“Jenẹ Uvie ọnọ rhe”

Jehova no veri: ‘Orho vwo oviẹ, emiamo, ojẹriọ, yanghene uhwu-u. Mi ne hionron amioviẹ nẹ aye ẹro. Nẹ ana kpare iroro vrẹn ekwakwa ibiobiomu ephian.’

Jehova o fiẹ Adam ọrhẹ Eve rhẹ ogba Eden, nẹ aye i nyerẹn ọrẹ ufuoma ọrhẹ omamerhomẹ. Aye ine vwiẹ emọ vuọn otọrakpọ na, jeghwai ha ẹga vwe Osolobrugwẹ obẹ odjuwu. Adam ọrhẹ Eve ni tiẹn uvwele i Jehova, ọrẹn, ọhọre ọnẹyen o wene-e. Ọwan i yonorin uvuẹn ọbe ọnana taghene ọhọre Osolobrugwẹ ephian e te orugba. Uvie ọnẹyen ọnọ ha ebrurhọ vwe ihworho re rhirhiẹ otọrakpọ na, jerẹ oborẹ o ve rẹn Abraham.

Phẹrẹkpẹ, ana ghwọghọ Echu, ikpodje yi, ọrhẹ evwọkon na. Ihworho ephian uvuẹn akpọ na ni na ga i Jehova. Erhe kpomẹ yanghene hwuẹ-ẹ. Ukpomaran, ọwan ine vwo oma ọkpokpọ ọke ephian, ana jeghwai rha ghọghọ taghene ọwan e nyerẹn. Ọsoso akpọ na ephian ono rhiẹ i Paradais. Ihworho ephian ine vwo omamọ eghwa ọrhẹ obọdẹn emaren. Ihworho ni ne vwo uruemru esiri, aye i rhiẹ evwọkon yanghene ilogbozighi-i. Ọwan i zofẹn eranmo ra djoma-a, aye i ji zofẹn ọwa-an.

Oma ọnọ merhen ọwan omamọ ọke i Jehova ọnọ rhọmọ ihworho ri hwuru. Ọwan ine dede ihworho jerẹ Abel, Noah, Abraham, Sarah, Moses, Ruth, Esther ọrhẹ i David. Ọwan ephian ine vwobọrhọ owian re ne ruẹ akpọ na rhiẹ i Paradais. Omamọ ewian ine rhirhiẹ ye ọke ephian.

Jehova ọ guọlọre ne wu rhirhiẹ i Paradais. Ne wu ne rhe i Jehova ghwẹ oborẹ wu rherie te bi. Omarana, jene rhe tiẹ kẹrẹ i Jehova kẹdẹkẹdẹ ya ruẹ i bẹmẹde!