ONO 3
Marhẹ Mi Ne Ru Sabu Tẹmro rẹn Eri Vwiẹre Mẹ?
ME ỌYẸ WU NE RU?
Roro kpahen erhirhiẹ ọnana: Ason i Wẹnẹsde, Geoff ẹgbukpe 17, o ru owian oghwa hin ne, ọ jeghwai mwuegbe ọnọ ha ọke ọrẹ ọhẹrhẹre e romoma! Nọ ha ekpeti-ughe tu, no se bru aga rọ mai je yi.
Ọke ọrana, Ọsẹ ye no mevi anurẹsẹ, Oma ọmerhiẹ-ẹn.
‘Geoffrey! Mesoriẹ we kpọke ni ekpeti-ughe, ukperẹ wu na ha userhumu rẹn omizuo ọkokamu ruẹ ihomwọk ọnẹyen? Wu we ru oborẹ a ta
a wẹn dẹ-ẹ!’
‘Wu rha rhe ne,’ Geoff nọ gon phia rhẹ uphele ro rierun.
Ọsẹ ye nọ nya brie. ‘Me wu tare, ibidama na?’
Geoff no kwẹhẹn, nọ tare, ‘emru-u, Papa,’ no rianro.
Evwan o vi biomu ọsẹ ye ne. ‘Wa ha uphele ọrana tẹmro mẹ-ẹ!’ nọ ta riẹn rhẹ uphele ọgbogbanhon.
Orhianẹ wẹwẹ yi Geoff, marhẹ wu ne ru sabu kẹnoma rẹn aruẹ erhirhiẹ ọnana?
ZIKẸN NE WU RORO!
Wa rha tẹmro rhẹ eri vwiẹ ruọ, ọ họhọ imoto ẹ ghwa. Orhianẹ wu mẹrẹn ọgbanrhọ uvuẹn izede, wu na sabu guọlọ izede ọrọrọ.
JERẸ UDJE:
‘Ọ bẹn mẹ mi na tẹmro rhẹ ọsẹ mẹ,’ omaran ọgbọtọ re se Leah ọ tare. “Ọkezẹko mia tẹmro riẹn ibiọke, orhoru nọ ta, ‘Wa ghwọ-ọ, mẹmẹ wa tẹmro riẹn?’”
LEAH O VWO ODJẸ ESA.
Van ghwu ọsẹ ye.
Leah nẹ ọnọ van, ‘me vwo, Kerhọ! Oborẹ mia ta na ọghoghanren!’
Dobọ ẹmro ẹta rẹn ọsẹ ye ji.
Leah ọnọ kpare iroro vrẹn obẹnbẹn rọ guọlọ ta rẹn ọsẹ ye na.
Hẹrhẹ ọke ro fori, nọ rharhumu ha ẹmro na phia.
Leah no siyẹ tẹmro rhẹ ọse ye, yanghene ya ileta vwe ọsẹ ye kpahen obẹnbẹn na.
Ọgo wu na ta rẹn i Leah nọ djẹ?
RORO KPAHEN ỌNANA: Ẹhẹn ọsẹ i Leah ọ ha ekete ọrọrọ—omarana, o vwo rho ni ebẹnbẹn i Leah sua-a. Omarana, i Leah ọrhọ djẹ Odjẹ A, ọsẹ ye ọ vwọ sa mọ vwẹruọ oborẹ ọsoriẹ ọ va-an. Odjẹ ọnana o vwo so mwu ọsẹ i Leah kerhọ ẹmro rọ ta-a, ọ jeghwai dje ọghọ harẹn ọsẹ ye-e. (Ephesians 6:2) Omarana, odjẹ ọnana o vwo erere owuorowu-u.
Jerẹ oborẹ wu na ja lẹrhẹ ọgbanrhọ rọ ha uvuẹn izede rhiẹ egbobọse, omaran wu na sabu guọlọ izede wu na ha ruẹ eri vwiẹ ruọ
Odjẹ B ọnọ sabu rhiẹ ọrẹ ọ mai phẹrẹ, ọrẹn o dje ẹghwanren phia-a. Mesoriẹ? Nime nọ sabu fi ebẹnbẹn yen kparobọ, o fori ni Leah ọ ta rẹn ọsẹ ye orhianẹ ọsẹ ye—ọnọ sabu sa ye erhumu, o ji fo no rhe oborẹ ọ phia uvuẹn akpenyerẹn i Leah. Omarana, ẹmro ẹta nọ yẹ oborẹ ọ mai fo.
Rhẹ Odjẹ C, Leah ọ lẹrhẹ obẹnbẹn ọnana fi ọgbanrhọ rhẹ omẹdamu rọ nọ tẹmro rẹn ọsẹ ye-e. Ukpomaran, nọ damoma rọ nọ ha ẹmro na phia ọke ọrọrọ. Ọ rhọ djẹ odjẹ rọ nọ ya ileta vwe ọsẹ ye, oma ọnọ sabu merhen Leah ogege.
Ileta ẹ ya ọnọ sabu sa ye erhumu roro kpahen oborẹ ọ guọlọ ta. Ọke rẹ ọsẹ ye orho se ileta na, ọsẹ Leah nẹ ono rhe oborẹ ọye ọ guọlọ ta riẹn, rọ nọ sa ye erhumu dabu rhe ebẹnbẹn i Leah. Omarana, odjẹ C ọ rhua erere vwe i Leah ọrhẹ ọsẹ ye. Sẹ aye e siyẹ tẹmro kugbe yanghene nyoma ileta, odjẹ ọnana o lele oborẹ i Baibol na ọ tare ‘guọlọ ekwakwa ra rhua ufuoma sa.’—Romans 14:19.
Odjẹ erọrọ ego yẹ i Leah ọnọ sabu djẹ?
Nie sẹ wu na sabu roro kpahen owu, ne wu ya ye rhẹ obotọre na. Gba ya oborẹ ono nẹ erhumu odjẹ ọrana rhe.
TA OBORẸ ỌGHINI HA UVUẸN ẸHẸN ỌNỌ
Karorhọ, oborẹ wu tare ọrhẹ oborẹ eri vwiẹ ruọ i rorori i vwe rhiẹ owu ọke ephia-an.
JERẸ UDJE:
Eri vwiẹ ruọ ina sabu nọ oborẹ ọsoriẹ we mwughwarorhọ. Wu na sabu ta, ‘Mia guọlọ ta kpahiẹ-ẹn.’
Ọrẹn oborẹ eri vwiẹ ruọ erhon yẹ: ‘Mia hẹroso are te mi na ta obẹnbẹn mẹ rẹn are-e. Mi na ta rẹn igbehian mẹ kpahen obẹnbẹn na, rhẹ are-e.’
Gbe rorie taghene wa dẹrughwaroghwu obẹnbẹn ọrẹn eri vwiẹ ruọ na guọlọ sa erhumu. Wu rha ta: ‘Are vwe kpokpo oma-a. Mi na sabu hẹrote yi.’
Me yẹ eri vwiẹ ruọ ina sabu rhon?
Me yẹ omamọ ẹkpahenrhọ wu na sabu haphia?