Iyẹnrẹn Ọrẹ i Mak

13 Ọke i Jesu o nẹ oghwa ẹga na, odibo yi nọ ta riẹn: “Oyono, nughe oborẹ oghwa ẹga na ọrhẹ itita ra ha bọn yen i vwo erhumu te!” 2 Ọrẹn, Jesu nọ ta riẹn: “Wa mẹrẹn eghwa eduado enana? A vwa samọ nyaji atita owuorowu vwo rhẹ oberun atita ọrọrọ uvuẹn ekete aran, ra na ja ghwọghọ totọre-e.”

3 Ọke ro siyẹ oberun Ugbenu Oliv ji ni oghwa ẹga na, Pita, Jems, Jọn ọrhẹ Andru ni brurie rhe ọke ọye ọvo ọ havwiẹ. Aye ni nọriẹn: 4 “Ta rẹn ame, ọkiọgo ye ekwakwa enana ina phia? Me yẹ oka ro no djephia taghene ekwakwa enana e riẹ ehion ne?” 5 Omarana, Jesu nọ ta rẹn aye: “Are i ni oma so nẹ ohworho owuorowu o jo rho suẹn are vru. 6 Ihworho buebun ina rhiọ ji ha odẹ mẹ ruiruo. Aye ni na ta taghene, ‘Mẹmẹ yẹ ohworho na.’ Aye ni ne suẹn ihworho buebun vru. 7 Habaye, are i rhe rhon kpahen ipheri ọrhẹ iyẹnrẹn ipheri, are i vwa zofẹ-ẹn. Fọkime ekwakwa enana ina vi phia, ọrẹn oba na o ji te-e.

8 “Fọkime agbamwa ọnọ kparehaso agbamwa, uvie ọnọ kparehaso uvie, etọre ine kpogho nẹ ekete owu riẹ ọrọrọ, emaren ina ji kanren. Ekwakwa enana yẹ ọtonrhọ ọke ukpokpogho.*

9 “Harẹn are, are i ni oma so. Fọkime ihworho ina kpare are riẹ oghwa ẹghware, ene ji kpe are uvuẹn i sinagọg ji ha are mevi obaro igọvunọ ọrhẹ irodje fọkiẹ odẹ mẹ, no rhiẹ oseri rẹn aye. 10 Habaye, ene vi ghwoghwo iyẹnrẹn esiri na vwẹre uvuẹn ọsoso egbamwa na. 11 Erhe mwu are ye firhọ ekanron, are i vwe brudu kpahen oborẹ are ina ta-a. Ọrẹn, kẹmro kẹmro re tiobọnu rẹn are uvuẹn unọke ọrana, are i ta ye, fọkime rhẹ are ya tẹmro na-a, ukpomaran ẹhẹn ọfuanfon na yọ tẹmro. 12 Habaye, omizu ọnọ ha omizu kpahontọre ne kpe yi hwu, ọsẹ ọnọ ha ọmọyen kpahontọre, emọ ni na kparehaso eri vwiẹre aye ji kpe aye hwu. 13 Ihworho ephian ine vwo utuoma kpahen are fọkiẹ odẹ mẹ. Ọrẹn ohworho ro vwo edirin ye toba yo no simirhọ.

14 “Ọrẹn, are i rha mẹrẹn emru aghwa rọ suẹ oghwọghọ ro mevi ekete ro vwo fo no mevi, e gbe jenẹ ihworho ri ha i Judia i rha zẹ riẹ igbenu na. (Jenẹ ọro seyi ọ ha ọmẹrẹnvwrurhe ruiruo). 15 Ohworho rọ ha oberun oghwa, ọ vwọ ruotọre yanghene ruẹ uvuẹn oghwa ya ha emru owuorowu nẹ uvuẹn oghwa ye-e. 16 Habaye, ohworho rọ ha ikebi ọ vwọ ghwẹrioma ya rhọrọ ewun otafiẹ-ẹ. 17 Ukpokpogho ono rhirhiẹ ye rẹn emẹse ri mẹrenvwan ọrhẹ emẹse ra yẹ emeboban enye uvuẹn ẹdẹ erana! 18 Are i rha nẹrhomo nọ jọ rhọ phia uvuẹn ọke erinrin. 19 Fọkime ẹdẹ erana ine rhiẹ ọke ukpokpogho ra vwa ji mẹrẹn aruiẹ dẹ, nẹ ọtonrhọ emama Osolobrugwẹ me te ọke ọnana, a ji mẹrẹn aruiẹ ghwomara-an. 20 Itiọrurhomẹmro, jokpanẹ i Jehova* o bru ẹdẹ na kpẹtẹ, o vwo ohworho owuorowu ro no simirhọ-ọ. Ọrẹn, fọkiẹ ihworho rọ djẹha na, o bru ẹdẹ na kpẹtẹ ne.

