹ orhọmo o kpo rẹ ame a ghẹruọ, yanghene rẹ uhrun ame ọ ka rẹ ame a yọ ame da? 38 Ọkiọgo we rhiẹ ọpha, rẹ ame e rhiabọ deduo, yanghene ọkiọgo wa banfirhọ rẹ ame a yọ ewun kurhọ? 39 Ọkiọgo yẹ ame a mẹruọn we kpomẹ, yanghene wa ha uvuẹn ekanron rẹ ame a mọ nekpọn?’ 40 Orodje na nọ nọ kpahenrhọ rẹn aye, ‘Itiọrurhomẹmro mia ta rẹn are, fọkime are i rurie rẹn owuọwan rọ mai kamu usuẹn imizu mẹ enana, mẹmẹ yẹ are i rurie riẹn.’

41 “Orodje na nọ nọ ta rẹn eri ha obohwẹre ọnẹyen: ‘Are re dumirhonrin riẹn na, are i nẹ aran ya ruẹ erhanren i bẹmẹdẹ re mwuegbe yi rẹn i Dẹbolo ọrhẹ emakashe enẹyen. 42 Fọkime ọke orhọmo o kpe mẹ, are a yẹ mẹ emaren re-e. Ọke uhrun ame ọ ka mẹ, are a yẹ mẹ ame da-a. 43 Ọke mie rhiẹ ọpha, are e rhiabọ dedi mẹ-ẹ. Ọke mia banfirhọ, are a yẹ mẹ ewun kurhọ-ọ. Ọke mie kpomu ji ha uvuẹn ekanron, are a hẹrote mẹ-ẹ.’ 44 Aye ni na ji nọ yen: ‘Ọrovwori, ọkiọgo yẹ ame a mẹruọn taghene orhọmo o kpo, uhrun ame ọ ka, we rhiẹ ọpha, wa banfirhọ, we kpomu yanghene wa ha uvuẹn ekanron, rẹ ame i vwa hẹroto?’ 45 Ọke ọrana, nọ nọ kpahenrhọ rẹn aye taghene: ‘Itiọrurhomẹmro mia ta rẹn are, fọkime are e ruie rẹn owuọwan usuẹn eri mai kamu enana-a, are e ji ruie ha mẹ-ẹ.’ 46 Ihworho enana ine riẹ oghwọghọ i bẹmẹdẹ,* ọrẹn evwata na ine vwo arhọ i bẹmẹdẹ.”