Oghwa Ọduado i Babel

Ọke ukude na o ku hin, emẹse rẹ emọ i Noah i rọnmọren ni vwiẹ emọ buebun rẹn aye. Ekrun aye nọ doro omamọ, aye na jeghwai kerabọ lele akpọ na, jerẹ oborẹ i Jehova ọ ta rẹn aye nẹ aye i ru.

Ọrẹn, ihworho ezẹko a huvwele i Jehova-a. Aye na ta: ‘Jenẹ a bọn amwa ne rhirhiẹ aran. Ọwan ina bọn oghwa ro no rhi te odjuwu na. Ọwan ni ne titi.’

Oma ọ merhen i Jehova kpahen oborẹ ihworho na e ruẹ na-a, omarana, no brorhiẹn rọ nọ da aye obọ ji. Wu rhe izede ro ruẹ ọnana? Jehova no rurie nẹ ihworho na i djẹ edjadjẹ sansan. Ra mẹriẹn taghene aye i vwa rha sabu vwẹruọ owuowọnwa-an, aye ni dobọ owian ebanbọn na ji. Ne se amwa rẹ aye a bọn bi na Babel, ro mevirhọ “otighri.” Ihworho ni riẹ ekete erọrọ ye rhirhiẹ uvuẹn otọrakpọ na. Ọrẹn, aye ne ji ruẹ ekwakwa ibiobiomu uvuẹn ekete aye i nyaren na. O ji vwo ihworho ri vwo ẹguọlọ kpahen i Jehova? Jene yono kpahiẹn uvuẹn urhomu-ẹmro rọ ha kpahen ọnana.