Enọ Rẹ Otu Re Se Ẹbe Ọwan I Nọren

Iruemru ra hunute uvuẹn Galatians 5:22, 23 ọvo yẹ “omamọ ẹhẹn ọfuanfon na”?

Ekete i Baibol erana i hunute iruemru irhinrin ro fori nẹ Olele Kristi o djephia: “Omamọ ẹhẹn ọfuanfon na yẹ ẹguọlọ, aghọghọ, ufuoma, erhionrin, uruemru esiri, orhorhomu, esegburhomẹmro, uruemru dẹndẹn, ọrhẹ omerhesun.” Ọrẹn, o fo ne roro taghene iruemru erana ọvo yẹ ẹhẹn ọfuanfon Osolobrugwẹ ọnọ ha userhumu rẹn ọwan vwo-o.

Djokarhọ oborẹ ọnyikọ Paul ọ yare uvuẹn eghwẹmro ri vrẹnren na: “Ewian erẹ ugboma na . . . yẹ, ọfanrhiẹn, ijẹfuọn, uruemru jodojodo, emẹgọ, irueruo eda, eghrẹn, ozighi, omẹriọ, ekwẹre ọgbogbanhon, ẹhẹriẹ, oghalẹ, ẹko ẹga sansan, omẹriọ ọsọsọ, inyo ẹda vrẹn oma, akpẹriọ ri vrẹn ovwan ọrhẹ ekwakwa ri họhọ enana.” (Gal. 5:19-21) Manẹ ọnyikọ Paul ọ sabu hunute ekwakwa erọrọ ri na ji sabu rhiẹ “ewian erẹ ugboma na,” jerẹ era hunute uvuẹn Col. 3:5. Omaran ọ ji havwọ, ọke rọ hunute iruemru irhorhomu irhinrin hin, nọ tare: “Enana i rhe nie, orho vwo urhi ọrọrọ-ọ.” Omarana, Paul ọ vwọ hunute ọsoso iruemru irhorhomu ra na sabu vwo nyoma userhumu ẹhẹn ọfuanfon na-a.

Ọnana o fiotọre ọke arha ha omamọ ẹhẹn ọfuanfon na vwanvwọn oborẹ i Paul ọ ya vwe ukoko rọ ha Ephesus: “Omamọ ukpẹ na o surhobọmwu aruẹ orhorhomu ọrhẹ irueruo ọvwata ephian ọrhẹ urhomẹmro.” (Eph. 5:8, 9) Itiọrurhomẹmro, “orhorhomu,” uruemru ọsoso ọrhẹ urhomẹmro, i ha usuẹn “omamọ ukpẹ na,” ọrẹn aye i ji ha usuẹn “omamọ ẹhẹn ọfuanfon na.”

Paul ọ ji ta rẹn Timothy nọ “hatua irueruo ọvwata, irueruo ọ ga Osolobrugwẹ, esegburhomẹmro, ẹguọlọ, edirin ọrhẹ uruemru dẹndẹn,” nọyẹ iruemru irhorhomu erhan. (1 Tim. 6:11) Iruemru esa usuẹn enana (nọyẹ esegburhomẹmro, ẹguọlọ, ọrhẹ uruemru dẹndẹn) ya hunute ri ha usuẹn “omamọ ẹhẹn ọfuanfon na.” Ọrẹn, Timothy ọ ji guọlọ userhumu ẹhẹn ọfuanfon na nọ sabu vwo iruemru ere hẹrhẹre ra hunute na: irueruo ọvwata, irueruo ọ ga Osolobrugwẹ ọrhẹ edirin.—Haye vwanvwọn Colossians 3:12; 2 Peter 1:5-7.

Omarana, Galatians 5:22, 23 ọ hunute ọsoso iruemru irhorhomu rẹ Olele Kristi ono djephia-a. Ẹhẹn ọfuanfon Osolobrugwẹ ọnọ sabu ha userhumu rẹn ọwan vwo iruemru irhinrin ri rhiẹ “omamọ ẹhẹn ọfuanfon na.” Ọrẹn, o ji vwo iruemru erọrọ re ne ji vwo ọke ra dua te edje uvuẹn ogame i Jehova, ji “ku uruemru ọkpokpọ na rhọ ra maren lele ọhọre Osolobrugwẹ ọrẹ obọdẹn ọvwata ọrhẹ atamwu.”—Eph. 4:24.