Uruemru Esiri rẹ Olele Kristi o Djephia Ukwọgbọ
UVUẸN amwa ọkokamo owu obẹ Gujarat uvuẹn India, ọsẹ ọhworhare owu re se i John o bromarhame uvwre ẹgbukpe 60 ri vrẹnren ne. John, imizie ehworhare ọrhẹ imizie emẹse awan isionrin kugbe izu aye, e riẹ ishọshi Catholic, omarana aye na kparehaso ọsẹ aye fọkiẹ ogame ọnẹyen.
Ẹdẹ owu, ọsẹ i John nọ tarẹn i John nọ ha ileta vwe omizu owu rọ ha ukoko yi. Ọrẹn, urhiọke ẹdẹ ọrana, John nọ kọn ififanbọ. Ọrẹn, nime ọ guọlọ huvwele ọsẹ ye, John nọ gba ififanbọ ro ji ghwe ọbara na, no zorhẹ ya ha ileta na vwe omizu na.
Ọke i John o te avwaye ane omizu na ro ji rhiẹ Oseri Jehova yọ ha ileta na. Omizu na nọ djokarhọ taghene i John ọ kon ififanbọ yen, nọ tare taghene ọnọ ha userhumu riẹn. Omizu ọmase na, nọ ha ekwakwa ro simi ora phia, no hionron ora na, nọ jeghwai gba ora na. Nọ dabu gbe iti ọdjedjẹre rẹn i John, ọrẹn, ọ tẹmro i Baibol riẹn bibiesuọn.
Ọrana nọ lẹrhẹ utuoma ri John o vwo kpahen Iseri Jehova riotọre, John nọ nọ omizu na sẹ i Jesu yẹ Osolobrugwẹ, nọ ji nọ omizu na sẹ o serhọ ra na nẹrhomo vwe i Mary, nime enọ eva na ye kpokpie ẹhẹn. Nime omizu na o yono edjadjẹ i John ro rhiẹ Gujarati, nọ sabu kpahenrhọ enọ yen nẹ i Baibol na rhe, nọ jeghwai yẹ ye ọbe na “This Good News of the Kingdom.”
Ọke oru, John no se ọbe na, nọ họhọre taghene o tu rhon iyẹnrẹn i Baibol na obọ. John no bru orherẹn ishọshi aye, nọ ji nọ yen enọ eva rọ nọ omizu na. Orherẹn na nọ tuekwẹre, nọ ha i Baibol fi John, nọ vanren: “Wu dẹriẹrhiẹ Echu ne! Ta mẹ ekete i Baibol rọ tare taghene Jesu rhẹ Osolobrugwẹ-ẹ. Ekete ọgo uvuẹn i Baibol na yọ tare taghene ọ sọre ra na ga Mary? Dje yi mẹ!” Uruemru orherẹn na o gbe i John unu, nọ ta rẹn orherẹn na, “Mi rha ghwẹrioma rhiẹ ishọshi na ghwomara-an.” John orho ghini ghwẹrioma-a!
John nọ tuẹn uyono i Baibol rhọ rhẹ Iseri Jehova, nọ tuẹn uyono ẹnya rhọ. Ọke oru, awọrọ uvuẹn ekrun i John, ni ji tuẹn uyono ẹnya rhọ. Inyenana, oka ri John ọ kọn ififanbọ ye na, ọ ji havwiẹ dedevwo ẹgbukpe 60 i vrẹn ne. Ọke ephian yọ karorhọ taghene ukwọgbọ rẹ Olele Kristi o dje uruemru esiri riẹn, yọ lẹrheriẹ tuẹn ogame urhomẹmro rhọ.—2 Cor. 6:4, 6.