Osolobrugwẹ ọ ma Ọhworhare Ọrhẹ Ọmase Ọrukaro na

Jehova nọ kwaphiẹ ogba orhorhomu rhọ uvuẹn ekete re se Eden. Ogba na ọ vuọnren rhẹ idodo, erhan ọrhẹ eranmo. Osolobrugwẹ nọ ha eyẹn ma Adam ro rhiẹ ọhworhare ọrukaro na, nọ jeghwai mwuẹhẹn rhọ ye irhuen. Wu rhe oborẹ ọ phiare? Ọhworhare na no nyerẹn! Jehova nọ ta rẹn Adam nọ hẹrote ogba na, nọ jeghwai mwu odẹ harẹn eranmo na ephian.

Jehova nọ ha urhi ọghoghanren rẹn Adam. Nọ ta rẹn Adam: ‘Wu na sabu riẹ emamọ ri ha uvuẹn erhan na ephian, jokpanẹ omamọ orhan oghẹnrensan owu. Wu rha riẹ omamọ ọrana, wu ne hwuo.’

Ọke oru, Jehova nọ tare: ‘Mi na ma ohworho rọ nọ ha userhumu rẹn Adam.’ Osolobrugwẹ no ru Adam nọ merhẹn omerhẹn okokodo, nọ ha edadefẹn Adam owu ma ane hariẹn. Odẹ ọmase na Eve. Adam ọrhẹ Eve yẹ ekrun ọrukaro na. Marhẹ oma o ru Adam kpahen ane ra ma riẹn na? Oma ọ merhen Adam omamọ, nọ tare: ‘Nughe oborẹ i Jehova ọ ha edadefẹn mẹ ma! Ọnana ohworho rọ họhere mẹ.’

Jehova nọ ta rẹn Adam ọrhẹ Eve nẹ aye i vwiẹ emọ vuọn otọrakpọ na. Ọ guọlọre nẹ aye i wian kugbe neneyo akpọ na ephian o rhiẹ i Paradais, yanghene ekete ro rhomurun omamọ, jerẹ oborẹ ogba Eden ọ havwọ. Ọrẹn, orhiẹ omaran yẹ ekwakwa i havwọ inyenana-a. Mesoriẹ? Jene yono kpahiẹn uvuẹn urhomu-ẹmro rọ ha kpahen ọnana.