Ra Harhomu Edandan re ru Vrẹn ne

Nyoma ọbara i Jesu ọvo rọ ha ruẹ izobo otan, ọyẹ ana sabu harhomu edandan ọwan. (Eph. 1:7) Ọrẹn, Baibol na ọ tare taghene: “Osolobrugwẹ o dje erhionrin phia ji harhomu edandan re ru vrẹn ne,” nọyẹ, edandan re ruru bọmọke i Jesu ọ ki ha arhọ ye ruẹ otan. (Rom. 3:​25, ekete ra djokarhọ) Marhẹ i Jehova ono ru ruẹ ọnana, ji rhiẹ Osolobrugwẹ ro brorhiẹn ọsoso?

Jehova o vive taghene ono tiobọnẹ “ọmọ” owu ro no simi ituakpọ ri vwo esegburhomẹmro kpahiẹn, ive ọrana ro veri nọ ghwai họhọ taghene o tiobọnẹ otan na ne. (Gen. 3:15; 22:18) Osolobrugwẹ o rheri taghene uvuẹn ọke ro serhọ, Ọmọyen owu ọvo ọnọ ha arhọ ye kpahontọre ruẹ otan. (Gal. 4:4; Heb. 10:​7-10) Ọke i Jesu ọ ji ha otọrakpọ na, o vwo omẹgbanhon rọ harhomu edandan ihworho bọmọke ọ ki ha arhọ ye ruẹ otan. O ruẹ ọnana fọkime o rheri taghene phẹrẹkpẹ ono ghini hwu, nọ kwosa edandan ihworho ri vwo esegburhomẹmro.—Matt. 9:​2-6.