Marhẹ Ugboma Usuon Na Ọ Wian Lele Inyenana?

Ẹgbukpe uzusiorin ọrẹ ukukaro, i biẹ otu ‘inyikọ rhẹ ekpako uvuẹn Jerusalem,’ e gare jerẹ ugboma usuon. Aye e brorhiẹn eghoghanren ro sekpahen ọsoso ukoko Ilelikristi rẹ a djẹ ha. (Acts 15:2) Ekwerhọ oborẹ i Baibol na ọtare rhẹ ọkpọvi ọrẹ ẹhẹn ọfuanfon Osolobrugwẹ, nẹ ọ lẹrhẹ aye brorhiẹn owu. (Acts 15:25) Omaran ọ je havwọ inyenana.

Osolobrugwẹ ọ ha aye ru ọhọre ọnẹyen. Imizu ra ha ẹhẹn ọfuanfon djẹ ha rẹ a ga uvuẹn Ugboma Usuon na, i vwo ọdamẹ ọgbogbanhon kpahen Ẹmro Osolobrugwẹ. Aye ji rhe kpahen oborẹ ana hẹrote owian na lele izede ọrẹ ugboma ọrhẹ ọrẹ ẹhẹn. Aye e koko kọkprughwre kọkprughwre nẹ aye tẹmro kpahen ọdamẹ Iseri Jehova uvuẹn akpọ na ephian. Jerẹ oborẹ ọhavwọ uvuẹn ẹgbukpe uzusiorin ọrẹ ukukaro, aye a ha iyono a bọn kpahen i Baibol phia nyoma ileta, yanghene iniruo okinhariẹ kugbe izede erọrọ. Ọnana nọ lẹrhẹ Iseri Jehova ephian vwo iroro owu, jeghwai ruẹ lele izede owu. (Acts 16:4, 5) Ugboma Usuon na ọ hẹrote ẹkwaphiẹrhọ emaren ọrẹ ẹhẹn. Ọ ha urhebro harẹn ọwan ephian nẹ a ha owian aghwoghwo-Uvie na karo, jeghwai hẹrote ẹhamwu imizu ehworhare rhẹ ẹrhẹ ohwan ẹkpare.

Ọ nyalele ọkpọvi ẹhẹn ọfuanfon ọrẹ Osolobrugwẹ. Ugboma Usuon na ọ hẹroso ọkpọvi ọrẹ i Jehova, Osun rọ Maido Kparobọ ọrhẹ i Jesu ro rhiẹ Urhomu harẹn ukoko na. (1 Corinthians 11:3; Ephesians 5:23) Erẹ e ha Ugboma Usuon i vwe nẹ oma aye jerẹ ere suẹn ihworho Osolobrugwẹ-ẹ. Aye rhẹ Ilelikristi a ha ẹhẹn ọfuanfon djẹ ha ephian, ‘a nyalele Ọmọ-ogegede na [Jesu] riẹ ekete rọ nyaren ephian.’ (Revelation 14:4) Ugboma Usuon na ovwo ọdaremẹro kpahen ẹrhomo ọwan a nẹ hariẹn.

• Ayọmọ yẹ ugboma usuon na uvuẹn ẹgbukpe uzusiorin ọrẹ ukukaro?

• Marhẹ Ugboma Usuon inyenana ọ nyalele ọkpọvi ọrẹ Osolobrugwẹ lele?