21 “Ọke ọrana, ohworho ọrhọ ta rẹn are taghene, ‘Nughe! Kristi na ọ ha aran,’ yanghene ‘Nughe! Ọ ha oboran,’ are i vwe kwerhọ ye-e. 22 Fọkime i Kristi efian ọrhẹ emẹraro efian ina homaphia ji ruẹ eka ọrhẹ igbevwunu, neneyo aye i sabu phiẹ era djẹha na rhọ, aye i rha sabu ru te omaran. 23 Omarana, are i gbe ni oma so. Mi tẹmro enana rẹn are ne, bọmọke aye ina ki phia.

24 “Ọrẹn uvuẹn ẹdẹ erana, ukpokpogho na ọrhọ phia hin, ọren na no no mwuokuku, ubiamo na o ji lo-o. 25 Ikereti na ni ne rhe se nẹ odjuwu sa, omẹgbanhon ri ha idjuwu na ni ne kpogho. 26 Aye ni na mẹrẹn Ọmọ onyakpọ na rọ sa uvuẹn avwre na rhẹ omẹgbanhon rode kugbe odidi. 27 No no dje emakashe enẹyen ye koko ihworho ra djẹha riẹn na, nẹ igogo ẹne akpọ na ọrhẹ nẹ ẹta otọrakpọ na ye fiẹ ẹta idjuwu na.

28 “Vwana, are i yono nẹ udje ọnana ro sekpahen orhan ifigi na: Ogege eghọn yen eboban i rhe mwu phia ji kwrọ ẹbe rhọ ne, are ne rhe taghene ọke uvo o tiẹkẹrẹ ne. 29 Omaran ọ ji havwọ, are arha mẹrẹn ekwakwa enana ra phia ne, are i gbe rhe taghene Ọmọ onyakpọ na o tikẹrẹ anurẹsẹ na ne. 30 Itiọrurhomẹmro mia ta rẹn are taghene uvwiẹ ọnana ọ nyavrẹ-ẹn, jokpanẹ ọsoso ekwakwa enana i phiare vwẹre. 31 Odjuwu ọrhẹ otọrakpọ na ina nyavrẹn, ọrẹn ẹmro mẹ i sefughwẹ dẹ-ẹ.

32 “Sekpahen ẹdẹ ọrana yanghene unọke na, o vwo ohworho owuorowu ro rherie-e. Emakashe ri ha odjuwu na yanghene Ọmọ na e rheyi-i, jokpanẹ Ọsẹ na ọvo. 33 Are i gbẹro rhotọre, are i rha dẹrẹ, fọkime are e rhe ọke re bruru na-a. 34 Ọ họhọ ọhworhare rọ nyaji oghwa ye vwo riẹ ẹkwotọre ọrọrọ. Bọmọke ọ ki nyarhẹn, nọ ha omẹgbanhon rẹn evrẹn yen ji ghalẹ owian rẹn aye owuowọnwan, no jurhi rẹn ọrọ dẹrẹ anurẹsẹ na nọ rhọ dẹrẹ. 35 Omarana, are i rha dẹrẹ, fọkime are e rhe sẹ onini oghwa na ọnọ rhiọ owuọwọn yanghene erhẹrhẹ ason, yanghene igidurhiọke yanghene bọmọke ọke ono ki rhie-e. 36 Neneyo ọrhọ rhe kpregede, nọ jọ rhọ vwa are ra merhẹn. 37 Ọrẹn, oborẹ mia ta rẹn are na, mia ji ta ye rẹn ihworho ephian: Are i rha dẹrẹ.”